YOSUA 16
16
O kweang Efraim inom Manasye inom wogisasikhe mene a'nogo
1Kweang huli-huli it Yusuf againafuri mene a'nogo faget palogo wogisasikhe mene re, i Yordan ima andoma nen hiling-hiling lagasik, o Yerikho horokhogo nen he mo lagai wagarek fikhit o Yerikho i elesi wulibisogo lagarekwe andoma nen he ilingage bene leimo andoma O Yerikho huli nen liabek he o Betel tom oba andoma huli. 2Betel huli nen lagasik, o Lus huliba nen o Atarot kwe nen he ap Arki mene were'ma andoma. 3Andoma nen lagasik, barat fikhit he o ap Yaflet mene werek fikhigen lagasik o Bet-Horon-Hilir fikhit andoma nen hiling-hiling o Gezer oba nen fem wurepma i Laut Tengah were'ma andoma.
4Andi re kweang ap inunggulenu Manasye mene inom, Efraim mene inom, at Yusuf ambisangma mene omanogo it inanggweang mondogat logouwageluk wogisasikhe mene andoma.
Kweang Efraim mene wogisasikhe mene a'nogo
5Ombo'ne yi re kweang omanogo unggulenu Efraim mene ineisok erokwe lombok hulithigik wogisasikhe mene. Fena timur fikhiren kweang iren mene huli-huli re, Atarot-Adar en hiling-hiling laga lagasik o Bet-Horon-Hulu fikhit andoma. 6Andi nen pikhit i Laut Tengah huli andoma. O Mikmetat andi re abel utara fikhit welagaikhe. Nen timur fikhit he kweang huli-huli maserogo o Taanat-Silo fikhit andoma nen hiling-hiling abel timur fikhit soganogo re pikhit o Yanoah huli andomaba.
7Andoma nen he huli walsek mene andi nen pelabek o Atarot en he Naharat huli nen pikhit o Yerikho walingisogo wurep kobokhogo re i Yordan huliba. 8Abel fena barat fikhit Efraim mene faget huli-huli re, o Tapuah nen laga-laga i endep mene Kana ima nen he, huli-huli re i Laut Tengah andoma hulirek. Andi re kweang it inunggulenu Efraim mene inanggweang asuageluk inebe ineisok erokwe lombok sumburisasikhe mene re, 9o kota endep mene inom, o sili wilayah Manasye mene inanggelekwe welagaukwa mene inom andoma. 10Oba nen he, it inunggulenu Efraim mene nen he ap Kanaan mene re o Gezer oba andoma nen mugusogo wulakfisasukwa lek. Andiba re. yogondak huli nen ap Kanaan mene re o Gezer andoma it Efraim inap inom seberogo welagaikharek, oba nen it ap Efraim mene nen he inamimingengge a'luk yabu hilingiti logouwageluk inane ninghogo yagaisugunem it ineabu hilingitu mondok welagaikharek.#Hak. 1:29
Currently Selected:
YOSUA 16: inohap
Highlight
Copy
Compare
Share
Want to have your highlights saved across all your devices? Sign up or sign in
