MATIUS 2
2
It ap mo eroma mene nen hesagal ineilenggen en waluk wagaukwa wene
1At Yesus a'nogo, o Propinsi Yudea o Betlehem ta'lagaikhe. Ta'lagaikhe andem sambul he, o andoma kain enupogot he, ap enu Herodes andi welagaikhe. Were'ma re, it ap inendawimo kagalek mene hesagal futfikhi lagaukwa mene ekhe o mo eroma nen yegelogo lagai wagarek andoma higiren o Yerusalem wagaukwa. 2Wagaukwasik, iren he, mel isukwa: ”Afuni Yahudi mene inoe raja kain mene ta'lagasik werek a'naga, o ki ta'lagasik werek. Nit o mo yegelogo lagai wagare'ma andoma were'ma, ap kain andi ta'lagama iluk, hesagal ekhe weinam agama re, at andi ninendawinggen oba himbiret fuluk fogerasuogeluk hesagal andi nineilenggen nen waluk heinok wani wago,” iluk isukwa. 3Isukwama re, at kain Herodes andi esanggo holhikhesik he, at inom, afuni o Yerusalem welagaukwa mene inom, ina'manggen hokhorogo lagaikhe. 4Ina'manggen hokhorogo lagaikhesik he, at kain Herodes a'nogo nen he, it ap Allah eisewerek inogogwi kaindek inom, Allah ane lisu palek inelu mene inom, misi'mo andogorogo fisasikhesik he, ”At Kristus andi, hiren he o koma ta'lasigin iluk ikhi lagep nogo,” iluk heinok wogisasikhe. 5Heinok wogisasikhemo re, iren he, ”O Betlehem Propinsi Yudea andoma aro. Andoma ta'lasigin iluk, it ap Allah ane yagaisikhi lagaukwa mene ekhe nen ikhi logolik he,
6’Hit afuni o Yudea tonggwe
o sili hokho mene enu Betlehem welagep
mene yi sani!
O sili fenakwe yoma enu werek,
hilingik kwelegat he, o Betlehem yi nek he,
enu lek, esanggoma hak, iluk ugun lego.
An nagainafuri Israel mene
ap kain mene awe a'ma logogun andi,
o sili hit were'ma yoma hinanggele'ma
nenat ta'lasigin o,’
iluk lisu palogo fesikhemo werego,” isukwa.#Mi. 5:1
7Isukwama re, at Herodes a'nogo nen he, it ap hesagal futfikhi lagaukwa mene ineilenggen nen waluk wagaukwa mene omanogo hinagaisogo woginarek lagaikhesik, mel yagaisasikhe: ”Hesagal andi mera nen weinam aga? Furogo yagane'ni,” iluk heinok inoba hobuk wanhikhe. 8Wanhikhemo iren he, ”Yi'nogo,” iluk yagatukwama re, aren he, ”Halok he, hit o Betlehem andoma lani o. Lambik he, omalik ta'lagasik werek andi fanorogo hera'no. Nen, arat heratep halok he, hobuk an nendawinggen at oba himbiret fuluk fogerasi lagen yaganesi we'no,” iluk yagaisasikhe. 9Yagaisasikhemo re, inesanggo holhukwasik, hesagal o mo eroma nen yegelogo lagai wagarek oba andoma weinam agaikhemo ineilenggen hasukwa mene a'nogo attak lagu kwelek he, ombo'ne ineilenggen nen waluk lagaukwa. Ineilenggen nen waluk lagaukwa-lagaukwa re, hesagal a'nogo omalik ta'lagaikheba higithogo asi lagaikhesik he, arat kamo isikhe. 10A'nogo kamo isikhemo it omanogo hesagal a'nogo ineilenggen hasukwasik he, inendawimo hokhorogo inagaiyek agaukwa. 11Inendawimo nen inagaiyek hokhorogo agaukwasik oloba kwisukwa re, omalik a'nogo agaisa Maria agoba were'ma ineilenggen hasukwasik, ineindep awi yagaisogo fogeratukwa. Fogerati logolik he, onggo hokho fano mene emas inom, kemenyan kami amben hangge mene inom, e mur amusu inom, heiselogo wogetukwa. 12Wogetukwasik nogo ugunem at Allah nen he, ”Hit hobuk hinambotkwe Herodes oba lagup,” iluk husumbi yagaisasikhemo inabi hasukwasik he, kwe hunogo kwe nen inaiba lagaukwa.
