Masalmo 78
78
Txizimu ni vathu va txona
Txithokozelo txa Asafe
1Vathu vangu, engisani gondo yangu;
engiselani ati ni mi gelako!
2 # Wona ni ka: Mat. 13:35. Ni lava kuwombawomba ngu sidinganiso
ni mi kombisa masambala a mbimo ya kale,
3timhaka ti hi nga tiengisa, hi txi ti gonda
ati vakale vathu va nga hi xawutela.
4Kha hi na mbi sisela situkulwana sathu;
totshe hi na xawutela ka tiveleko ti titako
ta kupfaliswa ka Mkoma ni mtamo wakwe
ni ta sidiwukiso si ene a nga si maha.
5Ene a ningile mithetho ka va ka Israyeli,
a ningile mlayo ka situkulwana sa Jakobe.
A leletile ka vakale vathu ti to
ve gondisa milayo yiya ka situkulwana sawe,
6kasiku liveleko li litako li txi yi ziva
ni vanana va va no velekwa
ve xawutela ka vanana vawe ni vona;
7kasiku ve themba Txizimu
va si divali ati txona txi nga ti maha;
kasiku ve vekisa sirumo sa txona
8va si fani ni vatate vawe,
i nga ti liveleko la sindaka-milayo, siphukuphuku
i ku liveleko li nga mbi xayisa mbilu ya lona,
ni moya wa lona wu nga mbi thembeka ka Txizimu.
9Vathu va nyumba ya ka Efrayime,
va nga ti xomile malaho ni tingove,
va to tutuma ve thava ka ditshiku da yimbi;
10kha va xonipha txitumelelano txawe ni Txizimu
kambe va lambile kuvekisa mlayo wa txona;
11va to divala ti txona txi nga va mahela,
sidiwukiso si txona txi nga va komba.
12Masoni ka vakale vawe, Txizimu txi mahile sidiwukiso,
ditikoni ka Egipta, libalani ka Zowani.
13Txi tute linene, kasiku vona ve txhatuka,
txi emisile mati, ma txi nga diseta.
14Ni mitshikari, txi ti va komba nzila ngu direfu
se, ni wusiku, txi ti va woninga nzila ngu mndilo.
15Txiwulani Txizimu txi bhandile marigwi
txi va setile mati ngu mtalo wa ona.
16Txizimu txi humisile ngu mu ka dirigwi mati o khulunga
awa ma nga txi khulunga ngu mtamo.
17Aniko vona va engetile ve onhela Txizimu,
ve wukela Nyatxitimwi, kona txiwulani.
18Va lavile kuduka Txizimu,
ve kombela sakudya, so tsakisa kunavela kwawe.
19Va to wukela Txizimu va txi kha vona:
“Ina Txizimu txi nga sikota ku hi lulamisela sakudya
kona txitingani muwa kani?
20Kha ditshuri Txizimu txi pekile dirigwi
se ngu ka dona me khulunga mati a kutala,
kambe ina txi nga sikota
ku hi ninga sakudya ni kululamisa nyama
kasi vedya vathu va txona kani?”
21Ngako Mkoma a di engisile timhaka tiya,
a to henya, e tsayisa vathu vakwe ngu mndilo
se dikhulo dakwe di to simama di tura;
22nguko kha va kholwa ka Txizimu
kambe kha va themba kuvhunwa ngu txona.
23Kha ditshuri, Txizimu txi to leleta marefu txitimwi
txi tula marefu a nzumani;
24 # Wona ni ka: Joh. 6:31. txi to wisa manna masoni ka vathu;
fulaho ya nzumani kasi ku vedya!
25Votshe va dyite sakudya sa tingelozi!
Txizimu txi va rumete sakudya sa kuenela!
26Txi to humisa ngu nzumani diphuho da wutxani
se ngu mtamo wa txona txi tisa diphuho da wulambwe!
27Txi to rumela ngu nzumani nyama yo ninga vathu va txona;
se si txi wa ngu nzumani sinyana
so tala nga mtxhefa wa linene!
28Txizimu txi si wisile hagari ka wugovelo
ni madhawa otshe a matenda awe.
29Sekoko va to dya ve khura
ngu toneto Txizimu txi tsakisile kunavela kwawe.
