2 Tutul Israél 27
27
Kogot Jutam yóm benwu Juda
1Yóm kbut Jutam mogot benwu, deng lewu folò limu ne halayen, ne yó kegenen mogot benwu sfolò nem halay ne bè Jirusalim gónóhen nô. Yó boluy yéen, Jirusa ngà Sadok. 2Kdê yó kem nmò Jutam tey hyu kton Dwata du, lómón yóm nmò Usiya yóm kun mà. Okóm ke Jutam là kô nmoen du yóm salà nmò maen bè yóm tódô ktemen insinsu bè Gónô Dwata. Okóm yó kem tau nogoten mom senflós le mò du yóm sidek.
3Bud hetlob hefdà Jutam yóm Bak Tikeb Fi Leged bè yóm gónô Dwata, ne bud hetlob hlamangen yóm beng bè yóm buntud boluyen Ofél bè Jirusalim. 4Bud du snéen hemdà yó kem syudad bè yó kem bulul lemnek bè Juda, ne wen kem gónô hofin ne kem gónô geta mò gónô mentey hefdaen bè yó kem benwu wen koyuhen. 5Nit Jutam sgida yó kem tau Amun, ne gemmò bélê le. Nbuten bè yóm halay yó, yóm bwis bnayad le béléen yó kem tau Amun, wen dô fat libu kilu blówón bukay, ne limu folò libu sakù halay wit, ne limu folò libu sakù halay barli. Ngang le tendo mayad bwis yó kem tau Amun efet tlu halay.
6Duhen yó, sónmoen temnù kbegelen mogot benwu Jutam, abay se tey ketgamahen du yóm kloloen yóm kun Dwata gónó mogot.
7Yó kem dumu nmò Jutam bè yóm klawihen kmamal benwu, gomong yó kem gel kwiten sgida ne yó kem dumu gendengen, deng gotu snulat bè yóm bok boluyen Tutul yó kem Tau Geta bè Israél ne Juda. 8Bè yóm kbalingen tau hol geta, deng lewu folò limu ne halayen, ne yó kegenen mogot benwu sfolò nem halay ne bè Jirusalim gónón nô. 9Bè yóm katay Jutam, lebeng le bè Syudad Dabid, ne yó bud tles tau hol geta, duhen Ahas yóm ngaen.
Là gomongen bè nili yóm tsaptér 28. Yó tulónen bè ni yóm ketles kogot Ahas yóm benwu Juda. Bè yóm kbut kkamalen du deng lewu folò ne halayen, ne yó kegenen kmamal sfolò nem halay. Là kô nmoen du se kun yóm gónón hligal Dwata, deng mom tmaba ne demsù ebè Baal. Balù yóm kun ngà botong gbeken demsù du ebè Baal. Tey dê dwata gónó Ahas e tmaba ne demsù. Deng mom nwiten lu là bud teneb bè Dwata yó kem tau Israél. Du se htikeb du yóm Gónô Dwata, gotu lenusoken yó kem kimu ken nô lemen. Yó gónó Dwata alì lembut du, hlusen yó kem tey dê tau hol geta hmilol mò gmida kul, ne là kô le gemmò yó kem tau Israél. Yóm kdê dumu nmò Ahas deng gotu snulat lem yóm Bok yó kem Tau Geta bè Israél ne bè Juda.
Currently Selected:
2 Tutul Israél 27: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
