2 Tutul Israél 25
25
Kogot Amasaya yóm benwu Juda
1Bè yóm kbut Amasaya mogot benwu, deng lewu folò limu ne halayen, ne yó kegenen kmamal benwu botong lewu folò syóm halay, ne bud bè Jirusalim se gónón nô. Yó boluy yéen, duhen Jihuyadin libun lemwót bè Jirusalim. 2Nmò Amasaya yóm hyu bè kton Dwata du, okóm là holen lemwót lem but blututen.
3Timbow deng mbegel kogot Amasaya benwu, gotu hfatayen yó kem tau tehe hmatay ke maen. 4Okóm là hnatayen du yó dum kem ngà le, abay se loloen yóm hlau Dwata snulat bè Bok Hlau Musis, yóm monen, “Yó kem tuha, là hnatay kul ke lemwót bè salà yó kem ngà le. Ne yó kem ngà, là hnatay kul ke lemwót bè salà yó kem tuha le. Yóm tau gemsalà, yó se hnatay.”
5Yó bud nmò Amasaya, gotu sentifunen yóm kdê logi lemwót bè tbong Juda ne bè tbong Bindyamin, nólólen lu bè libuhen ne bè latuhen, ne wen halaken kul. Ominen hlista kul, ne botong tlu latu libu logi deng lewu folò halayen duhen ke mukas, gembek mung bè gida, ne deng le gotu hulung mogot buyus ne klung. 6Ne bud wen sendalù lemwót bè Israél nwahen, yóm deng alì layam bè gida, ne wen dô fat libu kilu blówón bukay blayen kul mò sukéy le.
7Okóm wen tau Dwata sut béléen, ne monen mò du, “Ó Sér, hol béem abay nit yó kem sendalù Israél, abay se là kóen nô bè yó kem tau bè Israél Dwata. Là kô tnóbóngen kul yó kem sendalù semfu gu bè Ifraim.” 8Ke hmungem lu bè yó kem kóm sendalù ebè gida, balù nô khulung ye sfatay, là kô ye gemmò. Angat blay Dwata uu elem hólól yó kem hohonem, abay se yóm Dwata wen kfasangen gemmò, ne wen se kfasangen hegmò yó kem hohonem.
9Snólók Amasaya yóm tau Dwata yó, “Tedu tô kmou du se yóm tey blówón bukay deng blayu yó kem sendalù Israél mò sukéy le?”
Bnalà yóm tau Dwata, monen, “Glukas bè yó he yóm bud blay Dwata kóm.” 10Tahu se, gotu bud hulék Amasaya yó kem sendalù semfu gu bè Ifraim. Bè yóm kulék le, tey sidek kebut le bè yó kem tau Juda.
11Tey kehfól Amasaya nawahen, ne nalaken yó kem sendaluen ebè Datal Kahì. Bè yó gónó le sfatay kem tau Idom, ne botong sfolò libu sendalù hnatay le lemwót bè Sér. 12Ne bud sfolò libu se tau kenfô yó kem sendalù Juda, ne nwit le lu etu ta bè tubaw léhék, omin le hebtang kul etlem ta botu, ne gotu le matay.
13Okóm yó kem sendalù Israél deng hulék Amasaya, deng mom hnusek le yó kem syudad bè Juda nô lem blóng yóm syudad Samarya efet kól etu bè Bit-horon, botong tlu libu tau hnatay le bè yó, ne tey kimu wen negef le.
14Bè yóm kulék Amasaya gu bè gida gemmò bè yó kem tau Idom, nwiten mulék yó kem dwata lennged gel tnaba yó kem tau bè Sér. Nmoen lu mò dwatahen ne tmaba ne demsù ebélê le. 15Ya tey kebut Dwata ke Amasaya bè yóm nmoen yó, yó gónón hógów ebéléen yóm sotu tugoden. Yó monen mò ke Amasaya, “Moen ni du ke tmabahi ebè yó kem dwata là gbek le lemwà yó kem kul tau lem hólólem?”
