Wahyu 3
3
Wene Allah aʼburi o Sardis mende pasik yogokike wene
1Esigit diluk yoknekesik yabunggane yoknoko dogolik, “Allah Agurengge inebe 7 paga etnogo inde welagik, kusagal inebe 7 pagaat etnogo ninggimo pago welagik, kagarigogo mende etnogo nen wene yi yokisik,
At Allah nen malaikat ayonggo ʼbiluk laʼbi wisu kak, at aʼburi o Sardis nandorligogi mende inayonggo ʼbiluk ʼbiyasikemo werek etnogo, wene yigit diluk kat kolal mbalogo inoba laʼbino o,
Kit o Sardis mende akoni nen kinabok yisi dogolik,
It iniluk werek, yiluk yiligogi mende, kinebe warek negen dogolik kinobabut kagarigogi mende eti, an nilu o. 2An nen kit kinaren mbaligogo mende, nombae Allah iloba pano mondok ʼbogokogo kagarigogi dek. At te, watlasusak korogat kinendainggen nggenduk werek eta pagaat, mendokogo melatluk kininggi kiniyok kambuk dakalok, kinobatne atni o. 3Kit esigit diluk mendokogo melatluk kinobatne agidek kalok, akoni inil arurlu waganuwogoluk limago wirigogi eti kak, an esigit dilugat, kit nen,
At etinem wisigin, yiluk kinonggodek werekma wisunogo nen, wene ebe-alep yanggul kisasukama kinasuk kolkigip mende kinakla ebet diluk nen, weyak kagarigogi mende ʼbukalogo togot diyalok kinobabut kwalatluk, wene etiat kininggi aʼbetogo pago dogono o. 4Esigit diluk mende, kit akoni o Sardis mende kinebe mbererlagat amberek, akoni nen iniyom sobalek mende mirli mende oba dabulasunogo yiluk nggarelogo dogoligogi eti kak, weyak omanggi kagakidek werek eti, iniyom nggut mende yisusak erlok obaat yikogo nen an ninom noko dogogun o.
5Ta nen obatne asigin kalok, su nggut mende yiʼbigin o. Nen, an it akoni inilugurinabigogo mende inendaga buku paga kolal mbalek mende korogo laʼbiyagin dek o. An nombae inom, malaikat yonggo laʼbiya wirigogo mende inom, inil oba,
Yi an naʼburi o, yiluk inendaga ʼbukakogo yanggul isagin, yiluk, yigi mende eti, 6Allah Agurengge nen Allah aʼburi o yi ai ndi ai nandorligogi mende yogisiligogo mende eti, kinasuk kolusak kalok, panorogo kolini o, yiluk yogisigi mende eti, kolal mbalogo inoba laʼbino o,” yiluk yokneke.
Wene Allah aʼburi o Filadelfia mende pasik yogokike wene
7Esigit diluk yoknekesik nen, yabunggane omanggi yoknoko dogolik,
“An weyak kagakidek nobabut nggaʼberek dogolik, nane eberogonat dombok yiligogo mende, su kunci Daud mende wolok su kuwalko kalok, akoni amberek nen lasusak erlok dek o. Nen, su lako kalok, akoni amberek nen kuwalusak erlok degat etnogo nen wene yi yokisik,
At Allah nen malaikat ayonggo ʼbiluk laʼbi wisu kak, at aʼburi o Filadelfia nandorligogi mende inayonggo ʼbiluk ʼbiyasikemo werek etnogo, wene yigit diluk kat kolal mbalogo inoba laʼbino o,
8Lakani! Kit kinobabut kagarigogi eti, kinobatne mondok ʼbugurlagat mende, an nane kologo motogo kagakik, nabok laʼbelkidek ʼbukakogo yogisigik, kagarigogi eti, an nilumo, kit kinake, su akoni amberek nen lasusak mondok erlok dek mende arat kuwalogo ʼbinagagi o. 9Lakani. It akoni Iblis aʼburi nandorligogi mende inebe Yahudi mende dek mende, inenggalat,
Nit ninebe Yahudi mende, yiluk yiligogi mende eti, kit kinapma unggi witluk nen, an kit nendainggen kunik werek eti inilu asuwagaluk, it inebe kit kinoba ʼbiya wisigin o, yiluk eberogonat yokisigi o. 10Esigit diluk ʼbiya wisigin eti, an nen,
Kinobakanini kambuk yiluk dogono o, yiluk yokisasigi mende eti, nane kologo motogo kagarigogi eti paga, o yabunggane akoni agat oba yoma dogoligogi mende taʼbokogonat inaren mbaligiluk yi aik ndi aik inoba ʼbiyagin eti kasi nggorlek, kirat, an nen napma pano pakisek dogogin o. 11An ibat-ibarat wisigin o. Esigit diluk witluk nen, ta ae aʼbusuk ta ae aʼbusuk lagonem, inobatne asugun mende kalok onggo nggare-nggare mendago yiʼbiyiligogi eti kak, onggo kit wokisausak mende it akoni amberek nen ndilogo korlaunogo yiluk, kit ebe waganggigip mende eti, kininggi aʼbetogo pago dogono o.
