Kul Nmò 19

Ktolok Pol bè Ifisus

1Bè yóm tolo knô Apulus bè Kurin, lemwót ke Pol tódô hnalaken yóm sotu prubinsya efet kól bè Ifisus. Ne wen kem tau hemtahu glebeten bè yó. 2Ne snólóken lu, monen, “Deng kól bélê ye kô yóm Tulus Dwata bè yóm deng kehtahu ye?”

Mon le se, “Là he. Là deng gungol me du he kum yóm Tulus Dwata monem yó.”

3Mon Pol mò kul, “Mò kmoen se yóm kehbabtays ye?”

Mon le se, “Lómón yó sem tehe kbabtays Jan.”

4Mon Pol se, “Yóm tehe kbabtays Jan mò ilô yóm tau ke deng knogolen yó kem sidek gel nmoen. Okóm sotu gel tulón Jan yó kem tau Israél, ke hol hentahu le yóm sut huli du, duhen Jisas.”

5Bè yóm kungol le yóm tulón Pol yó, tódô le hbabtays hlan le bè boluy yóm gónó le mogot Jisas. 6Omin Pol mnok kul. Tódô sut bélê le se yóm Tulus Dwata, ne sket le mudél bè yóm udél là deng kul dnalang du, ne tódô gotu tulón le se yóm deng hetngón Dwata kul. 7Wen dô sfolò lewu kwen le.

8Tlu bulón Pol na mung bè yóm gónó le gel stifun yó kem Ju bè yó. Là kóen likò bè yóm gel ktoloken kul. Gel niten lu stulón snéen, ne wen hdilóen kul mò gónó le hemtahu du yóm gel ktoloken kul gbak ebè yóm kogot Dwata tau. 9Okóm wen se bélê le mgel kulu le, là kô le móyô hemtahu. Tey sidek kebkó le bè yó lem yóm kul gónó gel stifun yó kem Ju gbak ebè yóm kun kmò klan Jisas. Tódô tnagak Pol lu, niten yó kem tau hemtahu bè Jisas. Lenwóten bè yó, ket kdawen nô bè yóm gónô gónóhen gel tmolok yóm sotu tau boluyen Tiranus. Bè yó gónón mit kul stulón yó kem tau. 10Botong lewu halay Pol mò du nim ni. Tey kbólen yóm Udél Dwata efet gotu gungol yóm kdéen tau bè klamangen Asya, senged se yó kem tau Ju ne yó kem tau là Ju le.

Gfà kem ngà Skiba

11Bè yóm knô Pol bè yó, tey dê hentaw ton gel nmò Dwata hlanen béléen. 12Balù yó hem olo mesalahen duhen ke kayaben, ke nit le bè yó kem tau wen des le, kaem tódô mkó se yó kem des le. Balù yó kem tau nalak busaw, tódô gel mdó se yó kem busaw malak kul.

13Wen se kem dumu Ju gel mógów bè yó kem dumu benwu na le e hdó yó kem busaw gel malak yó kem tau. Tô tilów le se kul hdó busaw hlan le bè boluy Jisas. Gel mon le bè yó kem busaw, mon le, “Lemwót bè kun boluy yóm Jisas gel tulón Pol, mdóhi bè yóm tau nalakem yó.” 14Wen hitu logi setwoli, ngà yóm sotu tau hol geta gel demsù ebè Dwata boluyen Skiba, tilów tô nmò le se kul yóm hdó busaw. 15Okóm mom monen mò kul yóm busaw, monen, “Tngónu Jisas, ne tngónu se Pol, okóm yu, là kô tngónu kuy.” 16Ne ominen tódô demlu yó kem hitu logi yó koni, gotu le boug béléen laen kô dù gmò le. Botong le gotu gehewas laen dù nes lem gónô yóm tau nalak busaw yó koni, ne gotu le hnalì, tódô le mlóy.

17Tódô kdéen tau bè Ifisus, kem Ju ne kem tau là Ju le, gotu temngón du yóm gfà le yó koni. Ya tey sidek klikò le, ne tendo temnù któtólen yóm boluy Jisas, yóm hol gónó mogot. 18Bè yó kem tau hemtahu, tey dê bélê le tódô gotu benkas tulón le bè gónón wen yóm kul gel nmò. 19Tey dê tau wen lamat snalig le. Gotu nwit le yó kem bok gel lolò le, ne tódô gotu dnutung le lu. Wen dô limu folò libu btesen yóm bok dnutung le yó. 20Ya tey kbólen yóm Udél Dwata, ne dilô kdéen tau yóm tey kfasangen.

Yóm kehetê yó kem tau bè Ifisus

21Kogol ni kem ni, yó hendem Pol nan bud mlan tmonok lem prubinsya Masdunya ne Akiya, ominen hlós mulék ebè Jirusalim. Yó monen, “Sok kogolu gu bè Jirusalim, là gbeku du ke là hlóse ebè syudad Rom.” 22Ne wen lewu tau gel tmóbóng du hegnahen ebè Masdunya, Timuti ne Irastus. Okóm ke Pol, nan na legen udì bè prubinsya Asya.

