Dwata 32

1“Ó longit, hnungolem nim

monu ni.

Dalang se kóm tonok, henklinguhem nim btang bè sumóngu.

2Kehlingónu du nim toloku ni, hol lómón ke kulón gdek ete tonok,

ne hol lómón ke amù te tonok.

Yóm udélu ebélê ye ni, hol lómón ke blanas eta yó kem hulu ne hol lómón ke blanas eta yó kem bnes.

3Yó gónón lómón ni udélu abay se dóyónu yóm boluy Dwata yóm sana Dwata hol gónó tekuy mogot.

Hol dóyón tekuy yóm tey kegetahen yóm kut Dwata.

4Yóm Dwata gónó tekuy mogot, hol lómón ke du yóm léhék gónó tekuy heklung.

Kdê yó kem gel nmoen tódô ket du ne hono tedeng.

Là kóen monol nawahen yóm kuy Dwata ne laen kô dù kéngen.

Sal gel nmoen yóm tedeng ne là kóen mtukul knihuhen.

5Okóm yóm kuy là kô ye dog gulit, là kô ye knóón ke yu mò tauhen.

Hono kem tau gel mò sidek, kem tau mò kéng.

6Ó kem tau book là hulung hedem, ni kô balà ye ke Dwata?

Igoen sem du yóm mà ye, yóm deng tehe mifil kuy.

Du se tehe hol hembaling kuy mò sotu but tau.

7Hentulón ye nawa dé yóm tehe nmò Dwata ekni.

Snólók ye mà ye anì tulónen kuy yóm tehe kmoen bè yóm kdaw yó.

Snólók ye yó kem tuha anì tulón le kuy.

8Yó nmò yóm Dwata hol geta bè kdéen, wen mdengen benwu blayen bè ket bung tau talak tonok.

Tódô eles hendemen yóm knóón bang gónó le nô yóm kdê le.

Eles hendemen se yóm benwu geblà bè yóm kwen yó kem tau Israél.

9Yakà deng néléken du yó kem sfu Jakub mò kun nfun.

10Tehe tonen lu bè yóm benwu laen hol wen tauhen, yóm benwu balù udì ke wen mowil du.

Són luk lenos gungolem bè yó.

Bede yó nmò Dwata, kenlungen yó kem kun tau ne sen-gyoken lu.

Lómó kesgifaen kul lómón ke kimu alì mebtes béléen.

11Toloken lu, lómón yóm banug gel toloken móyóng kem ngaen.

Hdalang hóyóngen lu, ominen mból hafaken mò slegefen kul.

Lómón yó se deng nmò Dwata, là kô bayaen kul btang yó kem tau Israél.

12Tek són Dwata se tehe gel malak kul, laen kô dù dumu dwata fen tmóbóng kul.

13Hogoten yó kem tauhen yó kem benwu gu lem bulul ne yó lowil le yó kem hulu nmò le bè yó kem tniba le.

Wen tneb hkenen kul nwa le lem blóng yó kem botu lembang.

Ne yó kem koyu ulib le tódô le tmowok bè yó kem lusok botu.

14Yó kem safì le ne yó kem kambing le, tey wen gatas nwa le bélê le.

Hono hyu yó kem ubiha le ne kem kambing le ne kem safì le.

Alì hyu yóm halay le ne tey mgélék yóm tifas grép gel ninum le.

15Yó kem tau Dwata, deng le gotu baling tau mdengen. Okóm deng mom kenbê le Dwata.

Gotu le mabù, mo le mom hemnobò lan le alì mken.

Deng knogol le Dwata, yóm tehe mifil kul.

Kenbê le Dwata, yóm hol gembek lemwà kul.

16Yóm ktaba le bè yó kem tólóng dwata gónón sidek kélés nawa Dwata.

Lemwót bè yóm ksidek nmò le, yó gónón alì lembut kul.

17Gel le demsù ebè yó kem tulus seitan, là kô ebè Dwata du, kem dwata là deng hnikót tngón kem fù le du, dwata là deng hnikót nimón kem tau Israél du.