30Aniko va di ngadi va sinzi kudya va txi enelelwa kunavelani kwawe;
va di ngadi ni sakudya mkanani kwawe,
31Txiviti txa Txizimu txi to va wela txitimwi
txi daya tindena tawe;
txi date vathu vo xonipheka va ka Israyeli!
32Hambi keto, va to tamarisa ve onha
va si kholwi ngu sidiwukiso sa Txizimu.
33Ngu kumaha keto, Txizimu txi hetile
masiku awe amu ka wukanganyisi,
ni malembe awe amu ka xomulo.
34Ngu kuwona vava Txizimu txi nga va tsayisa ngu lifo,
vamwani va ti txi lava txona Txizimu;
va ti tshumelela ka txona,
va txi txi lava va si karali.
35Sekoko va ti ti khumbula ti to
Txizimu i m'vhikeli wawe,
ni ti to Txizimu Nyatxitimwi i ti mtiruli wawe.
36Aniko makungo a sisofu sawe i ti a makuhu;
totshe ti va nga ti womba ti ti si nga ni ditshuri.
37Timbilu tawe ti sa thembeka ka Txizimu
hambi ni ka txitumelelano txa Txizimu, ti sa thembeka.
38Aniko Txizimu, ngu wumbilu wa txona,
txi ti va divalete sionho sawe, txi si va lovisi;
sikhati so tala txi thindekile ku va henyela,
txi si va kawuki ngu txiviti.
39Txizimu txi alakanyile ti to
vona nziwumbwa sa nyama dwe,
va fana ni moya wu wu pindako wu si wuyi kambe!
40Nzikhati singahi va nga eyisa Txizimu txiwulani
va txi txi pandisa mbilu
ditikoni mule ka kuoma!
41Va to tshumelela msana, ve duka Txizimu;
sambe va kanakanile ngu wo Sawuleka wa ka Israyeli!
42Va ti si alakanyi mtamo wa txona,
wa ditshiku dile txi nga va hulukisa ka valala;
43mbimo yi Txizimu txi nga komba mtamo wa txona ditikoni ka Egipta,
txi txi mahetela sidiwukiso
so thisa sa mtamo ditikoni ka Zowani;
44mbimo yi txi nga hindula mati a mnambo
ni milonga ya kona me maha mnoha,
kasiku Vaegipta va si sikoti ku ma sela.
45Txi va rumete mabhawu, ma txi va lumetela,
ni makhele ma txi va daya.
46Txi ningete timbewu tawe ka mipungu
ni mihando ya mtamo wawe ka humbi.
47Txi hetile tithembwe tawe ta mivhinya ngu maralala
ni mimora yawe txi yi hisile ngu pheho.
48Txi dayetete tihomu tawe ngu maralala
ni tinvuta tawe ngu tinyangafula.
49Txi to rinza txitimwi kwawe
mndilo wa kuhenya ka txona,
txiviti, dikhulo, dikhombo,
kota txikombiso txa sixaniso.
50Txi to leka kuhenya ka txona ku txi ya masoni,
kha txa va hulukisa ka lifo!
Txi to ningela wutomi wawe ka mtungu!
51Txi mahile ti to va txi fa vanana va matiwula va Egipta,
matiwula a nyumba ni nyumba ya ka Hamu ma txi fa.
52Txi humisile vathu va txona
txi tsimbila navo ngu mu txiwulani,
kota m'dyisi a golako sifuyo sakwe.
53Txi va thangete ve tsimbila ngu kutsana va si thavi txilo,
txi mbembisile valala vawe lineneni.
54Txizimu txi tekile vathu va txona,
txi va yisa ditikoni ka txona ko sawuleka,
ka mmango wu txi nga wu teka ngu mtamo wa txona!
55 # Wona ni ka: Jox. 11:16-23. Txi tutumisile vamatiko masoni ka Vaisrayeli,
txi abanisela thomba yawe ka vathu va txona
txi akisa tihunzu ta ka Israyeli matendani kwawe.
56Aniko Vaisrayeli va dukile Txizimu Nyatxitimwi,
ve txi wukela, va si vekisi milayo ya txona.
57Va tshumelete msana,
ve eyisa Txizimu kufana ni vatate vawe;
va ti jikisile kufana ni wulaho wo gombonyeka!
58Va henyisile Txizimu ngu mhaka ya siluvelo sa wuhedheni;
va wusile txiluse txa Txizimu ngu kukhozela sithombe.
