Husiya 6
6
Olon te kulit yóm tô kulék le ebè Dwata yó kem tau Israél
1Yó udél yó kem tau Israél, mon le, “Géhél ye ne, bud tekuy semfulék ebè yóm sana kut Dwata hol gónó mogot. Tehe hendesen tekuy, okóm angat bud bnulungen tekuy. Tehe hnalien tekuy, okóm angat bud bnausen yó kem halì tekuy. 2Ke deng lewu duhen ke tlu kdaw, angat bud hnomihen tekuy anì hlós tekuy nô bè soluhen. 3Tey hyu dé ke hol tngón tekuy Dwata. Henlel tekuy hloni ebéléen anì hol tngón tekuy. Ke yó nmò tekuy, angat dohò yóm kehegfanen bélê tekuy lómón kdohò kebtù mata kdaw ke hlafus ne lómón kdohò yóm kulón bè bulón mò hulu.”
4Okóm yó udél Dwata ebélê le, monen, “Ó kem tau Israél ne kem tau Juda, tedu se kmou kuy du? Tódô gel kmanas yóm kbong nawa ye do lómón ke lobun te tonok, ke hlafus tódô kmanas ne lómón ke amù, tódô kmanas bè nóng kdaw. 5Deng hógówu kem tugodu mò na a tmulón du kuy yóm deng ukumu kuy ne yóm keglau kuy. Hol tahu dohò yóm angat ktafaku kuy, hol lómón kdohò yóm kwasen ket hlafus. 6Yó hol nóyóu bélê ye ke hol tahu lemwót lem but blutut ye yóm kbong nawa ye do. Là kô yó du kem gel dsù ye yóm hnebelu. Mom hyu nawahu ke hol tngón ye o. Tey hyu yó senta bè yó kem dsù gel hkekeb ye ebéléu.
7Okóm mkél ye bè yóm tehe Adam, deng genbà ye yóm kesfasad tekuy ne deng knogol ye o. 8Yóm syudad Gilyad bè Israél, syudad gónón smala salà ne gónón alì dê tau monok. 9Yó nmò yó kem tau blóng ebéléu, deng le mom baling tau temmón mnagaw, sónmò le hmékét tau mò hnatay le bè yóm lan ebè Sékém, gónó le gel tmaba ebéléu. 10Deng tonu bè Israél yóm alì sidek, duhen yóm gel ktaba le ebè yó kem dwata lennged deng nmò le.
11Dalang se kuy kem tau bè Juda, deng bnutengu ne yóm ktafaku kuy lemwót bè yó kem sidek deng gel nmò ye.”
Là gomongen bè nili yóm tsaptér 7 kól bè tsaptér 10. Yó tulónen bè ni kem tsaptér ni yóm kbólów Husiya yó kem tau Israél bè yóm ktaba le ebè yó kem dwata kéng, lel le bud demsù ebè Dwata. Yó mung bè yóm gel ktaba le ebè yó kem dwata kéng, gel le stungô bè yó kem libun hdóyón Baal, lel le gel hlengel. Yó mò kul yó kem tau Israél, lana bélê le yóm khulung le hedem. Bè yóm salà nmò le ni gónó Dwata alì tmafak kul. Angat heglaen yóm benwu le ne hegefen lu bè yó kem tau Asirya.
Currently Selected:
Husiya 6: tbl
Highlight
Share
Compare
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
