1 Kurin 11

1Yó ne, hol dnalang ye sen yóm dou kmò, lómón yóm gel kdalangu yóm kun kmò Krays.

Kmò kem libun lem simbahan

2Sotu gónóhu dmóyón kuy abay se là kô klifót ye du yóm tehe gel nmou, ne gel lolò ye yóm tehe toloku kuy. 3Okóm ni wen hentukulu bélê ye. Yóm gónó le kmulu yó kem logi, duhen Krays. Yóm kul gónó kmulu yó kem libun, duhen bè kem tuha logi le. Ne yóm gónó Krays kmulu, duhen Dwata. 4Yó gónóm mon, bè yóm gel ksimba ye, ke wen logi mni bè Dwata duhen ke tmugod ke Dwata, là kóen hyu ke wen sukuben bè kuluhen. Ke wen sukuben, lómón ke là nadaten du yóm gónón kmulu, duhen Krays. 5Okóm bè libun du kun, ke du mni bè yóm gel ksimba ye, duhen ke du tmugod ke Dwata, là hyuhen ke là wen nes dudumen. Ke là wen nô te kuluhen, lómón ke là nadaten du yóm gónón kmulu, duhen tuha logihen. Ke yó tô nmoen, laen kô dù gónón stólóng se kun bè yóm libun tenbulud. 6Ke kenbéen dmudum yóm libun, yake tódô kenlengen weken. Mom monem yó ne alì sidek kyaken du ke hetbulud duhen ke kenlengen weken. Hyu béléen dé ke tódô dmudum. 7Okóm bè logi kun, ke gel mni bè Dwata, là hyuhen ke wen sukuben bè kuluhen, abay se bè yóm kmò Dwata yóm logi, heskélen bè kun knô ne bè kun kmò. Okóm yó dum libun bè yóm kmò Dwata du, heskélen bè kun kmò yóm logi. 8Yó gónón kmulu bè logi yóm libun, abay se yóm tanay logi, là kóen lemwót gu bè libun, kaem libun dé lemwót gu bè logi. 9Ne sundu yó du gónó Dwata mò yóm logi ke mò dumu yóm tuha libunen, kaem libun mò dumu yóm tuha logihen. 10Yó gónón hyu ke dmudum yóm libun bè yóm gel ksimba ye mò gónón hegfan du bè yó kem hógów Dwata gu bè longit yóm kwen gónón kmulu se kun, duhen yóm tuha logihen.

11Okóm bè ktahuhen, bè klowil tekuy kem tau hemtahu bè yóm gónó tekuy mogot, là kóen mowil yóm libun ke là wen logi, ne là kóen mowil yóm logi ke là wen libun. 12Bè yóm tehe kmò Dwata du yóm tau, gu bè logi yóm tanay libun. Okóm yóm logi efet nim kmoen ni, tódô msut gu bè libun. Bede Dwata se gónón gu tembul kdéen.

13Yake tódô ket tau hemdem du ke hyu bè yóm libun ke là dogen dmudum ke mni bè Dwata bè yóm gel ksimba ye. 14Deng nbuten tehe yu ne ekni, ten-geeden hemyak knóen yóm logi ke htahaen weken. 15Okóm bè libun dé, hol gónón hyu ke tahà wek le mò heklóón kul, abay se yóm wek le mò henged kul dudum. 16Ke wen tô semkuya du yóm dou hlolò kuy ni, ni se balau du, són ni se yóm kum adat gel lolò. Ne bud ni se kul adat gel lolò yó kem dumu tau hemtahu bè Dwata bè dumu benwu.

Yóm ken mò gónó hemtulón nawa ke Jisas

(Matyu 26:26-29; Mark 14:22-25; Luk 22:14-20)

17Okóm wen sotu gónóhu là dmóyón kuy, ne yó but yóm hlolou kuy ni. Bè yóm gel ksimba ye, laen dog gónón temnù yóm kehtahu ye bè yóm kmò ye du, deng mom wen gónón hemsidek kuy. 18Bè hol tanayen, deng gungolu bè yóm gel ksimba ye, tey gel kesgólól nawa ye kun. Ne wen se gel hentahuhu du yóm gungolu yó. 19Déke wen muhen yóm kesgólól nawa ye yó mò gónón gfan ke mahil du bélê ye yóm hol tahu gulit lemolò du yóm ktahuhen.