59Txizimu txi engisile toneto, txi txi pandiseka,
txi tsukula va ka Israyeli ngu txiviti.
60 # Wona ni ka: Jox. 18:1; Jer. 7:12-14; 26:6. Txi lekile nyumba ya txona yo khozela ya Silo,
i nga ti ditenda da txona
do zumba ka dona hagari ka vathu.
61Txi lekile valala ve teka mtundu wa txitumelelano,
i ku txikombiso txa wudhumo wa txona.
62Txizimu txi henyile ngutu ngu mhaka ya vathu va txona,
txi va lekile ve dawa ngu ditxhari da mlala.
63Mndilo wu hisile otshe mazambi awe
se mahorana me sala i di mabhoyi.
64Vaphaxeli va datwe ngu ditxhari
tinoni tawe kha ta sikota ku va saluka.
65Sekoko Mkoma a to wuka,
ku nga o vhumuka ngu ha wukoheni,
ku nga ndena yi nga ambuluka kulevani ka vhinya.
66A khozisile valala vakwe va txi tutuma ve thava;
a txi va thela tingana ta yotshe mbimo.
67Ngu toneto, a tshotshile nyumba ya Josefa
e tsukula lihunzu la ka Efrayime.
68A to sawula lihunzu la ka Judha
ni mmango wa Siyoni, awu a wu randako.
69A akile nyumba yakwe ya kukhozela,
yo guleka nga nzuma
a txi yi tsanisa kala kupinduka kufana ni mafu.
70 # Wona ni ka: 1 Sam. 16:11-12; 2 Sam. 7:8; 1 Mak. 17:7. A sawute kambe Dhavhidha txithumi txakwe,
awu i nga ti m'dyisi wa tinvuta;
71a mthavisile ka mthumo wa kudyisa tinvuta,
kasiku e maha m'dyisi wa liveleko la Jakobe,
i ku vathu vakwe ni thomba yakwe.
72Dhavhidha a xayisile vathu vakwe ngu kululama kotshe
e va fuma ngu wuzivi wa hombe.
Currently Selected:
Masalmo 78: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
Masalmo 78
78
Txizimu ni vathu va txona
Txithokozelo txa Asafe
1Vathu vangu, engisani gondo yangu;
engiselani ati ni mi gelako!
2 # Wona ni ka: Mat. 13:35. Ni lava kuwombawomba ngu sidinganiso
ni mi kombisa masambala a mbimo ya kale,
3timhaka ti hi nga tiengisa, hi txi ti gonda
ati vakale vathu va nga hi xawutela.
4Kha hi na mbi sisela situkulwana sathu;
totshe hi na xawutela ka tiveleko ti titako
ta kupfaliswa ka Mkoma ni mtamo wakwe
ni ta sidiwukiso si ene a nga si maha.
5Ene a ningile mithetho ka va ka Israyeli,
a ningile mlayo ka situkulwana sa Jakobe.
A leletile ka vakale vathu ti to
ve gondisa milayo yiya ka situkulwana sawe,
6kasiku liveleko li litako li txi yi ziva
ni vanana va va no velekwa
ve xawutela ka vanana vawe ni vona;
7kasiku ve themba Txizimu
va si divali ati txona txi nga ti maha;
kasiku ve vekisa sirumo sa txona
8va si fani ni vatate vawe,
i nga ti liveleko la sindaka-milayo, siphukuphuku
i ku liveleko li nga mbi xayisa mbilu ya lona,
ni moya wa lona wu nga mbi thembeka ka Txizimu.
9Vathu va nyumba ya ka Efrayime,
va nga ti xomile malaho ni tingove,
va to tutuma ve thava ka ditshiku da yimbi;
10kha va xonipha txitumelelano txawe ni Txizimu
kambe va lambile kuvekisa mlayo wa txona;
11va to divala ti txona txi nga va mahela,
sidiwukiso si txona txi nga va komba.
12Masoni ka vakale vawe, Txizimu txi mahile sidiwukiso,
ditikoni ka Egipta, libalani ka Zowani.
13Txi tute linene, kasiku vona ve txhatuka,
txi emisile mati, ma txi nga diseta.
14Ni mitshikari, txi ti va komba nzila ngu direfu
se, ni wusiku, txi ti va woninga nzila ngu mndilo.
