2 Kurin 3

Yó kem tau hból du yóm lomi lan nmò Dwata

1Sundu yó gónóhu mon du tum monu tu koni ke udélu hton salù. Bè yóm gel kógów me ebélê ye, laen dù mu me du kum ke wen sulat nwit me mò gónó ye milô kum. Ne sotuhen, bè yóm kógów me ebè yó kem dumu benwu, là kô hsulat me kuy snéen mò nit me. 2Deng duhen yu se henged sulat deng hol nô bè nawa me mò gónó le dmilô kum yóm kdéen tau. 3Nim sulat monu ni, mahil dmilô du ke Krays fen smulat du, ne olon heted du kum. Bede là kô lan tdok du, kaem Tulus Dwata mò du, yóm Dwata laen dù tul katayen. Ne là se kô snulaten du bè botu kufil, kaem lem hendem ye gónón smulat du.

4Yó gónó me mon du nim ni koni, lemwót bè yóm kgel nawa me ke Dwata mlan bè yóm deng kehtahu me ke Krays. 5Bè ni kem deng nmò me lem blóng ye ni, là kô gbek me mon du lemwót bè kum kegbek, abay se là kô gbek me mò du se kum yóm yó. Kaem tódô lemwót bè yóm kenhulung blay Dwata kum. 6Deng benlayen mi khulung tmulón du yóm lomi lan nmoen mò lan tau ebéléen. Là hlanen du bè yóm gna hlau snulaten, abay se yóm gna hlau yó, són mit tau elem hatay kun nmò. Okóm nim lomi lan nmò Dwata ni, hlanen bè Tulusen, ne gbeken mit tau ebè yóm klowil laen dù sónen.

7Bè yóm tehe kehsulat Dwata du ke Musis bè botu kufil yóm hlau gnan, tey keslinang lem uyó Musis, lemwót bè yóm kloni Dwata béléen. Balù yóm konol yóm keslinang lem uyó Musis, ewenem sana là kegbek le temngel ebéléen yó kem tau Israél, bà mon yóm tey keslinang lem uyóhen. Ke yó se kmoen bè yóm tehe keblay Dwata yóm hlau mit hatay, 8milud he kehegfan Dwata du yóm keslinang yóm kfasang yóm lomi lan nmoen hlanen bè yóm Tulusen. 9Ke wen tey keslinang yóm kfasang Dwata gfan bè yóm hlau mit hatay, milud he keslinang yóm kfasangen yóm lomi lan nmoen mò gónó le mowil. 10Bè ktahuhen, lemwót bè yóm tey kehyu yóm keslinang hegfan Dwata nim kmoen ni, deng mom tódô lana ne kun tum gna slinang tu ekni. 11Ke wen se yóm slinang Dwata mung bè yóm hlau olo kem hlunen, milud he keslinangen bè yóm lan lomi nmoen, abay se laen kô tul sónen yóm lan lomi nmoen yó.

12Lemwót bè nim ken-gel nawa me ni, yó gónó me là lengayà bemkas du bélê ye yóm tulón nwit me. 13Tólóng se tu dum ke Musis ekni. Wen nes sengen bè uyóhen anì là dilô kem tau Israél du yóm kinut klana yóm keslinang lem uyóhen. 14Ne yó kem tau Israél ekni, là kô glileb le du yóm hmò Dwata ke Musis lem blóng le, hol lómón ke wen seng bè kehedem le. Balù nim kmoen ni, sok gel senfala le yóm tehe hsulat Dwata ke Musis ekni, là kô glileb le du, abay se monem tolo wen seng bè kehedem le. Tek són bè yóm kessotu le bè Krays gónón mkó yóm seng yó. 15Balù nim kmoen ni, sok senfala le yóm hlau Musis, hol lómón ke tolo wen seng bè kehedem le.

16Okóm wen lan mkó du yóm seng yó. Hol lómón yóm tehe monen bè Sulat Dwata gbak ebè Musis, yó monen, “Tódô kóhen yóm nes sengen bè uyóhen bè yóm bud kebeklilen ebè yóm gónón mogot.” 17Yóm gónó mogot monen yó, du se yóm Tulus Dwata. Ne ke deng nô bélê tekuy yóm kun Tulus yóm gónó tekuy mogot, là bud tekuy gfét du ne yóm hlau gnan. 18Duhen yó, kdê tekuy deng hemtahu, deng gfan lem uyó tekuy ne yóm kun keslinang yóm gónó tekuy mogot, ne laen kô dù bud sengen ne. Yóm gfan bélê tekuy yó, hol lemwót gu bè yóm gónó tekuy mogot. Bè yóm igò tekuy temngel ebéléen, igoen hembaling tekuy mò mkél béléen, ngangen mò du efet tekuy hol mkél du. Yóm gónó tekuy mogot yó, du se yóm hol Tulus Dwata.

Currently Selected:

2 Kurin 3: tbl

Highlight

Copy

Compare