Salmos 86
86
1Ruzë́ naguʼ, Xanaʼ Dios, en rubíʼu didzaʼ,
tuʼ zoa nu rusacaʼ ziʼ nedaʼ, ateʼ riyadzaj riyúdxidaʼ.
2Ben chiʼi böʼ naca cazaʼ, Dios, tuʼ nacaʼ quiuʼ Liʼ.
Busölá nedaʼ, huen dxin quiuʼ, Dios quiaʼ, tuʼ ruzxöni ládxaʼa Liʼ.
3Buzáʼ ladxiʼ quiaʼ, Xan,
tuʼ rulidzaʼ Liʼ idú dza.
4Ben ga udzeja ládxaʼa nedaʼ, huen dxin quiuʼ,
tuʼ riguʼa lu noʼo böʼ naca cazaʼ, Xan.
5Nacuʼ dxiʼa, Xan, en chizúʼ uniti loʼ bönachi quiuʼ.
Nadxíʼiticaʼsuʼ yúguʼtë nupa tuʼlidza Liʼ.
6Ruzë́ naguʼ le rulidzaʼ Liʼ, Xan,
en ruíʼi ládxuʼu gunuʼ yuguʼ le inábidaʼ loʼ.
7Cateʼ bi gaca quiaʼ ulidzaʼ Liʼ,
tuʼ ubíʼi cazuʼ didzaʼ bi gunuʼ quiaʼ.
8Cúnturö nu zoa ládjagaca dios nu naca ca nacuʼ Liʼ, Xan,
en bitiʼ zoa iaʼtú nu run ca nácagaca le runuʼ Liʼ.
9Ilaʼdxín bönachi yúguʼtë yödzö naguixjuʼ Liʼ, Xanaʼ Dios,
en ilaʼyéaj ládxiʼgaca Liʼ, en ilún zxön Loʼ.
10Nayë́pisëtërösuʼ Liʼ, en tuzuʼ Liʼ runuʼ yuguʼ yöl-laʼ huáca zxön.
Tuzuʼ Liʼ nacuʼ Dios.
11Busëdi nedaʼ ca naca le rë́ʼënuʼ gunaʼ, Xan.
Gunaʼ ca naca le naca idútë li naguixjuʼ Liʼ.
Ben ga gádxidaʼ Loʼ idú ládxaʼa.
12Idú ládxaʼa guíaʼ Liʼ: “Xclenuʼ”, Xanaʼ Dios,
en gunaʼ zxön Loʼ yuguʼ iz siʼ zaca.
13Nadxíʼideʼenuʼ nedaʼ,
en chibusölóʼ böʼ naca cazaʼ lu lataj chul-la ga nacuáʼ nupa chinátigaca.
14Dios quiaʼ, nupa taʼdáʼbagaʼ nedaʼ taʼdíl-lalen nedaʼ,
ateʼ yuguʼ bönniʼ zidzaj ladxiʼ të́ʼënëʼ ilútiëʼ nedaʼ,
yuguʼ bönniʼ naʼ bitiʼ tunëʼ Liʼ bal.
15Nacuʼ Dios ruhuéchiʼ ládxuʼu netuʼ, Xan, en ruzáʼ ládxuʼu queë́tuʼ.
Ridzenuʼ para ilenuʼ netuʼ, en nadxíʼideʼenuʼ netuʼ, en runuʼ ca rnna xtídzuʼu.
16Buyú nedaʼ, en buzáʼ ladxiʼ quiaʼ.
Butipa ládxaʼa nedaʼ, huen dxin quiuʼ,
en busölá nedaʼ, zxíʼininu nigula huen dxin quiuʼ.
17Buluíʼi nedaʼ tu le gaca bëʼ gaca dxiʼa quiaʼ,
para ilaʼléʼe le nupa bitiʼ taʼléʼe nedaʼ dxiʼa.
Uluʼtuíʼi, tuʼ gúcalenuʼ nedaʼ,
en buë tsahúʼu nedaʼ, Xan.
Currently Selected:
Salmos 86: zar
Highlight
Copy
Compare
Share
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
