Eksodha 4
4
Mtamo wa Mosi wo maha sixamaliso
1Sekoko Mosi a to xamula a txi khene:
“Aniko ni wona to kha va na mbi kholwa ngu ngani, kambe kha va na mbi engisa dipswi dangu, nguko va na womba va txi kha vona: Kha woneka Mkoma kwako.”
2Se Mkoma a to khene ka Mosi:
“Njitxani etxo u ku natxo manzani kwako kani?”
A to xamula a txi khene: “I ndonga.”
3Se ene a to khene:
“Yi tshotshe hahatshi.”
Ene a to yi tshotsha hahatshi, se yi to hinduka yi maha mnyoka, se Mosi a to thava ndonga, mbimo yi a nga yi wona.
4Sekoko Mkoma a to khene ka Mosi:
“Nawuluta dianza u txi wu ñola ngu mkila.”
Se a to nawuluta dianza dakwe, a txi wu ñola ngu mkila, se wu so tshumela kambe wu maha ndonga.
5“Kasi kuve kholwa taku a wonekile kwako Mkoma, Txizimu txa vatate vako, Txizimu txa Abrahamu, Txizimu txa Isaake, ni Txizimu txa Jakobe.”
6 Mkoma a to engeta a txi khene:
“Konkuwa veka dianza dako hakhana kwako.”
Ene a to veka dianza hakhana, se mbimo yi a ngadi thavisa, a to di wona di di hindukile di txi basa ngu tshekela di txi nga hunguva.
7 Mkoma a m'gete a txi khene: “Engeta u txi veka dianza dako hakhana.”
Ene a to engeta a txi di veka kambe dianza dakwe hakhana, se mbimo yi a ngadi thavisa, di to tshumela di txi fana kambe ni mmidi wakwe wotshe, mmidi wa nyama yakwe.
8Se Mkoma a ti khene:
“Ngu toneto, nga ti va si kholwi ngu ngawe va si engisi dipswi da txikombiso txo khata, vona va na kholwa ngu dipswi da txikombiso txa wumbidi. 9Ngako va si kholwi ngu ka sikombiso soneso sa simbidi, va si engisi dipswi dako, u na ya reka mati a mnamboni u txi ma thela ha mafuni ko oma; se mati awa u no ma reka mnamboni ma na hinduka ma txi maha mnoha txitimwi ka mafu a kuoma.”
10Sekoko Mosi a to khene ka Mkoma:
“Yowe! Mkoma! Ani kha ni nga m'thu wo womba-womba ta tinene, hambi nyamnova, hambi nyatulo, hambi nyamsi konkuwa u nga womba-womba ni txithumi txako; kha ni sikoti kuwombawomba ta tinene, nguko ni m'thu wa kukangamela ni txidimiti.”
11Se Mkoma a to mxamula a txi khene:
“I mani a nga va nga txisofu txa m'thu kani? Mwendo i mani a nga maha txiduma mwendo diphanzeve, awule a wonako ni wule i ku dibhofu kani? Ina hi nga ani Mkoma kani? 12Ngu toneto, tsula, konkuwa, ani ni na va ni nawe txisofuni kwako, kambe ni na kukomba ati u no bwabwata.”
13Ti di ngeto, Mosi a xamute a txi khene:
“Ahim-him! Mkoma! Ruma mmwani a txi ya maha mthumo ewo.”
14Sekoko Mkoma a to henyela Mosi, a txi khene:
“Ina kha nga ho Aroni, Mlevhi, i ku mwanana kani? Ani na tiziva ti to ene wa womba-womba ta tinene. Ndiyo ene wa huma a txi kuhingeta, ni mbimo yi a no kuwona a na tsaka mbiluni kwakwe. 15Awe u na womba-womba nayo, u txi m'vekela txisofuni kwakwe mapswi awa. Ani ni na va txisofuni kwako ni txisofuni kwakwe, ni txi mi kombisa ati mi fanelako ku ti maha. 16Ene a na kutshunda womba-womba ka vathu wukhaloni kwako; a na va txisofu txako, se awe u na va Txizimu kwakwe. 17Awe u na ñola ndonga yiya manzani kwako, u txi maha sikombiso ngu yona.”
Mosi e tshumelela ditikoni ka Egipta
18Sekoko Mosi a to khukha a txi ya ka Jetro msade wakwe, a txi ya m'gela tiya:
“Na kombela u txi ni leka ni tsula ditikoni ka Egipta, kasi kuya wona vanathu, mwendo va ngadi va txi hanya.” Jetro a mxamute a txi khene:
“Tsula ngu kuthutha.”
19A di ngadi Midhiyani Mosi, Mkoma a ti khene kwakwe:
“Tsula, u tshumela uya ditikoni ka Egipta, nguko va fite votshe avale va nga txi xota wutomi wako kasi ku kudaya.”
20Mosi koko, a to teka msikati wakwe ni vanana vakwe a txi va gadhisa mbongola a txi tshumela a txi ya ditikoni ka Egipta. Mosi a to teka ndonga ya Txizimu a txi yi ñola manzani kwakwe.