12Nen, ta nen obatne asigin mende kalok, kono wurowak wusabigogi eti kak, at esigit dilugat Allah enggaerek ago palekma mendiluk, nombae Allah endaga inom, ago kota Yerusalem ngget mende at nenat mbogot oba nen wusa ʼbi wisigin eti endaga inom, an nendaga ngget mende inom, an nen, at eti oba kolal mbalogo ʼbumo, at o etoma nen duki wisigin mondok dek o, yiluk yigi mende eti, 13Allah Agurengge nen, Allah aʼburi o yi ai ndi ai nandorligogi mende yogisiligogo mende eti, kit kinasuk kolusak kalok, panorogo kolini o, yiluk yogisigi mende eti, kolal mbalogo inoba laʼbino o,” yiluk yokneke.
Wene Allah aʼburi o Laodikia mende pasik yogokike wene
14Esigit diluk yoknekesik nen, yabunggane omanggi yoknoko dogolik,
“Erlo paga nen, yi mende ndi mende erlo anat werekma, Allah nen walkasike mende eti, at abok nobabut kumbukogo eberogonat dombok yiligogo mende, nendaga ebeat asuwak yu kak, Amin etnogo nen wene yi yokisik,
At Allah nen malaikat ayonggo ʼbiluk laʼbi wisu kak, at aʼburi o Laodikia nandorligogi mende inayonggo ʼbiluk ʼbiyasikemo werek etnogo, wene yigit diluk kat kolal mbalogo inoba laʼbino o,
15Kit kinobabut kagarigogi mende taʼbokogonat an nilu o. Kit kinendainggen nggoʼbot dogolik, kinobakanini kagarigogi degat, nen aganggen dogolik anggilukogo kagarigogi degat. Kinendainggen nggoʼborat kinobakanini dogusak kalok, esigit dilugat dogusak o. Nen aganggen anggilukogo kagako dogusak kalok, esigit dilugat kagako dogusagat o. 16Mende, kinendainggen nggoʼbot degat, aganggen degat, nggoʼbot a, aganggen a, aganggen ʼbugurlagat werek eti paga, i induk saram agonem inambema nen kirlelogo wula ʼbiyiligogi kak, an nen kinebe wula ʼbinagagin o. 17Kit kininggi degat, kinilenggen mbugat, kinal mbalegat dogolik,
Nit ninebe ninaʼbuwarek negen mondok weyagat werek, yiluk didigidek, kit nen yisi dogolik,
Nit ninebe ninenggaerek nen nggogorakogosik, yi mende ndi mende dek agidek, nininggi weregat werek o, yiluk yiligogi o. 18Esigit diluk werek eti paga, kit nggokndek kininggi werek asubagik nen, emas kindu werago pano kagarigogo mende noba onggo mbaligik, kinal mbalegat werek eti kinenggarli asunogo nen, su nggut mende yikawogoluk noba onggo mbaligik, kinilenggen mbuk mende eti pano agonem yi mende ndi mende lakasi doguwogoluk, ambusu kinilenggen obangge wasubagik nen noba onggo mbaligik, kagasubagik nen yiluk kinasuk warigogo o. 19Esigit diluk kinasuk warigogo eti, it akoni an nendainggen kunik mende, inebe dombok inasuk warogo ndugi inarigogo eti paga, kit weyak kagarigogi mende eti togot diyalok kinobabut kwalatluk nen, anggilukogo kagako dogono o. 20Lakani! An su kambema mendek dogolik, su ane mbumbukiligogo o. Esigit diluk mbumbukasinem, at ta nen nane asuk kol diluk nen, su kuwal niyagin kalok, an at oba ʼbika unggiluk nen, nimbisak kimbiri nasi dogolik nagarlak-kagarlak dogogun o.
21“An arat nobatne agagimo, nombae nggok dogoligogo mende obalikmo nimbisak werek yi kak, ta nen obatne asigin kalok, an nggok dogoligogo mende nobalikmo nimbisak doguwogoluk mendigin o, yiluk wene yigi mende eti, 22Allah Agurengge nen Allah aʼburi o yi ai ndi ai nandorligogi mende yogisiligogo mende eti, kinasuk kolusak kalok, panorogo kolini o, yiluk yogisigi mende eti kolal mbalogo inoba laʼbino o,” yiluk yokneke.
