2 Tutul Israél 30
30
Eles kehtifes le bè Kdaw Khius
1Wen udél hwit Hisikaya ebè klamang benwu Israél ne benwu Juda, ne wen kem sulat hwiten ebè yó kem tau ból Ifraim ne ból Manasi, tinoken lu anì gotu le mógów ebè Gónô Dwata bè Jirusalim yóm kdê le na le e bud hnigal yóm Kdaw Khius Dwata yóm Dwata yó kem tau Israél. 2Deng eles natul Hisikaya yóm tau hol geta ne yó kem genlalen ne yóm kdéen tau bè Jirusalim yóm kehligal le yóm Kdaw Khius bè yóm gwoluhen bulón. 3Là gbek le hmigal du bè yóm kun tahu bulón, abay se là hol le wen yó kem tau gel blóng ebè Dwata deng hfólós knô, ne là deng le stifun bè Jirusalim yóm kdéen tau. 4Yóm atul le bè Kdaw Khius yó, deng knotuk yóm tau hol geta dalang se yó kem tau. 5Duhen yó, heglalag le bè klamang Israél, lenwóten bè Birsiba fi leged efet kól etu bè Dan fi bwak yóm gotu ktinok le yóm kdéen tau anì mógów le ebè Jirusalim na le e hnigal yóm kun Kdaw Khius Dwata yóm Dwata yó kem tau Israél. Bè yó kem halay gnan, là kô deng du ni he kwen yó kem tau hmigal du yóm Kdaw Khius, lómón yóm hloloen kul bè hlau Dwata.
6Lemwót bè udél yóm tau hol geta, wen kem tau hógówen ebè klamang Israél ne Juda. Wen sulat hwiten kul, yó udél nô lemen,
“Ó kem tau Israél, tekuy kem dù mowil lem hólól yóm tau hol geta bè Asirya, semfulék ye ebè Dwata ne yóm Dwata Abraham, Isak ne Israél anì bud semfulék ebélê tekuy. 7Bê ye mkél bè yó kem fù ye ne bè yó kem dumu ye, deng mom tebel le Dwata yóm Dwata yó kem tehe fù le, ne deng tey ktafak Dwata kul, lómón yóm deng ton ye ni. 8Bê ye hgel kulu ye, lómón yóm tehe kul kgel kulu, okóm nimón ye Dwata. Mógów ye ebè kun Gónô yóm deng hetfingen, ne deng hólósen laen kô dù tul sónen. Tmaba ye ebè yóm sana kuy Dwata hol gónó mogot anì mkó ta ye yóm tey kebuten kuy. 9Abay se ke semfulék ye ebè Dwata, yó kem dumu ye ne yó kem ngà ye deng negef le, baling hyu kmò le ebélê le yó kem tau megef kul, ne angat le bud semfulék edini bè nim benwu ni. Abay se yóm sana kuy Dwata hol gónó mogot, tey hyu kmoen, ne hulung kmodu. Ke semfulék ye ebéléen, là kô bud knogolen kuy.”
Kehligal le yóm Kdaw Khius
10Lemwót yó kem tau hógów yóm tau hol geta yó koni, mógów le ebè ket benwu bè klamang tonok Ifraim ne Mansai efet kól etu bè kun tonok snakuf Sibulun. Okóm deng mom senkuli le lu yó kem tau, deng mom sendekà le lu. 11Tek udì néen lemwót gu bè benwu Asér ne Manasi ne Sibulun heglaan knô, ne mógów ebè Jirusalim. 12Bè yóm kdaw yó, wen nmò Dwata bè yó kem tau bè Juda, benlayen lu kessotu nawa mimón du yóm udél yóm tau hol geta ne yó kem genlalen kem tau deng lemolò yó kem hlolò Dwata. 13Tahu se, tey tau wen stifun ebè Jirusalim bè yóm gewuhen bulón na le e hnigal yóm Kehligal bè yóm Mambang Laen dù Bulung Henoken. 14Gotu kó le yó kem gónó le gel demsù ebè yó kem dwata kéng, ne gotu bot le lu etu bè Datal Kidron.
