Suro 19
19
Hi Paulu i Epesu
1Kolentuꞌana hi Apolo i Korintus, hi Paulu motengkaꞌimo bolaꞌ-bolaꞌ to i biri i woiꞌ Galatia hante Perigia, hei uko tiꞌo mengkohoumo nolou pe kota Epesu. Itoꞌo io mohidupaꞌ hante haꞌumbora duohi to mepoꞌohi. 2Noteneihi notiꞌi, “Pahuamokeiwae Inohaꞌ Mangkolehi i tempomi mepoꞌohi?”
Mehoniꞌhi, “Handoaꞌi tene, alaꞌ handoaꞌi tene kihori koꞌuwaꞌne Inohaꞌ Mangkolehi tiꞌo!”
3Nopeꞌitanoki womo hi Paulu, notiꞌi, “Ane hatoꞌoꞌi, ingkei niriukei motuntuni poturuꞌna hihimo?”
Mehoniꞌhi, “Motuntuni poturuꞌna hi Yohanes Toperiu.”
4Katoꞌo, notiꞌikihi hi Paulu, “Periuna hi Yohanes iomo tandaꞌ pengkatobaꞌa ka dosanta. Angkana i tempona hi Yohanes meriu, io mampowute pe toYahudi hingkeꞌna mepoꞌohihi pe toaꞌ to hingkiꞌ hupaꞌ ngkamuri, iomo hi Yesu.” 5Korohorina lolitane, niriumohi i lali konaꞌna Pueꞌ Yesu. 6Hi Paulu mohiniꞌmo koraweꞌna i tutuꞌra, hei mengkohoumo mpuꞌu Inohaꞌ Mangkolehi mokuasaꞌihi. Hampale hangkaꞌ-hangkaꞌ romo mololitahi hante wiharona toaꞌ ntaniꞌna, hei mampasuwuhi lolita to ka Pueꞌ Ala. 7Koworiꞌra to noriu hi Paulu, kira-kira hampuluꞌ roduo tomaꞌani.
8Kolentuꞌana hi Paulu i kota Epesu, io holampi nturusi i tambi penombahara toYahudi. I lali tolu mbula, io mampoturuꞌ toaꞌ to morampuhi itoꞌo, hei hawaꞌi uwaꞌ komorokaꞌne mampokonontokihi noniuꞌ i poparentana Pueꞌ Ala hingkeꞌna ropoꞌohi. 9Angkana uwaꞌ haꞌumbora duo toaꞌ to morintodi lalira to hawaꞌhi hiniꞌ mepoꞌohi. I hinarora toaꞌ to woriꞌ, mampononaꞌa poturuꞌ noniuꞌ tungkaihana Pueꞌ Ala mamposalamaꞌ manusiaꞌ moliu hi Yesu. Iomo hinaꞌ nopolihimohi hi Paulu nolou moꞌawa-awa hante haꞌumbora duo tosarani pe tambina hi Tiranu. Ando-ando hi Paulu mepoturuꞌ itoꞌo. 10Iomo jamane i lali rontoꞌa, wute lekiꞌ-lekiꞌna toaꞌ i poropensi Asia pahorihi pohawaꞌna Pueꞌ, moromiꞌ toYahudi moromiꞌ toYunani.
11Pueꞌ Ala mampaꞌani kuasaꞌ pe hi Paulu mowali tandaꞌ-tandaꞌ to mepohele. 12Kehapoꞌi lesona ba kumbanalu to ka nopakeꞌmo hi Paulu rokomi pe to mohakiꞌ, bateꞌra kaliuꞌ moꞌoriꞌ, hei molaihi mpuꞌu lekiꞌ-lekiꞌna lomoa to mampoperima-rimahi.
Kuasaꞌna hi Yesu monani kuasaꞌ tokodake i Epesu
13-14I tempo tiꞌo, uwaꞌ woꞌo i Epesu haꞌumbora duo toYahudi tokebahaꞌ matengkaꞌ-tengkaꞌhi i humanele kota mampopolai tokodake to mampekahii toaꞌ. Ka lumbura, uwaꞌ pitu tomaꞌani. Lekiꞌ-lekiꞌra anaꞌna haduo tutuꞌ tadulako mpenomba, to nikokeneꞌi hi Skewa. Hampiha tempo, tokebahaꞌ tiꞌo mampehohongkeꞌ mantiꞌi konaꞌna Pueꞌ Yesu hingkeꞌna mampopolaihi tokodake-tokodake ka haduo toaꞌ, rotiꞌi, “I lali konaꞌna Yesu to nopekarebaiki hi Paulu, molaiko!”
