Galatia 2
2
Pengkähänganna Paulus pano di tau ang tadia to Yahudi naakui rasul yaho di Yerusalem
1Sampulo uhpa'i pahiamanna, ya' le'ba' bumä' dai' di Yerusalem sibahaang ta Barnabas anna kubahai toe' ta Titus. 2Le'ba'ä' dai' di Yerusalem donetoo aka' inang napalosaiä' Puang Alataala naoatee, ”La dai'o di Yerusalem.” Lambi'ang dai', ya' ma'himpummang, ampo' supung pebulle ada' yaho ang kisibahaing ma'himpung. Ya' kutula'ming didiona yato pepakuhungku ang si kupakahebaing pano di tau ang tadia to Yahudi. Kutula'ing supu pano di pebulle ada' aka' mahea'ä' labu' arang yato pengkähängangku, aka' ke hapang dai naakui yato pebulle ada' yaho, ya' la labu' kale ingkänna yatoo. #2:2 Mahea' Paulus yato arang to Yahudi ang mampetahpa'mi dai la ungngakui tau ang tadia to Yahudi ang mampetahpa'mi ke dai sika untuhu'i toe' ingkänna pahentana peada'ang Yahudi noanna kapotilleang. 3Ampo' katämpä'anna dasiae' labu' aka' yato Titus ang mamposolaiä', moinnakato mesa to Yunani ampo' dasiae' dipahsa la untuhu'i kabiasaanna to Yahudi motille. #2:3 Situhu' atohanna to Yahudi pahallu ditille asang muane ang la mendahi tandana dioatee mendahing petauanna Puang Alataala. Ponna dai naakui pebulle ada' yato tula'na Paulus, ya' umbai la umpahsa Titus sibaha ingkänna tau ang tadia to Yahudi ditille mane malai naangka' toe' petauanna Puang Alataala. 4Inang aha sangngaka-sangngaka tau ang mangngoatee, ”Pahallu tau ditille.” Ang ma'tula' noa yatoo si mentama mahta-mahta di kakalebuanta boheng solata anna memata-mataii yaling di alla'-alla'taa'. Napanoa anna malai nainsang aka ang si tababe ang dai tisangke' yaling di ada' kabiasaanna to Yahudi aka' mesamingkea' kita' Kristus Yesus. Nasuhung napanoa, aka' umpeäng lalang anna malai napatisangke' toingkea' kita' pano di ingkänna pahenta yaling di peada'anna to Yahudi, sihapang sabua' ang dai beba'. 5Ampo' moi poro sai'di' dai kitahimbo yato tula'na, aka' kidakai kamarohoanna yato Kaheba Mapia anna malai tontong lolo noa anna kekuna pano di kalaemua'.
6Anna yato pebulle ada' yaho di Yerusalem, ang disangai to dipakeangka' donetoo, dang aha unsitelängngi yato pepakuhungku. (Aka' di kodi'na kodi' dai aha alla'na kusa'ding to dipakeangka' anna tau biasa. Aka' Puang Alataala daine' mampasise'la-se'la.) 7Dai aha aka ang nahängngängngiing pepakuhungku, ampo' nainsammi anna nakaleso naoatee kodi' nahannuang Puang Alataala umpepakahebaing Kaheba Mapia pano di tau ang tadia to Yahudi umba noa unghannuang Petrus umpepakahebaing Kaheba Mapia pano di to Yahudi. 8Aka' Puang Alataala umbea kamatohoang pano di Petrus mendahi rasulna Puang Yesus pano di to Yahudi, anna kodi'-kodi' nabeaä' kamatohoang mendahi rasulna Puang Yesus pano di tau ang tadia to Yahudi. 9Dahi naakui Yakobus, Petrus, anna Yohanes, yato to diangka' ahhi matoto'na di ingkänna to mampetahpa', naoatee, ”Inang dimana' Paulus pengkähängang yatoo.” Lambi' sika nasalama'iang, sibahaang ta Barnabas, mendahi tanda kasikenteangki'. Mane sipahtuyu-tuyuang lambi' kibohtu kioatee, ”Kodi' sibaha Barnabas la mengkähängngang pano di tau ang tadia to Yahudi, anna Yakobus sibaha Petrus anna Yohanes la mengkähäng pano di to Yahudi.”
10Supung mesa ang napalau naoatee, ”La si umpayaling loloa' di inahammu kapahalluanna to pemase-mase ang yaling di alla'-alla'ki'.” Anna setonganna dianto mesa toe' ang kukärä'i si'da-si'da la kupembabeing.
