2 Tutul Israél 24
24
Ketlob Juas yóm Gónô Dwata
(2 Bok Kem Tau Hol Geta 12:1-16)
1Bè yóm kbut Juas mogot benwu, hanà hitu he halayen, ne yó kegenen kmamal benwu fat folò halay, ne bè Jirusalim gónón nô. Yó boluy yéen Sibya libun lemwót bè Birsiba. 2Tey tilob kton Dwata du yó kem gel nmò Juas yóm klawihen mowil Jihuyada yóm tau blóng le ebè Dwata. 3Wen lewu libun hyehen Jihuyada ke Juas, ne yó gónón wen kem ngaen logi ne kem ngaen libun.
4Kogolen bè yó, hendem Juas yóm bud ketloben yóm Gónô Dwata. 5Gotu sentifunen yó kem tau gel blóng ebè Dwata ne yó kem sfu Libay, monen mò kul, “Mógów ye ebè yóm kdéen syudad bè klamang Juda, sentifun ye yó kem bwis gel blay yó kem tau Israél ket halay anì tenlob tekuy yóm Gónô yóm kut Dwata. Ne hol géhél nmò ye yóm hmou kuy ni.” Okóm là kô géhél nmò le du yó kem sfu Libay.
6Duhen yó, htaba yóm tau hol geta Jihuyada yóm geta bè yó kem tau gel blóng ebè Dwata, ne monen mò du, “Moen de ke là dókem kul yó kem sfu Libay anì sentifun le yó kem filak bwis le bè Gónô Dwata yó kem tau bè Juda ne bè Jirusalim? Igò Musis deng tehe hlolò du bè yó kem tau Israél mò temlob yóm Gónô gónóhen nô yóm Slungan Fasad.”
7Bè yó kem gnan halay, tódô le husek elem Gónô Dwata yó kem tau lemolò ke Atalaya yóm libun alì sidek nmoen, ne gotu nwa le yó kem kimu nô lem yóm Gónô Dwata deng tehe hetfing le ebè Dwata, mò ngom le bè yóm ktaba le ebè Baal. 8Duhen yó, wen kahun hmò Juas yóm tau hol geta mò gónó kem tau hemsù filak, ne sù le bè lewà yóm tikeb gónó kem tau gel mlan bè yóm kógów le ebè Gónô Dwata. 9Ominen heglalag du bè klamang Juda ne bè Jirusalim anì hol nwit le ebè Dwata yóm bwis tehe hlolò Musis yóm tóbóng lówó Dwata, yó kem tau Israél bè yóm tehe knô le ditu bè yóm benwu laen hol wen tauhen. 10Ya tey kehligal le du yó kem tmuha gel malak ne yóm kdê tau, ne gotu nwit le ebè Dwata yóm bwis le, ne hosok le bè yóm kahun, efet hnok.
11Ke deng hnok yóm kahun yó, omin kem sfu Libay mit du ebè yó kem tau genlal yóm tau hol geta. Yó fen msó du yóm filak yó, duhen yóm tau gel smulat bè kukum lewu le yóm genlal bè yóm tau hol geta bè yó kem tau gel blóng ebè Dwata. Omin le bud hulék du yóm kahun ebè yóm gónón nô bè Gónô Dwata. Tódô ket kdaw le mò du yóm yó, tey filak wen yóm sentifun le. 12Lemwót yóm tau hol geta lewu le Jihuyada, blay le yóm filak yó ebè yó kem tau gónón gsigang yóm nmò anì lu fen mebel kem tau hulung semsodò botu ne yó kem tau hulung hemdà gónô mò temlob yóm Gónô Dwata. Bud le mebel snéen yó kem tau wen kenhulung le bè bala tók ne bè tembaga mò tlob yóm gónô Dwata.
13Duhen yó, tey kmò le nmò yó kem tau gónón gsigang yóm ketlob yóm Gónô Dwata, ne yó gónón hlós wen gendeng le bè yóm kmò le nmò yó. Yóm ketlob le du yó, tódô ulit le bè yóm sana kun kmò bè kbuten, ne tey kehbegel le du. 14Tikóng deng ketlob le du yóm Gónô Dwata, lemwót yóm dù filak bud nwit le ebè yóm tau hol geta lewu le Jihuyada. Yó mu le du mò bli le tahu blówón ne blówón bukay mò hmò le yó kem kimu mò nô lem yóm Gónô Dwata, yó kem wen mu le du bè yóm ktaba le ebè Dwata, ne bè yóm gel kedsù le ebéléen yóm dsù hkekeb, ne bè yóm gel kken le bè yó, gotu nmò le bè blówón bukay ne tahu blówón. Yóm klawi Jihuyada mowil, senflós le demsù du yóm dsù hkekeb le ebè Dwata bè yó lem Gónô Dwata.
