1 KORINTUS 7
7
Fakfuken ro fakawawin
7:1-16
1Insape yamarisen yawos ro rosai naek srar mkofas ro syap mkoḇedi. Rofyor snon oso fyakawinḇa, ikada iḇye kaku. 2Ḇape insa isma awer fafrowes fa ifrur roi ḇeḇyeḇa, imnis rmomen, farbuk; iḇye syadi snon ani nya swa oso ḇardi ma bin oser-oser nya swa oso ḇardi. 3Inja, snonya ikenem imnis fararur ḇyedi faro binya raris swa ḇyedi, ma binya ikenem imnis fararur ḇyedi faro snonya raris swa ḇyedi; oser-oser ikenem imnis fararur ḇyena faro suminya. 4Binya baken ḇyedi ḇinkundi ḇardi ḇenaiyaḇa; ḇena baken ḇyeja isoine swa ḇyeja. Rarirya kako snonya baken ḇyeja mankundi ḇardi ḇenaiyaḇa; ḇena baken ḇyeja isoine swa ḇyeja. 5Muḇesisyeyae awer imnis imbeswa mambeswa. Fafisu ono muḇesisyeyae rofyor mumarisen kam wer. Rarirya oser-oser ḇyenadi kuker kananon. Ḇape ḇarpurya mkokaḇer ma mkofanamyae wer ḇeimbeswa mambeswa. Rofyor rariryaḇa, nari mkoso Ibiris embuk ḇyena snar mkosambraḇ ro rmomenyaḇa.
6Yakofen radine imnis sasoserḇa, ḇape imnis ananun. 7Kaku ḇeri yamarisen syadi insa snonkakusya kam simnis aya. Ḇape snonkaku oser-oser isma kwar fakamaman eḇesisye ro Allah. Oso isma fakamaman ine, eḇeseya isma fakamaman iwa.
8Faro snonkaku ḇefakawin ḇaimsya ma bin-bin ḇeḇe ḇindansya, farkarkor ayeja isoine: Iḇye syadi mkokenem ḇesnonkbor inkbor imnis aya. 9Ḇape rofyor mkosambraḇser rmomen mkoḇenaḇa, iḇye mkofakawin monda. Inja, iḇye syadi mkofakawin snar nari mkosambraḇser rmomen mkoḇenaḇa.
10 #
Mat. 5:32, 19:9; Mrk. 10:11-12; Luk. 16:18 Faro ḇefakawin kwarsya, sasoser ayedi isoine: (Kaku ḇeri ayai ḇeḇuk sasoser ineḇa mboi Manseren). Bin ḇefakawin kwar oso ibur awer swari. 11Ḇape rofyor ḇyeḇefaspar kwar, ipok ḇyeswa werḇa faswef, roḇa kyaḇer faro swari. Ma snon ḇefakawin oso ipok fyaspar awer swari.
12Faro ḇesesya ananun ayena naiso nane: – ananun nane ro aya ḇardi, mboi Manseren i ḇa – rofyor snon Kristen oso fyakawin kuker bin ḇekyar faro Kristus ḇa, ma bin ani imarisen ikenem fnoḇek snon ani, inja snon ani fyaspar aweri. 13Ma rofyor bin Kristen oso fyakawin kuker snon ḇekyar faro Kristus ḇa, ma snon ani imarisen ikenem fnoḇek bin ani, inja bin ani fyaspar aweri. 14Snar snon ḇekyarḇa ani Allah fyasreni snar fakawawin ḇyedi kuker bin Allah nya kwar ani. Rarirya kako bin ḇekyarḇa ani Allah fyasreni kwar snar fakawawin ḇyedi kuker snon Allah nya kwar ani. Rofyor rariryaḇa ido, romawa suḇesi simnis romawa korwar, ḇape romawa ansi Allah romawa ḇyesirya. 15Ḇape rofyor snonkaku ḇekyarḇa ani imarisen fyaspar swari ḇeḇe Kristen kwar, mkodwarek aweri. Rarirya ido naek roḇa srar ani imoḇes, snar Allah imarisen insa mkokenem kuker aski. 16Snar imbesrar wamnis bin ḇekyar kwar faro Manseren – rariso imbesrar wafawi kaku mboi nari wapok buk aski faro swambri? Rarirya kako naik ḇeḇe swa Kristen rariso naek wafawi kaku mboi nari wapok buk aski faro swambri?
