Isaya 63
63
Kegmò Dwata bè yó kem hmohon du bè klamangen benwu
1“Tau du se yóm tau kól gu bè syudad Busra bè benwu Idom?#63:1 Yóm benwu Idom ni, benwu yó kem tau semfu gu bè yóm tehe Iso yóm dumun segeng sut Jakub. NeJakub se yóm tau gónó le gu semfu yó kem tau Israél. Bè yóm kun kdaw Isaya deng le sfohon ne. Tey alì tilob yóm nes hulô leseken. Tódô mógów hekteng, tódô dilóem béléen yóm tey kfasangen ne yóm tey kgisen. Tau du de tu?”
Yóm mógów yó, duhen Dwata yóm hol gónó mogot. Tey wen kfasangen lemwà yó kem tauhen. Yó nógówen nan e tulón yóm deng kegmoen bè yó kem hohonen.
2“Moen de ke alì hulô yóm nes leseken? Hol lómón nes yóm tau smóyów mdà bungu grép mò ninum le. Moen de?”
3Yó balà Dwata du yóm sólók yó, monen, “Deng gotu ndau elaan yó kem hmohon do bè klamang benwu. Lómó kmou kul lómón smóyów mdà bungu grép. Ne laen kô dù tau na a tmóbóng dou mò du. Gotu ndau lu elaan lemwót bè kebutu kul. Yóm litô le tódô gotu demket bè nesu. 4Yakà dengen sut ne yóm kdawu lemwà yó kem dou tau ne deng kdawu tmafak yó kem hohon le. 5Tey ketngahu du yóm ktonu du laen dù tau tmóbóng dou. Okóm mom yó bemlay do kgis yóm lebutu, botonge gemmò bè yó kem hohonu igoen són ou. 6Lemwót bè kebutu, gotu ndau lu elaan yó kem hohonu bè klamangen benwu, gotu genlau lu. Gotu gamà bè tonok litô le.”
Yóm któbóng Dwata yó kem tauhen
7Angat tulónu yóm là kilihen yóm kbong nawa Dwata tekuy.
Tey kdóyónu du lemwót bè yóm deng nmoen bélê tekuy.
Tey któbóng Dwata yó kem tau Israél lemwót bè yóm alì kkoduhen kul ne yóm là kilihen yóm kbong nawahen kul.
8Yó mon Dwata, “Lu se yó kem dou tau. Là kô na le e snukat dou.” Yó gónó Dwata lemwà kul 9bè yóm kdê gónó le glayam. Sundu hógów Dwata gu bè longit du yóm lemwà kul, kaem tódô Dwata. Yó gónón mò du, lemwót bè yóm kbong nawahen kul ne yóm kkoduhen kul. Tey tendo gel kesegyoken kul lemwót bè kbuten,
10okóm deng mom natù yó kem tauhen ne tey sidek keheblat le nawa yóm Tulus Dwata. Yó gónó Dwata deng mom hmohon kul ne niten lu sfatay. 11Omin le yó he hemtulón nawa du yóm tehe kun kdaw Musis ekni, yóm sotu tau tehe tóbóng lówó Dwata. Yó sólók le, “Nô se yóm Dwata tehe lemwà yó kem tauhen mifal mohin, mung kul yó kem tau gónó le galak? Nô se yóm Dwata tehe hemsù du bè Musis yóm Tulusen? 12,13Nô se yóm Dwata alì mfasang, yóm alì dê tehe nmoen hlanen bè Musis? Botong gbeken semkó yóm mohin, hnayahen lan yó kem tauhen ditu tlem él. Yóm nmoen yó, htótólen boluyen ne laen dù sónen yóm któtólen yó. Nô se kun du yóm kmoen ni?” Bè yóm tehe kalak Dwata kul là kô le tlokob. Tey mbegel kdà le, hol lómón kdà yó kem kudà tabag. 14Yó kmò kwit Dwata yó kem tauhen ebè yóm benwu gónó le henek nô, hol lómón kwit le safì yó kem tau ebè yóm gónón mabù bnes mò gónó le mótób. Tódô Dwata se malak yó kem tauhen, yó gónó le alì madat du yóm kun boluy.
Alì kehkodu le ebè Dwata
15Ó Dwata, hol knudungem mi gu dyó bè yóm gónóhem nô bè longit. Tngón me yóm klaen dù belenem ne yóm tey kegetahem. Gónón nô se yóm alì kehedemem kum du? Ne yóm kfasangem, gónón nô de? Gónóhen nô se yóm kbong nawahem kum ne yóm kkoduhem kum? Hol béem tódô bayà mi sen. 16Uu se yóm hol kum mà. Yó kem tehe fù me Abraham ne Jakub, là bud tenngón le kum. Okóm uu se hol kum mà yóm gónó me mogot, yóm tehe gel lemwà kum. 17Moen de ke hlusem mi tabag? Moen de ke alì hgelem kulu me efet knogol me u? Géhél bud senfulékem mi, Dwata, igoen tolo wen kem tau bélê me he mimón kóm, igoen sem mi du yó kem kóm tau lemwót bè hol kbuten. 18Mi se yó kem tau deng hetfingem mò kóm nfun. Okóm deng lo le mi gu bè kum benwu yó kem hohon me. Tek likót me mfun du yóm Gónóem. Okóm ni, deng gotu genbà yó kem hohon me. 19Yóm kmoem ebélê me ni, hol lómón ke là uu du yóm gónó me gel galak lemwót bè kbuten. Hol lómón ke là tauhem kum lemwót bè kbuten.
Currently Selected:
Isaya 63: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