15Tey tahà ktau Jihuyada, ne song matay deng lematu tlu folò halayen. 16Lebeng le bè yóm gónó le lembeng yó kem tau hol geta bè syudad Dabid, abay se hono hyu yóm kdê nmoen bè Israél, ne yóm nmoen bè Dwata ne dalang se bè yóm Gónóen.
17Okóm kogol yóm katay Jihuyada, mógów le ebè Juas yóm tau hol geta yó kem genlal bè Juda, ne mtud le bukol bè soluhen, nubug le anì hmungol hlau bélê le. 18Yó atul le, tódô bayà le yóm Gónô Dwata, ne yóm Dwata yó kem tehe fù le, ne tmaba le ebè yóm hehek yóm dwata libun boluyen Asira ne bè yó kem dwata lennged. Bè yóm salà nmò le yó, tey kebut Dwata kul yó kem tau bè benwu Juda ne bè Jirusalim. 19Okóm wen kem tugoden hógów Dwata elem blóng le mò bud mit kul semfulék ebéléen, okóm là kô hnungol le kul balù yóm eles kehetgama le kul.
20Ominen sut yóm Tulus Dwata bè Sikaraya yóm ngà Jihuyada logi ne yóm tau blóng ebè Dwata. Tódô mdà Sikaraya bè solu yó kem tau, yó udélen, “Ni se udél Dwata. Moen de ke là nimón ye du yóm hlau Dwata kuy? Ke yó se nmò ye, là kóen hyu klowil ye. Lemwót bè yóm deng kekbê ye ke Dwata, deng kenbéen yu se kuy.”
21Okóm natul hnatay le Sikaraya yó kem tmuha gel malak, dalang se ke Juas yóm tau hol geta, gloken mdók kul anì sentudà le botu bè yó bè lósól yóm Gónô Dwata efet matay. 22Là kô hendem Juas du yóm tey kehyu nawa Jihuyada ebéléen yóm mà Sikaraya, mom hnatayen yóm ngaen. Bè yóm katay Sikaraya, yó monen, “Ton Dwata he yóm nmò ye ni, ne du meles kuy.”
Kegesón yóm kogot Juas benwu
23Timbow bè kdeng yóm halay yó, nundug le Juas yó kem sendalù Aram. Nundug le Juda ne Jirusalim, ne gotu hnatay le yóm kdê genlal bè yó. Ne gotu hwit le mulék ebè yóm tau hol geta bélê le bè Damaskus yóm kdê negef le bè yó. 24Balù yóm là kwen le mundug yó kem sendalù Aram, okóm tnóbóng Dwata lu gemmò bè yó kem tey sendalù wen bè Juda, abay se deng tebel Dwata yó kem tau bè Juda, yóm Dwata yó kem tehe fù le. Duhen yó, gefet bè Juas yóm tau hol geta yóm tafak Dwata du.
25Bè yóm kulék yó kem sendalù Aram, tódô tebel le Juas igò tey halien. Okóm deng eles natul yó kem genlalen yóm khatay le du, duón le du yóm khatayen yóm ngà Jihuyada yóm tau blóng ebè Dwata. Tódô hnatay le Juas yóm tau hol geta bè gónón tungô. Omin le lembeng du bè syudad Dabid, okóm là lebeng le du bè yóm gónó le lembeng yó kem tau hol geta. 26Yó kem tau hmatay du, duhen le Jusabad ngà yóm libun lemwót bè Amun boluyen Simyat, ne Jihusabad ngà yóm libun lemwót bè Muab boluyen Sirit.
27Yóm kdê nmò yó kem ngà Juas, ne yó kem eles htulón Dwata gbak etahen, ne yóm ketloben yóm Gónô Dwata, deng gotu snulat bè yóm bok boluyen Tutul yó kem Tau Geta. Bè yóm deng katay Juas, yó bud tles tau hol geta yóm ngaen boluyen Amasaya.