Paulus unsalla Petrus di hao di Antiokhia
11Tahpana sulei ta Petrus napellambi'iä' di hao di Antiokhia, ya' dä' mahea' kusalla di olona tau mai'di aka' sala pembabena. 12Dolu si mandeke' sibaha to mampetahpa' ang tadia to Yahudi. Ampo' tahpana sule sangngaka-sangngaka solana Yakobus yaho mai di Yerusalem, ya' umpelleing tau ang tadia to Yahudi anna dang naaku sibaha mande aka' mahea' pano yato di to Yahudi ang si mangngoatee, ”Pahallu tau ditille asang.” 13Anna noa sia tunne' to Yahudi senga' ang mampetahpa'mi: sisenga' tula'na anna senga' di inahanna sinnoa Petrus, datoi naaku mande sibaha tau ang tadia to Yahudi lambi' umpasähsä' toe' Barnabas aka' kapola-polaang. 14Tahpana sika kuita dang membabe situhu' yato pepakuhu maroho ang talambi' yaling di Kaheba Mapia, ya' kupakalesoming pano di ta Petrus di hao di olona tau mai'di kuoatee, ”Dio-dio mesao to Yahudi ampo' tuhoo noa ang tadia to Yahudi ang si untuhu'i pembabena tau ang tadia to Yahudi. Dahi, akana palla'rako dio la umpahsa to mampetahpa' ang tadia to Yahudi untuhu'i pembabena to Yahudi?”
Supung mala mepamaroho Puang Alataala ke umpetahpa'i tau Puang Yesus Kristus
15Di kami'na kami' naonge anna dipadahiang inang to Yahudiang, tadiaang tau senga', bahtu' dioatee ‘to madosa.’ #2:15 Situhu' peada'anna to Yahudi supung to Yahudi mala dihekeng petauanna Puang Alataala. Ingkänna tau senga' nahekeng ‘to madosa.’ Aka' napetahpa' nei' naoatee ponna dituhu'i ingkänna Atohanna Musa la mepamaroho Puang Alataala bahtu' dioatee metahimbo. 16Ampo' moinnakato noa, kiinsang kioatee dai aha moi poro la mesa tau napamaroho Puang Alataala aka' untuhu'i Atohanna Musa. Ampo' supung mala mepamaroho Puang Alataala ke mampetahpa'i tau pano di Puang Yesus Kristus. Dahi mampetahpa'ang kami' pano di Kristus Yesus anna malaang napamaroho Puang Alataala aka' yato kapampetahpa'angki', tadia aka' untuhu'iang Atohanna Musa. Aka' dai aha moi poro la mesa tau dipamaroho aka' untuhu'i Atohanna Musa.
17Mane ahai indee, ponna kami' to Yahudi pemalaang napamaroho Puang Alataala ungngolai kasikenteangki' Kristus, ampo' naita siamang tau dai untuhu'i ingkänna Atohanna Musa, noa yato tau ang tadia to Yahudi (ang si dioaintee ‘to madosa’), ya' la malaraka dioatee Kristus umbahaang pano di dosa? Maleso anna daete' noa yatoo! 18Ponna ke la sumuleä' untuhu'i yato Atohanna Musa ang puha kupellei, sihapang puha kutalei mane la kupake'de'i sumule, ya' dianto disanga maleso anna madosaä'. 19Aka' ungngolai ihsinna Atohanna Musa ang kupellaya'i, kuinsammi kuoatee dai kubela kutuhu'i lolo. Dahi bohtung kasikenteangku Atohanna Musa anna malaä' untuhu'i pangngelo'na Puang Alataala.
Naonge dipateii Kristus yaho di kayu sitambeng, naangka' Puang Alataala mate touä' ko sibaha Kristus. #2:19 Sinnoanna mesa to mate dang nakuasai pahentana inde lino, noa tuntone' to mampetahpa' dang nakuasai Atohanna Musa aka' puhang mate sibaha Puang Yesus Kristus. 20Anna tadiang kalaeku kale ang tuho dinoa, ampo' Kristusmi tuho yaling di kalaeku. Inde katuhoangku dinoa kuolai sibaha punno kapampetahpa'ang pano di Änä'na Puang Alataala ang mangkalemuiä' anna puha umbeho Kalaena nabala'iä' dipatei. 21Dä' unsumbäng mana' pa'kalemunna Puang Alataala. Aka' ponna dioatee Puang Alataala umpamaroho hupatau aka' umpembabeing ingkänna Atohanna Musa, ya' labu' kaleete' disanga yato kamateanna Kristus, aka' sule Kristus dipatei anna malai mapia sumule kasikenteanna hupatau anna Puang Alataala.
