Jirimaya 30
30
Yóm fasad Dwata yó kem tauhen
1Yó bud udél Dwata ebè Jirimaya, monen, 2“Ni se udél Dwata yóm kuy Dwata yó kem tau Israél, Ó Jirimaya, gotu snulatem yóm kdê deng tulónu kóm. 3Abay se angat wen kdawen bud kehguléku klowil le yó kem dou tau bè Israél ne bè Juda. Bud nwitu lu semfulék eta yóm tonok tehe blayu yó kem tehe fù le ne angat kul yóm tonok ni bud le nô tahen. Ou se Dwata nim mudél ni.”
4Yó udél Dwata ebè yó kem tau bè Israél ne bè Juda, monen, 5“Wen gungolu tey dmumu mkik, hol kik gónó likò. 6Okóm wen snólóku bélê ye. Wen kô logi mngà? Moen se ke tey dê tonu kem logi hfiles nogot le blutut le lómón ke libun kmuleng blututen? 7Móyónen kól ne yóm kdawen wen tey glumfak, kdaw laen dù bud gónóm e hmingón du, kdaw le hol glayam yó kem dou tau Israél, okóm bè hol sónen gewà le.”
8Yó bud udél yóm Dwata laen dù là gbeken du, monen, “Bè yóm kdaw yó gotu tenfoku yóm yok nô bè lihol yó kem dou tau ne gotu lenkasu yóm kdina fét le. Là kô le bud ghesek bè yó kem tólóng tau. 9Yakà ou du ne lolò le yóm sana kul Dwata hol gónó mogot ne sfu Dabid yóm angat geta bélê le yóm tau deng néléku.
10Ó kem dou tau, hol bê ye abay hlikò. Kem tau Israél, hol bê ye abay htafa nawa ye. Yakà bud nitu kuy semfulék ebè benwu ye gu bè yó kem tey benwu mayuk. Yó kem ngà ye, tebel le ne yóm benwu gónó le e megef kul. Angat le semfulék yó kem tau Israél ne angat menek kbenwu le ne laen kô dù bud knikò le. 11Yakà tendohe nô bélê ye naw e lenwà yu. Gotu genlau yó kem benwu deng gónów e semkla kuy. Okóm yó dum kuy là kô genlau kuy. Bede là kô gbeku du ke là tnafaku kuy. Là kô lugunu kuy là tnafak,” mon Dwata.
12Yó bud udél Dwata ebè yó kem tauhen, monen, “Yóm halì ye là kô gbek bnulung du, tey halì sidek. 13Ne laen kô dù na a tmóbóng kuy bmaus du. Laen kô dù bulung gembek hkó du. 14Kdê yó kem wè ye tô tmóbóng kuy gotu sentagak le yu, là kô bud kenmón le kuy. Tey sidek yóm khaliu kuy lómón ke hol hohonu yu, abay se tey deng wen ne yó kem salà ye ne tey bong yóm nô ta ye. 15Bê ye abay bud tnalaw ne yóm halì ye, yóm halì là gbek bulung du. Yó gónów tmafak kuy lómón ni, abay se deng tey wen ne yó kem salà ye ne tey sidek kbongen yóm nô ta ye.
16Okóm bè yóm kdaw kwitu kuy semfulék yó, kdê yó kem tau gemlà kuy bud wen gemlà kul se kul. Kdê yó kem hohon ye bud wen se megef kul. Kdê yó kem tau muku kimu ye, bud wen se muku kimu bélê le. Kdê yó kem tau mundug kuy, bud wen se mundug kul. 17Angat bud hen-guléku klówó ye, hkóhu bélê ye yó kem halì ye, mon Dwata.
Ni kmoen ni, kem tau bè Jirusalim, gel taba le kuy kem tau bayà, abay se laen dù bud kemmón kuy.” 18Okóm yó udél Dwata, monen, “Bè yóm kwitu kuy semfulék gu bè yóm benwu deng gónó le megef kuy yó naw e bud kehgulék klowil ye, bud hdau snéen yóm syudad Jirusalim bè yóm sana gónóhen seblà, balù yóm tey kegbaen. Dalang se yóm gónô bong yóm tau hol geta bélê ye, bud hdau hol mkél bè yóm gnan. 19Yó kem tau angat bud nô lem Jirusalim, tey kesngal le dmóyón do, tey kehligal le mensag. Tey kehbólu kul yó kem dou tau, henbalingu lu sotu benwu tótól ne benwu nadat. 20Yó kem ngà le tey kehyu klowil le lómón yóm gnan ekni. Bud hbegelu yóm benwu le bè soluhu ne angat tnafaku yó kem tau hemsidek kul. 21Yóm tau malak kul lemwót bè kul kwen, là kô tólóng tau du. Tinoku yóm tau yó anì hloni ebéléu, mon Dwata. Ke là lemwóten bè yóm ktinoku du, laen kô dù tau mlos hloni ebéléu. 22Bè yóm kdaw yó, yu se mò dou tau ne ou se mò kuy Dwata.”
23“Ngem yóm kebut Dwata hol lómón ke mbel yóm tey lenos, tnódóen kulu yó kem tau mò sidek. 24Yóm alì kebut Dwata yó, là kóen teflok efet deng gotu deng yóm kdê atulen. Angat kól yóm kdawen gotu getnef ye kdê yó kem monu ni.”
Currently Selected:
Jirimaya 30: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