15Mehoniꞌ tokodake tiꞌo, “Ane hi Yesu hante hi Paulu, kubahaꞌlu. Angkana ingkei hieꞌe, hihimokei horiana podehoꞌkei mobueꞌa!” 16Katoꞌo toaꞌ to nopekahii tokodake tiꞌo melihaꞌ ako mepohokiꞌ pe iohi. Angkana hawaꞌi robiaꞌ roꞌewa, alaꞌ marohohi mpololeke. Iomo horiana mehilaihi ntureraꞌ ka tambi tiꞌo, belo-belomohi hei baduꞌra mohepaꞌ-hepaꞌ wutehi tintilawa.
17Lekiꞌ-lekiꞌna toaꞌ to meꞌohaꞌ i Epesu, moromiꞌ toYahudi moromiꞌ toYunani, pahorimohi hapo to mewali tiꞌo. Iomo hinaꞌ morokaꞌhi, hei konaꞌna hi Yesu pedeꞌ ropokodeꞌmo. 18Uko katoꞌo, woriꞌ woꞌo tosarani mangakuꞌ waliara to hawaꞌi hintotoꞌ i hinarora toaꞌ to woriꞌ. 19Woriꞌhi tokebahaꞌ mangkomi suraꞌ-suraꞌ bahaꞌra, rorampu hei rohunu i hinarora toaꞌ to woriꞌ. Hilina suraꞌ-suraꞌ bahaꞌra tiꞌo ane niꞌihaꞌi, kira-kira 50.000 doiꞌ peraꞌ. 20Katoꞌo, kopewalina to mepohele tiꞌo, koworiꞌ-woriꞌa toaꞌ to mampehoromua pohawaꞌna Pueꞌ, hei nokomi kuasaꞌna kareba tiꞌo, terononihi womo toaꞌ to mepoꞌohi.
Posisalaꞌ i kota Epesu
21Liumo to pewali tiꞌo, notungkai hi Paulu nolou pe woiꞌ Makedonia hante Akaya, hei uko tiꞌo hingkiꞌ nolou woꞌo pe kota Yerusale, notiꞌi, “Uko ka Yerusale, hangangaa nolouꞌa pe kota Roma.” 22Uko katoꞌo, norumbaꞌmohi roduo toaꞌ to metuntu pe io medulu nolou pe Makedonia. Konaꞌra, hi Timotius hante hi Eratus. Hi Paulu uwaꞌ tene i poropensi Asia.
23I tempo tiꞌo, uwaꞌ posisalaꞌ to kodeꞌ mpololeke i kota Epesu. Posisalaꞌ tiꞌo mewali nokomi poturuꞌ noniuꞌ poliwona Pueꞌ Ala mamposalamaꞌ manusiaꞌ moliu i hi Yesu. Waheꞌe lolitane. 24I kota Epesu tiꞌo, uwaꞌ haduo tomaꞌani to mapande mowali totambi ka peraꞌ. Konaꞌna toaꞌ tiꞌo hi Demeteriu. Jamana iomo mowali totambi to ropakeꞌ menomba pe lomoa. Lomoa towoweꞌe to ropenombai tiꞌo nikokeneꞌi hi Atemis. Hei ka jamana tiꞌo, io hante topajamana pahuahi woriꞌ doiꞌ. 25Hampiha tempo, io mowowoi awanahi to mapande mowali totambi ka peraꞌ. Notiꞌikihi, “Halali-halali, ibahaꞌlukei, ka pajamanta hieꞌe woriꞌ mpololeke pahuante. 26Kehapomo hatoꞌo, iꞌokiꞌkei hei ihorimokei hapo to nowali haduo toaꞌ to nikokeneꞌi hi Paulu. Notiꞌi hapo to nowali korawena toaꞌ hei ropenombai, hawaꞌi uwaꞌ kuasaꞌne. Alaꞌ pepoturuꞌna tiꞌo, woriꞌhi toaꞌ to metuntu pe hi Paulu, hei handoꞌio i Epesulu angkana i humanele poropensi Asia, bateꞌna woꞌo hatoꞌo. 27Mewaliꞌ, halali-halali, to kukorokaꞌ mpololeke, inioꞌna intu pajamanta hieꞌe hamboaꞌmo nolei toaꞌ. Hawaꞌi iolu, angkana totambi penombahanta pe hi Atemis hamboaꞌmo hingkiꞌ tepokodeꞌ, wute konaꞌna hi Atemis to makuasaꞌ mpololeke hamboaꞌmo niꞌadaꞌi. Hantaro iomo to ropenombai lekiꞌ-lekiꞌna toaꞌ i Asia hei i humanele duniaꞌ.”
