HAKIM–HAKIM 5
5
He Debora inom, ap Barak inomen wuni watukwa wene
1A'nogo legetfisasukwasik, o andi sambul he Debora inom ap Abinoam amlogo Barak inomen wuni yi'nogo watukwa.
2Afuni Israel mene inogogwi kaindek
omanogo weim yabugun iluk sikhiphogo aga,
ap inebe mondogaren inendawinggen oba
nenat yabi logoin aga andi nen,
nineisena Tuhan fogerasuogo.
3Nit afuni Israel mene nineisena
Tuhan Allah a'nogo faget wuni wati lagi yi,
hit ap hinenupogot hinagoromi kaindek
hinomen hinesanggo holini o.
4Nineisena Tuhan hat hebe
tom Seir oba nen wulipluk wagunemen,
hat hebe o wilayah Edom oba nen
herakfisaluk wagunem,
kweang abolok igik, nen pogoroba
nen i anggwe halogo pelabi wagik,
ohenaba nen meiso kweisalogo
pelabi wagik, ikhi lagen mene o.
5Nineisena Tuhan handom
Sinai eisewerek mene,
Israel mene ineisena Allah helokhoma
yi tom ti tom mondogat abolok ikhe.#Kel. 19:18
6Samgar hun Anat amlogo welagaikhe andem oba inom,
nen he Yael werek oba inom he,
kwe bene afuni inelokhe welagaukwa lek,
we, kwe endep kwe nen kwanirogo laga lagaukwa.
7Israel mene inawi kota-kota
omanogo afuni mondok le'ma,
hat Debora afuni Israel mene inagaisa
asigiluk hendawinggen hundik mene wagen,
8Israel mene nen tugwi kembu faget
nineisena ebe yi aro,
iluk inendawinggen oba himbiret faga,
fagasik fogerasuogeluk ugunem
naiba weim kagal laga.
Ap weim inanini mene inebe
40.000 mene inanggele'ma nen ogo,
ap misik ekhe nen sikhe wanhi'lek.
9Ap Israel mene inogogwi kaindek
weim awene agarek mene inom,
afuni holhu mene inomen inendawimo
nen anggaluk weim yabugun aga andi,
Nendawilage, iluk hai wathinafi lagi o,
Tuhan enek fogerati logouwok!
10Hit ap wam keledai kut mene
amboloba talfuluk laga-lagep mene andi inom,
hit hinasu wam oroa'ma talfuluk
laga-lagep mene andi inom,
Nen hit afuni ekhe hineisok oba
laga lagep mene andi inom
ninomame ago wene andi
yagaisilik laga logoino!
11A'nogo yagaisilik lagunem, afuni i mogo habuli'mo wuni watu mondok logolik,
nineisena Tuhan nen ninaselei mene mabenet fesikhemo,
At againafuri Israel mene ninomame agosik,
iluk agap sagalogo yagaisilik laga logoino.
O kota leget ambe palekwe erathigik weri'lagwi.
12Wesimbik he Debora hebe menlame o, menlasimbik wuni ero wulabin.
Hat Barak Abinoam amlogo yi, hebe siakhogo menlasimbik he,
haselei mene inenggi hele warogo woginarek lan, ili'lago.
13 Tuhan faget weim yabugun iluk, ap ekhe inafe hebelek mene,
linet fisaga mene inogogwi melalinafu mene inoba lagaikha.
14It he o Efraim en he tonggoma it inelokhoma Benyamin mene esa logale'ma andoma paga.
O Makhir en he ap sikhe fisogo mene inogogwi panglima pi wagaikha,
nen o Zebulon oba nen he inogogwi sikhe fisogo mene perwira weinam agaikha.
15It Isakhar mene inogogwi re, Debora inom wagaikha o.
Ap Isakhar mene andi re, an Barak nombo'ne lagaikha.
It he an nombo'ne tonggoma paga.
Oba nen he, it inunggulenu Ruben mene re inane misik lambulhi'lek andi nen he,
lagi'lek kamo aga andi.
16 Domba inanggelekwe kamo aga andi nenahalok?
Ap anggo halherek mene nen anggo woletu mene ane holugun iluk kamo aga a?
