Isaya 57
57
Là gomongen bè nili yóm bérs 1 kól bè 13. Bè ni kem bérs ni hton Dwata ke Isaya yóm kmò ktaba yó kem tau Israél bè yó kem dwata kéng, laan yó kem koyu ne yóm kmò khatay le yó kem ngà lemnek mò dsù le bè ni kem dwata kéng ni. Gel le tmaba ebè yó kem dwata lennged te bulul ne tekwang beng snéen. Deng tódô knogol le Dwata ne.
Mon Dwata bè bérs 13, “Hnénég te he ke wen gmò yó kem dwata kéng ye sok ye mkik mni tóbóng bélê le. Là kô gbek le tmóbóng kuy, abay se mkél le bè yó kem kafa halay holis bè lenos. Okóm yó kem smalig béléu, lu angat gemfun du yó kem tonok ne wen kul ólól bè yóm dou bulul.”
Yóm fasad Dwata bè któbóngen yó kem tauhen ne yóm kkóhen yó kem salà le
14Yó udél Dwata, monen, “Hulék ye lu ebéléu yó kem dou tau. Kó ye bélê le yó kem gel hemseng kul bè lan le. Mò ye bélê le lan mò lolò le.
15Ou se yóm Dwata hol geta yóm Dwata laen dù belenen yóm hlós mowil laen kô dù tul sónen. Nóe bè yóm hol gónón geta ne hol gónón mólós. Okóm bude nô bè yó kem tau heglaan le knô le ne gel hen-gsel le salà le anì bud huléku ebélê le yóm kgel nawa le do ne anì wen nefet nawa le elem hulin kdaw. 16Deng tehe hlowilu yó kem dou tau ne là bud henlósu du ne yóm kduónu kul ne yóm kebutu kul. 17Tahu se, tehe lenbutu lu lemwót bè salà le ne bè yóm tey kesbì le ne yó se gónóhu tmafak kul ne tódô mayà kul. Bede tey mgel kulu le, tódô henlel le lemolò du yóm kul kóyô. 18Deng gotu tonu yó kem nmò le, okóm angat kóhu bélê le yó kem salà le. Nalaku lu ne tnóbóngu lu ne henyuhu nawa yó kem langag. 19Wen kenek nawa blayu kul yóm kdê le, tau moni duhen tau mayuk. Tódô kóhu bè yó kem dou tau yó kem salà le. 20Okóm kul yó kem tau gel mò sidek, hol le mkél bè lewók mohin là kóen menek, tendo mit fól ne kluon ebè kilil. 21Laen kô dù gónón menek bélê le kul yó kem tau gemsalà,” mon Dwata.
Currently Selected:
Isaya 57: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