21Se Mkoma a to khene ka Mosi:
“Ngako u txi tshumela uya ditikoni ka Egipta, alakanya kuya maha ka Faro sotshe sixamaliso si ni nga si veka manzani kwako; aniko ani ni na bangisa mbilu yakwe ti to asi leki vathu ve huma ve tsula.” 22Sekoko u na ya gela Faro u txi khawe: Mkoma a womba tiya: Mwanana wangu wa matiwula ngu Israyeli. 23#Wona ni ka: Eks. 12:29. Ani ni kugete ti to khani: Leka mwanana wangu wa matiwula a txi tsula, kasiku a txi ya ni thumela! Aniko ngako u txi lamba ku mleka a txi tsula, ani ni na daya mwanana wako wa matiwula.
24Ku mahekile ti to hagari ka nzila, amu nyumbani ka vapfhumba, Mkoma a to hingeta Mosi, a txi lava ku m'daya. 25Sekoko Zipora a to teka dirigwi do hinda, e wila ngu dona mxuvo wa mwanana wakwe wa mfana, a to gwesa ngu wona minenge ya Mosi, na a txi khene: “Ngu ditshuri awe u mwamna wangu wa mnoha.”
26Se a to va vayilela. Sekoko ene a to khene: “U mwamna wa mnoha,” ngu mhaka ya wukwera.
27Ti di ngeto, Mkoma a wombile ka Aroni a txi khene:
“Tsula u txi hingeta Mosi txiwulani.”
Aroni a to khukha a txi tsula, eya manana nayo mmangoni ka Txizimu, a ha a nga mlosa ngu ku mpswopswa. 28Mosi a to xawutela ka Aroni ni totshe ti Mkoma a nga mruma ku ti maha kumweko ni sixamaliso sa hombe asi a nga mruma ku si mahetela. 29Sekoko Mosi ni Aroni va to tsula va txi ya tshanganisa madhota otshe a ka Israyeli. 30Se Aroni a to txhamusela mapswi otshe aale Mkoma a nga ma womba ka Mosi, se Mosi a to maha sikombiso masoni ka vathu. 31Se athu va to kholwa; se kambe va tsakile ngu kuziva ti to Mkoma a alakanyile vanana vakwe va ka Israyeli, ngu kuwona ti vona va xanisekisako tona. Va to khizama va txi khozela Mkoma.
Currently Selected:
Eksodha 4: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
Eksodha 4
4
Mtamo wa Mosi wo maha sixamaliso
1Sekoko Mosi a to xamula a txi khene:
“Aniko ni wona to kha va na mbi kholwa ngu ngani, kambe kha va na mbi engisa dipswi dangu, nguko va na womba va txi kha vona: Kha woneka Mkoma kwako.”
2Se Mkoma a to khene ka Mosi:
“Njitxani etxo u ku natxo manzani kwako kani?”
A to xamula a txi khene: “I ndonga.”
3Se ene a to khene:
“Yi tshotshe hahatshi.”
Ene a to yi tshotsha hahatshi, se yi to hinduka yi maha mnyoka, se Mosi a to thava ndonga, mbimo yi a nga yi wona.
4Sekoko Mkoma a to khene ka Mosi:
“Nawuluta dianza u txi wu ñola ngu mkila.”
Se a to nawuluta dianza dakwe, a txi wu ñola ngu mkila, se wu so tshumela kambe wu maha ndonga.
5“Kasi kuve kholwa taku a wonekile kwako Mkoma, Txizimu txa vatate vako, Txizimu txa Abrahamu, Txizimu txa Isaake, ni Txizimu txa Jakobe.”
6 Mkoma a to engeta a txi khene:
“Konkuwa veka dianza dako hakhana kwako.”
Ene a to veka dianza hakhana, se mbimo yi a ngadi thavisa, a to di wona di di hindukile di txi basa ngu tshekela di txi nga hunguva.
7 Mkoma a m'gete a txi khene: “Engeta u txi veka dianza dako hakhana.”
Ene a to engeta a txi di veka kambe dianza dakwe hakhana, se mbimo yi a ngadi thavisa, di to tshumela di txi fana kambe ni mmidi wakwe wotshe, mmidi wa nyama yakwe.
8Se Mkoma a ti khene:
“Ngu toneto, nga ti va si kholwi ngu ngawe va si engisi dipswi da txikombiso txo khata, vona va na kholwa ngu dipswi da txikombiso txa wumbidi. 9Ngako va si kholwi ngu ka sikombiso soneso sa simbidi, va si engisi dipswi dako, u na ya reka mati a mnamboni u txi ma thela ha mafuni ko oma; se mati awa u no ma reka mnamboni ma na hinduka ma txi maha mnoha txitimwi ka mafu a kuoma.”