28Korohorinalu lolitane hi Demeteriu tiꞌo, bukotahi hei moloaꞌ-loaꞌhi, “Pokodeꞌmo hi Atemis, lomoanta toEpesu!” 29Posisalaꞌ tiꞌo menele wute i humanele kota. Uko katoꞌo, noloumohi toaꞌ to woriꞌ mohokiꞌ hi Gaiu hante hi Aritaku. To roduo tiꞌo iomo toMakedonia to mampoꞌawa hi Paulu i patengkaꞌana. Roduo toaꞌ tiꞌo nihokiꞌmohi hei rokomimo nolou pe tambi porampuara to kodeꞌ i lali kota. 30Nokodokoꞌi hi Paulu nolou moꞌawa-awa hante iohi mekahi pe lali porampuara tiꞌo. Angkana roꞌopi halali hampepoꞌohina hingkeꞌna anioꞌi nolou. 31Uwaꞌ woꞌo haꞌumbora duo toaꞌ (bolena hi Paulu i poropensi Asia) to morumbaꞌ toaꞌ mampatiꞌiki hi Paulu hingkeꞌna anioꞌ nolou pe porampuara ngkodeꞌ tiꞌo.
32I tempo tiꞌo, makaja komaroaꞌne toaꞌ i porampua ngkodeꞌ tiꞌo. Uwaꞌhi to mantiꞌi waheꞌe, uwaꞌhi to mantiꞌi watoꞌo. Koworiꞌna toaꞌ to hirampu itoꞌo hawaꞌi robahaꞌ hapo to roporampuki. 33Uwaꞌhi to mantiꞌi haduo toYahudi to nikokeneꞌi hi Alesande to mewali pongkana posisalaꞌre, alaꞌ io to ropopewotu toYahudi mampowute lolita pe toaꞌ to woriꞌ. Iomo horiana hi Alesande mohinimo koraweꞌna mampokondiiꞌhi, alaꞌ nokodokoꞌi mampowute kototuꞌuana. 34Angkana ikoroꞌokiꞌna toaꞌ to woriꞌ koꞌiona toYahudi, moloaꞌ-loaꞌmohi nturusi, rojaa komoruene, rotiꞌi, “Pokodeꞌmo hi Atemis, lomoanta toEpesu!”
35Koꞌukoana haduo guru ntulisiꞌ i kota tiꞌo moloaꞌ mampokondiiꞌhi, notiꞌi, “Halali-halali toEpesu! Lekiꞌna toaꞌ i duniaꞌ pobahaꞌ kota hieꞌe to morewahi tambi penombaha lomoa towoweꞌe hi Atemis hante watu ntoaꞌna to moꞌonoꞌ ka laniꞌ 36Hawaꞌi uwaꞌ haduo to wadi mosapuaka tiꞌo. Iomo hinaꞌ hangangaa mondiiꞌki duluna. Inioꞌki nokomi komolahona lalinta. 37Alaꞌ toaꞌ to ikomikei humei tiꞌo, hawaꞌhi mosilakai tambi penombahanta ba mampokokeniꞌa konaꞌna lomoanta. 38Mewaliꞌ, ane hi Demeteriu hante awana to hampajamahi mangkodokoꞌi mosalaꞌi ba himolu, bateꞌna ropowute i tadulako kota. Alaꞌ uwaꞌmo tempo to nopokononto, hei i tempo tiꞌo tadulakonta wadi mohuroni kara-karanta hibali to mewali hieꞌe. 39Io horiana halali-halali, ane uwaꞌ tene kara-karami, kara-kara tiꞌo hangangaa nihuroni i porampuara motuntuni aturana topoparenta. 40Alaꞌ hapo to towali hieꞌe mekototehuꞌi mpuꞌu. Wadiki roraiꞌ topoparenta Roma. Hingkiꞌ rotiꞌi mampoꞌuwaꞌki peꞌewa. Hei ane roraiꞌki mpuꞌu, hapomo to hingkiꞌ totiꞌi, alaꞌ hawaꞌi uwaꞌ pokoꞌne to topogombo hieꞌe.” 41Koꞌukona mololita tomotodi tiꞌo, nopopahuliꞌmohi lekiꞌ-lekiꞌra.
