Kehewà 15

Lingón Musis

1Omin le lemingón ebè yóm sana kul Dwata hol gónó mogot le Musis ne yó kem tau Israél. Yó lingón le,

“Lemingóne ebè Dwata lemwót bè yóm tey deng kegmoen bè yó kem hohon tekuy.

Tudaen elem mohin yó kem kudà le mung du yó kem tau smakay kul.

2Dwata yóm hol kemgis mofin dou.

Du se yóm deng lemwà do.

Du se yóm dou Dwata tendo dóyón.

Du se Dwata yóm dou mà ne hmungu bè lingónu yóm tey kegetahen.

3Hol tahu sendalù hulung mit sfatay yóm Dwata.

Yó boluyen, duhen yóm Dwata hol gónó mogot.

4Gotu tudaen elem mohin yó kem sendalù Idyip ne yó kem tey klitun le.

Yó kem tau alì hulung mit yó kem klitun yó, gotu le lemneb bè Mohin Hulô.

5Lemneb le lem yóm tey mohin nelem.

Lemneb le etlaan kól ditu bè sokolen lómón ke botu kmò le.

6Yóm sigel kwananem, Dwata, tey knikò yóm kgisen, gotu genlaen yó kem hohonem.

7Bè yóm tey kfasangem gónóm gemmò.

Laen kô dù gmò le yó kem hohonem.

Yóm kebutem, hol lómón yóm ofi mken lami.

8Bè yóm kyufem eta yóm mohin, tódô segbusung yóm él, lómón kmoen lómón ke mdà beng.

Bè yó bè yóm gónón alì nelem mohin tódô baling mgel yóm él.

9Yó mon yóm hohon me, ‘Na ktes lu, na kenfô lu.

Na nólól yóm kendengen le ne gotu nwahu yóm kdê nóyóu.

Nsoku tóku ne nwahu yóm kdê nô bélê le.’

10Okóm Dwata, tek olo bè kyufem kul gónó le gotu lemneb yó kem tau Idyip.

Yóm keneb le bè yóm él alì sidek knelemen yó lómón tô keblat le bala tók.

11Uu se yóm sana kum Dwata hol gónó mogot, dwata du de tô semnged kóm?

Tau du de tô mkél kóm bè yóm tey klinggelen yóm kmoem, yóm klaen kô dù belenem?

Tau du de tô gembek mò kul yó kem hentaw ton ne yó kem tey deng genbek nmoem?

12Olo bè kehdaem sigel kwananem gónó tonok hemlo yó kem hohon me.

13Tey tilob kalakem kul yó kem tau deng lenwaem, hol lómón yóm tehe fasadem kul.

Mlan bè kgisem gónóm gemwit kul ebè yóm kóm tonok deng tehe fasadem kul.

14Nim nmoem ni, Dwata, deng gungol yó kem dumu benwu ne tey klikò le, botong setbol kkel le.

Deng gefet bè yó kem tau Flistin yóm klikò yó.

15Ne tey sidek klikò le se kul yó kem tau mogot bè Idom.

Ne yó kem tau alì lóbô bè Muab tey kkel le.

Ne yó kem tau menwu bè Kanan laen dù bud klóbô le.

16Gefet bélê le yóm tey sidek klikò le.

Ton le yóm tey kgisem, Dwata.

Lemwót bè klikò le yó gónón laen dù gmò le efet niwes le lu yó kem kóm tau, yó kem tau deng lenwaem bè yóm gónó le ghesek.

17Nwitem lu ebè yóm kóm tonok, hol lómón ke huluhem lu bè yóm kóm bulul, yóm benwu deng nélékem mò hol kóm gónô nô, Dwata, yóm benwu mò gónóm hemdà yóm kóm Gónô.

18Uu se, Dwata, laen kô dù tul sónen yóm alì kegetahem.”

Lingón Miryam

19Bè yóm kul kifal mohin yó kem tau Israél, tódô le mlan lemen bè gónón mékéng tonok. Okóm yóm kul tô kifal yó kem tau Idyip, bud hulék Dwata yóm él ne gotu lemneb yó kem kudà le ne yó kem klitun le ne yó kem tau mit kul.

20Wen sotu libun tugod Dwata boluyen Miryam, libun Aron. Nunihen yóm kun gel nuni boluyen tamburin ne kdê yó kem dumu libun gotu lemolò du. Bud nuni le se yóm kul tamburin lel le madal. 21Omin Miryam lemingón bélê le, yó lingónen,

“Lemingón tekuy ebè Dwata lemwót bè yóm tey deng kegmoen bè yó kem hohon tekuy.

Tudaen elem él yó kem kudà le, mung du yó kem tau smakay kul.”

Él héét

22Kewót Musis bè yó bè Mohin Hulô, bud nalaken yó kem tau Israél ebè Sur, bè yóm benwu là hyu menwu du. Botong tlu kdaw le mlan lem yóm benwu là hyu menwu du yó ne balù udì ke wen él ton le. 23Timbow le gefet bè yóm benwu boluyen Mara, wen él ton le bè yó okóm tey héét, là hyu minum du. Yó se gónó le moluy du Mara yó kem tau gnan abay se héét élen.

24Yó udél le tmalaw ebè Musis yó kem tau, mon le, “Tedum tô ninum tekuy du?”

25Tódô hotu Musis nawahen mni bè Dwata. Kogol yóm knihen, wen ngà koyu hton Dwata du, htudaen du elem yóm él ne baling hyu minum du yóm él yó.

Bè yóm benwu Mara yó, wen hlolò Dwata kul yó kem tau Israél mò gónón tmilów kul. 26Yó monen mò kul, “Ke hol nimón ye o ne ke tedeng ktonu du yóm gel nmò ye ne ke nimón ye yó kem hlauhu kuy, là kô naw e tafak du kuy yóm des tehe tafaku yó kem tau Idyip. Ou se Dwata, yóm gel hkó des ye.”

27Ngang le mógów yó kem tau Israél efet le kól bè Ilim. Bè yóm benwu yó, wen sfolò lewu sfut él nô du ne hitu folò but lefò mdà bè yó snéen. Ne bè yó gónó le na bud kmamfù moni bè yóm él yó.

Currently Selected:

Kehewà 15: tbl

Highlight

Copy

Compare