Currently Selected:
Galatia 2: ATQ
Highlight
Copy
Compare
Share
Want to have your highlights saved across all your devices? Sign up or sign in
LAI 2004
Galatia 2
2
Pengkähänganna Paulus pano di tau ang tadia to Yahudi naakui rasul yaho di Yerusalem
1Sampulo uhpa'i pahiamanna, ya' le'ba' bumä' dai' di Yerusalem sibahaang ta Barnabas anna kubahai toe' ta Titus. 2Le'ba'ä' dai' di Yerusalem donetoo aka' inang napalosaiä' Puang Alataala naoatee, ”La dai'o di Yerusalem.” Lambi'ang dai', ya' ma'himpummang, ampo' supung pebulle ada' yaho ang kisibahaing ma'himpung. Ya' kutula'ming didiona yato pepakuhungku ang si kupakahebaing pano di tau ang tadia to Yahudi. Kutula'ing supu pano di pebulle ada' aka' mahea'ä' labu' arang yato pengkähängangku, aka' ke hapang dai naakui yato pebulle ada' yaho, ya' la labu' kale ingkänna yatoo. #2:2 Mahea' Paulus yato arang to Yahudi ang mampetahpa'mi dai la ungngakui tau ang tadia to Yahudi ang mampetahpa'mi ke dai sika untuhu'i toe' ingkänna pahentana peada'ang Yahudi noanna kapotilleang. 3Ampo' katämpä'anna dasiae' labu' aka' yato Titus ang mamposolaiä', moinnakato mesa to Yunani ampo' dasiae' dipahsa la untuhu'i kabiasaanna to Yahudi motille. #2:3 Situhu' atohanna to Yahudi pahallu ditille asang muane ang la mendahi tandana dioatee mendahing petauanna Puang Alataala. Ponna dai naakui pebulle ada' yato tula'na Paulus, ya' umbai la umpahsa Titus sibaha ingkänna tau ang tadia to Yahudi ditille mane malai naangka' toe' petauanna Puang Alataala. 4Inang aha sangngaka-sangngaka tau ang mangngoatee, ”Pahallu tau ditille.” Ang ma'tula' noa yatoo si mentama mahta-mahta di kakalebuanta boheng solata anna memata-mataii yaling di alla'-alla'taa'. Napanoa anna malai nainsang aka ang si tababe ang dai tisangke' yaling di ada' kabiasaanna to Yahudi aka' mesamingkea' kita' Kristus Yesus. Nasuhung napanoa, aka' umpeäng lalang anna malai napatisangke' toingkea' kita' pano di ingkänna pahenta yaling di peada'anna to Yahudi, sihapang sabua' ang dai beba'. 5Ampo' moi poro sai'di' dai kitahimbo yato tula'na, aka' kidakai kamarohoanna yato Kaheba Mapia anna malai tontong lolo noa anna kekuna pano di kalaemua'.
6Anna yato pebulle ada' yaho di Yerusalem, ang disangai to dipakeangka' donetoo, dang aha unsitelängngi yato pepakuhungku. (Aka' di kodi'na kodi' dai aha alla'na kusa'ding to dipakeangka' anna tau biasa. Aka' Puang Alataala daine' mampasise'la-se'la.) 7Dai aha aka ang nahängngängngiing pepakuhungku, ampo' nainsammi anna nakaleso naoatee kodi' nahannuang Puang Alataala umpepakahebaing Kaheba Mapia pano di tau ang tadia to Yahudi umba noa unghannuang Petrus umpepakahebaing Kaheba Mapia pano di to Yahudi. 8Aka' Puang Alataala umbea kamatohoang pano di Petrus mendahi rasulna Puang Yesus pano di to Yahudi, anna kodi'-kodi' nabeaä' kamatohoang mendahi rasulna Puang Yesus pano di tau ang tadia to Yahudi. 9Dahi naakui Yakobus, Petrus, anna Yohanes, yato to diangka' ahhi matoto'na di ingkänna to mampetahpa', naoatee, ”Inang dimana' Paulus pengkähängang yatoo.” Lambi' sika nasalama'iang, sibahaang ta Barnabas, mendahi tanda kasikenteangki'. Mane sipahtuyu-tuyuang lambi' kibohtu kioatee, ”Kodi' sibaha Barnabas la mengkähängngang pano di tau ang tadia to Yahudi, anna Yakobus sibaha Petrus anna Yohanes la mengkähäng pano di to Yahudi.”
10Supung mesa ang napalau naoatee, ”La si umpayaling loloa' di inahammu kapahalluanna to pemase-mase ang yaling di alla'-alla'ki'.” Anna setonganna dianto mesa toe' ang kukärä'i si'da-si'da la kupembabeing.