Currently Selected:
Wahyu 3: DNA
Highlight
Copy
Compare
Share
Want to have your highlights saved across all your devices? Sign up or sign in
Wahyu 3
3
Wene Allah aʼburi o Sardis mende pasik yogokike wene
1Esigit diluk yoknekesik yabunggane yoknoko dogolik, “Allah Agurengge inebe 7 paga etnogo inde welagik, kusagal inebe 7 pagaat etnogo ninggimo pago welagik, kagarigogo mende etnogo nen wene yi yokisik,
At Allah nen malaikat ayonggo ʼbiluk laʼbi wisu kak, at aʼburi o Sardis nandorligogi mende inayonggo ʼbiluk ʼbiyasikemo werek etnogo, wene yigit diluk kat kolal mbalogo inoba laʼbino o,
Kit o Sardis mende akoni nen kinabok yisi dogolik,
It iniluk werek, yiluk yiligogi mende, kinebe warek negen dogolik kinobabut kagarigogi mende eti, an nilu o. 2An nen kit kinaren mbaligogo mende, nombae Allah iloba pano mondok ʼbogokogo kagarigogi dek. At te, watlasusak korogat kinendainggen nggenduk werek eta pagaat, mendokogo melatluk kininggi kiniyok kambuk dakalok, kinobatne atni o. 3Kit esigit diluk mendokogo melatluk kinobatne agidek kalok, akoni inil arurlu waganuwogoluk limago wirigogi eti kak, an esigit dilugat, kit nen,
At etinem wisigin, yiluk kinonggodek werekma wisunogo nen, wene ebe-alep yanggul kisasukama kinasuk kolkigip mende kinakla ebet diluk nen, weyak kagarigogi mende ʼbukalogo togot diyalok kinobabut kwalatluk, wene etiat kininggi aʼbetogo pago dogono o. 4Esigit diluk mende, kit akoni o Sardis mende kinebe mbererlagat amberek, akoni nen iniyom sobalek mende mirli mende oba dabulasunogo yiluk nggarelogo dogoligogi eti kak, weyak omanggi kagakidek werek eti, iniyom nggut mende yisusak erlok obaat yikogo nen an ninom noko dogogun o.
5Ta nen obatne asigin kalok, su nggut mende yiʼbigin o. Nen, an it akoni inilugurinabigogo mende inendaga buku paga kolal mbalek mende korogo laʼbiyagin dek o. An nombae inom, malaikat yonggo laʼbiya wirigogo mende inom, inil oba,
Yi an naʼburi o, yiluk inendaga ʼbukakogo yanggul isagin, yiluk, yigi mende eti, 6Allah Agurengge nen Allah aʼburi o yi ai ndi ai nandorligogi mende yogisiligogo mende eti, kinasuk kolusak kalok, panorogo kolini o, yiluk yogisigi mende eti, kolal mbalogo inoba laʼbino o,” yiluk yokneke.
Wene Allah aʼburi o Filadelfia mende pasik yogokike wene
7Esigit diluk yoknekesik nen, yabunggane omanggi yoknoko dogolik,
“An weyak kagakidek nobabut nggaʼberek dogolik, nane eberogonat dombok yiligogo mende, su kunci Daud mende wolok su kuwalko kalok, akoni amberek nen lasusak erlok dek o. Nen, su lako kalok, akoni amberek nen kuwalusak erlok degat etnogo nen wene yi yokisik,
At Allah nen malaikat ayonggo ʼbiluk laʼbi wisu kak, at aʼburi o Filadelfia nandorligogi mende inayonggo ʼbiluk ʼbiyasikemo werek etnogo, wene yigit diluk kat kolal mbalogo inoba laʼbino o,
8Lakani! Kit kinobabut kagarigogi eti, kinobatne mondok ʼbugurlagat mende, an nane kologo motogo kagakik, nabok laʼbelkidek ʼbukakogo yogisigik, kagarigogi eti, an nilumo, kit kinake, su akoni amberek nen lasusak mondok erlok dek mende arat kuwalogo ʼbinagagi o. 9Lakani. It akoni Iblis aʼburi nandorligogi mende inebe Yahudi mende dek mende, inenggalat,
Nit ninebe Yahudi mende, yiluk yiligogi mende eti, kit kinapma unggi witluk nen, an kit nendainggen kunik werek eti inilu asuwagaluk, it inebe kit kinoba ʼbiya wisigin o, yiluk eberogonat yokisigi o. 10Esigit diluk ʼbiya wisigin eti, an nen,
Kinobakanini kambuk yiluk dogono o, yiluk yokisasigi mende eti, nane kologo motogo kagarigogi eti paga, o yabunggane akoni agat oba yoma dogoligogi mende taʼbokogonat inaren mbaligiluk yi aik ndi aik inoba ʼbiyagin eti kasi nggorlek, kirat, an nen napma pano pakisek dogogin o. 11An ibat-ibarat wisigin o. Esigit diluk witluk nen, ta ae aʼbusuk ta ae aʼbusuk lagonem, inobatne asugun mende kalok onggo nggare-nggare mendago yiʼbiyiligogi eti kak, onggo kit wokisausak mende it akoni amberek nen ndilogo korlaunogo yiluk, kit ebe waganggigip mende eti, kininggi aʼbetogo pago dogono o.
