Isikél 2
2
Ktaba Dwata ke Isikél mò tugoden
1Bè yóm igou gefen bè tonok, bud mudél ebéléu yóm mudél yó, monen, “Ó Tau Tonok, mdai. Móyóe stulón kóm.” 2Yóm igoen mudél ebéléu, tódô gnómu husek béléu yóm Tulus Dwata ne hdaen ou. Tey keheklinguhu du yóm udélen, monen, 3“Yó ne, Tau Tonok, hógówu uu ebè yó kem tau Israél ebè yó kem tau là mimón do. Yó kem tehe fù le ekni, tódô lenwóten bè kbuten yóm là kimón le do ne efet ni kmoen ni sana yó ne yóm là kimón le do. 4Hono kem tau mgel kulu. Okóm hógówu uu ebélê le nam e tulón kul, monem, ‘Ni se udélen ebélê ye yóm sana Dwata hol dandónen geta.’ 5Kihu ke hnungol le uu duhen ke là yó kem tau là mimón do yó, syan olo le temngón du deng wen tugodu deng kól lem blóng le.
6Béléem kóm, Tau Tonok, hol béi abay hlikò bélê le. Béem knikò yó kem dê gel udél le, baluen ke lómón ktelemen yó kem sual ne lómón kdesen ékét syufón. Béem abay knikò yóm gel ketngel le des, abay se hono le tau là mimón yóm kdê le. 7Hol tulónem kul yóm udélu ebélê le, kihu ke hnungol le duhen ke là. Okóm là kô na le e hnungol kóm, abay se hono le tau là mimón yóm kdê le. 8Yó ne, Tau Tonok, hol hnungolem yóm tulónu kóm. Béi gbót du kóm yóm là kimón le do. Mnangahi ne, tódô kenem yóm blayu kóm ni.”
9Tahu se, wen sigel tonu nogoten yóm sulat lenulun. 10Ominen mból du béléu ne tonu yóm snulat sfatà kililen, hono lingón modung ne udél langag ne lanu ne udél heglà kul.
Currently Selected:
Isikél 2: tbl
Highlight
Share
Compare
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