Currently Selected:
2 Tutul Israél 24: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
2 Tutul Israél 24
24
Ketlob Juas yóm Gónô Dwata
(2 Bok Kem Tau Hol Geta 12:1-16)
1Bè yóm kbut Juas mogot benwu, hanà hitu he halayen, ne yó kegenen kmamal benwu fat folò halay, ne bè Jirusalim gónón nô. Yó boluy yéen Sibya libun lemwót bè Birsiba. 2Tey tilob kton Dwata du yó kem gel nmò Juas yóm klawihen mowil Jihuyada yóm tau blóng le ebè Dwata. 3Wen lewu libun hyehen Jihuyada ke Juas, ne yó gónón wen kem ngaen logi ne kem ngaen libun.
4Kogolen bè yó, hendem Juas yóm bud ketloben yóm Gónô Dwata. 5Gotu sentifunen yó kem tau gel blóng ebè Dwata ne yó kem sfu Libay, monen mò kul, “Mógów ye ebè yóm kdéen syudad bè klamang Juda, sentifun ye yó kem bwis gel blay yó kem tau Israél ket halay anì tenlob tekuy yóm Gónô yóm kut Dwata. Ne hol géhél nmò ye yóm hmou kuy ni.” Okóm là kô géhél nmò le du yó kem sfu Libay.
6Duhen yó, htaba yóm tau hol geta Jihuyada yóm geta bè yó kem tau gel blóng ebè Dwata, ne monen mò du, “Moen de ke là dókem kul yó kem sfu Libay anì sentifun le yó kem filak bwis le bè Gónô Dwata yó kem tau bè Juda ne bè Jirusalim? Igò Musis deng tehe hlolò du bè yó kem tau Israél mò temlob yóm Gónô gónóhen nô yóm Slungan Fasad.”
7Bè yó kem gnan halay, tódô le husek elem Gónô Dwata yó kem tau lemolò ke Atalaya yóm libun alì sidek nmoen, ne gotu nwa le yó kem kimu nô lem yóm Gónô Dwata deng tehe hetfing le ebè Dwata, mò ngom le bè yóm ktaba le ebè Baal. 8Duhen yó, wen kahun hmò Juas yóm tau hol geta mò gónó kem tau hemsù filak, ne sù le bè lewà yóm tikeb gónó kem tau gel mlan bè yóm kógów le ebè Gónô Dwata. 9Ominen heglalag du bè klamang Juda ne bè Jirusalim anì hol nwit le ebè Dwata yóm bwis tehe hlolò Musis yóm tóbóng lówó Dwata, yó kem tau Israél bè yóm tehe knô le ditu bè yóm benwu laen hol wen tauhen. 10Ya tey kehligal le du yó kem tmuha gel malak ne yóm kdê tau, ne gotu nwit le ebè Dwata yóm bwis le, ne hosok le bè yóm kahun, efet hnok.
11Ke deng hnok yóm kahun yó, omin kem sfu Libay mit du ebè yó kem tau genlal yóm tau hol geta. Yó fen msó du yóm filak yó, duhen yóm tau gel smulat bè kukum lewu le yóm genlal bè yóm tau hol geta bè yó kem tau gel blóng ebè Dwata. Omin le bud hulék du yóm kahun ebè yóm gónón nô bè Gónô Dwata. Tódô ket kdaw le mò du yóm yó, tey filak wen yóm sentifun le. 12Lemwót yóm tau hol geta lewu le Jihuyada, blay le yóm filak yó ebè yó kem tau gónón gsigang yóm nmò anì lu fen mebel kem tau hulung semsodò botu ne yó kem tau hulung hemdà gónô mò temlob yóm Gónô Dwata. Bud le mebel snéen yó kem tau wen kenhulung le bè bala tók ne bè tembaga mò tlob yóm gónô Dwata.
13Duhen yó, tey kmò le nmò yó kem tau gónón gsigang yóm ketlob yóm Gónô Dwata, ne yó gónón hlós wen gendeng le bè yóm kmò le nmò yó. Yóm ketlob le du yó, tódô ulit le bè yóm sana kun kmò bè kbuten, ne tey kehbegel le du. 14Tikóng deng ketlob le du yóm Gónô Dwata, lemwót yóm dù filak bud nwit le ebè yóm tau hol geta lewu le Jihuyada. Yó mu le du mò bli le tahu blówón ne blówón bukay mò hmò le yó kem kimu mò nô lem yóm Gónô Dwata, yó kem wen mu le du bè yóm ktaba le ebè Dwata, ne bè yóm gel kedsù le ebéléen yóm dsù hkekeb, ne bè yóm gel kken le bè yó, gotu nmò le bè blówón bukay ne tahu blówón. Yóm klawi Jihuyada mowil, senflós le demsù du yóm dsù hkekeb le ebè Dwata bè yó lem Gónô Dwata.