Wakenem imnis raris Manseren farkankin ḇyena
7:17-40
17Iḇye syadi oser-oser kankenem ḇyedi iso Manseren farkankin ḇyedi imnis Allah fyasna kwar faroi rofyor Allah dori. Moḇ yaḇuk farkarkor rarirya faro jemaat oser-oser. 18Rofyor snonkaku oso isma sofakfuk kwar, rofafisu isma fararyor ro Allah, rarirya snon ani ḇyesewar fa ipyos aḇyair sofakfuk ani awer. Rarirya kako rofyor snonkaku oso ḇyeḇesofuk ḇaim rofyor isma fararyor ro Allah, snon ani dor fa isma sofakfuk awer. 19Snar koso sofakfukyake roḇake, sukam suḇe fainda osoḇaḇeri. Mboi ḇesyadiya isoine koso Allah sasoser ḇyena. 20Iḇye syadi snonkaku oser-oser ikenem raris fafisu isma fararyor ro Allah. 21Rofyor naek srar mkosma fararyor, rofyor ani mkoḇewomen, ḇape mkokara mankenem awer nyan ani. Ḇape rofyor nari mkosma fafisu faro ḇaḇe mkeya, mkun fafisu ani beri. 22Snar manfyan oso ḇekyar Manseren kwar, ikada snonkaku ḇemkei ro Manseren. Ma snonkaku oso ḇeḇemkei ma ḇekyar kwar faro Manseren, ikada Kristus manfamyan ḇyedirya. 23Allah kyoḇes ma ḇyak namuk mko kwar. Rarirya, naek srar mkopok mkoḇuk mankunmko fa mkoḇewomen faro snonkaku awer. 24Inja, naek srar, rariso wer kuker kankenem mkoḇedi rofyor mkosma fararyor, iḇye syadi mkokenem faswef rarirya kuker Allah.
25Faro inkbor ḇefakawin ḇaim. Farosi yasma sasoser osoḇa ro Manseren. Rariryano imnis snonkaku ḇesma fakamaman ro Manseren, yamarisen yaḇuk ananun ayena.
26Koswarepen kandera ḇeḇor ḇemun rofafisu ine, inja yakara iḇye syadi snonkaku sikenem faswef mura imnis moḇ sikenem rofafisu ine raya. 27Rofyor naek fakawin kwar, ḇesewar fa faspar swambri awer. Rofyor naek fakawin ḇaim ḇesewar fa fakawin awer. 28Ḇape rofyor naek fakawin, ima sasar risyaḇa. Rarirya kako rofyor inkbor oso fyakawin, ikako sasar risyaba. Derer ḇefakawin ansi nari sisrow kandera nabor. Inja yamarisen yafaspar mkobur kandera anna.
29Moḇ yakara raya isoine, naek srar: Kosma fafisu ḇeḇor werḇa. Randak ro baboine, snonkaku oso ḇefakawin kwar ikenem imnis fyakawin ḇaim; 30snonkaku ḇekanes, ikenem imnis sneḇefafardunḇa; snonkaku ḇembrif, imnis iryaḇ ḇa; snonkaku ḇekoḇes kwar, imnis isma roi onoḇa; 31ma snonkaku sne ḇero roi ḇero supswan ine, iḇye ikenem raris ḇyefandun naḇa. Snar supswan ine, imnis moḇ ryaya, nari ipromes!
32Yamarisen insa naek srar ḇemkei ro kandera. Snonkaku ḇefakawinḇa nari kyara monda roi ḇekur Manseren snar imarisen ifrur sneperi Allah. 33Mansei ḇefakawin kwar kyara nabor ro roi ḇero supswan ine, snar imarisen ifrur sneprei swari; 34ḇarpurya ḇyerarwas kakara ḇyena. Inkbor oso ḇefakawinḇa, oroḇa dojaru oso nari kyara ker monda roi ḇekur Manseren, snar imarisen insa kraf ma rur ḇyedi Allah nya na. Ḇape bin oso ḇefakawin kwar, kyarai ker monda roi ḇero supswan ine, snar imarisen ifrur sneprei swa ḇyedi.
