Isaya 8
8
Yóm boluy yóm ngà Isaya logi mò ilô bè yó kem tau
1Yó udél Dwata ebéléu, monen, “Mahi yóm mò gónóm smulat, bede yóm bong. Yó kmò ksulatem du hebangem, monem, ‘Mebetik ma, metlasik megef.’ 2Mahi lewu tau snaligem mò gemtanud du yóm nmoem. Yó nwahem, yóm tau demsù bè Dwata boluyen Yuraya ne Sikaraya ngà Jebirikaya.”
3Kogolen bè yó mlutut yehenu. Bè yóm kdaw ksut yóm ngà me logi yó udél Dwata ebéléu, monen, “Yó boluyem du yóm ngaem yó ‘Mebetik ma, metlasik megef.’ 4Gu laanen là deng hulung tmaba ‘yê’ ne ‘mà’ yóm ngà ye, lemwót yóm tau hol geta bè Asirya gotu negefen yó kem kendengen yó kem tau bè Damaskus ne yó kem kendengen yó kem tau bè Samarya.”
Yóm móyón kkól yóm tau hol geta bè Asirya
5Bud mon Dwata mò do, 6“Lemwót bè yóm kekbê yó kem tau bè Juda du yóm él bélê le boluyen Silu#8:6 Yóm él Silu ganag klelen yó hningónen yóm tóbóng Dwata kul hlanen bè yó kem tau semfu gu bè tehe Dabid, yó kem tau gel mogot kul. yóm él alì ganag klelen ne lemwót bè yóm alì ksidek klikò le ke Risin ne Pika, 7yó angat nmou bélê le hlusu elem blóng le yóm tau hol geta bè Asirya ne yóm kdê sendaluen na le e nundug yóm benwu Juda yó. Yóm angat kundug le, hol lómón ke mamà yóm él bong boluyen Yufratis. 8Tódô lenumfaken yóm benwu Juda yó yóm tey dunuk mulé te kembu. Tódô gotu limes klamangen. Dwata he tendo nô bélê tekuy. Lómón ke deng nbólen hafaken mò kemlung yóm benwu tekuy. Ou se Dwata yóm hol gónó mogot mon du nim ni.”
9Ó kem dumu tau bè tólóng benwu mayuk hol ye stifun, mung du klikò ye. Hnungol ye yu kem tau bè yó kem benwu yó, htifes ye ne mógów ye bè sfatay bede eles ye hol hlikò. Yó ne htifes ye bede eles ye hol hlikò. 10Eles ye mò atul, okóm laen kô dù nefeten yóm atul ye yó. Eles sentulón ye yóm nóyô nmò ye, okóm laen dù gónóhen e kól yóm nmò ye yó abay se yóm Dwata tendo eles nô bélê me kum.
Yóm eles hetgama Dwata ke Isaya
11Wen eles hetgama Dwata dou mlan bè yóm tey kfasangen. Là kóyóen du ke lolou yóm lan lolò yó kem dumuhu tau. Yó udélen ebéléu, monen, 12“Hol béi gbót bè kul atul yó kem dumum tau ne béi likò du kóm yóm kul gel knikò. 13Ni hol suem bè nawahem, tek sónen o yóm Dwata laen dù là gbeken du yóm laen kô dù belenen. Olon ou dé yóm hol knikoem. 14Lemwót bè yóm klaen dù belenu yó, yó gónó le likò do yó kem tau. Hol lómón ke ou yóm botu gónó le tlokob. Ne hol lómón ke ou yóm holot gónó le bkó yó kem tau bè benwu Juda ne bè benwu Israél ne bè syudad Jirusalim. 15Tey dê bélê le tlokob. Gotu le masà gotu glinaen lu yóm botu yó. Tódô le gotu bkó bè holot.”
Kudél Dwata kul lan le tmaba ebè yó kem tau deng matay
16Yu kem tau lemolò do, hol ten-gama ye anì là lanahen bélê ye yóm udél deng tulón Dwata do. 17Deng henbnos Dwata yó kem tauhen, okóm dou sana ksaligu du ne són du ken-gel nawahu. 18Ni ou, mung do yó kem ngà deng blay Dwata do. Yóm klowil me hol lómón ke tulón gdek lem blóng yó kem tau Israél, yóm tulón hwit yóm Dwata laen dù là gbeken du, yóm Dwata myón bè yóm gónón kmamal bè bulul Sayun. 19Okóm angat mon yó kem dumu tau mò kuy, yake smólók ye bè yó kem tau mton bù ne bè yó kem tau demwata, yó kem gel mnuhul ne mengeg. Yó gónó le mon du yóm yó abay se hyu kun ke gel tekuy smólók bè yó kem tau deng matay mò tmóbóng yó kem tau tolo mowil.
20Okóm ni mò balà ye kul, mon ye, “Yake yó dém tolok Dwata kuy yóm hol hnungol ye. Hol bê ye abay hmungol bè yó kem tau demwata. Là kóen hyu bélê ye yóm gel tulón le kuy.”
Yóm kdaw keglayam le
21Bè yóm kdaw angat keglayam le, yó nmò yó kem tau sónmò le mógów. Tey sidek keblat nawa le ne tey sidek kbitil le. Lemwót bè yóm kbitil le ne bè yóm kebut le yó gónó le hemtolo yóm tau hol geta bélê le ne gomong hentolo le Dwata snéen. Baluen ke temngel le eta bè longit, 22duhen ke hmunu le ebè tonok tek són ton le, són yóm gónó le glayam ne yóm tey kkifuhen, yóm kifu wen klikò mung du. Ne laen kô dù lan le mógów elemen. Laen kô gónó le gewà du yóm tey hlayam angat gefet bélê le.
Currently Selected:
Isaya 8: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
