Danyél 5
5
Yóm hsulat Dwata bè beng
1Timbow deng hilu halayen miwes bè yó, lemwót Bélsasar#5:1 Nim Bélsasar ni, du bud tles mogot bè Babilun. mò ken bong bè yó kem lemibu tau genlalen, ominen mung minum tifas grép bélê le.
2Yóm igò Bélsasar minum, gotu hfangayen yó kem tegayan tahu blówón ne tegayan blówón bukay tehe nwa maen Nibukadnisar gu lem yóm Gónô Dwata bè Jirusalim.#5:2 Yó gónón mon du maen Nibukadnisar, abay se bè kul adat mò gónó le hegfan du yóm kadat le yóm tau gna mogot benwu. Wen se mon du nim Bélsasar téméen Nibukadnisar. Hfangayen mò gónón minum dalang se yó kem genlalen ne kem yehenen ne yó kem libun tódô nmuhen. 3Tahu se, nwit le ebéléen ni kem tegayan blówón tehe nwa le lem yóm Gónô Dwata bè Jirusalim ne gotu le minum lemen, mung du yó kem genlalen ne yó kem yehenen ne yó kem libun tódô nmuhen. 4Yóm igò le minum tey kdóyón le du yóm kul dwata, nmò le lemwót gu bè tahu blówón ne gu bè blówón bukay ne gu bè tembaga futì ne gu bè bala tók ne gu bè koyu ne gu bè botu.
5Yóm igò le dmóyón yó kem dwata le yó, tódô henmung ton le yóm tdok smulat bè beng yóm gónô bong yóm tau hol geta, moni bè wen soloken. Ton Bélsasar se kun yóm tdok smulat yó 6ya tey sidek klikoen, tódô bukós lem uyóhen ne tódô setbol kkelen, ne là kóen bud gdà.
7Botong lemangat anì gotu nwit le lu ebéléen yó kem tau demwata ne yó kem tau hemgawang. Yóm kkól le bè yó, yó udélen ebè yó kem tau temngón bè Babilun yó, monen, “Ke wen bélê ye gembek semfala du nim snulat bè beng nii ne gembek tmulón du do yóm lanen, angat heseku du yóm nes megem hulô gel lesek yóm tau hol geta ne hniegu lieg blówón ne henbalingu mò getlu geta bè yóm benwu ni.”#5:7 Yó hol geta duhen yóm maen, ominen du gewuhen.Okóm bè yóm deng kkól le bè yó, yó kem tau temngón tinok yóm tau hol geta yó koni, balù sotu bélê le ke gembek semfala du yóm snulat bè beng yó, duhen ke gembek tmulón du yóm lanen. 8Okóm bè yóm deng kkól le bè yó, yó kem tau temngón tinok yóm tau hol geta yó koni, balù sotu bélê le ke gembek semfala du yóm snulat bè beng yó, duhen ke gembek tmulón du yóm lanen. 9Deng mom temnù klikò Bélsasar ne bud temnù yóm kbukósen. Ya tey sidek klikò le se kul yó kem genlalen.
10Okóm timbow gungol yóm libun boi yê Bélsasar yóm alì kesekbà le, tódô kendel mógów elem yóm dfél bong gónó le mken. Yó monen mò ke Bélsasar, “Hol tahà he ktauhem. Béi abay alì hlikò bè nim ni ne béi abay bud hbukós. 11Wen sotu tau nô lem nim benwu nogotem deng htulus yó kem dwata alì mólós. Yóm hanà kegenen du maem Nibukadnisar, tngónen nim tau ni wen tey khulungen temnef, lelen temngón ne hulung hedem, hol lómón ke du yóm sotu dwata. Lemwót maem, nmoen nim tau ni mò gónó le kmulu yóm kdéen tau demwata ne tau mton bù ne tau hemgawang nô lem nim benwu ni. 12Yó boluyen yóm tau ni, Danyél, yóm bnoluy Nibukadnisar Béltisasar. Tey betik kehedemen, tau temngón, tau hulung temnef. Gbeken tmulón lan kna ne lan yó kem nged ne gbeken se hemlan yó kem mgel sut bè klowil tau. Yake géhél htabahem Danyél anì tulónen kóm lan yóm snulat bè beng yóó.”