10Sekoko Mosi a to khene ka Mkoma:
“Yowe! Mkoma! Ani kha ni nga m'thu wo womba-womba ta tinene, hambi nyamnova, hambi nyatulo, hambi nyamsi konkuwa u nga womba-womba ni txithumi txako; kha ni sikoti kuwombawomba ta tinene, nguko ni m'thu wa kukangamela ni txidimiti.”
11Se Mkoma a to mxamula a txi khene:
“I mani a nga va nga txisofu txa m'thu kani? Mwendo i mani a nga maha txiduma mwendo diphanzeve, awule a wonako ni wule i ku dibhofu kani? Ina hi nga ani Mkoma kani? 12Ngu toneto, tsula, konkuwa, ani ni na va ni nawe txisofuni kwako, kambe ni na kukomba ati u no bwabwata.”
13Ti di ngeto, Mosi a xamute a txi khene:
“Ahim-him! Mkoma! Ruma mmwani a txi ya maha mthumo ewo.”
14Sekoko Mkoma a to henyela Mosi, a txi khene:
“Ina kha nga ho Aroni, Mlevhi, i ku mwanana kani? Ani na tiziva ti to ene wa womba-womba ta tinene. Ndiyo ene wa huma a txi kuhingeta, ni mbimo yi a no kuwona a na tsaka mbiluni kwakwe. 15Awe u na womba-womba nayo, u txi m'vekela txisofuni kwakwe mapswi awa. Ani ni na va txisofuni kwako ni txisofuni kwakwe, ni txi mi kombisa ati mi fanelako ku ti maha. 16Ene a na kutshunda womba-womba ka vathu wukhaloni kwako; a na va txisofu txako, se awe u na va Txizimu kwakwe. 17Awe u na ñola ndonga yiya manzani kwako, u txi maha sikombiso ngu yona.”
Mosi e tshumelela ditikoni ka Egipta
18Sekoko Mosi a to khukha a txi ya ka Jetro msade wakwe, a txi ya m'gela tiya:
“Na kombela u txi ni leka ni tsula ditikoni ka Egipta, kasi kuya wona vanathu, mwendo va ngadi va txi hanya.” Jetro a mxamute a txi khene:
“Tsula ngu kuthutha.”
19A di ngadi Midhiyani Mosi, Mkoma a ti khene kwakwe:
“Tsula, u tshumela uya ditikoni ka Egipta, nguko va fite votshe avale va nga txi xota wutomi wako kasi ku kudaya.”
20Mosi koko, a to teka msikati wakwe ni vanana vakwe a txi va gadhisa mbongola a txi tshumela a txi ya ditikoni ka Egipta. Mosi a to teka ndonga ya Txizimu a txi yi ñola manzani kwakwe.
21Se Mkoma a to khene ka Mosi:
“Ngako u txi tshumela uya ditikoni ka Egipta, alakanya kuya maha ka Faro sotshe sixamaliso si ni nga si veka manzani kwako; aniko ani ni na bangisa mbilu yakwe ti to asi leki vathu ve huma ve tsula.” 22Sekoko u na ya gela Faro u txi khawe: Mkoma a womba tiya: Mwanana wangu wa matiwula ngu Israyeli. 23#Wona ni ka: Eks. 12:29. Ani ni kugete ti to khani: Leka mwanana wangu wa matiwula a txi tsula, kasiku a txi ya ni thumela! Aniko ngako u txi lamba ku mleka a txi tsula, ani ni na daya mwanana wako wa matiwula.
24Ku mahekile ti to hagari ka nzila, amu nyumbani ka vapfhumba, Mkoma a to hingeta Mosi, a txi lava ku m'daya. 25Sekoko Zipora a to teka dirigwi do hinda, e wila ngu dona mxuvo wa mwanana wakwe wa mfana, a to gwesa ngu wona minenge ya Mosi, na a txi khene: “Ngu ditshuri awe u mwamna wangu wa mnoha.”
26Se a to va vayilela. Sekoko ene a to khene: “U mwamna wa mnoha,” ngu mhaka ya wukwera.
27Ti di ngeto, Mkoma a wombile ka Aroni a txi khene:
“Tsula u txi hingeta Mosi txiwulani.”
Aroni a to khukha a txi tsula, eya manana nayo mmangoni ka Txizimu, a ha a nga mlosa ngu ku mpswopswa. 28Mosi a to xawutela ka Aroni ni totshe ti Mkoma a nga mruma ku ti maha kumweko ni sixamaliso sa hombe asi a nga mruma ku si mahetela. 29Sekoko Mosi ni Aroni va to tsula va txi ya tshanganisa madhota otshe a ka Israyeli. 30Se Aroni a to txhamusela mapswi otshe aale Mkoma a nga ma womba ka Mosi, se Mosi a to maha sikombiso masoni ka vathu. 31Se athu va to kholwa; se kambe va tsakile ngu kuziva ti to Mkoma a alakanyile vanana vakwe va ka Israyeli, ngu kuwona ti vona va xanisekisako tona. Va to khizama va txi khozela Mkoma.
Currently Selected:
:
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.