35Yafas nanekam radine faro ḇaḇye naek srar mko ḇardi, mboi yakara fa yaḇuki idwarek ḇa. Roi yamarisenya insa naek srar mkofrur roi ḇenapes ma ḇeḇye, ma insa naek srar mkokara ker monda faro Manseren.
36Rofyor snon oso ḇyaḇir ifrur roi ḇemnisḇa faro inkbor ssḇuki dapsasori, rofyor fyarmku nafsu ḇyediḇa, ma kyara doḇo fyakawin kuker dojaru ḇyedi, iḇye ifrur rosai kyara ḇo ḇeḇyeya. Ḇyesasar ḇa, rofyor sufakawin. 37Ḇape rofyor snon oso kyara kwar fa fyakawin awer ma kakara ḇyedi sedusu iba, rarirya fararur ḇyedi iḇye, rofafisu fyakawin ḇa kuker dojaru ḇyedi. 38Inja snonkaku ḇeḇekawin fararur ḇyedi iḇye, ma snonkaku ḇeḇekawin ḇa fararur ḇyedi iḇye syadi wer.
39Bin oso ḇefakawin kwar ḇyeḇefesepen kuker swari kwar rofafisu swari ikenem. Rofyor swari imar kwar, bin ani imkei fa ḇyekawin kuker snon sai imarisenya; mboi fakawin ani fakawin Kristen rirya. 40Rariryano fainda syadi faroi rofyor fyakawin werḇa. Ine mankundaya kakara ayedirya, ma yaḇaḇir Allah Rur ḇyedi ikfin aya kako.
Currently Selected:
1 KORINTUS 7: LAIBHW
Highlight
Share
Copy
Want to have your highlights saved across all your devices? Sign up or sign in
1 KORINTUS 7
7
Fakfuken ro fakawawin
7:1-16
1Insape yamarisen yawos ro rosai naek srar mkofas ro syap mkoḇedi. Rofyor snon oso fyakawinḇa, ikada iḇye kaku. 2Ḇape insa isma awer fafrowes fa ifrur roi ḇeḇyeḇa, imnis rmomen, farbuk; iḇye syadi snon ani nya swa oso ḇardi ma bin oser-oser nya swa oso ḇardi. 3Inja, snonya ikenem imnis fararur ḇyedi faro binya raris swa ḇyedi, ma binya ikenem imnis fararur ḇyedi faro snonya raris swa ḇyedi; oser-oser ikenem imnis fararur ḇyena faro suminya. 4Binya baken ḇyedi ḇinkundi ḇardi ḇenaiyaḇa; ḇena baken ḇyeja isoine swa ḇyeja. Rarirya kako snonya baken ḇyeja mankundi ḇardi ḇenaiyaḇa; ḇena baken ḇyeja isoine swa ḇyeja. 5Muḇesisyeyae awer imnis imbeswa mambeswa. Fafisu ono muḇesisyeyae rofyor mumarisen kam wer. Rarirya oser-oser ḇyenadi kuker kananon. Ḇape ḇarpurya mkokaḇer ma mkofanamyae wer ḇeimbeswa mambeswa. Rofyor rariryaḇa, nari mkoso Ibiris embuk ḇyena snar mkosambraḇ ro rmomenyaḇa.
6Yakofen radine imnis sasoserḇa, ḇape imnis ananun. 7Kaku ḇeri yamarisen syadi insa snonkakusya kam simnis aya. Ḇape snonkaku oser-oser isma kwar fakamaman eḇesisye ro Allah. Oso isma fakamaman ine, eḇeseya isma fakamaman iwa.
