Jirimaya 35
35
Yó kem sfu Rikab
1Bè yóm kun kkamal bè Juda Jihuyakim yóm ngà Jusaya logi, wen udél Dwata ebè Jirimaya, monen, 2“Mógówi etu bè kem sfu Rikab nam e tinok lu ebè yóm dou Gónô. Nwitem lu elem yóm sotu dfél bè yó ne benlayem lu tifas grép mò ninum le.”
3Tahu se, mógówe ebè yó kem sfu Rikab bè le Jaasaniya yóm ngà yóm sotu Jirimaya logi ne témê Habasinaya ne ebè kdê yó kem dumuhen setwoli logi ne ebè kem ngaen logi. 4Nwitu lu elem Gónô Dwata bè yóm dfél gónó le mò nmò yó kem ngà Hanan logi, yóm Hanan ngà Igdalaya logi yóm tau Dwata. Nim dfél ni, klohok yóm dfél gónó le gel stifun yó kem genlal yóm tau hol geta, hol nô ta yóm dfél gónón mò nmò Maasiya yóm ngà Syalum yóm tau gel mentey bè bak tikeb yóm Gónô Dwata.
5Ominu hemyón lem blóng le yó kem basù ne yóm lebwón gónón nô tifas grép ne nbalu lu, monu, “Minum tekuy.” 6Okóm yó balà le dou, mon le, “Hol hnifótem mi, là minum me tifas grép se kum, abay se yóm fù me Jihunadab ngà Rikab deng monen mò kum, ‘Hol bê ye abay minum tifas grép se kuy. 7Ne bê ye se abay hdà gónô. Bê ye abay mò hulu ne mulu grép. Són bè kamfù gónó ye nô se kuy. Ke lolò ye nim hlolou kuy ni, angat tahà ktau ye ta nim tonok ni lelen hyu klowil ye.’ 8Tahu se, tódô lolò me yóm kdê hloloen kum. Lemwót bè kbuten là kô me minum tifas grép. Balù yehen me ne kem ngà me logi ne kem ngà me libun, là kô le na a minum tifas grép. 9Là kô me se hdà gónô ne mulu grép ne mò hulu. 10Tódô me nô bè kamfù, nimón me yóm kdê deng hloloen kum Jihunadab yóm tehe fù me. 11Okóm bè yóm kegdofien bè ni Nibukadnisar yóm tau hol geta bè Babilun, tey klikò me bè yó kem sendalù Babilun ne bè yó kem sendalù Aramiyan. Ne ni se gónó me mili ebè ni bè Jirusalim.”
12Ominen yó wen bud udél Dwata ebè Jirimaya, monen, 13“Ni se udél yóm Dwata laen dù là gbeken du, yóm Dwata yó kem tau Israél, monen, Holi mógów ebè yó kem tau bè Juda ne bè Jirusalim, monem mò kul, ‘Ngem wen dnalang ye bè yóm là kimón ye dou. 14Yó kem sfu Rikab là kô le minum tifas grép, abay se deng monen mò kul yóm fù le Jihunadab hol bê le abay minum. Okóm dou, tendo sensulit tulónu kuy ne là kô hnungol ye dou. 15Són moen wen kem tugodu hógówu elem blóng ye anì hol tebel ye yó kem sidek gel nmò ye ne tenflok ye tmaba ebè yó kem dwata kéng anì menek klowil ye ta yóm tonok blayu kuy dalang se bè yó kem tehe fù ye. Okóm là kô hnungol ye dou ne là se kô nimón ye do. 16Yó kem semfu gu bè Rikab, tey kimón le yóm tehe fù le. Okóm kuy, là kô hnungol ye dou.’
17Yó gónóm mon, ni se udél yóm Dwata laen dù là gbeken du, yóm Dwata yó kem tau Israél, monen, Lemwót bè yóm là kóyô ye hmungol dou ke tnabahu yu, tenbóhu eta yó kem tau bè Juda ne eta yó kem tau bè Jirusalim kdê yó kem hlayam deng eles bantaku kul.”
18Ominen wen tulón Jirimaya bè yó kem sfu Rikab, monen, “Ni se udél yóm Dwata laen dù là gbeken du yóm Dwata yó kem tau Israél, monen, Deng tey tilob kimón ye du yóm fù ye Jihunadab, gotu lolò ye yóm kdê hloloen kuy. 19Lemwót bè nim kimón ye ni, sónmoen tendo wen bélê ye lemwót bè sfu Jihunadab yóm ngà Rikab logi, gel setles mò nmò béléu. Ou se yóm Dwata laen dù là gbeken du, yóm Dwata yó kem tau Israél, nim mudél ni.”
Currently Selected:
Jirimaya 35: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
