Isaya 59
59
Alì kekbê Isaya yó kem salà le
1Ofo kuy mon du ke yó gónó Dwata là lemwà kuy abay se là bud gbeken du ne. Ne yó gónón là hmungol du yóm gel kehtóbóng ye béléen abay se deng bokong. Là kô yó du. 2Yó gónón là hmungol kuy lemwót bè yó kem salà ye. Kaem salà ye se hemseng kuy ebè Dwata bè yóm kehloni ye ebéléen. 3Tau ye mò kéng se kuy, gel ye hemsidek kem dumu tau ne tau ye monok.
4Gel ye skukum, okóm là kô ndà ye du yóm kukum tedeng mom snalig ye yóm kéng anì gemmò ye. Tey mahil bélê ye mò du bè kem dumu tau yóm sidek gel natul ye. 5,6Yó kalas yóm gel natul ye yó, hol lómón ke wen mken yóm ngà ulal lenbotù, tódô matay. Okóm yóm sidek gel natul ye yó, laen kô dù gónón hyu bélê ye. Hol lómón ke mewel ye iwol wong, là kóen baling. 7Tendo gel natul ye yóm sidek ne tey kódód ye géhél mò du. Tey mahil bélê ye hmatay yó kem tau laen dù sidek nmò le. Balù kihu gónó ye e solu, tey wen tau gel hensidek ye ne hnayam ye. 8Balù sotu ke wen tau menek nawahen ke nô ye lem blóng le, abay se là tedengen yóm kdê gel nmò ye ne là se tedengen yóm lan lolò ye. Ke wen tau lemolò du yóm kuy lan yó, bà udì ke wen kenek nawahen.
Kebkas kem tau Israél yó kem salà le
9Yó udél yó kem tau, mon le, “Deng tngón me ne gónó Dwata là lemwà kum gu lem tdok yó kem tau hemgnok kum. Hendeen me ke wen hlayag du yóm lan me, okóm laen dù ton me, tódô hono kifu. 10Lómón tô me tau butô gel migóf mógów. Anien ke talak kemdaw sana ketlokob me, abay se mom kmifu bélê me, hol lómón kkifuhen yóm gónó le nô yó kem tau deng matay. 11Tódô sónmò me likò, tendo sidek ktafa nawa me. Hol nalu nawa me ke lenwà Dwata mi bè yó kem tau tendo hemgnok kum, bede là.
12Ó Dwata, deng tey wen ne yóm salà me béléem. Yó kem sidek deng nmò me yó, yó se fen kmamo kum béléem. Deng gotu dilô me ne yó kem salà me. 13Deng tey là kimón me kóm. Tey kekbê me kóm. Là kô me móyô lemolò kóm. Deng gel hen-gnok me kem dumu me, tódô knogol me uu. Là tedengen yóm gel hendem me ne yó kem gel tulón me hono kéng. 14Mom henseng me yóm kukum tedeng. Là kóen gehloni ebélê me yóm tedeng. Là bud gungolem du bè yó kem tau gel bemtad lem fedyan ne yóm ktahuhen. Laen kô bud tonem bè yó yóm tau laen dù kéngen. 15Laen kô bud tonem ke wen tau lemolò du yóm ktahuhen. Ke tói hlayuk bè yó kem sidek, mom henayam le uu yó kem tau gel mò sidek.”
Kmò kehewà Dwata yó kem tauhen
Deng gotu ton Dwata yó kem sidek deng nmò le yó ne tey sidek kegnómen du abay se là tedengen yóm kukum nwit le. 16Ya tey ketngahen abay se laen dù tau tonen mò tmóbóng yó kem tau gel nongò le, bà sotu. Yó gónóm mon, tódô lemwót bè kun kfasang gónón lemwà kul ne gónón gemmò bè yó kem hohon le. 17Bè yóm kehewaen kul yó, yó henged oniten, duhen yóm kukum tedeng nwiten. Yó henged sloung tóken, duhen yóm kfasangen lemwà kul. Yó henged nesen, duhen yóm hol óyóen tmóbóng kul ne yóm óyóen meles kul. 18Bè yóm kbelesen kul, tódô tnafaken yó kem hohonen lemwót bè yó kem sidek tehe gel nmò le. Baluen he ke nô le bè benwu mayuk, sana ktafaken kul. 19Lemwót bè yó kem benwu fi dmata kdaw kól bè yó kem benwu fi desdef, gotu le likò du. Knikò le yóm alì kfasangen. Yó kmoen kul bè yóm kógówen elem blóng le, hol lómón ke dunuk yóm tey él bong, duhen ke mbel yóm hol yéen lenos bong.
20Yó udél Dwata ebè yó kem tauhen, monen, “Yu yóm kdê deng kmogol yó kem salà ye, angate mógów elem blóng ye bè yó bè Jirusalim naw e nofin yu ne hewau yu. 21Ne wen senfasad tekuy, duhen yóm keblayu du kuy yóm dou Tulus ne yóm dou tolok ne laen kô dù tul sónen yóm knóen bélê ye. Ne yó mò kuy fasad do, nbuten ni yóm hol kimón ye do. Yóm kimón ye do yó, hol senflós ye tmolok du bè yó kem ngà ye kkólen bè yó kem angat sfu ye.”
Currently Selected:
Isaya 59: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
