Eksodha 27

Txiluvelo txa miphaxo yo hiswa

(Eksodha 38:1-7)

1“U na maha txiluvelo ngu mapulango a setime; aale ma ku ni mtxhanu wa mikono ya kulapha, ni mtxhanu wa mikono kuanama (txiluvelo nja mune wa makhona o dingana), ni mikono yimbidi kudemba ka kona. 2Amu ka mune wa makhona u na wumba mune wa titshulu, ati ti no ñolana ni txiluvelo, ti txi maha txiwumbeko tximwetxo, u txi bhama ngu koporo. 3U na maha kambe simbiyana so na ola ngu sona dikhuma, mafoxola, mabhaziya, tifoloko ni sikho, sotshe simaheso u na si maha ngu koporo. 4U na maha kambe txiselo txa koporo, txo nga sefo, u txi maha kambe mune wa masinda a simbi, ka madhawa a txona a mune. 5Se u na ma veka mndani ka txiluvelo ngu hahatshi ka kona, kasi ku sefo yi na mana kuhoka hagari ka txiluvelo. 6U na maha kambe mipakato ya txiluvelo ngu mndonga wa setime, u txi yi bhama ngu koporo. 7Mipakato u na yi wuletisa amu ka masinda, ati to mipakato yi maneka ka madhawa otshe a txiluvelo, ngako txiluvelo txi txi gulwa. 8Txiluvelo txi na va i di txa mapulango, txa diphanga ngu mndani, nga tonti ni nga ku kombisisa tona mmangoni, u na mahisa toneto.”

Diguma da Ditenda Masoni ka Txizimu

(Eksodha 38:9-20)

9U na maha kambe diguma da ditenda do sawuleka, ka didhawa da wulambwe diguma di na va ni m'jiyo wa nguwo yo hehuka yo rungelwa ta tinene, kulapha ku nava ka dizana da mikono, ngu didhawa dimwedo. 10Tiphande ta kona ta magumi mambidi ni siparako sa kona sa magiumi mambidi si na va sa koporo. Sihariketo sa tiphande ni madhawani ka kona si na va sa silivhela. 11Ngu ka didhawa da wuphemba, mijiyo yi na va ya kulapha ka dizana da mikono, tiphande ta kona ta magumi mambidi ni siparako sa kona sa magumi mambidi, si na va sa koporo, sihariketo sa kona ni siparako sa kona si na va i di sa silivhela. 12Ngu didhawa da wuphemba, kuanama ka kona ku nava ka mtxhanu wa magumi a mikono, ni tiphande ta kona ta digumi ni siparako sa kona sa digumi. 13Kuanama ka kona ka diguma, ngu didhawa da wutxani, ku nava ka mtxhanu wa magumi a mikono; 14Ku nava ni digumi da mikono ni mtxhanu a mijiyo ka didhawa dimwedo; ni tiphande ta kona ta tiraru ti ku ni siparako sa kona sa siraru si na va sa didhawa dimwedo. 15Ka didhawa da wumbidi ngu kufana ku nava ni digumi da mikono ni mtxhanu ya mijiyo; kumweko ni tiphande tiraru ni siparako sa kona sa siraru. 16Ditimba da diguma di na va da m'jiyo: Da magumi mambidi a mikono a nguwo ya mkuxe, ya txiwunguwungu, yo bhilivila, ya linyu yo hehuka yo somborotelwa, yo rungwa ngu kutshuriselwa; ayi yi no va ni mune wa tiphande ni mune wa sipande. 17Tiphande ta kona totshe ati ti no tshanganisa diguma ti nava ti txi pataniswa ngu sihariketo sa silivhela, tiphingwi ta kona ti nava ta silivhela, ni siparako sa kona si na va sa koporo. 18Kulapha ka diguma ku nava ka dizana wa mikono, se kuanama ka didhawa dimwedo ni dimwani ku nava ka mtxhanu wa magumi, ni kudemba ka mtxhanu wa mikono, ya linyu yo hehuka yo somborotelwa; aniko siparako sa kona si na va sa koporo. 19Sotshe simaha sa mthumo wa hombe wa ditenda do sawuleka, totshe tiphande ta kona ni totshe tiphande ta diguma si na va i di sa koporo.

Mtona wo thela ka phande ya malambu

(Levhi 24:1-4)

20“U na leleta vanana va ka Israyeli ati to ve kutisela mtona wa wunene, wo wungulwa, wa mihando ya miolivha kasiku wu txi ta va wa kuwoninga, awule wu no thelwa amu ka malambu, kasiku ma si timeki. 21Amu ka ditenda da msengeletano, ngu hahanze ka m'jiyo, awu wu fenengetako wufakazi, Aroni ni vanana vakwe va na thela mtona wuwa amu ka malambu, kasiku me tura kukhukhela ni minova kala ditxitxa, me woninga masoni ka Mkoma. Awuwa mthetho wu na vaho ka vanana va ka Israyeli ni ka situkulwana sawe sotshe.”

Currently Selected:

Eksodha 27: BEC2016

Highlight

Copy