YESAYA 19
19
Tumpu mohukumo Mesir
1 #
Yer. 46:2-26, Yeh. 29:1–32:32 Sumo uuka na potuunon mongkona aha Mesir.
Tumpu tokamo mae i Mesir monsake'i mae kundom anu malia'. Iwi-iwi na pilogot anu daagi' i Mesir nu lakatmo i ahop-Nyo ka' aha mian nu Mesir ise-ise'mo na kinyonyoa nu aha. 2Tumpu notataemo, “Aku mompojadimo pahampatean utus mongewa utusnyo i Mesir: Anu mompaha ohani laigan mompaha ewa-ewamo kota' mongewamo kota', kalaja'an mongewamo kalaja'an. 3Apaa na anu nu tanga'imo nu aha Mesir, Ku baumo da madi'mo jadi ka' mompohentemo kinyonyoa nu aha da aha madi'mo kosumangat. Aha momoitamo tulung hi pilogot nu aha, momoitamo pokinde' ka' pikilan hi to sando-sando tiba hi to tomi-tominuat pa' apaa na anu timbali obau. 4Mesir Kubee'mo hi kakuasa'an nu samian na tomundo' anu buhingison hondo da mompalentah aha. Aku, Tumpu Anu Daka' na Kuasanyo notataemo.”
5Kaunyo nu Nil tolotutusmo ka' pin tiba pin mo'otimo. 6Kaunyo anu nuinau bau polowo'an mabusikmo salatan ueenyo kopoti-poti'inyomo. Biho' tiba hemput magayoumo. 7Iwi-iwi' na pombibitan anu tutuus i Kaunyo nu Nil manggasmo ka' nu lahabakonmo nu mombun. 8To mia-mian anu biasa momeka i kaunyo aijo' sinusamo'mo ka' lewa'mo humang kalana peka tiba buani' nu aha madi'mo daagi' kogunanyo. To mia-mian anu bisa montonun hude madi'mo ko anu nu taha'imani nu aha; 9-10aha tiba anu biasa lewa' mongalatambo susa'mo na kinyonyoa nu aha ka' hentemo na nu oa'i nu aha.
11Memang pikok ahi' na to pola-polaya' nu kota' Zoan! Aha mian nu Mesir anu pande hondo nombee'imo pokinde' anu madi' totu'u! Baani hondo na aha motatae hi tomundo' tukoonyo aha lee' mae nu to tomu-tomundo' tempo'nyo nai puan mae! 12O, tomundo' Mesir iyamo mae na tomia-mian anu toto pande-pande na mombee'i pokinde' i tomundo'? Ugaat nu sumbu' nu aha apaa na anu tinanga'anmo nu Tumpu Anu Daka' na Kuasanyo mongkona Mesir. 13Aha to pola-polaya' nu Zoan tiba Memfis singkap to mia-mian anu pikok. Aha na misa' ahi' to pola-polaya', panyo ola mule' ahi' momposala' jalan nu aha bansanyo. 14Tumpumo na nombau aha da jinadi mian anu lewa' mompokinde'i ola-ola mompobingung mule'. Ahennyo mae Mesir sinala'mo iwi-iwi' ka' tinombabihing mo susumo mian anu nalangumo ka' tinongkelejutmo kalana ilenda'mo nu lua'annyo. 15I Mesir madi'mo daagi' ko mian anu daagi' moko ala kosumangat, mau aha anu balakuasa, mau aha mian da'isan, mau aha mian anu talasanggo, mau aha mian anu popo lolo.
Mesir monsombahmo Tumpu
16Tokaje mae na tempo'nyo bansa Mesir timbalimo susumo boune anu sampa tolokuku' na kinyonyoa ka' sampa mabuhuk. Aha nulakatmo nu buhuk de montoamo Tumpu Anu Daka' na Kuasanyo motangkakonmo lima-Nyo kalana kahanda'mo mohukum aha. 17Tano' nu aha Yehuda mompokalangkabutmo aha mian nu Mesir de aha tolo inau'mo ikaputusan nu Tumpu Anu Daka' na Kuasanyo mongkona aha.
18Toka itempo'nyo aijo' basa' nu aha Ibrani opakemo i olima' na kota' nu Mesir. Aha mian anu ikiijo' mae basumpa'mo i uno nu sanggo nu Tumpu Anu Daka' na Kuasanyo. Sala' sa'angu' na kota' haha aijo' osanggohimo, “Kota' Batu nu sinaa”.