15Txiwulani Txizimu txi bhandile marigwi
txi va setile mati ngu mtalo wa ona.
16Txizimu txi humisile ngu mu ka dirigwi mati o khulunga
awa ma nga txi khulunga ngu mtamo.
17Aniko vona va engetile ve onhela Txizimu,
ve wukela Nyatxitimwi, kona txiwulani.
18Va lavile kuduka Txizimu,
ve kombela sakudya, so tsakisa kunavela kwawe.
19Va to wukela Txizimu va txi kha vona:
“Ina Txizimu txi nga sikota ku hi lulamisela sakudya
kona txitingani muwa kani?
20Kha ditshuri Txizimu txi pekile dirigwi
se ngu ka dona me khulunga mati a kutala,
kambe ina txi nga sikota
ku hi ninga sakudya ni kululamisa nyama
kasi vedya vathu va txona kani?”
21Ngako Mkoma a di engisile timhaka tiya,
a to henya, e tsayisa vathu vakwe ngu mndilo
se dikhulo dakwe di to simama di tura;
22nguko kha va kholwa ka Txizimu
kambe kha va themba kuvhunwa ngu txona.
23Kha ditshuri, Txizimu txi to leleta marefu txitimwi
txi tula marefu a nzumani;
24 # Wona ni ka: Joh. 6:31. txi to wisa manna masoni ka vathu;
fulaho ya nzumani kasi ku vedya!
25Votshe va dyite sakudya sa tingelozi!
Txizimu txi va rumete sakudya sa kuenela!
26Txi to humisa ngu nzumani diphuho da wutxani
se ngu mtamo wa txona txi tisa diphuho da wulambwe!
27Txi to rumela ngu nzumani nyama yo ninga vathu va txona;
se si txi wa ngu nzumani sinyana
so tala nga mtxhefa wa linene!
28Txizimu txi si wisile hagari ka wugovelo
ni madhawa otshe a matenda awe.
29Sekoko va to dya ve khura
ngu toneto Txizimu txi tsakisile kunavela kwawe.
30Aniko va di ngadi va sinzi kudya va txi enelelwa kunavelani kwawe;
va di ngadi ni sakudya mkanani kwawe,
31Txiviti txa Txizimu txi to va wela txitimwi
txi daya tindena tawe;
txi date vathu vo xonipheka va ka Israyeli!
32Hambi keto, va to tamarisa ve onha
va si kholwi ngu sidiwukiso sa Txizimu.
33Ngu kumaha keto, Txizimu txi hetile
masiku awe amu ka wukanganyisi,
ni malembe awe amu ka xomulo.
34Ngu kuwona vava Txizimu txi nga va tsayisa ngu lifo,
vamwani va ti txi lava txona Txizimu;
va ti tshumelela ka txona,
va txi txi lava va si karali.
35Sekoko va ti ti khumbula ti to
Txizimu i m'vhikeli wawe,
ni ti to Txizimu Nyatxitimwi i ti mtiruli wawe.
36Aniko makungo a sisofu sawe i ti a makuhu;
totshe ti va nga ti womba ti ti si nga ni ditshuri.
37Timbilu tawe ti sa thembeka ka Txizimu
hambi ni ka txitumelelano txa Txizimu, ti sa thembeka.
38Aniko Txizimu, ngu wumbilu wa txona,
txi ti va divalete sionho sawe, txi si va lovisi;
sikhati so tala txi thindekile ku va henyela,
txi si va kawuki ngu txiviti.
39Txizimu txi alakanyile ti to
vona nziwumbwa sa nyama dwe,
va fana ni moya wu wu pindako wu si wuyi kambe!
40Nzikhati singahi va nga eyisa Txizimu txiwulani
va txi txi pandisa mbilu
ditikoni mule ka kuoma!
41Va to tshumelela msana, ve duka Txizimu;
sambe va kanakanile ngu wo Sawuleka wa ka Israyeli!
42Va ti si alakanyi mtamo wa txona,
wa ditshiku dile txi nga va hulukisa ka valala;
43mbimo yi Txizimu txi nga komba mtamo wa txona ditikoni ka Egipta,
txi txi mahetela sidiwukiso
so thisa sa mtamo ditikoni ka Zowani;
44mbimo yi txi nga hindula mati a mnambo
ni milonga ya kona me maha mnoha,
kasiku Vaegipta va si sikoti ku ma sela.