12Nen, ta nen obatne asigin mende kalok, kono wurowak wusabigogi eti kak, at esigit dilugat Allah enggaerek ago palekma mendiluk, nombae Allah endaga inom, ago kota Yerusalem ngget mende at nenat mbogot oba nen wusa ʼbi wisigin eti endaga inom, an nendaga ngget mende inom, an nen, at eti oba kolal mbalogo ʼbumo, at o etoma nen duki wisigin mondok dek o, yiluk yigi mende eti, 13Allah Agurengge nen, Allah aʼburi o yi ai ndi ai nandorligogi mende yogisiligogo mende eti, kit kinasuk kolusak kalok, panorogo kolini o, yiluk yogisigi mende eti, kolal mbalogo inoba laʼbino o,” yiluk yokneke.
Wene Allah aʼburi o Laodikia mende pasik yogokike wene
14Esigit diluk yoknekesik nen, yabunggane omanggi yoknoko dogolik,
“Erlo paga nen, yi mende ndi mende erlo anat werekma, Allah nen walkasike mende eti, at abok nobabut kumbukogo eberogonat dombok yiligogo mende, nendaga ebeat asuwak yu kak, Amin etnogo nen wene yi yokisik,
At Allah nen malaikat ayonggo ʼbiluk laʼbi wisu kak, at aʼburi o Laodikia nandorligogi mende inayonggo ʼbiluk ʼbiyasikemo werek etnogo, wene yigit diluk kat kolal mbalogo inoba laʼbino o,
15Kit kinobabut kagarigogi mende taʼbokogonat an nilu o. Kit kinendainggen nggoʼbot dogolik, kinobakanini kagarigogi degat, nen aganggen dogolik anggilukogo kagarigogi degat. Kinendainggen nggoʼborat kinobakanini dogusak kalok, esigit dilugat dogusak o. Nen aganggen anggilukogo kagako dogusak kalok, esigit dilugat kagako dogusagat o. 16Mende, kinendainggen nggoʼbot degat, aganggen degat, nggoʼbot a, aganggen a, aganggen ʼbugurlagat werek eti paga, i induk saram agonem inambema nen kirlelogo wula ʼbiyiligogi kak, an nen kinebe wula ʼbinagagin o. 17Kit kininggi degat, kinilenggen mbugat, kinal mbalegat dogolik,
Nit ninebe ninaʼbuwarek negen mondok weyagat werek, yiluk didigidek, kit nen yisi dogolik,
Nit ninebe ninenggaerek nen nggogorakogosik, yi mende ndi mende dek agidek, nininggi weregat werek o, yiluk yiligogi o. 18Esigit diluk werek eti paga, kit nggokndek kininggi werek asubagik nen, emas kindu werago pano kagarigogo mende noba onggo mbaligik, kinal mbalegat werek eti kinenggarli asunogo nen, su nggut mende yikawogoluk noba onggo mbaligik, kinilenggen mbuk mende eti pano agonem yi mende ndi mende lakasi doguwogoluk, ambusu kinilenggen obangge wasubagik nen noba onggo mbaligik, kagasubagik nen yiluk kinasuk warigogo o. 19Esigit diluk kinasuk warigogo eti, it akoni an nendainggen kunik mende, inebe dombok inasuk warogo ndugi inarigogo eti paga, kit weyak kagarigogi mende eti togot diyalok kinobabut kwalatluk nen, anggilukogo kagako dogono o. 20Lakani! An su kambema mendek dogolik, su ane mbumbukiligogo o. Esigit diluk mbumbukasinem, at ta nen nane asuk kol diluk nen, su kuwal niyagin kalok, an at oba ʼbika unggiluk nen, nimbisak kimbiri nasi dogolik nagarlak-kagarlak dogogun o.
21“An arat nobatne agagimo, nombae nggok dogoligogo mende obalikmo nimbisak werek yi kak, ta nen obatne asigin kalok, an nggok dogoligogo mende nobalikmo nimbisak doguwogoluk mendigin o, yiluk wene yigi mende eti, 22Allah Agurengge nen Allah aʼburi o yi ai ndi ai nandorligogi mende yogisiligogo mende eti, kinasuk kolusak kalok, panorogo kolini o, yiluk yogisigi mende eti kolal mbalogo inoba laʼbino o,” yiluk yokneke.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in