19Tempo'nyo aijo' ipuso nu lipu' Mesir daagi'mo ko sa'angu' na mezbah bau ponsomban Tumpu, ka' ipotempasannyo sa'angu' na ohi' batu anu salaku bau tanda monginau' Tumpu. 20Mezbah tiba ohi' ai-aijo' salaku baut anda saba' Tumpu Anu Daka' na Kuasanyo kiijo'mo i Mesir. Ia monsaimo mae samian da momposalamat aha. 21Tumpu mompotoamo butongnyo hi bansa Mesir, ka' saidi' mae nusumbu'mo nu aha na Ia ka' mule' nu sombahmo nu aha ka' momboamo koloban anu opalasombahkon hi Ia. Aha balajanji'mo hi Ia, ka' basumpa'mo da han aijo' tataap ahi' obau. 22Nu tahutu'mo nu Tumpu na bansa Mesir, panyo lapas aijo' Nu pakuli'imo da ma'alin na aha. Aha mobalikmo mae hi Tumpu ka' Ia mohongomo do'a nu aha ka' mompo alinmo.
23Tempo'nyo aijo' kojalanmo anu daka' lengkat i Mesir mamba i Asyur. Mian anu jojoong i ohua' na lipu' aijo' mambamo ka' mo uuka mae montulu jalan aijo' ka' aha monsombahmo Tumpu hingga-hinggat. 24Tempo'nyo aijo' Israel pokakanamo na angga'nyo hingga-hinggat tiba Mesir ka' Asyur, ka' mule' totototolu' na bansa aijo' timbalimo balakat kona hi aha songko-songko na dunia. 25Tumpu Anu Daka' na Kuasanyo mombalakatimo aha ka' motatae, “Ku balakatimo na belemiu, o, Mesir mian anu palesayamo hi beleng-Ku, belemiu Asyur anu pinotimbaling-Kumo, ka' mule' belemiu Israel mian anu pinile'an-Kumo.”
Currently Selected:
YESAYA 19: LAILOE
Highlight
Copy
Compare
Share
Want to have your highlights saved across all your devices? Sign up or sign in
YESAYA 19
19
Tumpu mohukumo Mesir
1 #
Yer. 46:2-26, Yeh. 29:1–32:32 Sumo uuka na potuunon mongkona aha Mesir.
Tumpu tokamo mae i Mesir monsake'i mae kundom anu malia'. Iwi-iwi na pilogot anu daagi' i Mesir nu lakatmo i ahop-Nyo ka' aha mian nu Mesir ise-ise'mo na kinyonyoa nu aha. 2Tumpu notataemo, “Aku mompojadimo pahampatean utus mongewa utusnyo i Mesir: Anu mompaha ohani laigan mompaha ewa-ewamo kota' mongewamo kota', kalaja'an mongewamo kalaja'an. 3Apaa na anu nu tanga'imo nu aha Mesir, Ku baumo da madi'mo jadi ka' mompohentemo kinyonyoa nu aha da aha madi'mo kosumangat. Aha momoitamo tulung hi pilogot nu aha, momoitamo pokinde' ka' pikilan hi to sando-sando tiba hi to tomi-tominuat pa' apaa na anu timbali obau. 4Mesir Kubee'mo hi kakuasa'an nu samian na tomundo' anu buhingison hondo da mompalentah aha. Aku, Tumpu Anu Daka' na Kuasanyo notataemo.”
5Kaunyo nu Nil tolotutusmo ka' pin tiba pin mo'otimo. 6Kaunyo anu nuinau bau polowo'an mabusikmo salatan ueenyo kopoti-poti'inyomo. Biho' tiba hemput magayoumo. 7Iwi-iwi' na pombibitan anu tutuus i Kaunyo nu Nil manggasmo ka' nu lahabakonmo nu mombun. 8To mia-mian anu biasa momeka i kaunyo aijo' sinusamo'mo ka' lewa'mo humang kalana peka tiba buani' nu aha madi'mo daagi' kogunanyo. To mia-mian anu bisa montonun hude madi'mo ko anu nu taha'imani nu aha; 9-10aha tiba anu biasa lewa' mongalatambo susa'mo na kinyonyoa nu aha ka' hentemo na nu oa'i nu aha.