Currently Selected:
Suro 19: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
Suro 19
19
Hi Paulu i Epesu
1Kolentuꞌana hi Apolo i Korintus, hi Paulu motengkaꞌimo bolaꞌ-bolaꞌ to i biri i woiꞌ Galatia hante Perigia, hei uko tiꞌo mengkohoumo nolou pe kota Epesu. Itoꞌo io mohidupaꞌ hante haꞌumbora duohi to mepoꞌohi. 2Noteneihi notiꞌi, “Pahuamokeiwae Inohaꞌ Mangkolehi i tempomi mepoꞌohi?”
Mehoniꞌhi, “Handoaꞌi tene, alaꞌ handoaꞌi tene kihori koꞌuwaꞌne Inohaꞌ Mangkolehi tiꞌo!”
3Nopeꞌitanoki womo hi Paulu, notiꞌi, “Ane hatoꞌoꞌi, ingkei niriukei motuntuni poturuꞌna hihimo?”
Mehoniꞌhi, “Motuntuni poturuꞌna hi Yohanes Toperiu.”
4Katoꞌo, notiꞌikihi hi Paulu, “Periuna hi Yohanes iomo tandaꞌ pengkatobaꞌa ka dosanta. Angkana i tempona hi Yohanes meriu, io mampowute pe toYahudi hingkeꞌna mepoꞌohihi pe toaꞌ to hingkiꞌ hupaꞌ ngkamuri, iomo hi Yesu.” 5Korohorina lolitane, niriumohi i lali konaꞌna Pueꞌ Yesu. 6Hi Paulu mohiniꞌmo koraweꞌna i tutuꞌra, hei mengkohoumo mpuꞌu Inohaꞌ Mangkolehi mokuasaꞌihi. Hampale hangkaꞌ-hangkaꞌ romo mololitahi hante wiharona toaꞌ ntaniꞌna, hei mampasuwuhi lolita to ka Pueꞌ Ala. 7Koworiꞌra to noriu hi Paulu, kira-kira hampuluꞌ roduo tomaꞌani.
8Kolentuꞌana hi Paulu i kota Epesu, io holampi nturusi i tambi penombahara toYahudi. I lali tolu mbula, io mampoturuꞌ toaꞌ to morampuhi itoꞌo, hei hawaꞌi uwaꞌ komorokaꞌne mampokonontokihi noniuꞌ i poparentana Pueꞌ Ala hingkeꞌna ropoꞌohi. 9Angkana uwaꞌ haꞌumbora duo toaꞌ to morintodi lalira to hawaꞌhi hiniꞌ mepoꞌohi. I hinarora toaꞌ to woriꞌ, mampononaꞌa poturuꞌ noniuꞌ tungkaihana Pueꞌ Ala mamposalamaꞌ manusiaꞌ moliu hi Yesu. Iomo hinaꞌ nopolihimohi hi Paulu nolou moꞌawa-awa hante haꞌumbora duo tosarani pe tambina hi Tiranu. Ando-ando hi Paulu mepoturuꞌ itoꞌo. 10Iomo jamane i lali rontoꞌa, wute lekiꞌ-lekiꞌna toaꞌ i poropensi Asia pahorihi pohawaꞌna Pueꞌ, moromiꞌ toYahudi moromiꞌ toYunani.
11Pueꞌ Ala mampaꞌani kuasaꞌ pe hi Paulu mowali tandaꞌ-tandaꞌ to mepohele. 12Kehapoꞌi lesona ba kumbanalu to ka nopakeꞌmo hi Paulu rokomi pe to mohakiꞌ, bateꞌra kaliuꞌ moꞌoriꞌ, hei molaihi mpuꞌu lekiꞌ-lekiꞌna lomoa to mampoperima-rimahi.
Kuasaꞌna hi Yesu monani kuasaꞌ tokodake i Epesu
13-14I tempo tiꞌo, uwaꞌ woꞌo i Epesu haꞌumbora duo toYahudi tokebahaꞌ matengkaꞌ-tengkaꞌhi i humanele kota mampopolai tokodake to mampekahii toaꞌ. Ka lumbura, uwaꞌ pitu tomaꞌani. Lekiꞌ-lekiꞌra anaꞌna haduo tutuꞌ tadulako mpenomba, to nikokeneꞌi hi Skewa. Hampiha tempo, tokebahaꞌ tiꞌo mampehohongkeꞌ mantiꞌi konaꞌna Pueꞌ Yesu hingkeꞌna mampopolaihi tokodake-tokodake ka haduo toaꞌ, rotiꞌi, “I lali konaꞌna Yesu to nopekarebaiki hi Paulu, molaiko!”
