Jirimaya 6
6
Là gomongen bè nili yóm bérs 1 kól bè bérs 9. Yó tulónen bè ni kem bérs ni yóm eles kehtugod Dwata du ke Jirimaya yóm hol són hetgamahen yó kem tau bè Jirusalim. Yó gónó Dwata eles tmulón du kul nim ni anì wen lan le hegsel yó kem tauhen. Deng tey moni bè Jirusalim ne yó kem sendalù gmida kul, hol lómón ke deng ton Jirimaya yóm angat nmò le bè yóm kkól le bè yó. Gotu tonen yóm kmò kegbà le yóm beng hmilol Jirusalim. Dwata se hmò du kul yóm nmò le yó lemwót bè yó kem sidek alì gel nmò yó kem tauhen.
Ktafak Dwata yó kem tau là mimón du
10“Ke eles tulónu kul nim udélem ni,” mon Jirimaya mò ke Dwata, “tau du se hmungol dou? Deng henseng le klingu le, là kô hnungol le du yóm udél htugodem dou, deng mom knuli le. Balù udì ke wen óyô le hmungol du. 11Yóm kebutem kul, Dwata bud gnómu snéen dou, là gbeku du ke là benkasu du bélê le.”
Ne yó bud udél Dwata ebéléu, monen, “Gotu sulék kokem eta yó kem tau bè Jirusalim yóm tey kebutu kul, balù yó kem ngà le là mdengen bè lan, dalang se yó kem logi lomi lemnok tolo sbung, kkólen bè yó kem tau syehen ne yó kem tuha bélê le, gotu sulék kokem eta le. 12Angat gotu hledu kem hohon le yó kem gónô le ne yó kem tonok gónó le mò hulu. Balù yehen le gotu hwahu yó kem hohon le. Yó gónón lómón yó nmou bélê le, yakà gotu tnafaku kul yó kem tau lem nim benwu ni,” mon Dwata.
13“Tódô lenwóten bè yó kem tau leneken kkólen bè yó kem tau lebangen, gel snukat le kem dumu le, nwa le yóm là kul du. Balù yó kem dumu tugodu ne yó kem tau blóng ebéléu, bud yó se kul nmò. 14Yó kem dou tau tey sidek khalì le, yóm halì là bud lowil le du. Yó nmò yó kem tau smukat yó, wen ngà bulung lunol le tahen, okóm là kóen mkó du. 15Kenyak le kô nim sidek nmò le ni? Là. Là kô kenyak le du, balù udì ke ton bélê le ke wen kyak le. Yó gónóm mon, angat le gotu mung masà lem blóng yó kem tau matay bè gida. Gotu le matay ke deng tnafaku lu mlan bè kebutu,” mon yóm sana Dwata hol gónó mogot.
Kekbê yó kem tau Israél du yóm kun kóyô Dwata
16Yó udél Dwata ebè yó kem tauhen, monen, “Mdà ye bè yóm gónón sesyat lan. Hnebel ye yóm lan deng legen, yóm lan hol tahu duhen ne yó lolò ye. Bè yóm klolò ye du yóm lan yó, bè yó gónón menek kegnóm ye du. Okóm deng mom yó balà ye dou, mon ye, ‘Là. Là yó du yóm lan nóyô me.’ 17Deng tehe wen kem tau néléku mò mentey kuy. Yó udél le ebélê ye, ‘Angat wen uni féw gungol ye mò eles gónó ye temgama. Hol hnungol ye.’ Okóm mom yó balà ye kul, mon ye, ‘Là. Là kô me móyô hmungol du.’
18Yó gónóm mon yu yóm kdê kay but tau bè klamangen benwu, hol hnungol ye se kuy nim ni. Hol hnénég ye yóm angat gefet bè yó kem tauhu. 19Ó Tonok, hmungoli se kóm. Angat wen heglumfaku kul ni kem tau ni, ulék yóm sidek tendo gel nmò le, abay se là bud hnungol le dou ne kenbê le yóm deng hlolou kul. 20Tedu de muhu du yóm insinsu lemwót bè benwu Siba, yóm gel ntem ye mò hboo ye ebéléu? Ne yó kem dumu alì mebtes tilob boohen lemwót bè benwu mayuk, tedu de muhu du? Yóm dsù gel hkekeb ye ebéléu là kóe móyô du. Yó kem dumu gel dsù ye, là kóe na a hligal du.”
21Yó gónóm mon ni se udélen ebélê ye yóm sana Dwata hol gónó mogot, monen, “Wen suu bè lan le ni kem tauhu ni anì gotu le tlokob du, tau smà ne tau sngà, dalang se yó kem tau sebét ne yó kem tau swè, gotu le tlokob ne hlós le matay.”
Yó kem tau mundug kul lemwót bè yóm benwu fi bwak
22Yó udél yóm sana Dwata hol gónó mogot, monen, “Tenngel ye dé, wen kem tey sendalù wen lemwót bè yóm benwu fi bwak. Wen tey benwu mfasang lemwót bè hol són tonok angat gmida kuy. 23Deng le eles mit boho ne sudeng. Tey le lóbô balù udì ke wen kodu le. Bè yóm kehlóy le yó kem kudà le bè yóm na le e kundug edini, ya tey lungkul le lómón lungkul lewók mohin. Ó kem tau bè Jirusalim, deng le eles htigel bè yóm keglà le kuy.”
24Yó udél yó kem tau bè Jirusalim, mon le, “Wen tulón gungol me gbak bè kmò yó kem hohon me. Bè yóm kungol me du botong lana bélê me kgis me. Ya tey sidek klikò me lelen yó he tey sidek kdesen bélê me, lómón kdes yóm libun kmuleng blututen. 25Hol bê tekuy abay mógów ebè yó kem tonok gónó tekuy mò hulu. Dalang se ebè yó kem lan, bê tekuy abay mlan edu, abay se deng le eles nô bè klamangen yó kem hohon tekuy. Deng le eles htigel hmatay kut. Balù kihu gónó tekuy nô, sana tendo sidek klikò tekuy.” 26Yó udél Dwata ebè yó kem tauhen, monen, “Lemsek ye nes sakù ne ma ye kohù mò gónó ye hluy. Hol ye dmumu mkik lómón ke deng matay yóm tek sotu ngà ye logi, yakà móyónen sut yó kem tau kemtut mundug kuy.
27Ó Jirimaya, lómón ke uu yóm tau temwél hulung mélék du yóm hyu mò tenwélen. Tenwélem lu yó kem dou tau, hnénégem yóm mò kmò le. 28Tódô kdê le gotu kmogol do kem tau hensidek le boluy kem dumu le. Tey mgel kulu le lómó kgelen bala tók, lelen mahil bélê le mit kem dumu le mò sidek. 29Ke tô tenwélem lu, balù nô kehedfohem du yóm lubónen anì hol kinì yóm ofihen, ewenem sana tolo kwen kê fak le. Laen kô dù muhen yóm ofi yó bè yó kem dou tau, abay se laen dù tahu duhen nô bélê le. Hono wen belen le. 30Yó boluyu kul, ‘Blówón Bukay Kenbê’ abay se ou yóm sana Dwata hol gónó mogot kembê kul.”
Currently Selected:
Jirimaya 6: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