8Faro snonkaku ḇefakawin ḇaimsya ma bin-bin ḇeḇe ḇindansya, farkarkor ayeja isoine: Iḇye syadi mkokenem ḇesnonkbor inkbor imnis aya. 9Ḇape rofyor mkosambraḇser rmomen mkoḇenaḇa, iḇye mkofakawin monda. Inja, iḇye syadi mkofakawin snar nari mkosambraḇser rmomen mkoḇenaḇa.
10 #
Mat. 5:32, 19:9; Mrk. 10:11-12; Luk. 16:18 Faro ḇefakawin kwarsya, sasoser ayedi isoine: (Kaku ḇeri ayai ḇeḇuk sasoser ineḇa mboi Manseren). Bin ḇefakawin kwar oso ibur awer swari. 11Ḇape rofyor ḇyeḇefaspar kwar, ipok ḇyeswa werḇa faswef, roḇa kyaḇer faro swari. Ma snon ḇefakawin oso ipok fyaspar awer swari.
12Faro ḇesesya ananun ayena naiso nane: – ananun nane ro aya ḇardi, mboi Manseren i ḇa – rofyor snon Kristen oso fyakawin kuker bin ḇekyar faro Kristus ḇa, ma bin ani imarisen ikenem fnoḇek snon ani, inja snon ani fyaspar aweri. 13Ma rofyor bin Kristen oso fyakawin kuker snon ḇekyar faro Kristus ḇa, ma snon ani imarisen ikenem fnoḇek bin ani, inja bin ani fyaspar aweri. 14Snar snon ḇekyarḇa ani Allah fyasreni snar fakawawin ḇyedi kuker bin Allah nya kwar ani. Rarirya kako bin ḇekyarḇa ani Allah fyasreni kwar snar fakawawin ḇyedi kuker snon Allah nya kwar ani. Rofyor rariryaḇa ido, romawa suḇesi simnis romawa korwar, ḇape romawa ansi Allah romawa ḇyesirya. 15Ḇape rofyor snonkaku ḇekyarḇa ani imarisen fyaspar swari ḇeḇe Kristen kwar, mkodwarek aweri. Rarirya ido naek roḇa srar ani imoḇes, snar Allah imarisen insa mkokenem kuker aski. 16Snar imbesrar wamnis bin ḇekyar kwar faro Manseren – rariso imbesrar wafawi kaku mboi nari wapok buk aski faro swambri? Rarirya kako naik ḇeḇe swa Kristen rariso naek wafawi kaku mboi nari wapok buk aski faro swambri?
Wakenem imnis raris Manseren farkankin ḇyena
7:17-40
17Iḇye syadi oser-oser kankenem ḇyedi iso Manseren farkankin ḇyedi imnis Allah fyasna kwar faroi rofyor Allah dori. Moḇ yaḇuk farkarkor rarirya faro jemaat oser-oser. 18Rofyor snonkaku oso isma sofakfuk kwar, rofafisu isma fararyor ro Allah, rarirya snon ani ḇyesewar fa ipyos aḇyair sofakfuk ani awer. Rarirya kako rofyor snonkaku oso ḇyeḇesofuk ḇaim rofyor isma fararyor ro Allah, snon ani dor fa isma sofakfuk awer. 19Snar koso sofakfukyake roḇake, sukam suḇe fainda osoḇaḇeri. Mboi ḇesyadiya isoine koso Allah sasoser ḇyena. 20Iḇye syadi snonkaku oser-oser ikenem raris fafisu isma fararyor ro Allah. 21Rofyor naek srar mkosma fararyor, rofyor ani mkoḇewomen, ḇape mkokara mankenem awer nyan ani. Ḇape rofyor nari mkosma fafisu faro ḇaḇe mkeya, mkun fafisu ani beri. 22Snar manfyan oso ḇekyar Manseren kwar, ikada snonkaku ḇemkei ro Manseren. Ma snonkaku oso ḇeḇemkei ma ḇekyar kwar faro Manseren, ikada Kristus manfamyan ḇyedirya. 23Allah kyoḇes ma ḇyak namuk mko kwar. Rarirya, naek srar mkopok mkoḇuk mankunmko fa mkoḇewomen faro snonkaku awer. 24Inja, naek srar, rariso wer kuker kankenem mkoḇedi rofyor mkosma fararyor, iḇye syadi mkokenem faswef rarirya kuker Allah.