15Bè yóm gesfoloen fat kdaw bè yóm gewuhen bulón, hnatay yó kem tau yó kem ngà ubiha dsù le bè yóm Kdaw Khius. Tey sidek kyak yó kem tau gel blóng ebè Dwata ne yó kem sfu Libay là deng hfólós le du knô le. Yó gónó le hol hfólós knô le ne demsù le yóm dsù hkekeb ebè Dwata bè yó bè kun Gónô. 16Tódô le nô bè yóm kul gónó nô bè yó bè Gónô Dwata, ulit le bè yóm Hlau Musis yóm tau Dwata. Nwit yó kem sfu Libay ebè yó kem tau gel blóng ebè Dwata yóm litô yó kem ógóf dsù le ebè Dwata anì hetsik le ta yóm gónó gel demsù.
17Lemwót bè yóm tey kwadag yó kem tau bè yó yóm là deng hólós le du knô le, yó nmò yó kem sfu Libay, lu hmatay du bélê le yó kem ubiha dsù le bè yóm Kdaw Khius anì mólós kton Dwata kul. 18Tey dê bélê le yóm là deng hfólós knô lemwót gu bè benwu Ifraim, ne Manasi, ne Isakar, ne Sibulun. Okóm yó nmò Hisikaya yóm tau hol geta, mni bélê le bè Dwata anì gbek le mken du yóm ken bè Kdaw Khius, balù yóm là kehyuhen bè yóm hlolò Dwata bè yó kem kun tau. Abay se yó mon Hisikaya, “Balù yóm là deng kehfólós le, yó hem Dwata alì hyu hol hmifót kul 19yó kem tau hol nô bè nawa le lemolò ke Dwata yóm Dwata yó kem tehe fù le.” 20Ne hnungol Dwata yóm kni Hisikaya yó, ne hnifóten yó kem tau.
21Duhen yó, hitu kdaw yó kem tau stifun bè Jirusalim hmigal du yóm Kehligal bè yóm Mambang Laen Dù Bulung Henoken. Ket kdaw yó kem sfu Libay ne yó kem tau gel blóng ebè Dwata semngal ebè Dwata, hmung le bè yóm tey uni yó kem gel huni le. 22Tey kdóyón Hisikaya kul yó kem sfu Libay bè yóm tey dê kenhulung hegfan le bè yóm kmò le nmò bè Dwata. Duhen yó, hitu kdaw le mò du yóm kehligal yó. Dsù le yóm dsù mit sefyu ebè Dwata, ne gotu benkas yó kem tau ebè Dwata yó kem salà le bè yóm Dwata yó kem tehe fù le.
23Yó bud atul yóm kdéen tau Israél stifun bè yó, bud tennù le hitu kdaw yóm kehligal le yó. Ya tey kehligal le bè yóm bud kestifun le yó. 24Botong lemibu safì tudu ne hitu libu ubiha tódô blay Hisikaya mò dsù ebè Dwata. Dalang se yó kem genlalen, bud le bemlay se kul lemibu safì tudu ne sfolò libu ubiha. Bud tey dê tau blóng ebè Dwata hfólós knô.
25Ya tey kehligal yóm kdéen tau Juda stifun ebè yó, gomong yó kem tau gel blóng ebè Dwata, ne yó kem sfu Libay, ne yóm kdê tau lemwót bè benwu Israél fi bwak, balù yó kem tólóng tau mung bélê le bè yó, ne yó kem tólóng tau menwu bè Juda, ya tey kehligal le yóm kdê le. 26Tey kehligal bong yóm kehligal le bè Jirusalim yó. Laen dù deng hnikót mò du bè Jirusalim he nim kehligal lómónen ni lenwóten bè yóm tehe kun kdaw kogot bè Israél Selumun yóm ngà Dabid yóm tau hol geta. 27Yó kem tau gel blóng ebè Dwata ne yó kem sfu Libay, mni le ebè Dwata bè yó kem tau, ne hnungol Dwata ditu bè gónón nô bè longit yóm kni le yó.
Currently Selected:
2 Tutul Israél 30: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