16Okóm yóm igoen tolo mudél, yóm tau Dwata yó, tódô kendel tenbleng yóm tau hol geta, monen, “Deng nélék me uu kô mò gónón hmungol hlau yóm tau hol geta? Béi abay bud mudél, déke hfatayu uu.”
Duhen yó, tódô mulék yóm tugod Dwata yó, bede wen eles hetgamahen yóm tau hol geta, monen, “Tngónu deng eles nô bè nawa Dwata ne gemlà kóm bè nim nmoem ni, là kô dog hnungolem du yóm hlauhu kóm.”
17Ominen wen atul le Amasaya yóm tau hol geta ne yó kem tau gónón hmungol hlau. Wen udél hwiten ebè Jihuas yóm tau hol geta bè Israél, yóm ngà Jihuahas témê Jihu anì nbóten sfatay, monen, “Géhéli, ston te bè yóm gónó sgida.”
18Okóm yó balà Jihuas yóm tau hol geta bè Israél ke Amasaya yóm tau hol geta bè Juda, bede hmungen bè hlingón, monen, “Ditu bè Bulul Libanun, hemwit udél ebè koyu sidar yóm ngà koyu semnual, monen, ‘Hyehenem yóm ngau logi yóm ngaem libun.’ Okóm kendel wen ógóf lem bnes mlan bè yó, ne gotu sninà ndaen yóm ngà koyu semnual yó. 19Tey keheklabakem bè yóm kegmoem bè yó kem tau Idom, okóm ni se dou hlau kóm, tódói nô bè yó ne. Moen ke hegfaem knóem ne bud hegfaem yó kem tau bè Juda?”
20Okóm là kô hnungol Amasaya du, abay se deng kun kmò du Dwata mò gónón gemlà du bè yóm ktabahen ebè yó kem dwata bè Idom. 21Duhen yó, lemwót Jihuas yóm tau hol geta bè Israél, mung du yó kem sendaluen nundug le Amasaya yóm tau hol geta bè Juda. Sfatay le bè yó bè Bét-simés glem lem Juda. 22Là kô le gemmò yó kem sendalù Juda bè yó kem sendalù Israél, ne gotu le mlóy mulék yó kem sendalù Juda. 23Ne bè yó bè Bét-simés, kenfô Jihuas Amasaya ne nwiten mulék ebè Jirusalim. Ominen hegbà du bè yó kem sendaluen yóm beng hmilol Jirusalim lemwót bè yóm bak tikeb boluyen Bak Tikeb Ifraim efet kól bè yóm sotu bak tikeb boluyen Bak Tikeb bè Sokok Beng. Yó Ktahaen yóm beng genbà le yó, dô lewu latu mitruhen. 24Gotu negefen yó kem tahu blówón ne blówón bukay tonen bè Gónô Dwata, homongen yóm kdê kimu nô bè Gónô Dwata, gel nofin yóm sotu tau boluyen Ubid-idom. Bud negefen snéen kdê yó kem kimu mebtes bè gónô bong yóm tau hol geta, gomong negefen yó kem tau tonen bè yó. Ominen mulék ebè Samarya.
25Kogol katay Juas yóm tau hol geta bè Israél, sfolò limu halay Amasaya he ne bud mowil yóm tau hol geta bè Juda. 26Yó kem dumu nmò Amasaya, nbuten bè kbuten efet kól bè sónen, deng gotu snulat le bè yóm bok boluyen Tutul yó kem Tau Hol Geta bè Juda ne bè Israél. 27Lemwót bè yóm kdaw kkogol Amasaya ke Dwata, wen kem tau bè Jirusalim matul hmatay du, yó gónón mlóy ebè Lakis. Okóm ktes le etu, ne ditu gónó le hmatay du. 28Nwit le mulék ebè Jirusalim, lulón le bè kudà, ne lebeng le bè syudad Dabid bè yóm gónó le lembeng yó kem fuen.
Currently Selected:
2 Tutul Israél 25: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