25Faro inkbor ḇefakawin ḇaim. Farosi yasma sasoser osoḇa ro Manseren. Rariryano imnis snonkaku ḇesma fakamaman ro Manseren, yamarisen yaḇuk ananun ayena.
26Koswarepen kandera ḇeḇor ḇemun rofafisu ine, inja yakara iḇye syadi snonkaku sikenem faswef mura imnis moḇ sikenem rofafisu ine raya. 27Rofyor naek fakawin kwar, ḇesewar fa faspar swambri awer. Rofyor naek fakawin ḇaim ḇesewar fa fakawin awer. 28Ḇape rofyor naek fakawin, ima sasar risyaḇa. Rarirya kako rofyor inkbor oso fyakawin, ikako sasar risyaba. Derer ḇefakawin ansi nari sisrow kandera nabor. Inja yamarisen yafaspar mkobur kandera anna.
29Moḇ yakara raya isoine, naek srar: Kosma fafisu ḇeḇor werḇa. Randak ro baboine, snonkaku oso ḇefakawin kwar ikenem imnis fyakawin ḇaim; 30snonkaku ḇekanes, ikenem imnis sneḇefafardunḇa; snonkaku ḇembrif, imnis iryaḇ ḇa; snonkaku ḇekoḇes kwar, imnis isma roi onoḇa; 31ma snonkaku sne ḇero roi ḇero supswan ine, iḇye ikenem raris ḇyefandun naḇa. Snar supswan ine, imnis moḇ ryaya, nari ipromes!
32Yamarisen insa naek srar ḇemkei ro kandera. Snonkaku ḇefakawinḇa nari kyara monda roi ḇekur Manseren snar imarisen ifrur sneperi Allah. 33Mansei ḇefakawin kwar kyara nabor ro roi ḇero supswan ine, snar imarisen ifrur sneprei swari; 34ḇarpurya ḇyerarwas kakara ḇyena. Inkbor oso ḇefakawinḇa, oroḇa dojaru oso nari kyara ker monda roi ḇekur Manseren, snar imarisen insa kraf ma rur ḇyedi Allah nya na. Ḇape bin oso ḇefakawin kwar, kyarai ker monda roi ḇero supswan ine, snar imarisen ifrur sneprei swa ḇyedi.
35Yafas nanekam radine faro ḇaḇye naek srar mko ḇardi, mboi yakara fa yaḇuki idwarek ḇa. Roi yamarisenya insa naek srar mkofrur roi ḇenapes ma ḇeḇye, ma insa naek srar mkokara ker monda faro Manseren.
36Rofyor snon oso ḇyaḇir ifrur roi ḇemnisḇa faro inkbor ssḇuki dapsasori, rofyor fyarmku nafsu ḇyediḇa, ma kyara doḇo fyakawin kuker dojaru ḇyedi, iḇye ifrur rosai kyara ḇo ḇeḇyeya. Ḇyesasar ḇa, rofyor sufakawin. 37Ḇape rofyor snon oso kyara kwar fa fyakawin awer ma kakara ḇyedi sedusu iba, rarirya fararur ḇyedi iḇye, rofafisu fyakawin ḇa kuker dojaru ḇyedi. 38Inja snonkaku ḇeḇekawin fararur ḇyedi iḇye, ma snonkaku ḇeḇekawin ḇa fararur ḇyedi iḇye syadi wer.
39Bin oso ḇefakawin kwar ḇyeḇefesepen kuker swari kwar rofafisu swari ikenem. Rofyor swari imar kwar, bin ani imkei fa ḇyekawin kuker snon sai imarisenya; mboi fakawin ani fakawin Kristen rirya. 40Rariryano fainda syadi faroi rofyor fyakawin werḇa. Ine mankundaya kakara ayedirya, ma yaḇaḇir Allah Rur ḇyedi ikfin aya kako.
Currently Selected:
:
Highlight
Share
Copy
Want to have your highlights saved across all your devices? Sign up or sign in