Kehewà 13

Là gomongen bè nili yóm bérs 1 efet kól bè bérs 16. Hono hlolò Dwata kul bè kehfun le du du yó kem ngà le logi twogu dalang se yó kem tanay sut bè yó kem ógóf le. Bud tulónen snéen yóm hlolò Dwata kul bè kehligal le bè kken le yóm mambang laen dù bulung henoken.

Yóm lobun ne ofi gel holun tukô gna yó kem tau Israél

17Bè yóm deng kehewót Faro yó kem tau Israél, là kô hlan Dwata kul bè yóm lan hmilol yóm mohin bong gefet bè Flistin balù yóm tey klahilen yóm lan yó. Abay se yó hendem Dwata, “Ke wen tau geslong le mit sfatay bélê le bè yóm lan mahil yó, déke megetles kehedem le ne bud le semfulék ebè Idyip. Là móyóe du ke yó nmò le.” 18Mom yó gónón hlan kul bè yóm lan mima elem yóm benwu laen hol wen tauhen hlós ebè Mohin Hulô. Ewenem yó kem tau Israél tey eles kehtigel le bè yó kem hohon le.

19Bè yóm kewót le gu bè Idyip yó, nwit Musis tiol yóm tehe Jusif abay se yó se yóm deng tehe hfasad Jusif yó kem tau Israél bè yóm hanà tolo klowilen. Yó tehe mon Jusif mò kul, “Bè yóm kdaw angat kehewà Dwata kuy, hol nwit ye do tiolu gu bè nim benwu ni.”

20Bè yóm kógów le yó lenwót le bè yó bè Sukut efet le kól bè Itam bè kilil yóm benwu laen hol wen tauhen. Na le na kmamfù bè yó. 21Nim kógów le ni, ke kemdaw wen lobun tmahà gónón nô Dwata tendo tukô gna kul mò gónó le temngón du yóm lan lolò le. Ne ke kifu, baling ofi yóm lobun yó. Yó se gónón nô Dwata tendo tukô gna kul mò layag le anì gbek le mógów kifu ne kemdaw. 22Tendo tukô gna kul yóm lobun tmahà ke kemdaw ne tendo bud tukô gna kul yóm ofi tmahà ke kifu.

Currently Selected:

Kehewà 13: tbl

Highlight

Copy

Compare