Job 6
6
Yóm kbalà Job ke Ilifas
1Yó bud udél Job monen, 2“Ke yó dum gbek tmimbang du yóm klangagu gomong du yóm hlayamu, 3déke mkay senta keblat helek mohin he. Ne yó se gónóhu tódô fà du mudél. 4Yóm gbunuu ni, hol lómón ke deng gentien o yóm Dwata alì gembek. Yóm alas yóm hanaken hol lómón ke deng lengeben gu lem lówóhu. Yóm kdê lan Dwata gel hmikò yó kem hohonen, gotu hegnómen do. 5Yóm kudà asnu kun, là kóen kemdél ke wen nótóben. Ne yóm safì, là kóen mudél ke wen mò kenen. 6Dalang se yóm tau, là kóen tmalaw ke wen kahien. Laen kô dù nómen yóm bukay bè ngà onuk ke là knahiem du. 7Laen dù óyóu mken du dou yóm ken lómón yó. Udì duen gónów là lemwól bè kehedemu du.
8Hyu nawahu ke blay Dwata dou yóm hnihu béléen, ne yóm nóyóu béléen. 9Mom hyu ne ke tódô hnatayen o duhen ke hukolen klowilu. 10Ke nmoen béléu yóm ni wen gónón hyu nawahu. Baluen ke deng tey ksidek yóm desu, là kô naw e hnalà du yóm kun udél yóm Dwata laen kô belenen. 11Okóm là gbeku bud hembala du ne yóm ni. Moen se ke mowile igoen laen dù bud nefet nawahu? 12Là kóen na a mkél bè botu yóm gelu. Là se kóen na a mkél bè tembaga futì yóm lówóhu. 13Bè ktahuhen, laen dù bud kgisu ne ni ne laen se dù gónóhu htóbóng.
14Bè nim tey gbunuu ni tey hyu ke wen kem weu hemyu nawaw, okóm kuy mom dnelem ye o. Bè nim nmò ye béléu ni laen kô dù klikò ye ke Dwata yóm Dwata alì gembek. 15,16Ó kem weu, là kô gsaligu kuy. Yóm gel ketgel ye do, hol lómón ke yu yóm él dmunuk gónó konul. 17Bede ke deng kinì kdaw mom kti yóm él yó, laen kô dù bud él tonem. 18Yó kem tau gel stodol mógów smakay kamél mlan bè yóm benwu là hyu menwu du, gel le mebel él mò ninum le bè yóm él mlel tehe ton le. Okóm bè yóm kkól le bè yó laen dù bud él ton le. Ne matay le bè yó bè yóm benwu là hyu menwu du lemwót bè yóm laen dù bud él mò ninum le. 19Dalang se yó kem tau stodol mógów lemwót gu bè Siba ne lemwót gu bè Tima, bud le slob mebel él se kul, 20okóm tódô le henà bè kilil yóm él deng kti. 21Yóm nmò ye béléu ni hol ye mkél bè yóm él deng kti tulónu yó koni, laen dù gónó ye tmóbóng do. Ton ye yóm deng gbunuu ne deng ye mom likò. 22Tedu se buten yóm klikò ye? Denge mni bélê ye kô anì bnasa ye o? Denge hkodu bélê ye kô bè yó kem kendengen ye anì benlay ye o mò lan ye tmóbóng do? 23Denge htóbóng bélê ye kô anì lenwà ye o lem tdok yó kem hohonu, duhen ke lenwà ye o lem tdok yó kem tau hemgnok do? Là gi.
24Duhen ni tolok ye do kun. Tulón ye do yóm salau. Hnungolu yu là kóe mudél. 25Móyóe hmungol du yóm ktahuhen baluen ke des béléu. Okóm yó kem udél ye dmelem yó hono udél laen dù lemen. 26Lemwót bè yóm là khungol ye du yóm dou udél, yóm udél yóm tau laen dù bud nefet nawahen, là kóen na a gemseb se yóm kuy udél ebéléu. 27Okóm yóm kuy kmò, balù ngà hikit sana kmò ye du hesek. Ne balù wè ye sana kehbalù ye du. 28Temngel ye ebéléu dé. Là kô gbeku du dou mò kéng. 29Geblaen ne yóm kdelem ye dou kéng, yakà tedeng yóm dou nmò. Bê ye abay bud dnelem o. 30Bè kehedem ye dou, ofo kuy mon du ke moe kéng okóm là. Ofo kuy ke là dilóu du yóm tedeng ne yóm là tedengen, igou dmilô du.”
Là gomongen bè nili yóm tsaptér 7 efet kól bè tsaptér 13. Yó tulónen bè tsaptér 7 yóm sfu yóm udél Job ebè Ilifas ne yóm tey ktalaw Job ebè Dwata.
Yó tulónen bè tsaptér 8 yóm tanay udél Bildad ebè Job ne bè tsaptér 9 ne 10 yóm kbalà Job ke Bildad ne yóm bud ktalaw Job ebè Dwata.
Yó tulónen bè tsaptér 11 yóm udél Sufar ebè Job ne bè tsaptér 12 ne 13 yóm bud kbalà Job ke Sufar ne yóm tey bud ktalaw Job ebè Dwata.
Currently Selected:
Job 6: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