Yesus tago waluk heise o Mesir lagaukwa wene
13It ap hesagal ineilenggen en waluk wagaukwa mene omanogo arat lagaukwama re, hubanggo at Yusuf nogo ugunem malaikat pogoroba nen wagaikhesik he, abiba mel yagatikhe: ”Yusuf. Hat he, omalik tago ari agaisa emberegat woginarek, o Mesir andoma heise lan o. Lambik he, andomaat logoino o. Were'ma an nen yagaheti halogat we'no. At kain Herodes a'nogo nen omalik tago ari wasigeluk ili'logo o,” iluk yagatikhemo abi hasikhe. 14Abi hasikhesik eluk agaikhesik he, hubanggoat omalik ket tago a'nogo agaisa emberek woginarek o Mesir lagaukwa. 15Lagaukwasik, o andoma mondok welagaukwa. Were'ma, at kain Herodes a'nogo ebe wa'lagaikhemo nen wagaukwa. Andi hilingitikhe andi re, it ap Allah ane yagaisikhi lagaukwa mene ekhe nen he, ’An namlogo o Mesir andoma nen wesuageluk wolhagain o,’ iluk Allah nen isikhemo lisu palogo fesikhe andi higithogoat hilinglasuageluk hilingitikhe andi.#Hos. 11:1
Omalik o Betlehem mene inoatukwa wene
16At kain Herodes a'nogo nen it ap wene warisasikhe mene a'nogo,” Wesugun a? Lega,” iluk, yerinarek welagaikhe-welagaikhe re, inebe legaren he, ”Lalnafama higi,” iluk a'mage hokhorogo lagasikhe. A'mage hokhorogo lagasikhesik he, omalik ket tago mene o Betlehem andoma mene inom, o era'lukwe andoma mene inom, huli ap hesagal ineilenggen nen waluk wagaikhasik, yi huliba nen hogo, iluk senggerogo yaganeta huli nen, umur 2 tahun mene inom, hobuk ta'larik wagaikha mene inom, ap halok mondogat inoa'no,” iluk, agoromi lakfisasikhe.
17A'nogo hilinglagaikhe andi re, at Yeremia Allah ane yagaisikhi lagaikhe mene nen ikhi logolik he:
18”O Rama nen le hokhorogo agunem ninesanggo holhik,
inane ngai wai hokhorogo ugunem ninesanggo holhik, ogo.
At he Rahel eagwi inebe legen inobaget le hokhorogo aga logolik,
Nendawinggen sebelu lek hak. Nabire. Le agu mondok logogin o,” iluk isikhemo lisu palogo fesikhe mene andi higithogoat hilinglasuageluk hilingitukwa andi.#Yer. 31:15
Yesus tago waluk o Nasaret wagaukwa wene
19At kain Herodes a'nogo arat wa'lagaikhemo re, malaikat Allah nen lakfei wagaikhemo wagaikhesik he, Yusuf o Mesir andoma logolik nogo ugunem hubanggo abiba re, mel yagatikhe: 20”Yusuf. Helugame o. Menla'luk he, omalik tago ari agaisa emberek woginarek o ap Israel mene were'ma lan o. Omalik tago ari wasuogeluk ikhi lagaikha a'nogo re, ebe arat wa'laga o,” iluk yagatikhe. 21Yagatikhemo re, Yusuf en omalik tago a'nogo agaisa emberek woginarek he, ap Israel mene were'ma wagaukwa. 22Wagaukwama re, it afuni nen he, ”O Propinsi Yudea tonggwe omanogo hobuk ap kain he, enu Arkelaus, andi eisena Herodes obali'mo menfagama werego,” iluk isukwama, Yusuf esanggo holhikhesik he, o andoma lagain ailo agaikhesik were'ma, at Allah nen, ”O Yudea andoma lagun o,” iluk, abiba husumbi yagatikhemo, o Galilea andomaat wagaukwa. 23Wagaukwasik he, o sili enu Nazaret andi kwi wagaukwasik andomaat kamo isukwa. A'nogo hilingitukwa andi re, it ap Allah ane yagaisikhi lagaukwa mene nen ikhi logolik, ”At a'nogo awi Nazaret mene ugun o,” iluk isukwa higithogoat hilinglagaikhe andi.#Mrk. 1:24; Luk. 2:39; Yoh. 1:45
Currently Selected:
MATIUS 2: inohap
Highlight
Share
Copy
Want to have your highlights saved across all your devices? Sign up or sign in