Ktulón Danyél lan yóm snulat bè beng
13Tahu se, nwit le ebè yóm tau hol geta Danyél ne yó monen mò du yóm tau hol geta, “Uu kô Danyél, yóm sotu tau lemwót gu bè Juda yóm tehe gomong negef mau Nibukadnisar? 14Deng gungolu yóm tey kehtulus le kóm yó kem dwata hol mólós ne gungolu snéen yóm khulungem temnef ne yóm tey ketngónem mung du yóm khulungem hedem. 15Deng gotu nwit le lu edini yó kem tau temngón snaligu ne yó kem tau demwata, okóm là kô gbek le tmulón du do lan yóm snulat bè beng yóó. 16Deng wen tmulón du do gbekem kun tmulón lanen ne gbekem se hemlan yó kem mgel sut bè klowil tau. Ke gbekem semfala du yóm snulat yóó ne ke tulónem do yóm lanen, heseku kóm yóm nes megem hulô gel lesek yóm tau hol geta ne hliegu kóm yóm lieg blówón. Uu se mò getlu geta bè nim benwu ni.” 17Bnalà Danyél se, monen, “Omin he, Bélsasar. Mò kóm ne yóm tô basahem do yó, duhen ke blayem bè yó kem dumu tau. Okóm yóm snulat bè beng yóó, senfalahu béléem ne tulónu kóm se yóm hnigaden. 18Yóm Dwata hol dandónen geta bè kdéen, tehe hogoten ke maem Nibukadnisar yóm klamangen. Du se hol hfasang du ne hegeta du ne htótól boluyen. 19Tey kehegeta Dwata du, gotu le likò du yóm kdéen tau bè klamangen benwu, balù kihu gónó le gu semfu, balù kihu benwu gónó le gu lemwót, ne balù kihu kay udél le. Botong setbol kkel le bè soluhen. Gbeken hmatay du kihu nóyô hnatayen ne gbeken se hlowil du kihu nóyô hlowilen. Gbeken se hegeta du yóm sotu tau nóyô hegetahen ne gbeken se mnok du elaan yóm sotu tau nóyô nnoken elaan. 20Okóm lemwót bè yóm alì kehegmónen ne kehgelen kuluhen, yó gónó Dwata ma du béléen yóm kogoten benwu ne mkó du béléen yóm kegetahen. 21Tódô lo le anì là buden nô lem blóng tau, baling knawa ógóf ne tódô nô lem blóng yó kem kudà asnu tabag. Mótób bè yó mkél bè safì ne tódô sónmoen wos bè amù efet nan na gtukul són yóm Dwata hol dandónen geta bè kdéen kmamal du yóm kdê benwu nogot tau ne hogoten benwu yóm tau deng kun nélék.
22Uu se Bélsasar, yóm ngaen. Là kói dog heglaan bè Dwata igoem deng hónô temngón du nim ni. 23Deng mom natuem yóm Dwata nô bè longit lanem hangay yó kem tegayan tehe nô lem yóm kun Gónô Dwata. Deng ye mom minum tifas grép lemen yó kem genlalem ne yó kem yehenem ne yó kem libun tódô nmuhem yóm igò ye dmóyón yó kem dwata nmò ye lemwót bè blówón bukay ne bè tahu blówón ne lemwót bè tembaga futì ne lemwót bè bala tók ne lemwót bè koyu ne bè botu, kem dwata là mton ne là mungol ne laen dù tngón le. Okóm là dog nadatem ke Dwata igoen du mogot klowilem ne eles tngónen yóm gónóm e kól. 24Yó gónóm mon, lemwót béléen yóm tdok smulat ni, du hsulat du ni kem udélen ni.
25Ni se yóm snulat, monen, Méné, Méné, Tékél, Parsin.
26Yó lanen yó kem udél yó,
Méné, yó lanen bnuteng. Deng bnuteng Dwata ne yóm kóm kogot ne deng nmoen sónen.
27Tékél, yó lanen tnimbang. Deng tnimbang Dwata ne yóm kóm gel nmò, okóm laen dù lemen.
28Parsin, yó lanen nólól. Deng nólól Dwata ne yóm kóm benwu nogot, hogoten yó kem tau Mid ne yó kem tau Pérsya.”
29Lemwót bè udél Bélsasar, hesek le ke Danyél yóm nes megem hulô, omin le hmieg du lieg blówón ne henbalingen getlu geta bè yóm benwu yó.
30Ne bè yóm kifu yó, lemwót Bélsasar yóm tau mogot yóm benwu Babilun hnatay le. 31Yó bud tles mogot yóm benwu yó, duhen Daryus yóm tau Mid. Yó deng halay Daryus bè yóm kbut kogoten bè yó, nem folò lewu.
Currently Selected:
Danyél 5: tbl
Highlight
Share
Compare
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