15Tey tahà ktau Jihuyada, ne song matay deng lematu tlu folò halayen. 16Lebeng le bè yóm gónó le lembeng yó kem tau hol geta bè syudad Dabid, abay se hono hyu yóm kdê nmoen bè Israél, ne yóm nmoen bè Dwata ne dalang se bè yóm Gónóen.
17Okóm kogol yóm katay Jihuyada, mógów le ebè Juas yóm tau hol geta yó kem genlal bè Juda, ne mtud le bukol bè soluhen, nubug le anì hmungol hlau bélê le. 18Yó atul le, tódô bayà le yóm Gónô Dwata, ne yóm Dwata yó kem tehe fù le, ne tmaba le ebè yóm hehek yóm dwata libun boluyen Asira ne bè yó kem dwata lennged. Bè yóm salà nmò le yó, tey kebut Dwata kul yó kem tau bè benwu Juda ne bè Jirusalim. 19Okóm wen kem tugoden hógów Dwata elem blóng le mò bud mit kul semfulék ebéléen, okóm là kô hnungol le kul balù yóm eles kehetgama le kul.
20Ominen sut yóm Tulus Dwata bè Sikaraya yóm ngà Jihuyada logi ne yóm tau blóng ebè Dwata. Tódô mdà Sikaraya bè solu yó kem tau, yó udélen, “Ni se udél Dwata. Moen de ke là nimón ye du yóm hlau Dwata kuy? Ke yó se nmò ye, là kóen hyu klowil ye. Lemwót bè yóm deng kekbê ye ke Dwata, deng kenbéen yu se kuy.”
21Okóm natul hnatay le Sikaraya yó kem tmuha gel malak, dalang se ke Juas yóm tau hol geta, gloken mdók kul anì sentudà le botu bè yó bè lósól yóm Gónô Dwata efet matay. 22Là kô hendem Juas du yóm tey kehyu nawa Jihuyada ebéléen yóm mà Sikaraya, mom hnatayen yóm ngaen. Bè yóm katay Sikaraya, yó monen, “Ton Dwata he yóm nmò ye ni, ne du meles kuy.”
Kegesón yóm kogot Juas benwu
23Timbow bè kdeng yóm halay yó, nundug le Juas yó kem sendalù Aram. Nundug le Juda ne Jirusalim, ne gotu hnatay le yóm kdê genlal bè yó. Ne gotu hwit le mulék ebè yóm tau hol geta bélê le bè Damaskus yóm kdê negef le bè yó. 24Balù yóm là kwen le mundug yó kem sendalù Aram, okóm tnóbóng Dwata lu gemmò bè yó kem tey sendalù wen bè Juda, abay se deng tebel Dwata yó kem tau bè Juda, yóm Dwata yó kem tehe fù le. Duhen yó, gefet bè Juas yóm tau hol geta yóm tafak Dwata du.
25Bè yóm kulék yó kem sendalù Aram, tódô tebel le Juas igò tey halien. Okóm deng eles natul yó kem genlalen yóm khatay le du, duón le du yóm khatayen yóm ngà Jihuyada yóm tau blóng ebè Dwata. Tódô hnatay le Juas yóm tau hol geta bè gónón tungô. Omin le lembeng du bè syudad Dabid, okóm là lebeng le du bè yóm gónó le lembeng yó kem tau hol geta. 26Yó kem tau hmatay du, duhen le Jusabad ngà yóm libun lemwót bè Amun boluyen Simyat, ne Jihusabad ngà yóm libun lemwót bè Muab boluyen Sirit.
27Yóm kdê nmò yó kem ngà Juas, ne yó kem eles htulón Dwata gbak etahen, ne yóm ketloben yóm Gónô Dwata, deng gotu snulat bè yóm bok boluyen Tutul yó kem Tau Geta. Bè yóm deng katay Juas, yó bud tles tau hol geta yóm ngaen boluyen Amasaya.
© 2007, Wycliffe Bible Translators, Inc. All rights reserved.