2 Bok Kem Tau Hol Geta 7
7
1Bnalà Ilaysa yóm tau hol geta, monen, “Hol hnungol ye yóm udél lemwót bè Dwata. Yó udélen, monen, Haya lómón ni kmò kdaw, gbek ye ne bemli bè bak tikeb Samarya sgantang arina alì hyu bè tek sotu blówón bukay btesen, senged snéen bè yóm lewu gantang halay barli, bud sotu blówón bukay btesen.”
2Okóm mudél yóm sotu genlal alì snalig yóm tau hol geta yó, monen, “Hol mou kun ne ke dohò yóm yó anien ke lenungkà Dwata yó kem tembó beng bè longit.”
Bnalà Ilaysa se, monen, “Angat tonem he, okóm là kô nam e gken du kóm.”
Kauy yó kem tau Israél gemnóm des mifù bè kamfù yó kem hohon le
3Bè bak tikeb yóm syudad Samarya, wen fat kem tau gemnóm des mifù myón bè yó, ne yó sentulón le, mon le, “Tedum nangat tekuy bè ni ni du? Angat tekuy matay mni kdeng. 4Ke husek tekuy elem syudad tódô tekuy matay bè yó, bà mon yóm tey bitil bong lemen. Okóm ke tódô tekuy hlós myón bè ni, senged nóm, bud tekuy matay snéen. Mom hyu he ke tódô tekuy mógów ebè kamfù yó kem sendalù Aram, heglaan tekuy bélê le. Ke hlowil le tekuy, hyu, okóm ke hnatay le tekuy, kunen ne.”
5Tahu se, bè yóm móyón kkifuhen, mógów le etu bè kamfù kem sendalù Aram yóm fat kem tau gemnóm des mifù yó koni. Okóm bè yóm kkól le ditu, laen kô dù tau ton le bè yó. 6Abay se deng le gotu mlóy yó kem sendalù Aram lan Dwata hfungol du kul yó kem tey uni klitun tók ne legdeg yó kem kudà, ne uni yó kem tey sendalù wen. Yó mon le, “Deng wen tinok yóm tau hol geta bè Israél mò mundug tekuy. Tinoken yó kem tau hol geta bè yó kem tau Hitayt ne yó kem geta bè Idyip, mung kul yó kem sendalù le.” 7Yó gónóm mon bè yóm móyón kifu yó, gotu le mlóy yó kem sendalù Aram, tódô tebel le yóm kamfù le ne kem kudà le ne kem kudà asnu le. Gotu tebel le kdéen, botong le mlóy anì là matay le.
8Bè yóm kgefet le bè kamfù kem tau Aram yó kem tau gemnóm des mifù yó, hnusek le yóm sotu gónó le gel nô yó kem sendalù Aram, omin le tódô kudung mken ne minum, ne gotu nwa le yó kem blówón bukay ne tahu blówón ne yó kem nes ton le bè yó, ne omin le lemwót na le e bnos lu. Omin le bud mulék, bud hnusek le yóm sotu gónó le gel nô yó kem sendalù Aram, ne gotu nwa le yóm kdê ton le lemen, ne senged snéen bud nmò le, gotu bud bnos le lu. 9Omin le stulón, mon le, “Là hyuhen nim nmò tekuy ni. Wen tey hyu tulón tekuy kemdaw ni, ne ke là géhél tulón tekuy du bè kem dumu tekuy efet hlafus, ngem kà tnafak le tekuy. Yó ne, géhél tekuy mulék, tnulón tekuy tu kem tau bè gónô bong yóm tau hol geta.”
10Tahu se, mulék le ebè syudad Samarya, ne gotu tnaba le yó kem tau gel mentey bè bak tikeb yóm syudad yó. Yó mon le mò kul, “Deng me gu bè kamfù yó kem sendalù Aram. Okóm balù sotu tau ke wen ton me bè yó, ne laen se dù gungol me bè yó. Són ton me, són yó kem kudà ne kem kudà asnu fét bè yó, ne sana knóen bè kamfù le yó kem tolda le.” 11Tahu se, lemwót yó kem tau gel mentey bè bak tikeb, gotu le mensag, tódô kendel tulón le ebè tu kem tau nô bè gónô tau hol geta yóm tulón yó.
12Bè yóm kungol yóm tau hol geta du, tódô btik sóól buteng. Yó monen mò yó kem genlalen, “Tulónu kuy yóm eles atul yó kem sendalù Aram. Tngón le yóm deng tey kbitil tekuy, yó gónó le tmebel yóm kamfù le na le e hebnos gu hilol. Yó hendem le hewà tekuy gu lem yóm syudad ni anì mebel tekuy ken ditu bè kamfù le. Omin le yó sut, gotu kenfô le tekuy, ne nled le yóm syudad ni.”
13Yó mon yóm sotu bè yó kem genlalen, “Yake hógów tekuy limu tau kmudà mò hménég ditu gu hilol. Ke hnatay le lu ditu, laen dù gónón stólóng, abay se ke nô le bè ni, bud senged katay le snéen.”
