Istér 6
6
Yóm kadat Sérksis ke Murdikay
1Bè yóm kifu yó là kóen gtungô Sérksis, sónmoen myolo. Yó gónón hangay yóm bok gónó le gel smulat yóm gel nmò le ket kdaw bè yóm benwu nogoten anì senfala le béléen. 2Yó sotu gesfala le béléen bè yó, duhen yóm tehe nmò Murdikay bè Sérksis, yóm fen le tehe ktulónen du yóm tô khatay le du yó kem lewu tau kafun gel mentey bè bak dólen, le Bigtana ne Térés. 3Yó mon yóm tau hol geta yó, “Tedu se deng gónó tekuy hegfan du du yóm kadat tekuy ke Murdikay bè nim nmoen ni ne tedu se deng ofol blay tekuy du?”
Mon yó se kem tóbóng lówóhen, “Laen duen he.”
4Bud mon Sérksis, “Tmau du tum mdà bè lewà tuu?” Anì monem Haman lomi kól bè yó nan e tô hni bè Sérksis yóm kehetléwéngen ke Murdikay bè yóm koyu deng hefdaen.
5Ne yó mon yó kem tóbóng lówóhen, “Haman, móyô ston kóm kun.”
“Hfusek ye elemen sen,” mon yóm tau hol geta yó. 6Tahu se, husek elemen Haman ne kendel monen mò du yóm tau hol geta yó, “Ó Haman, tedu se tô nmou béléen yóm tau ke hegfanu yóm tey kadatu du?”
Hendem Haman, “Déke ou mtu. Laen dù dumu tau nadaten tek són sem ou.” 7,8Yó gónóhen mon du mò yóm tau hol geta, “Ke hegfanem yóm kadatem yóm sotu tau, yake hangayem yóm nes gel lesekem ilô yóm kegetahem, hesekem du ne hyónem du snéen yóm kudà gel nyónem, yóm kudà wen ilô yóm kegetahem nô bè kuluhen. 9Méléki sotu tau alì bong boluyen mò hesek du du yóm nesem ne mò hyón du ta yóm kudaem. Ne bud du snéen malak du yóm kudà bè yóm plasa lamang bè syudadem, bede bè yóm igoen malak du yóm kudà yó hgelen udélen, monen, ‘Tenngel ye dé yóm nmò yóm tau hol geta bè yóm tau hol nadaten.’ ”
10Ne monen mò ke Haman yóm tau hol geta yó, “Hyu se yó. Hesloi, kendel nangayem yóm nes monem yó dalang se yóm kudau. Nmoem bè Murdikay nim kadat ni, yóm tau Ju gel myón bè bak tikeb yóm gónô bong. Gotu nmoem béléen yóm deng monem yó.”
11Tahu se, nangay Haman yóm nes ne heseken ke Murdikay. Nangayen se yóm kudà ne hyónen du. Ominen malak yóm kudà hlalak yóm plasa lamang bè syudad le, bede hgelen udélen, monen, “Tenngel ye dé yóm nmò yóm tau hol geta bè yóm tau hol nadaten.” 12Tikóng deng, tódô bud mulék ebè bak tikeb yóm gónô bong ke Murdikay. Okóm ke Haman kun, tódô kendel heslò mulék ebè gónóen tey sidek kyaken, botong kukum.
13Gotu tulónen ke yehenen ne yó kem ween yóm deng glumfaken yó. Ne yó mon yehenen mò du dalang se yó kem ween gel hmau du, “Ni se hanà buten yóm keglaanem bè Murdikay. Lemwót bè yóm ke Juhen laen kô dù bud gmoem béléen ne.” 14Bè yóm igò le tolo stulón sut se yóm tau kafun tóbóng lówó yóm tau hol geta nan e nangay Haman anì kendel mógów ebè tum ken nmò Istér.
Currently Selected:
Istér 6: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