11Memang pikok ahi' na to pola-polaya' nu kota' Zoan! Aha mian nu Mesir anu pande hondo nombee'imo pokinde' anu madi' totu'u! Baani hondo na aha motatae hi tomundo' tukoonyo aha lee' mae nu to tomu-tomundo' tempo'nyo nai puan mae! 12O, tomundo' Mesir iyamo mae na tomia-mian anu toto pande-pande na mombee'i pokinde' i tomundo'? Ugaat nu sumbu' nu aha apaa na anu tinanga'anmo nu Tumpu Anu Daka' na Kuasanyo mongkona Mesir. 13Aha to pola-polaya' nu Zoan tiba Memfis singkap to mia-mian anu pikok. Aha na misa' ahi' to pola-polaya', panyo ola mule' ahi' momposala' jalan nu aha bansanyo. 14Tumpumo na nombau aha da jinadi mian anu lewa' mompokinde'i ola-ola mompobingung mule'. Ahennyo mae Mesir sinala'mo iwi-iwi' ka' tinombabihing mo susumo mian anu nalangumo ka' tinongkelejutmo kalana ilenda'mo nu lua'annyo. 15I Mesir madi'mo daagi' ko mian anu daagi' moko ala kosumangat, mau aha anu balakuasa, mau aha mian da'isan, mau aha mian anu talasanggo, mau aha mian anu popo lolo.
Mesir monsombahmo Tumpu
16Tokaje mae na tempo'nyo bansa Mesir timbalimo susumo boune anu sampa tolokuku' na kinyonyoa ka' sampa mabuhuk. Aha nulakatmo nu buhuk de montoamo Tumpu Anu Daka' na Kuasanyo motangkakonmo lima-Nyo kalana kahanda'mo mohukum aha. 17Tano' nu aha Yehuda mompokalangkabutmo aha mian nu Mesir de aha tolo inau'mo ikaputusan nu Tumpu Anu Daka' na Kuasanyo mongkona aha.
18Toka itempo'nyo aijo' basa' nu aha Ibrani opakemo i olima' na kota' nu Mesir. Aha mian anu ikiijo' mae basumpa'mo i uno nu sanggo nu Tumpu Anu Daka' na Kuasanyo. Sala' sa'angu' na kota' haha aijo' osanggohimo, “Kota' Batu nu sinaa”.
19Tempo'nyo aijo' ipuso nu lipu' Mesir daagi'mo ko sa'angu' na mezbah bau ponsomban Tumpu, ka' ipotempasannyo sa'angu' na ohi' batu anu salaku bau tanda monginau' Tumpu. 20Mezbah tiba ohi' ai-aijo' salaku baut anda saba' Tumpu Anu Daka' na Kuasanyo kiijo'mo i Mesir. Ia monsaimo mae samian da momposalamat aha. 21Tumpu mompotoamo butongnyo hi bansa Mesir, ka' saidi' mae nusumbu'mo nu aha na Ia ka' mule' nu sombahmo nu aha ka' momboamo koloban anu opalasombahkon hi Ia. Aha balajanji'mo hi Ia, ka' basumpa'mo da han aijo' tataap ahi' obau. 22Nu tahutu'mo nu Tumpu na bansa Mesir, panyo lapas aijo' Nu pakuli'imo da ma'alin na aha. Aha mobalikmo mae hi Tumpu ka' Ia mohongomo do'a nu aha ka' mompo alinmo.
23Tempo'nyo aijo' kojalanmo anu daka' lengkat i Mesir mamba i Asyur. Mian anu jojoong i ohua' na lipu' aijo' mambamo ka' mo uuka mae montulu jalan aijo' ka' aha monsombahmo Tumpu hingga-hinggat. 24Tempo'nyo aijo' Israel pokakanamo na angga'nyo hingga-hinggat tiba Mesir ka' Asyur, ka' mule' totototolu' na bansa aijo' timbalimo balakat kona hi aha songko-songko na dunia. 25Tumpu Anu Daka' na Kuasanyo mombalakatimo aha ka' motatae, “Ku balakatimo na belemiu, o, Mesir mian anu palesayamo hi beleng-Ku, belemiu Asyur anu pinotimbaling-Kumo, ka' mule' belemiu Israel mian anu pinile'an-Kumo.”
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in