Zɛ́fènádyà 1
1
1Céè-ɖɛ̀ nìà kɛ mɔ̀ wuɖu ɓɛ́ Bounɓoɔ̀ dèìn ma Zɛ́fènádyà mɔ̀ Kúsììɛ̀ dyú-gàà kɛɛ wĩín nyɛ. Ɔ mɔ̀ ti ɓɛ́ Jòsádyà mɔ̀ Ámɔ̀ùn dyú-gàà kɛɛ mɔ̀ ma Júɖà-ɓòɖòɔ̀ kã́á kɛ. Zɛ́fènádyà ɓǎ ɓěɛ̀ gbǒ-xwíníínɔ̀ kɛà kɛ̀. Hɛ́sèkádyà ɓɛ́ ɔ mɔ̀ ma Júɖà-ɓòɖòɔ̀ kã́á kɛɛ wóɖóìn ma Ámàwíɖíà, ké Ámàwíɖíà wóɖóìn ma Gédàɖádyà, ké Gédàɖádyà wóɖóìn ma Kúsìì, hwɛ̀ ké Kúsìì wóɖóìn ma kà Zɛ́fènádyà kɛ̀.
Bounɓoɔ̀ zaa-wɔ̃-po-wèɔ̀
2Bounɓoɔ̀ cɛ̃ɛ, ké ɔ ɖá, “Ní mu ɖɛ séín nì ɓóɖó-kpàà kɔ̃ɛɛ ɓó dyi sámáùn pã́-pã́. 3Ɔ hwɔìn kà nyɔǔn-dyù séín kè nimii séín kè naà séín ɔ kè zimii séín. Ní muɛ nyuùn ɓɛ́ hwòɖǒ-kɔ̃in-nyìnììn-nyɔ̀ ɓěɔ̀ ké dyi kpá. Ní mu nyɔǔn-dyù séín mú gbɔɔ̀ùn, ké wa ɖò se ɓíɖíi sèɛ̌ mu. Mɔ̄ Bounɓoɔ̀ mɔ̀ nyɔ cɛ̃à kɛ̀.
4“Ní mu ní sɔ̃ɔ̀ nyɔ séín cĩ́à ɖé Júɖà-ɓòɖòɔ̀ kɔ̃ kè ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ kɔ̃ pɛ̃́ìn ɖé dyoɖo mú. Ní mu nyɔ séín ɓě ɓɛ́ wa mɔ̀à kũùn-kpò-gèɖèpɔ́ɔ̀ mɔ̀à Béò kɛɛ ɓiè-nyɔ̀ ɓěɛɛ mú gbɔɔ̀ùn, ké sáa-zà-nyɔ̀ ɓě ɓiè kà Béò kɛɛ jè se nyɔ ɖò hwìɖǐi nìɛ̌ mu ɖe. 5Ní mu nyɔ séín ɓě ɓɛ́ wa mu ɖé waà gbǒ ɓěɔ̀ kɔ̃in dyáùn, ké wa mu dyóɖóɔ̀ kè dɛ̀nɛ̀ɔ̀ ɔ kè dɛ̀nɛ̀ mɛ́nɛ́ɛ́ ɓěɔ̀ ɓièìn nyɛɛ mú gbɔɔ̀ùn, ké ní mu nyɔ ɓě ɓiè ḿ, ké wa ɖi wuɖu kà ɓɛ́ wa mu ní kũ̀à nyuùn, hwɛ̀ ké wa sɔ̀ dyí, ké wa ɓiè kũùn-kpò-gèɖèpɔ́ɔ̀ mɔ̀à Móɖɛ̀ kɛɛ mú gbɔɔ̀ùn ɖekè. 6Ní mu nyɔ ɓě ɓɔ́à ḿ kíɖíí síɛ kɛɛ mú gbɔɔ̀ùn, ké ní mu nyɔ ɓě ní dyià ḿ gbo, mɔɔ ké wa ní ɓiè kà ḿ wɛ̃ɛ mú gbɔɔ̀ùn.
7“Ɓě nì gìɖìǐ ɓó mɔ̄ Bounɓo Ɖɛɓíɔ́ɔ̀ dyúa, sepóɛɖé ní zaa-wɔ̃-po-wèɔ̀ ɖǎ dyi xwɛ̃́ìn. Ḿ nì ti dyéɛń, ɓɛ́ ḿ ké ní nyɔ ɓěɔ̀ sáa zàìn, ḿ ɖǎ waà mú-nyɛ́-nyɔ̀ ɓěɔ̀ ɖá, ɓɛ́ wa ké Júɖà-ɓòɖòɔ̀ hwu. 8-9Ɓó wé kɔ̃̀ ɓaɖa ní muà ní nyɔ ɓěɔ̀ sáa zàìn nyɛɛ, ní mu gɔ̌mànà-nyɔ̀ ɓěɔ̀ kè kã́áɔ̀ dyú-gàà ɓě ɓɛ́ wa dyíɖíà, ké wa ɖáɓáà kú, ɓɛ́ wa kéà waà kɔ̃in-nyɔ̀ɔ̀ gbǒɔ̀ ɖɛ ɓě wa zà nyɔǔn xwa gana-kàa dyíìn nyɛɛ gǎ kɔ̃ tòùn. Ní mu wa gǎ kɔ̃ tòùn, sepóɛɖé wa nyu ɓóɖó-ɖìàǔn-kpèɖè, ké wa ɓiè ḿ kà nyɔ ɓě ɓiè kà kũùn-kpò-gèɖèpɔ́ɔ̀ ɓě kɛ.