15Mehoniꞌ tokodake tiꞌo, “Ane hi Yesu hante hi Paulu, kubahaꞌlu. Angkana ingkei hieꞌe, hihimokei horiana podehoꞌkei mobueꞌa!” 16Katoꞌo toaꞌ to nopekahii tokodake tiꞌo melihaꞌ ako mepohokiꞌ pe iohi. Angkana hawaꞌi robiaꞌ roꞌewa, alaꞌ marohohi mpololeke. Iomo horiana mehilaihi ntureraꞌ ka tambi tiꞌo, belo-belomohi hei baduꞌra mohepaꞌ-hepaꞌ wutehi tintilawa.
17Lekiꞌ-lekiꞌna toaꞌ to meꞌohaꞌ i Epesu, moromiꞌ toYahudi moromiꞌ toYunani, pahorimohi hapo to mewali tiꞌo. Iomo hinaꞌ morokaꞌhi, hei konaꞌna hi Yesu pedeꞌ ropokodeꞌmo. 18Uko katoꞌo, woriꞌ woꞌo tosarani mangakuꞌ waliara to hawaꞌi hintotoꞌ i hinarora toaꞌ to woriꞌ. 19Woriꞌhi tokebahaꞌ mangkomi suraꞌ-suraꞌ bahaꞌra, rorampu hei rohunu i hinarora toaꞌ to woriꞌ. Hilina suraꞌ-suraꞌ bahaꞌra tiꞌo ane niꞌihaꞌi, kira-kira 50.000 doiꞌ peraꞌ. 20Katoꞌo, kopewalina to mepohele tiꞌo, koworiꞌ-woriꞌa toaꞌ to mampehoromua pohawaꞌna Pueꞌ, hei nokomi kuasaꞌna kareba tiꞌo, terononihi womo toaꞌ to mepoꞌohi.
Posisalaꞌ i kota Epesu
21Liumo to pewali tiꞌo, notungkai hi Paulu nolou pe woiꞌ Makedonia hante Akaya, hei uko tiꞌo hingkiꞌ nolou woꞌo pe kota Yerusale, notiꞌi, “Uko ka Yerusale, hangangaa nolouꞌa pe kota Roma.” 22Uko katoꞌo, norumbaꞌmohi roduo toaꞌ to metuntu pe io medulu nolou pe Makedonia. Konaꞌra, hi Timotius hante hi Eratus. Hi Paulu uwaꞌ tene i poropensi Asia.
23I tempo tiꞌo, uwaꞌ posisalaꞌ to kodeꞌ mpololeke i kota Epesu. Posisalaꞌ tiꞌo mewali nokomi poturuꞌ noniuꞌ poliwona Pueꞌ Ala mamposalamaꞌ manusiaꞌ moliu i hi Yesu. Waheꞌe lolitane. 24I kota Epesu tiꞌo, uwaꞌ haduo tomaꞌani to mapande mowali totambi ka peraꞌ. Konaꞌna toaꞌ tiꞌo hi Demeteriu. Jamana iomo mowali totambi to ropakeꞌ menomba pe lomoa. Lomoa towoweꞌe to ropenombai tiꞌo nikokeneꞌi hi Atemis. Hei ka jamana tiꞌo, io hante topajamana pahuahi woriꞌ doiꞌ. 25Hampiha tempo, io mowowoi awanahi to mapande mowali totambi ka peraꞌ. Notiꞌikihi, “Halali-halali, ibahaꞌlukei, ka pajamanta hieꞌe woriꞌ mpololeke pahuante. 26Kehapomo hatoꞌo, iꞌokiꞌkei hei ihorimokei hapo to nowali haduo toaꞌ to nikokeneꞌi hi Paulu. Notiꞌi hapo to nowali korawena toaꞌ hei ropenombai, hawaꞌi uwaꞌ kuasaꞌne. Alaꞌ pepoturuꞌna tiꞌo, woriꞌhi toaꞌ to metuntu pe hi Paulu, hei handoꞌio i Epesulu angkana i humanele poropensi Asia, bateꞌna woꞌo hatoꞌo. 27Mewaliꞌ, halali-halali, to kukorokaꞌ mpololeke, inioꞌna intu pajamanta hieꞌe hamboaꞌmo nolei toaꞌ. Hawaꞌi iolu, angkana totambi penombahanta pe hi Atemis hamboaꞌmo hingkiꞌ tepokodeꞌ, wute konaꞌna hi Atemis to makuasaꞌ mpololeke hamboaꞌmo niꞌadaꞌi. Hantaro iomo to ropenombai lekiꞌ-lekiꞌna toaꞌ i Asia hei i humanele duniaꞌ.”