14Tahu se, wen tau nélék le mò mit lewu klitun tók dyol kudà. Hógów yóm tau hol geta lu mò hménég yóm deng gónó le nô yó kem sendalù Aram. 15Ngang le mógów yó kem tau dók le yó koni efet le kól ditu bè Él Jurdan. Bè yóm igò le mógów ton le bè bak lan yó kem nes ne yó kem ngom gbot yó kem tau Aram bè yóm alì klóy le lan Dwata hfungol du kul uni yó kem sendalù kemtes kul. Omin le bud semfulék yó kem tau hógów le yó koni, gotu tulón le bè yóm tau hol geta yóm deng ton le. 16Bè yóm kungol kem tau lem syudad Samarya du yóm tulón le yó, gotu le seklab mlóy etu bè kamfù kem sendalù Aram na le e mebel ken, kihu ton le gotu nwa le. Tahu se, bè yóm kdaw yó, yóm sgantang arina alì hyu, tek sotu blówón bukay btesen, senged se yóm lewu gantang halay barli, bud sotu blówón bukay btesen, hol lómón yóm deng mon Dwata. 17Uma kóm bè bak tikeb yóm syudad yó, hbentey yóm tau hol geta bè yó yóm genlal alì snaligen. Bè yóm kesguku le mlóy yó kem tau, geslob le yóm tau hbentey yóm tau hol geta bè bak tikeb yó koni ne matay.
Tódô uliten bè yóm tehe mon Ilaysa bè yóm kógów yóm tau hol geta ebè gónóen. 18Yakà deng tehe mon Ilaysa du mò yóm tau hol geta, “Haya lómón ni kmò kdaw gbek ye bemli bè bak tikeb Samarya sgantang arina alì hyu, ne tek sotu blówón bukay btesen, senged se yóm lewu gantang halay barli, bud sotu blówón bukay btesen.” 19Yó tehe mon yóm tau genlal bè yóm tau hol geta deng matay yó koni, “Hol mou kun ne ke dohò yóm yó anien ke lenungkà Dwata yó kem tenbó beng bè longit.” Yó deng balà Ilaysa du, monen, “Angat tonem he, okóm là kô nam e gken du kóm.” 20Tahu se, tódô uliten bè yóm mon Ilaysa yó, abay se mom geslob yó kem tey tau wen sguku mlóy mlan bè bak tikeb ne matay yóm tau yó.
Currently Selected:
2 Bok Kem Tau Hol Geta 7: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
2 Bok Kem Tau Hol Geta 7
7
1Bnalà Ilaysa yóm tau hol geta, monen, “Hol hnungol ye yóm udél lemwót bè Dwata. Yó udélen, monen, Haya lómón ni kmò kdaw, gbek ye ne bemli bè bak tikeb Samarya sgantang arina alì hyu bè tek sotu blówón bukay btesen, senged snéen bè yóm lewu gantang halay barli, bud sotu blówón bukay btesen.”
2Okóm mudél yóm sotu genlal alì snalig yóm tau hol geta yó, monen, “Hol mou kun ne ke dohò yóm yó anien ke lenungkà Dwata yó kem tembó beng bè longit.”
Bnalà Ilaysa se, monen, “Angat tonem he, okóm là kô nam e gken du kóm.”
Kauy yó kem tau Israél gemnóm des mifù bè kamfù yó kem hohon le
3Bè bak tikeb yóm syudad Samarya, wen fat kem tau gemnóm des mifù myón bè yó, ne yó sentulón le, mon le, “Tedum nangat tekuy bè ni ni du? Angat tekuy matay mni kdeng. 4Ke husek tekuy elem syudad tódô tekuy matay bè yó, bà mon yóm tey bitil bong lemen. Okóm ke tódô tekuy hlós myón bè ni, senged nóm, bud tekuy matay snéen. Mom hyu he ke tódô tekuy mógów ebè kamfù yó kem sendalù Aram, heglaan tekuy bélê le. Ke hlowil le tekuy, hyu, okóm ke hnatay le tekuy, kunen ne.”
5Tahu se, bè yóm móyón kkifuhen, mógów le etu bè kamfù kem sendalù Aram yóm fat kem tau gemnóm des mifù yó koni. Okóm bè yóm kkól le ditu, laen kô dù tau ton le bè yó. 6Abay se deng le gotu mlóy yó kem sendalù Aram lan Dwata hfungol du kul yó kem tey uni klitun tók ne legdeg yó kem kudà, ne uni yó kem tey sendalù wen. Yó mon le, “Deng wen tinok yóm tau hol geta bè Israél mò mundug tekuy. Tinoken yó kem tau hol geta bè yó kem tau Hitayt ne yó kem geta bè Idyip, mung kul yó kem sendalù le.” 7Yó gónóm mon bè yóm móyón kifu yó, gotu le mlóy yó kem sendalù Aram, tódô tebel le yóm kamfù le ne kem kudà le ne kem kudà asnu le. Gotu tebel le kdéen, botong le mlóy anì là matay le.