Paulus unsalla Petrus di hao di Antiokhia
11Tahpana sulei ta Petrus napellambi'iä' di hao di Antiokhia, ya' dä' mahea' kusalla di olona tau mai'di aka' sala pembabena. 12Dolu si mandeke' sibaha to mampetahpa' ang tadia to Yahudi. Ampo' tahpana sule sangngaka-sangngaka solana Yakobus yaho mai di Yerusalem, ya' umpelleing tau ang tadia to Yahudi anna dang naaku sibaha mande aka' mahea' pano yato di to Yahudi ang si mangngoatee, ”Pahallu tau ditille asang.” 13Anna noa sia tunne' to Yahudi senga' ang mampetahpa'mi: sisenga' tula'na anna senga' di inahanna sinnoa Petrus, datoi naaku mande sibaha tau ang tadia to Yahudi lambi' umpasähsä' toe' Barnabas aka' kapola-polaang. 14Tahpana sika kuita dang membabe situhu' yato pepakuhu maroho ang talambi' yaling di Kaheba Mapia, ya' kupakalesoming pano di ta Petrus di hao di olona tau mai'di kuoatee, ”Dio-dio mesao to Yahudi ampo' tuhoo noa ang tadia to Yahudi ang si untuhu'i pembabena tau ang tadia to Yahudi. Dahi, akana palla'rako dio la umpahsa to mampetahpa' ang tadia to Yahudi untuhu'i pembabena to Yahudi?”
Supung mala mepamaroho Puang Alataala ke umpetahpa'i tau Puang Yesus Kristus
15Di kami'na kami' naonge anna dipadahiang inang to Yahudiang, tadiaang tau senga', bahtu' dioatee ‘to madosa.’ #2:15 Situhu' peada'anna to Yahudi supung to Yahudi mala dihekeng petauanna Puang Alataala. Ingkänna tau senga' nahekeng ‘to madosa.’ Aka' napetahpa' nei' naoatee ponna dituhu'i ingkänna Atohanna Musa la mepamaroho Puang Alataala bahtu' dioatee metahimbo. 16Ampo' moinnakato noa, kiinsang kioatee dai aha moi poro la mesa tau napamaroho Puang Alataala aka' untuhu'i Atohanna Musa. Ampo' supung mala mepamaroho Puang Alataala ke mampetahpa'i tau pano di Puang Yesus Kristus. Dahi mampetahpa'ang kami' pano di Kristus Yesus anna malaang napamaroho Puang Alataala aka' yato kapampetahpa'angki', tadia aka' untuhu'iang Atohanna Musa. Aka' dai aha moi poro la mesa tau dipamaroho aka' untuhu'i Atohanna Musa.
17Mane ahai indee, ponna kami' to Yahudi pemalaang napamaroho Puang Alataala ungngolai kasikenteangki' Kristus, ampo' naita siamang tau dai untuhu'i ingkänna Atohanna Musa, noa yato tau ang tadia to Yahudi (ang si dioaintee ‘to madosa’), ya' la malaraka dioatee Kristus umbahaang pano di dosa? Maleso anna daete' noa yatoo! 18Ponna ke la sumuleä' untuhu'i yato Atohanna Musa ang puha kupellei, sihapang puha kutalei mane la kupake'de'i sumule, ya' dianto disanga maleso anna madosaä'. 19Aka' ungngolai ihsinna Atohanna Musa ang kupellaya'i, kuinsammi kuoatee dai kubela kutuhu'i lolo. Dahi bohtung kasikenteangku Atohanna Musa anna malaä' untuhu'i pangngelo'na Puang Alataala.
Naonge dipateii Kristus yaho di kayu sitambeng, naangka' Puang Alataala mate touä' ko sibaha Kristus. #2:19 Sinnoanna mesa to mate dang nakuasai pahentana inde lino, noa tuntone' to mampetahpa' dang nakuasai Atohanna Musa aka' puhang mate sibaha Puang Yesus Kristus. 20Anna tadiang kalaeku kale ang tuho dinoa, ampo' Kristusmi tuho yaling di kalaeku. Inde katuhoangku dinoa kuolai sibaha punno kapampetahpa'ang pano di Änä'na Puang Alataala ang mangkalemuiä' anna puha umbeho Kalaena nabala'iä' dipatei. 21Dä' unsumbäng mana' pa'kalemunna Puang Alataala. Aka' ponna dioatee Puang Alataala umpamaroho hupatau aka' umpembabeing ingkänna Atohanna Musa, ya' labu' kaleete' disanga yato kamateanna Kristus, aka' sule Kristus dipatei anna malai mapia sumule kasikenteanna hupatau anna Puang Alataala.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
LAI 2004