It ap Ruben mene andi re inane misigat agasik he lagi'lek kamo aga andi.
17-18It Zebulon mene inom Naflati mene inom
weim ambeba inaninirogo hilingitu kwelek,
it ap Dan mene re, inangge kapal
herakfuluk lagi'lek welagaikha.
Andi hak he Gad mene ogo re,
i Yordan aik elikwe timur
fikhit kamo agaat.
Ap Aser mene inawi i laut
esanggokwe werek mene ogo re,
wulibi lagi'lek, kamo agaat andi.
19Ap raja-raja mene re,
o Taanakh I Megido ima horokhogo
andoma weim yabi lagaikha,
Nen it raja-raja Kanaan mene re
weim inomamerogo yafa.
Meneat he, hugulengge perak
mene ogo ekhe helaluk wagaikha lek.
20A'nogo yafu kwelek, it hesagal
pogoroba mene re it inebe werekwe
andoma laga logolik,
ap Sisera wasuogoluk, it inom weim yafaat.
21I Kison he fu waga logolik,
selei mene woginarek laga.
I fu fonyalik-lenggalik lagarek andi hak
an nomamerogo hilingisin iluk
nendawignggenma nen ninghogo yaganeri'logo.
22Ap inomame werek mene re,
weim heise louwogeluk,
inangge kuda silhugunem aninirogo
laga logolik ineisok abolok telim-telim lili'lagwi.
23It ap Meros mene andi inom,
ap Tuhan obaget inamurururogo
weim yafarek mene nen hilingitarek
hakhogo weim yafunem leberisa
wagaikha lek andi nen he,
malaikat Tuhan nen ikhi logolik,
o andi inom afuni o andiba werek mene inom
Allah nen homan fisoago, iluk ikhe.
24Ap Heber aiba Keni mene andi ogore,
at agwe Yael andi re, it hemi o tenda
sale'ma werek mene andoma inanggele'ma nen he,
at Yael enek he Allah nen hokhorogo
fanot fouwago.
25Sisera nen i kino ikhe meneat he,
sapi eilak amusu wogote.
It raja-raja nen inagai oak
fano meneba keralogo nenggarek andi hak,
susu hinagaisogo wogote.
26At he Yael en he,
e kabuksek mene inom,
posiemanggen telhu meneba inom
Sisera tungethasikhemo,
ungguloak halokhogo wate.
27at ebe he Yael elokhoma
talorogo weing lagama re,
kweangma warek were'ma haga.
28At Sisera agaisa nen he,
jendela lekwe nen eilenggen
wu'lasi lagik ikhi logolik he,
kereta Sisera mene weri'lago
lek andi re ninggi'nogo nen he,
Sisera anggo kuda eisok abolok
lumbu-lumbu ili'lago lek andi re
nenahalok he, iluk hilingiti laga.
29Amingmingengge endawinggen mondok
wenggelek mene nen,
agaisa endawimo wenggel hasikhe mene
onggo yagatikhe.
30It hugulengge wanha mene
sumbut-sumbut agunem athe areng lek andi.
Ap tentara inebe lombok helime
yenggerugwi pirendek he a,
misiktek he a, helugu kwelek he
areng lek andi,
Sisera asu unggulkwe mene onggo
hokho mene wogota,
Wogoti logolik hat hasiong
fano mene inom wogheta.
Muli figik, mola figik mene eil fano
mene hat faget hobagaga, iluk yagate.
31Nineisena Tuhan,
at Sisera wato andi hak,
afuni hat haselei mene ogo, a'nogo wa'lasuak.
A'nogo meneat he, hat hagainafuri
hendawi mene nek he,
mo eil tilelek-walelek wagarek andi hak,
it mondogat liarogo logouwago,
iluk wuni watukwa.
A'nogo hilinglagaikhesik oba nen, 40 tahun weim lek liolek fano welagaukwa.
Currently Selected:
HAKIM–HAKIM 5: inohap
Highlight
Copy
Compare
Share
Want to have your highlights saved across all your devices? Sign up or sign in