8Bè yóm kgefet le bè kamfù kem tau Aram yó kem tau gemnóm des mifù yó, hnusek le yóm sotu gónó le gel nô yó kem sendalù Aram, omin le tódô kudung mken ne minum, ne gotu nwa le yó kem blówón bukay ne tahu blówón ne yó kem nes ton le bè yó, ne omin le lemwót na le e bnos lu. Omin le bud mulék, bud hnusek le yóm sotu gónó le gel nô yó kem sendalù Aram, ne gotu nwa le yóm kdê ton le lemen, ne senged snéen bud nmò le, gotu bud bnos le lu. 9Omin le stulón, mon le, “Là hyuhen nim nmò tekuy ni. Wen tey hyu tulón tekuy kemdaw ni, ne ke là géhél tulón tekuy du bè kem dumu tekuy efet hlafus, ngem kà tnafak le tekuy. Yó ne, géhél tekuy mulék, tnulón tekuy tu kem tau bè gónô bong yóm tau hol geta.”
10Tahu se, mulék le ebè syudad Samarya, ne gotu tnaba le yó kem tau gel mentey bè bak tikeb yóm syudad yó. Yó mon le mò kul, “Deng me gu bè kamfù yó kem sendalù Aram. Okóm balù sotu tau ke wen ton me bè yó, ne laen se dù gungol me bè yó. Són ton me, són yó kem kudà ne kem kudà asnu fét bè yó, ne sana knóen bè kamfù le yó kem tolda le.” 11Tahu se, lemwót yó kem tau gel mentey bè bak tikeb, gotu le mensag, tódô kendel tulón le ebè tu kem tau nô bè gónô tau hol geta yóm tulón yó.
12Bè yóm kungol yóm tau hol geta du, tódô btik sóól buteng. Yó monen mò yó kem genlalen, “Tulónu kuy yóm eles atul yó kem sendalù Aram. Tngón le yóm deng tey kbitil tekuy, yó gónó le tmebel yóm kamfù le na le e hebnos gu hilol. Yó hendem le hewà tekuy gu lem yóm syudad ni anì mebel tekuy ken ditu bè kamfù le. Omin le yó sut, gotu kenfô le tekuy, ne nled le yóm syudad ni.”
13Yó mon yóm sotu bè yó kem genlalen, “Yake hógów tekuy limu tau kmudà mò hménég ditu gu hilol. Ke hnatay le lu ditu, laen dù gónón stólóng, abay se ke nô le bè ni, bud senged katay le snéen.”
14Tahu se, wen tau nélék le mò mit lewu klitun tók dyol kudà. Hógów yóm tau hol geta lu mò hménég yóm deng gónó le nô yó kem sendalù Aram. 15Ngang le mógów yó kem tau dók le yó koni efet le kól ditu bè Él Jurdan. Bè yóm igò le mógów ton le bè bak lan yó kem nes ne yó kem ngom gbot yó kem tau Aram bè yóm alì klóy le lan Dwata hfungol du kul uni yó kem sendalù kemtes kul. Omin le bud semfulék yó kem tau hógów le yó koni, gotu tulón le bè yóm tau hol geta yóm deng ton le. 16Bè yóm kungol kem tau lem syudad Samarya du yóm tulón le yó, gotu le seklab mlóy etu bè kamfù kem sendalù Aram na le e mebel ken, kihu ton le gotu nwa le. Tahu se, bè yóm kdaw yó, yóm sgantang arina alì hyu, tek sotu blówón bukay btesen, senged se yóm lewu gantang halay barli, bud sotu blówón bukay btesen, hol lómón yóm deng mon Dwata. 17Uma kóm bè bak tikeb yóm syudad yó, hbentey yóm tau hol geta bè yó yóm genlal alì snaligen. Bè yóm kesguku le mlóy yó kem tau, geslob le yóm tau hbentey yóm tau hol geta bè bak tikeb yó koni ne matay.
Tódô uliten bè yóm tehe mon Ilaysa bè yóm kógów yóm tau hol geta ebè gónóen. 18Yakà deng tehe mon Ilaysa du mò yóm tau hol geta, “Haya lómón ni kmò kdaw gbek ye bemli bè bak tikeb Samarya sgantang arina alì hyu, ne tek sotu blówón bukay btesen, senged se yóm lewu gantang halay barli, bud sotu blówón bukay btesen.” 19Yó tehe mon yóm tau genlal bè yóm tau hol geta deng matay yó koni, “Hol mou kun ne ke dohò yóm yó anien ke lenungkà Dwata yó kem tenbó beng bè longit.” Yó deng balà Ilaysa du, monen, “Angat tonem he, okóm là kô nam e gken du kóm.” 20Tahu se, tódô uliten bè yóm mon Ilaysa yó, abay se mom geslob yó kem tey tau wen sguku mlóy mlan bè bak tikeb ne matay yóm tau yó.
© 2007, Wycliffe Bible Translators, Inc. All rights reserved.