YIDNAK YIDNAK WENE 18
18
Korintus-nen kwaridnak wene
18:1-17
1Iri rak purug-e, Paulus na-ge Atena keya buruk, Korintus mbirij-o. 2Mbiridnggal-e, iri me-ge Yawuri nap misik unu-ge Akila imin lambuk yij-o. Akila iri-ge o Pontus woraso-t nde, Kelaudius-nen-e ”Yawuri nap pidsa-ge Oroma wi yu me-nen mberer-o” yidnak pem-e at ogwe Periskila imin Italia-nen nggeret lobok yigarik, Korintus worakmu, Paulus na-ge it endam wok yij-o. 3Nde, it iri-ge at-nen wanoso nggal yabu misiget erep wanugwi nap ala, inmin woralar-e, lambuksa-nen o lije wururak sum panggarogolat woraiga-o. 4Nde, we woragwi tarem pempa Paulus na Yawuri nap-nen tepan yugwi ma-nen wene yosolar-e, Yawuri nap min Yunani nap min kwara lombok mirik onposolat woragaij-o.
5Nde, Silas min Timotius min-e Makeronia-nen wok yogola-ge, Paulus na-ge pempa aid wene yik tenak woralat-nen Yawuri nap yak ondosolar-e: ”Yesus iri-ge Mesias-nen yusu-o” luk kenggera yak ondosolat woragaij-o. 6Yak ondosola-ge, it-nen-e at imin sirid mbarogolat, at obok pogolat ala karug-e, at-nen at usum pem mabe pil kasolat-nen it yak ondosolar-e: ”Kit keneyabi-ge kondomok kenpem-o! An meya-ge lag-o. Yawo kuri-net an-e enlem nin nap endam mbirimin-o” luk yak indij-o. 7Yak undurug-e, iri me-nen keya buruk mborosolar-e, ap misik unu-ge Titius Yustus, Mbal Pem Nagawan aye kaso nap na ama nggwij-o. At uwi iri-ge Yawuri nap-nen tepan yugwi wi min naboroga worag-o. 8Yawuri nap-nen tepan yugwi wi iri winde nagawan unu-ge Kerispus min at ama woragwi nap pidsa min-e Nagawan Indo ebem inndi angin tubu yiga-o. Nde, Korintus nap kwarat-nen na Paulus-nen yidnak wene kuluruk, inndi angin tubu yogolikma, yi ma inpij-o.
9Misik tarem kubu nggwe-ge Nagawan Indo-nen nabi nggwe nggal Paulus yak tosolar-e: ”Kwiye lag-et Mbal Pem Nagawan-nen yidnak wene-ge yak ondosolat nak wolmin-o. Larok yurak pug-o. 10An-e kimin worasu-o. Nde, o yu me-ge an-nen idnak nap kwarat worali me, ap misiger-o luk-nen na andi bandi rak kubuwa bug-o” luk yak tij-o. 11Yak tosoloma-ge, Paulus na-ge it ennggendumu-nen Mbal Pem Nagawan-nen yidnak wene mul ondosolar-e, olengen misiget woraruk, waneya enam woragaij-o.
12Alat nde, ap Nggalio na-ge nagawan men luk Akaya nggweyak tena worala-ge, it Yawuri nap men yogolar-e, Paulus wuruwokluk wene mbenarugwi sa ibil lobok yogolat-nen 13yogolar-e: ”At yu-ge imiri mbarak pidnak wene tarogolar-e, Mbal Pem Nagawan erembel wanuwakluk nin tula nde ap mirik unpusu-o” luk yiga-o. 14Yogolikma-ge, Paulus na-nen wene yekluk yij-et nde, Nggalio-nen Yawuri nap na yak ondosolar-e: ”Yawuri nap wa-e. Wene yu-ge meya yidnak wene ala na, meya kwarat kwaridnak wene ala na, kit kenne-ge yebosa-t kuleleb-o. 15Alat nde, wene yu-ge kit-nen yugwi wene bem ala na, kit-nen yugwi unnu bem ala na, kit-nen wanugwi imiri mbarak pidnak wene bem ala-nen nde neyak puk keyak puk yili me, kit na kit-net wene mbenarer-o. An-nen wene yu mbenarimin pug-o” luk yak indij-o. 16Yak undurug-e, wene mbenarugwi sa-nen langgara wirik inpij-o. 17Wirik onposoloma-ge, it pidsa-nen-e Yawuri nap-nen tepan yugwi wi iri winde nagawan Sostenes na tenasa, wene mbenarugwi wi tumende bem wiriga-t nde, Nggalio-nen yik nak eneyaruk, puk agaij-o.
