Jirimaya 24
24
Yóm lewu kay bungu fig hton Dwata bè Jirimaya
1Kogol yóm deng kegef Nibukadnisar bè Babilun ke Jihuyakin yóm ngà yóm tehe Jihuyakim bè Juda, mung du yó kem genlalen ne yóm kdê tau wen kenhulung tdok le, wen hton Dwata béléu. Yó tonu wen lewu abì hnok fig myón bè lewà yóm Gónô Dwata bè Jirusalim. 2Yóm sotu abì tonu tódô hnok fig mélél lemen. Okóm yóm sotuhen hono bolok yóm fig nô lemen, là bud hyu mken du.
3Yó udél Dwata ebéléu, monen, “Tedu se tonem du, Jirimaya?”
Bnalau se monu, “Bungu fig. Wen se hyu mken du ne wen se là hyuhen.”
4Ominen wen udél Dwata ebéléu, monen, 5“Ni se udél Dwata yóm Dwata yó kem tau Israél. Yó kem fig hyu tonem hnigaden yó kem tau Juda deng negef le ebè Babilun. 6Yóm khegefu kul, kul kehyu. Angat tendo tnanudu lu ditu ne angat bud nwitu lu semfulék edini. Bè yóm bud kehesfuléku kul edini bud hdau lu, là kô naw e hnugón kul. Lómón ke bud huluhu lu, là kô naw e kendut kul. 7Angat wen nawa hyu blayu kul anì hol dilô le ou yóm sana kul Dwata hol gónó mogot. Angat bud lu se dou tau ne bud ou se kul Dwata, abay se hol lemwót bè nawa le yóm bud kesfulék le ebéléu.
8Okóm yó kem fig bolok hnigaden Sidikaya bè Juda ne yó kem genlalen, ne kdê yó kem tau dù tebel bè Jirusalim ne yó kem dumu tau mlóy etu ebè Idyip. Lómón kmou kul lómón yó kem bungu fig bolok là bud hyu mken kul. 9Angat tey wen hlayam hwitu elem blóng le. Ne kdê yó kem dumu tau bè klamangen benwu, angat le gotu likò bè yóm kton le kul. Balù kihu benwu gónów e hógów kul, laen kô dù tau bud madat kul. Angat sendekà le lu ne senkbê le lu ne tendo henmulà le lu. 10Wen gida hwitu elem blóng le mung du yóm tey bitil bong, lelen wen des leed hgefetu ebélê le. Yó se nmou bélê le efet le gotu lana bè tonok Israél, yóm tonok tehe blayu kul hlanu bè yó kem fù le.”
Currently Selected:
Jirimaya 24: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