18Botong klifót le yóm kul Dwata yóm mà le, yóm là monol nawahen ebélê le, yóm deng hlowil kul.

19Bè yóm kton Dwata du nim nmò le ni, tey sidek kebuten kul.

Botong kenbéen lu, lu se yó kem tau Israél, kem ngaen logi ne kem ngaen libun.

20Botong monen, ‘Là bud tnóbóngu kul ne, hnénég gónó le e són.

Hono kem tau mgel kulu, tau là gulit.

21Deng hélés le nawahu bè yó kem dwata kéng gel tnaba le.

Hebut le ou bè yó kem dwata lennged laen mu.

Bè nim nmò le ni, gónóhu hélés nawa le mlan bè któbóngu yó kem tólóng but tau.

Hebutu lu bè któbóngu yó kem tau là hulung le hedem.

22Yóm kebutu kul ni hol lómón ke mkal ofi, tódô gotu kenen yó kem kentihen nô talak tonok efet kól ditu tlaan bè benwu yó kem tau deng matay.

Gomong kenen yó kem but bulul laan tonok.

23Tendo setgafit hlayam hwitu ebélê le.

Gotu gtiu kul yóm kdê hanaku.

24Angat le matay bè kenus le ne bè alì sidek kkinì le ne matay le bè yó kem des mekto.

Hemwite ebélê le ógóf lóbô mò msék kul ne ulal malas mò mékét kul.

25Angat tey dê matay gu hilol lemwót bè gida, tódô le gotu blékê bè lan.

Balù bè gónô le, tódô sut bélê le yóm tey knikò le.

Gotu genlà yó kem hohon le yó kem logi lomi lemnok ne yó kem libun lomi lemnok, kewóten bè yó kem ngà hanà hulô kkólen bè yó kem tau deng nubón, laen kô dù tebel, gotu le meglà matay.

26Yó tô hendemu gotu sulék genlau lu anì laen dù bud hemtulón nawa kul.

27Okóm là kóe móyô ke salù yó kem hohon le yóm kegmò le bè yó kem dou tau, igoen ou yóm gemlà kul.’

28Yó kem tau Israél, kem tau laen dù tngón le, ne là hulung le hedem.

29Ke hulung le hedem, deng sana dilô le ne buten yó kem gel gfà le.

Ne eles tngón le ne gónón e kól yóm sidek gel nmò le.

30Bè tek olo sotu hohon le, botong le lemibu hemlóy du.

Bè tek lewu hohon le, botong le sfolò libu hemlóy kul. Yó gónó le mlóy abay se deng bayà Dwata lu yóm sana kul Dwata gónó mogot.

Deng tódô lusen lu elem tdok yó kem hohon le yóm kul Dwata alì gembek.

31Okóm yóm kul dwata yó kem hohon tekuy, là mkélen bè yóm kut Dwata kem tau Israél.

Deng eles tngón yó kem hohon tekuy ne yóm yó.

32Yó kem hohon tekuy yó, tey sidek nmò le, mkél le bè yó kem tau tehe nô bè Sodom ne Gumura.

Ke hningónu lu, hol le mkél bè yóm grép alì héét gónó milu.

33Mkél le bè yóm tifas wen alas ulal nô lemen.

34Là kô klifót Dwata du yóm deng nmò le bè yó kem tau Israél yó kem hohon le.

Són nangaten yóm bantang kdawen tmafak kul.

35Bneles Dwata lu ne tnafaken lu.

Móyón kól ne yóm kdaw le btang ne deng moni ne yóm kdaw le meglà.

36Angat lenwà Dwata yó kem tauhen ke tonen yóm klaen dù bud kgis le.

Knoduhen yó kem tau mimón du ne tonen là holen bud wen dù tebel bélê le.

Yakà deng le gotu meglà, kem tau hesek ne kem tau là hesek le.