20Deng gungolu bè yóm gel kestifun ye mken, sundu kô yóm ken gónó ye hemtulón nawa yóm katay yóm gónó tekuy mogot yóm nmò ye. 21Yó gónóhu mon du yóm yó, abay se bè yóm gel kken ye, tódô sotu kun gna mken, là dog ye na sfangat. Ngem deng mom wen fen bitil bélê ye kun, ne fen le hlengel kem dumu. 22Yu kem tau alì mò du yóm yó, mò ye là tódô eles hemdengen mken lemwót du? Tey laen kô dog adat ye yó kem dumu ye hemtahu bè Dwata, ne deng mom tey sidek kehyak ye yó kem tau laen dù gónó le ma. Ofo kuy mon du kô ke dóyónu yu bè yóm nmò ye yó? Là kô naw dóyón kuy.

23Deng tehe toloku kuy yóm deng gna dnalangu lemwót bè yóm gónó tekuy mogot. Bè yóm tehe kifu kekfô le du, wen mambang gna nwa yóm gónó tekuy mogot Jisas, 24ne nan na mni bè Dwata, ominen kembéng du, ne monen mò kul, “Nim mambang ni, ni se yóm dou lówó angat gamà bélê ye. Hol bud gel nulit ye nim deng nmò tekuy ni mò gónó ye gel hemtulón dou nawa.” 25Timbow deng kken le, ominen ma yóm tgayan gónón nô yóm ninum le, ne monen mò kul, “Nim ninum ni, hol hnigaden yóm lomi fasad nmò Dwata mò lan ye ebéléen, dou litô mò hemget du. Bè ket kinum ye du nim ni, hol gel hentulón ye ou nawa.” 26Duhen yó, ket kken tekuy du nim mambang ni, ne ket kinum tekuy du nim ninum ni mò gónó tekuy hetngón du bè dumu tau yóm tehe katayen bélê tekuy yóm gónó tekuy mogot. Bê tekuy abay gel senkas mò du efet bud kesfuléken edini.

27Duhen yó, ke wen sotu bélê ye gbót mken du yóm mambang yóm gónó tekuy mogot yó, duhen ke minum du yóm kun ninum, okóm ke tódô faen, yó nmoen, deng mom kdà hen-gnoken yóm lówó yóm gónó tekuy mogot, ne yóm litóen gamà béléen. 28Duhen yó, na ye na gna hol henklol yóm kuy kmò. Ke hyu, omin ye yó he gbót mken ne minum. 29Abay se ke wen tau tódô gbót mken yóm mambang yó, ne gbót minum yóm ninum yó, ke là dilóen du hol lówó yóm gónó tekuy mogot yóm lanen, tnafak Dwata yóm tau yó. 30Yó se gónón lemwót yóm dê gemnóm des bélê ye, ne dê tmalaw là mgel, ne deng wen se bélê ye gehlós matay.

31Okóm ke na tekuy na hol henklol yóm kmò tekuy, là kô tnafak Dwata tekuy. 32Okóm ke wen gónó yóm gónó tekuy mogot tmafak tekuy, yó se mò gónón hemtedeng tekuy anì là gomong tekuy megtuled bè yó kem tau là hemtahuhen. 33Ne duhen yó, kem dumuhu setwoli, sok ye bud gel stifun mken bè yóm gel kehtulón nawa ye yóm gónó tekuy mogot, na ye gel sfangat. 34Ke wen tau bitil bélê ye, yake tódô mken bè gónóen anì là wen gónó Dwata tmafak du bè yóm gel kestifun ye.

Bè yó kem dumu snólók ye béléu, angat tulónu kuy he soke deng kól dyó.

Currently Selected:

1 Kurin 11: tbl

Highlight

Copy

Compare