Ijok lem Antiokia lobok yid wene
18:18-23
18Paulus na kwarat nggal Korintus worarug-e, anggamirak tak inpidnak nap na keya unpuruk, e koma arem-nen Siria mborosolar-e, Periskila min Akila min inmin mbirij-o. Kenkerea iri me-nen at-nen kumbuk polosolar-e, anggulsu mbarij-o. 19Iri rak purug-e, it na-ge Epesus wok lug-e, it mberen na iri me keya unpuruk, at Paulus ariget nak Yawuri nap-nen tepan yugwi ma nggwarik, Yawuri nap inmin wene yosolat woragaij-o. 20Worala-ge, it-nen-e: ”Nit ninmin siyak wolmin-o” yak tiga-t nde, at-nen-e it enne nggarigit lag-o. 21Are, it na keya unpuruk mbereyekluk-nen yosolar-e: ”Mbal Pem Nagawan indi-nen nde, ’Tuguruk mbiri-o’ yak norosola-ge, tuguruk kendam lobok yimin-o” luk, Epesus-nen e koma arem mbirij-o.
22Nde, Kaisarea wok yosolar-e, lambuk tak inpidnak nab-e ”Wiwa-o” yak indil laruk, Antiokia mbij-o. 23Iri me kwarat nggal woraruk mborosolar-e, o Nggalatia min Perigia min oboksa waring kil mborosolar-e, Yesus ene wanugwi nap pidsa inndi uwi ya bil pil mbirij-o.
Apolos-e Epesus min Korintus min-nen kwaridnak wene
18:24-28
24Iri na tarem-e o Aleksandaria woraso Yawuri nap misik unu Apolos iri-ge o Epesus lobok yij-o. At iri-ge wene owak ngara yoso nab-o. Mbal Pem Nagawan Engga na kwara aru nab-o. 25Nde, at iri-ge Nagawan Indo urula mul tidnak nap me, indi embem min-et Yesus owene yosolat, kwara ap mul ondosolat woragaij-et nde, ar-e Yoanes-nen yi ma bidnak nak aru-o. 26At iri-ge Yawuri nap-nen tepan yugwi ma-nen kwiye lag-et wene yij-et nde, Periskila min Akila min-e at-nen yidnak wene kuluruk, at na imin mbutlug-e, Mbal Pem Nagawan urula kwara uwi yaga mul togolat woraiga-o. 27Nde, Apolos-nen-e Akaya nggwe ele bem ndil layekluk yosola-ge, Yesus ene wanugwi nap Akaya woragwi-nen Apolos na wok ubuwakluk, Epesus woragwi ennggamirak tak inpidnak nap-nen engga mbara enmanggim pikma, at na iri me wok lug-e, Mbal Pem Nagawan we wok ondoso elem pem-e inndi a gin tubu yidnak nap ereba na kwara yongga indij-o. 28Yongga ondosolar-e, ap kwarat inmbiri bem Yawuri nap inmin enne amawi pebe yogolar-e, at-nen ene amawi min-et Mbal Pem Nagawan Engga bem-net ”Yesus iri-ge Mesias-nen yusu-o” luk yosolat-nen Yawuri nap na nggweyara keya inpij-o.
Currently Selected:
YIDNAK YIDNAK WENE 18: inondx
Highlight
Share
Compare
Copy
Want to have your highlights saved across all your devices? Sign up or sign in
@LAI 1992, 1994