37Omin Dwata yó smólók yó kem tauhen, monen mò kul, ‘Nô se lu du yó kem dumu dwata tehe snalig ye yóm gel mon ye, wen genbek le?

38Deng gel henken ye lu abù yó kem dsù ye ne deng gel benlay ye lu tifas grép mò ninum le.

Hógów ye lu edini kun anì tnóbóng le yu.

Henslò ye lu dé anì géhél lenwà le yu.

39Tek són ou Dwata, tek sotuhu.

Laen kô dù dumu dwata, són ou.

Gbeku hmatay tau ne gbeku se hlowil tau.

Gbeku hmalì tau ne bud gbeku se hkó des tau.

Ne laen dù gembek lemwà du yóm deng nô lem hólólu.

40Ou se yóm hol tahu Dwata là matayen.

Hdau eta hólólu mò ilô yóm angat kehdohou du yóm angat nmou.

41Néhéku sudengu, yóm sudeng tódô smilà, naw hegfan dé yóm kukum tedeng.

Bnelesu lu yó kem hohonu, ne tnafaku yó kem kmutó nawa dou.

42Angat moyos bè hanaku litô le.

Ne angat le matay bè sudengu yó kem tau kembê dou.

Laen dù hlowilu bè yó kem tau semfatay do.

Balù yó kem tau olon hnalì ne yó kem tau negef angat le tódô gotu matay.’

43Ó kem dumu but tau te tonok, tey knóón ke hol dóyón ye lu yó kem tau Dwata abay se tnafak Dwata yó kem tehe hmatay kul.

Bnelesen yóm nmò yó kem hohonen ne fen hnifóten salà yó kem tauhen.”

44Lewu le Musis Juswa yóm ngà Nun, fen lemingón du nim lingón ni anì gungol yóm kdéen tau Israél.

Yóm hol són hlolò Musis yó kem tau Israél

45Timbow deng klingón Musis du bè yó kem tau Israél nim lingónen ni koni, yó bud monen mò kul, 46“Hol sù ye lem hendem ye yóm kdê udél Dwata toloku kuy kemdaw ni. Hol gel sensulit ye tmulón du bè yó kem ngà ye anì hol le hteneb mimón du. 47Nim tolok ni, là kô tolok hkawang du, ni se hol tolok gónó ye mowil. Nimón ye anì legen knô ye tahen yóm tonok móyón nfun ye nô fi fatu Él Jurdan.”

Eles hetngón Dwata ke Musis yóm katayen

48Bè yóm kdaw yó, yó mon Dwata mò ke Musis, 49“Lemwóti ne Musis, mógówi etu bè yó kem bulul bnoluy le Abarim bè benwu Muab, yó kem bulul sfatà syudad Jiriku. Ke dengi kól ditu, mnegedi eta Bulul Nibu. Bè yó tahen tenngelem eta yóm benwu Kanan móyón blayu yó kem tau Israél. 50Bè yó ta yóm bulul yó gónóm matay, lómón yóm tehe kun katay ta Bulul Hor yóm twoguhem Aron 51abay se là kô ye gulit yóm lewu ye bè solu yó kem tau Israél. Bè yóm tehe knô ye bè yó kem él bè Miriba yóm él moni bè Kadis, yóm benwu nô lem yóm benwu laen hol wen tauhen boluyen Sin, mom henda ye ou lem blóng yó kem tau.#32:51 Yó gónó Dwata mon du mò ke Musis yóm yó, “mom henda ye ou lem blóng yó kem tau,” abay se bè yóm tehe knô le bè Sin yó kem tau Israél, là kô dog nimón Musis du yóm hlolò Dwata du. Senfalahem yóm bok Lista Israél 20:1–13.Yó gónóm mon, olohem mton du mayuk kóm yóm tonok blayu yó kem tau Israél, là kói na a gehlós edu. 52Yó gónóm mon, olohem mton du mayuk kóm yóm tonok blayu yó kem tau Israél, là kói na a gehlós edu.”

Currently Selected:

Dwata 32: tbl

Highlight

Copy

Compare