28Korohorinalu lolitane hi Demeteriu tiꞌo, bukotahi hei moloaꞌ-loaꞌhi, “Pokodeꞌmo hi Atemis, lomoanta toEpesu!” 29Posisalaꞌ tiꞌo menele wute i humanele kota. Uko katoꞌo, noloumohi toaꞌ to woriꞌ mohokiꞌ hi Gaiu hante hi Aritaku. To roduo tiꞌo iomo toMakedonia to mampoꞌawa hi Paulu i patengkaꞌana. Roduo toaꞌ tiꞌo nihokiꞌmohi hei rokomimo nolou pe tambi porampuara to kodeꞌ i lali kota. 30Nokodokoꞌi hi Paulu nolou moꞌawa-awa hante iohi mekahi pe lali porampuara tiꞌo. Angkana roꞌopi halali hampepoꞌohina hingkeꞌna anioꞌi nolou. 31Uwaꞌ woꞌo haꞌumbora duo toaꞌ (bolena hi Paulu i poropensi Asia) to morumbaꞌ toaꞌ mampatiꞌiki hi Paulu hingkeꞌna anioꞌ nolou pe porampuara ngkodeꞌ tiꞌo.
32I tempo tiꞌo, makaja komaroaꞌne toaꞌ i porampua ngkodeꞌ tiꞌo. Uwaꞌhi to mantiꞌi waheꞌe, uwaꞌhi to mantiꞌi watoꞌo. Koworiꞌna toaꞌ to hirampu itoꞌo hawaꞌi robahaꞌ hapo to roporampuki. 33Uwaꞌhi to mantiꞌi haduo toYahudi to nikokeneꞌi hi Alesande to mewali pongkana posisalaꞌre, alaꞌ io to ropopewotu toYahudi mampowute lolita pe toaꞌ to woriꞌ. Iomo horiana hi Alesande mohinimo koraweꞌna mampokondiiꞌhi, alaꞌ nokodokoꞌi mampowute kototuꞌuana. 34Angkana ikoroꞌokiꞌna toaꞌ to woriꞌ koꞌiona toYahudi, moloaꞌ-loaꞌmohi nturusi, rojaa komoruene, rotiꞌi, “Pokodeꞌmo hi Atemis, lomoanta toEpesu!”
35Koꞌukoana haduo guru ntulisiꞌ i kota tiꞌo moloaꞌ mampokondiiꞌhi, notiꞌi, “Halali-halali toEpesu! Lekiꞌna toaꞌ i duniaꞌ pobahaꞌ kota hieꞌe to morewahi tambi penombaha lomoa towoweꞌe hi Atemis hante watu ntoaꞌna to moꞌonoꞌ ka laniꞌ 36Hawaꞌi uwaꞌ haduo to wadi mosapuaka tiꞌo. Iomo hinaꞌ hangangaa mondiiꞌki duluna. Inioꞌki nokomi komolahona lalinta. 37Alaꞌ toaꞌ to ikomikei humei tiꞌo, hawaꞌhi mosilakai tambi penombahanta ba mampokokeniꞌa konaꞌna lomoanta. 38Mewaliꞌ, ane hi Demeteriu hante awana to hampajamahi mangkodokoꞌi mosalaꞌi ba himolu, bateꞌna ropowute i tadulako kota. Alaꞌ uwaꞌmo tempo to nopokononto, hei i tempo tiꞌo tadulakonta wadi mohuroni kara-karanta hibali to mewali hieꞌe. 39Io horiana halali-halali, ane uwaꞌ tene kara-karami, kara-kara tiꞌo hangangaa nihuroni i porampuara motuntuni aturana topoparenta. 40Alaꞌ hapo to towali hieꞌe mekototehuꞌi mpuꞌu. Wadiki roraiꞌ topoparenta Roma. Hingkiꞌ rotiꞌi mampoꞌuwaꞌki peꞌewa. Hei ane roraiꞌki mpuꞌu, hapomo to hingkiꞌ totiꞌi, alaꞌ hawaꞌi uwaꞌ pokoꞌne to topogombo hieꞌe.” 41Koꞌukona mololita tomotodi tiꞌo, nopopahuliꞌmohi lekiꞌ-lekiꞌra.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)