45Txi va rumete mabhawu, ma txi va lumetela,
ni makhele ma txi va daya.
46Txi ningete timbewu tawe ka mipungu
ni mihando ya mtamo wawe ka humbi.
47Txi hetile tithembwe tawe ta mivhinya ngu maralala
ni mimora yawe txi yi hisile ngu pheho.
48Txi dayetete tihomu tawe ngu maralala
ni tinvuta tawe ngu tinyangafula.
49Txi to rinza txitimwi kwawe
mndilo wa kuhenya ka txona,
txiviti, dikhulo, dikhombo,
kota txikombiso txa sixaniso.
50Txi to leka kuhenya ka txona ku txi ya masoni,
kha txa va hulukisa ka lifo!
Txi to ningela wutomi wawe ka mtungu!
51Txi mahile ti to va txi fa vanana va matiwula va Egipta,
matiwula a nyumba ni nyumba ya ka Hamu ma txi fa.
52Txi humisile vathu va txona
txi tsimbila navo ngu mu txiwulani,
kota m'dyisi a golako sifuyo sakwe.
53Txi va thangete ve tsimbila ngu kutsana va si thavi txilo,
txi mbembisile valala vawe lineneni.
54Txizimu txi tekile vathu va txona,
txi va yisa ditikoni ka txona ko sawuleka,
ka mmango wu txi nga wu teka ngu mtamo wa txona!
55 # Wona ni ka: Jox. 11:16-23. Txi tutumisile vamatiko masoni ka Vaisrayeli,
txi abanisela thomba yawe ka vathu va txona
txi akisa tihunzu ta ka Israyeli matendani kwawe.
56Aniko Vaisrayeli va dukile Txizimu Nyatxitimwi,
ve txi wukela, va si vekisi milayo ya txona.
57Va tshumelete msana,
ve eyisa Txizimu kufana ni vatate vawe;
va ti jikisile kufana ni wulaho wo gombonyeka!
58Va henyisile Txizimu ngu mhaka ya siluvelo sa wuhedheni;
va wusile txiluse txa Txizimu ngu kukhozela sithombe.
59Txizimu txi engisile toneto, txi txi pandiseka,
txi tsukula va ka Israyeli ngu txiviti.
60 # Wona ni ka: Jox. 18:1; Jer. 7:12-14; 26:6. Txi lekile nyumba ya txona yo khozela ya Silo,
i nga ti ditenda da txona
do zumba ka dona hagari ka vathu.
61Txi lekile valala ve teka mtundu wa txitumelelano,
i ku txikombiso txa wudhumo wa txona.
62Txizimu txi henyile ngutu ngu mhaka ya vathu va txona,
txi va lekile ve dawa ngu ditxhari da mlala.
63Mndilo wu hisile otshe mazambi awe
se mahorana me sala i di mabhoyi.
64Vaphaxeli va datwe ngu ditxhari
tinoni tawe kha ta sikota ku va saluka.
65Sekoko Mkoma a to wuka,
ku nga o vhumuka ngu ha wukoheni,
ku nga ndena yi nga ambuluka kulevani ka vhinya.
66A khozisile valala vakwe va txi tutuma ve thava;
a txi va thela tingana ta yotshe mbimo.
67Ngu toneto, a tshotshile nyumba ya Josefa
e tsukula lihunzu la ka Efrayime.
68A to sawula lihunzu la ka Judha
ni mmango wa Siyoni, awu a wu randako.
69A akile nyumba yakwe ya kukhozela,
yo guleka nga nzuma
a txi yi tsanisa kala kupinduka kufana ni mafu.
70 # Wona ni ka: 1 Sam. 16:11-12; 2 Sam. 7:8; 1 Mak. 17:7. A sawute kambe Dhavhidha txithumi txakwe,
awu i nga ti m'dyisi wa tinvuta;
71a mthavisile ka mthumo wa kudyisa tinvuta,
kasiku e maha m'dyisi wa liveleko la Jakobe,
i ku vathu vakwe ni thomba yakwe.
72Dhavhidha a xayisile vathu vakwe ngu kululama kotshe
e va fuma ngu wuzivi wa hombe.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.