23Bè yóm kteyen Pol bè yó bè Ifisus, geslaen yóm tey kebut le du yó kem tau bè yó yóm tolok gbak ebè yóm kun kmò klan Jisas, yóm hol gónó mogot. 24Yó buten, yóm sotu tau gel temwél boluyen Dimitriyus. Yó gel nmoen yóm tau yó, gel temwél yó kem ngà gónô udì skél bè yóm gónô gónó le gel tmaba yóm kul dwata bè yó boluyen Artimis, yóm dwata libun bélê le. Ne tey dê tau mò nmò béléen, ne tey wen gel guta le bè kehbalù le du yóm tenwél le yó. 25Gotu sentifun Dimitriyus yó kem tau mò nmò béléen ne yó kem dumu tau hulung temwél, monen mò kul,

“Ó kem dumuhu logi, tngón ye se yóm kendengen tekuy lemwót bè yóm gel nmò tekuy ni. 26Deng ton ye se, ne deng gungol ye yóm kun nmò yóm tau boluyen Pol. Yó gel monen, yóm dwata lenbù nmò tau, sundu tahu Dwata du. Deng tey dê tau hemtahu du yóm toloken yó, là olon bè ni du bè Ifisus, deng dô lengeben klamang prubinsya Asya. 27Ke hlós yóm nmò Pol yó,” mon Dimitriyus, “déke angat sidek nawa yó kem tau bè yóm gel nmò tekuy. Yó bong du he, là wen bud mu le du yóm gónô gónó le gel tmaba ebè Artimis, ne kô lana yóm któtólen, igoen du yóm dwata gel tnaba yó kem tau bè klamangen Asya, balù bè klamangen benwu.”

28Bè yóm kungol le du yóm udél Dimitriyus, ya tey kebut yó kem tau, tódô le gotu hetê, mon le, “Tey tótól Artimis, yóm dwata tekuy kem tau bè Ifisus.” 29Gotu le gbót lembut se kul yó kem dumu tau bè yóm syudad yó, ne gotu le hetê. Tódô senkfô le Gayus ne Aristarkus, yó kem lewu tau mung ke Pol lemwót bè Masdunya. Nit le lu ebè yóm sotu gónô bong gónó le gel stifun skukum. 30Timbow tngón Pol yóm yó, ominen tô mógów etu bélê le, okóm là hlus le du yó kem dumuhen hemtahu. 31Balù yó kem ween wen glal le bè prubinsya, tminok le ebéléen anì hol béen abay mógów bè yó.

32Okóm yó kem tau stifun bè yóm gónô bong yó koni, olo le tódô beyen gotu hetê, ne lelen là senged yóm hentê le. Tey dê bélê le, là kô tngón le du buten yóm kestifun le yó. 33Ofo kul mon du yó kem dumu ke Aliksandér buten, abay se du dók yó kem Ju mdà lem blóng yó kem tey tau wen bè yó. Yó nmò Aliksandér, hdaen hólólen anì teflok udél yó kem tau, abay se wen tô balaen kul. 34Bè yóm kton yó kem tau là Ju le yóm ke Ju Aliksandér, tódô le bud gotu hetê. Botong lewu uras le semsulit du yóm mon le, “Tey tótól Artimis, yóm dwata tekuy kem tau bè Ifisus.”

35Botong mógów elem blóng le yóm sotu tau wen glalen bè yóm syudad yó nan e tenflok lu, monen mò kul, “Ó kem dumuhu bè ni bè Ifisus, tódô tngón kdéen tau yóm kut kesgifà du yóm kun gónô yóm kut dwata Artimis, dalang se yóm botu mtulus btang gu bè longit. 36Là kô gehkéng tau du nim ni. Boluy se ni dum alì henbnes ye ni? Bê ye nmò kut yó dum angat gónón huli sel ye. 37Tódô kem nwit ye edini ni kem lewu tau ni, okóm laen sem dù deng hennagaw le lem gónô yóm dwata tekuy, ne laen se dù sidek udél le gbak etahen. 38Ke wen se tahu duón le Dimitriyus kul, ne yó kem dumuhen tau temwél, yake na le hlan bè yó kem tau mogot kukum. Mdengen se yóm kdaw tekuy gel seyón bè kukum anì hyu semtulón du ke tedu senduón ye. 39Okóm ke wen dumu nóyô sentulón ye, hol na kuy hlan bè yóm gel kiting tekuy du. 40Ngem kà tnafaken tekuy yóm tau hol geta bélê tekuy ke henlós ye yóm nmò ye ni. Ke snólók le bélê tekuy buten nim alì hentê ye ni, tedu se balà ye du?” 41Kogol yóm kudélen yó, ominen gotu hulék kul yó kem tau sbung bè yó.

Currently Selected:

Kul Nmò 19: tbl

Highlight

Copy

Compare