Danyél 1
1
Knô Danyél bè Nibukadnisar bè Babilun
1Bè yóm deng getlu halay Jihuyakim mogot yóm benwu Juda, sut bè Jirusalim Nibukadnisar yóm tau hol geta bè Babilun mung du yó kem sendaluen na le e mundug bè yó. 2Yó nmò Dwata, blayen Jihuyakim elem hólól Nibukadnisar. Yóm kulék Nibukadnisar ebè Babilun wen nwiten bè yó kem kimu mebtes nô lem Gónô Dwata, kem kimu deng hetfing le ebè Dwata ne suen lem gónô yóm kun dwata hentahu bè Babilun, bè yóm gónó le gel hemyu yó kem alì mebtes.
3Lemwót yóm tau hol geta yó, dóken Aspinas yóm geta bè yó kem genlalen, anì mélék bè yó kem ngà logi lomi lemnok deng negef le lemwót gu bè Juda yóm hono kesfu tau hol geta. 4Yó monen mò du, “Nélékem yóm hyu klówó le ne knóón le logi, kem tau hulung hedem ne kem tau temngón ne mahil le megtolok ne yóm wen kenhulung le bè yóm angat kmò le nmò bè yóm gónô bongu. Tolokem ni kem lomi lemnok ni mudél yóm kut udél kem tau Babilun ne semfala yó kem dê kut snulat.” 5Yó bud nmò yóm tau hol geta, wen hmoen yóm tau mólól ken anì tódô ket kdawen bemlay kul ken yó kem ngà logi nélék le yó, yóm ken hyu ne yóm tifas grép alì hyu lemwót bè kun lemisa. Tlu halay le kegen le tmolok kul, ominen yó he wen hmoen kul yóm tau hol geta.
6Yó kem ngà logi nélék le yó, wen fat bélê le lemwót bè ból Juda, duhen Danyél ne Hananiya ne Misyél ne Asariya. 7Wen lomi boluyen kul yóm geta bè yó kem genlal yóm tau hol geta. Yó tles boluy Danyél, Béltisasar. Yó tles boluy Hananiya, Sadrak. Yó tles boluy Misyél, Misak ne yó tles boluy Asariya, Abidnigu.
8Okóm ke Danyél kun, deng nô bè nawahen yóm là kóyóen gholu bè yóm ken ne yóm ninum blay yóm tau hol geta kul. Yó nmoen, hkodu bè Aspinas anì htólóngen yóm hkenen kul. 9Lemwót bè yóm któbóng Dwata ke Danyél gónó Aspinas kmodu du ne móyô tmóbóng du. 10Okóm tey klikoen bè yóm tau hol geta bè yóm hni Danyél béléen yó. Yó monen mò ke Danyél, “Yóm tau hol geta se mdók do hemken du kuy ni kem ken ne hinum du kuy ni kem tifas grép ni. Ke tonen yu fen lehen lem blóng ni kem dumu logi lomi lemnok ni, kaem hnatayen o lanu là mò du yóm hmoen do.”
11Yó udél Danyél ebè yóm sotu tau deng nélék yóm geta bè yó kem fen gel mkay ken mò hemken kul le Danyél ne Hananiya ne Misyél ne Asariya, monen, 12“Ke hyu béléem, tnilówem mi sfolò kdaw olon lemnaw ken me ne olon él ninum me. 13Ke sok deng mfu yóm sfolò kdaw, ominem semskél kum bè yó kem dumu logi mken yóm ken tau hol geta, hnénégem ke mahil du bélê me hyu klówóhen. Ke là móyói du yóm ktonem kum, tódô nmoem bélê me yóm kóm kóyô.” 14Tahu se, nmung yóm tau gel mkay ken bè yó yóm hni Danyél ne tnilówen lu bè sfolò kdaw.
15Tikóng mfu yóm sfolò kdaw, tonen tey hyu kul klówó le Danyél ne yóm tlu kem ween senta yó kem dumu logi mken yóm ken tau hol geta. 16Lenwóten bè yó ne són lemnaw ne hkenen kul le Danyél yóm tau gel mkay ken ebélê le, là ne yóm ken tilob tô hken le kul ne yóm tifas grép hinum le kul. 17Tey keblay Dwata kul ketngón nim fat kem logi lomi lemnok ni bè kdê yó kem hefnagì le kul. Bong ke Danyél kun, wen kenhulung blay Dwata du, duhen yóm khulung tmulón lan yóm hton Dwata bè tau ne lan kna.
18Timbow deng mfu yóm tlu halay le tmolok kul, lemwót yóm geta bè yó kem genlal gotu nwiten lu ebè Nibukadnisar yóm kdê logi deng tolok le. 19Gotu le mdà bè solu yóm tau hol geta yóm ket kul na sotu ne stulón kul. Yó ton yóm tau hol geta bè kdê yó kem logi nwit le ebéléen, laen dù gemsenged kul le Danyél ne Hananiya ne Misyél ne Asariya. Yó gónón mélék kul mò mung bè yó kem tau gel hemlan béléen udél. 20Lenwóten bè yó bè ket snólóken bélê le yóm tau hol geta, bè kun kehedem du yóm kul khulung hedem ne kul khulung temnef nim fat kem logi gel hemlan béléen udél ni, botong sfolò duléken lemyu senta yóm kul ketngón yó kem tau demwata tehe gel hemlan béléen udél.
21Tódô hlós nô bè yó Danyél bè gónô bong yóm tau hol geta efet bè yóm kun bud kogot bè benwu Babilun Sirus, yóm tau hol geta lemwót bè benwu Pérsya mled yóm benwu Babilun.#1:21 Yó kegen Danyél mò nmò bè yó kem tau hol geta mogot bè Babilun botong nem folò hitu halayen.
Currently Selected:
Danyél 1: tbl
Highlight
Share
Compare
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
