Varoma 13
13
Kuengisa wukoma
1M'thu ni m'thu a na engise wukoma; nguko kha ku nga ni wukoma wu wu sitiko ngu ka Txizimu. Se vafumeli va va kuho va vekilwe ngu Txizimu. 2Ngu konaho, ava va engisako wukoma, va engisa mlayo wu wu nga vekwa ngu Txizimu. Se ava va eyisako va dhana kuabaniswa txitimwi kwawe. 3Nguko ava va fumako hi nga valala ka mithumo ya yinene, aniko hahanze ka yile yo biha. Ina u dhunda kuhanya u si nga ni txithavo ka wuthangeli kani? Maha ta tinene, u na dhundwa ngu wukoma; 4nguko mfumeli njirumwa txa Txizimu, txa ku kuvhuna kumaha ta tinene. Kambe ngako u txi maha to biha, u fanete kuthava, nguko mfumeli kha ñoli ditxhari mahala. Njirumwa txa Txizimu kasi kulamula ni kutsayisa ava va mahako to biha. 5Ngu konaho, mi fanete kutiveka hahatshi ka wukoma, i si nga ngu kuthava kuhenyelwa dwe, aniko ngu mhaka ya livhalo. 6#Wona ni ka: Mat. 22:21; Mar. 12:17; Luk. 20:25. Ngu konaho mi humisako mikhupo, nguko vafumeli nzithumi sa Txizimu, si khutalako ka mthumo wuwa. 7Va ningeni votshe asi si va fanelako: Awu a fanelako kuamukela mkhupo mningeni; awu a fanelako kuamukela nduwo, mluveni; awu a fanelako kuxoniphwa, mxonipheni; awu a fanelwako ngu txithavo, mthaveni.
Lirando ditshina da mlayo
8Mi nga veni ni txikweneti ka mmwani m'thu, hahanze ka txikweneti txa lirando. Nguko awule a randako m'thu kulowe, a hetisile mlayo. 9#Wona ni ka: Eks. 20:13-15,17; Dhewut. 5:17-19,21; Levh. 19:18. Nguko sirumo si si ku: “U nga geleze, u nga daye, u nga pe, u nga navele” hambi ni sihi simwani sirumo, sotshe si tshanganiswa ngu dipswi diya diku: “U na randa muakelani nga ti u ti randisako tona awe upune.” 10Lirando kha li mahi kubiha ka muakelani. Ngu toneto, lirando ngu lona i ku ditshina da mlayo.
Ditshiku da kuwuya ka Kristu di hafuhi
11Mahani totshe tiya, nguko ma yi ziva mbimo yi hi ku ka yona: Se i mbimo yo wuka wukoheni. Konkuwa kuhanyiswa kwathu ku hafuhi ngutu kupinda mbimo yile hi nga amukela ngu yona likholo. 12Wusiku wu pindile, kutxa ka tshuketela. He lekeni mithumo ya txidema, he xomeni matxhari a liwoningo. 13Nga tiya i ku mitshikari, he tsimbileni ngu fanelo, hi hambana ni limito mwendo wudevi, ni wugango mwendo wugelegele, ni livengo mwendo dibava. 14Aniko ambalani Mkoma Jesu Kristu, mi nga khataleleni mmidi, kasiku mi si londisi kunavela ka wona.
Currently Selected:
Varoma 13: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
Varoma 13
13
Kuengisa wukoma
1M'thu ni m'thu a na engise wukoma; nguko kha ku nga ni wukoma wu wu sitiko ngu ka Txizimu. Se vafumeli va va kuho va vekilwe ngu Txizimu. 2Ngu konaho, ava va engisako wukoma, va engisa mlayo wu wu nga vekwa ngu Txizimu. Se ava va eyisako va dhana kuabaniswa txitimwi kwawe. 3Nguko ava va fumako hi nga valala ka mithumo ya yinene, aniko hahanze ka yile yo biha. Ina u dhunda kuhanya u si nga ni txithavo ka wuthangeli kani? Maha ta tinene, u na dhundwa ngu wukoma; 4nguko mfumeli njirumwa txa Txizimu, txa ku kuvhuna kumaha ta tinene. Kambe ngako u txi maha to biha, u fanete kuthava, nguko mfumeli kha ñoli ditxhari mahala. Njirumwa txa Txizimu kasi kulamula ni kutsayisa ava va mahako to biha. 5Ngu konaho, mi fanete kutiveka hahatshi ka wukoma, i si nga ngu kuthava kuhenyelwa dwe, aniko ngu mhaka ya livhalo. 6#Wona ni ka: Mat. 22:21; Mar. 12:17; Luk. 20:25. Ngu konaho mi humisako mikhupo, nguko vafumeli nzithumi sa Txizimu, si khutalako ka mthumo wuwa. 7Va ningeni votshe asi si va fanelako: Awu a fanelako kuamukela mkhupo mningeni; awu a fanelako kuamukela nduwo, mluveni; awu a fanelako kuxoniphwa, mxonipheni; awu a fanelwako ngu txithavo, mthaveni.
Lirando ditshina da mlayo
8Mi nga veni ni txikweneti ka mmwani m'thu, hahanze ka txikweneti txa lirando. Nguko awule a randako m'thu kulowe, a hetisile mlayo. 9#Wona ni ka: Eks. 20:13-15,17; Dhewut. 5:17-19,21; Levh. 19:18. Nguko sirumo si si ku: “U nga geleze, u nga daye, u nga pe, u nga navele” hambi ni sihi simwani sirumo, sotshe si tshanganiswa ngu dipswi diya diku: “U na randa muakelani nga ti u ti randisako tona awe upune.” 10Lirando kha li mahi kubiha ka muakelani. Ngu toneto, lirando ngu lona i ku ditshina da mlayo.
Ditshiku da kuwuya ka Kristu di hafuhi
11Mahani totshe tiya, nguko ma yi ziva mbimo yi hi ku ka yona: Se i mbimo yo wuka wukoheni. Konkuwa kuhanyiswa kwathu ku hafuhi ngutu kupinda mbimo yile hi nga amukela ngu yona likholo. 12Wusiku wu pindile, kutxa ka tshuketela. He lekeni mithumo ya txidema, he xomeni matxhari a liwoningo. 13Nga tiya i ku mitshikari, he tsimbileni ngu fanelo, hi hambana ni limito mwendo wudevi, ni wugango mwendo wugelegele, ni livengo mwendo dibava. 14Aniko ambalani Mkoma Jesu Kristu, mi nga khataleleni mmidi, kasiku mi si londisi kunavela ka wona.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.