10“Ɓó wéa ɓaɖaa, ɓě mu mú-páná-wùɖù kè kpé-po-wùɖù wɔ̃́ùn sɔ̀ìn ɖé gmɔ-wɔ̃̀ ɓɛ́ wa ɖáìn Zimii-gmɔ̀-wɔ̃̀ nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ gbo kè ɖé hwɔɖɔɔ̀ dà ɓě wa po ɖieɛ, ké ɓě mu ɖɛ dyi kpá jĩ̌ vɛ̀nɛ̀ ɓě wɔ̃́ùn sɔ̀ìn ɖé toɖo ɓě nìà ɖé hwɔɖɔɔ̀ múɛɛ dya. 11Ti nyɔ ɓě cĩ́à ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ ɖɛ-pèɖèìn-naínɔ̀ kɛɛ mu ɖɛ ɓěɛ̀ jè wɔ̃́ùn wɛ̃ɛ, nìí, wa mu kpé poùn ɖé wuɖu zoo mú, sepóɛɖé ɖɛ-peɖe-nyɔ̀ séín ɓěɔ̀ ɖǎ mɛ́ɛ hwɛ̀, ké séɓàɖà-dɔ̃-nyɔ̀ ɓěɔ̀ séín ɖǎ mú gbɔɔ̀ hwɛ̀. Mɔ̄ Bounɓoɔ̀ ɖǎa cɛ̃.
12“Ɓó wéa ɓaɖaa, ní mu ɖáùnpò ɓě dyí kpɔ̃̀ìn, ɓɛ́ ḿ ké Jùɖúsɛ̀ɖɛ̀ìn-hwɔ̀ɖɔ̀ɔ̀ gboi gmɔìn, ké ní mu nyɔ ɓě dèìn kà wa mìɔùn hwòɖǒ múin nyɛɛ gǎ kɔ̃ tòùn. Wa mɔ̀ nyɔ ɓě cɛ̃à ɖé wa hwòɖǒ bũ̌, ɓɛ́ wa dyià níiń, ‘Bounɓoɔ̀ se ɖɛ nɔ̀mɔ̀ dyíin mɔɔ ɖɛ gbà ɖò nyuɛ́ mu kɛ.’ 13Waà mú-nyɛ́-nyɔ̀ ɓěɔ̀ mu wa ɖɛ séín wa ɓéɖéɛɛ xwai zàùn, ké wa mu waà gbǒ ɓěɔ̀ wáɖáùn. Kɛbì wa mɛ po gbǒ ɓěɛɛ, wa se wa mú cĩ́ɛ mu. Kɛbì wa mɛ ɓá géɖéè-gbǎ ɓěɛɛ, wa se wa ɖòɛ̀ wã́ìn náa mu.”
14Bounɓoɔ̀ wé vɛ̀nɛ̀ɔ̀ ɖǎ dyi xwɛ̃́ìn. Ɔ ɖǎ dyi xwɛ̃́ìn, ké ɔ nì dyiɛń wàɖà. Ɔ mu wé nɛɛ̀-nɛɛ̀ jǔùn jèɛɛ, gàa-zà-nyɔ̀ ɓěɔ̀ mu vĩ̌ìn. 15Wéɔ̀ mu Bounɓoɔ̀ dyoɖo-hwòɖò-ku-wɔ̃-wè jǔùn. Ɔ mu wìì kè nyɔ-ɖɛ-puà-wè jǔùn. Ɔ mu fũ̀à-fṹá kè ɖɛ-mú-gbɔɔ̀-wè jǔùn. Ɔ mu gbèè-dyí-dyììn-wè kè tíe-kpɔ̃-wè jǔùn. 16Ɔ mu wé kɔ̃̀ ɓaɖa ɓɛ́ sójà ɓě mu ɖɔ-kpa ɓě ɓaɖaùn, ɓɛ́ wa ké mú pánáuń nì, ɓɛ́ wa ké hwɔɖɔ cɛ̃̀ìn gmɔ ɖei ɓě kè hwɔɖɔ-dyí-gmɔ̀ìn-gbò ɓě to kɔ̃ poɛń nì kɛ.
17Bounɓoɔ̀ cɛ̃ɛ ɖe, ké ɔ ɖá, “Ní mu mú-gbɔɔ̀-gbɔɔ̀ nì kàà nyɔǔn-dyù kɔ̃ dyàùn, ɓɛ́ wa ké dyi ɓɛɛ̀ kà dyéɖéín-dyi-kpè-nyɔ̀ ɓɛɛ̀à dyiɛ, sepóɛɖé wa ɖǎ ḿ nàmàǔn bũ̌ nyu. Ké waà nyɔmɔɔ mu dyi púèìn kà ní púè kà dyiɛ, ké waà xwɛ́ ɓě mu ɓíɖíi dyi pɛ̃́ìn kà sĩ̀ɔ̌ nìà kɛ, ɓɛ́ wa ké ɓó zɔ̃̌ìn.”
18Ɓó Bounɓoɔ̀ dyoɖo-wèɔ̀ ɓaɖaa, waà séɓàɖà kè waà góò se wa póɛ̌n mu. Ɔ dyoɖo nɛɛ̀-nɛɛ̀ɔ̀ mu ɓóɖó-kpà gànáà mú gbɔɔ̀ùn. Ɔ mu nyɔǔn séín cĩ́ ɓóɖó-kpàà kɔ̃ɛɛ ɓó dyi sámáùn wàɖà.
Currently Selected:
Zɛ́fènádyà 1: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
