Zɛ́kɔ̀wáɖádyà 4
4
Dyí-tɛ̀mɛ̀ìn-ɖɛ̀ ɓá ɖáùnpò-kɔ̃-dè-ɖɛ̀ɔ̀ jè dyíɛ
1Sɔ̀ìn ɓóɛ gboɛɛ, ínjà ɓɛ́ ɔ wùɖù ma kà ḿ gboɛɛ dyi, ké ɔ túò ma ḿ kà nyɔ túò kà nyɔ ɖò ɓɛ́ ɔ nì nyíɔún wɛ̃. 2Ké ínjàɔ̀ diè ma ḿ dyi, ké ɔ ɖá, “Ɖɛ́ nìà kɛ́?”
Ké ḿ ɖá, “Ɔ mɔ̀ ɖáùnpò-kɔ̃-dè-ɖɛ̀ ɓɛ́ ɔ mɔ̀ góò saá-saá kɛ. Ɔ ɓéɖé ɖɛ hwɔìn gbòɖòò ɖò ɖéɛ dú-hwìɛ̀, ké ɖáùnpò mɛ̀nɛ̌ìn-sɔ̃́ nì ɓóɛ kɔ̃, ké ɖáùnpò ɓěɔ̀ ɖò-ɖò ɓéɖé ɖue-wɔ̃̀ mɛ̀nɛ̌ìn-sɔ̃́ ɓó ɔ dú-hwìɛ̀. 3Ké ɔ́ɖè-cù sɔ̃́ nyànà ɓóɛ wáún dyi. Dyúáɖò nyànà ɖé ɖɛ hwɔìn gbòɖòòɔ̀ ɖiaún dyi, ké dyúáɖò nyànà ɖéɛ kunuaún dyi.” 4Ké ḿ diè ma ínjà ɓɛ́ ɔ nì ma kà ḿ gbo wùɖùɛ̌n nyɛɛ dyi, ké ḿ ɖá, “Ɓɔ̌ɔ̀, ɖɛ́ mɔ̀ ɖɛ ɓěa xwíníín nyɛ́?”
5Ké ínjàɔ̀ jǔ ma ḿ gɔ̃̌, ké ɔ ɖá, “M̀ se ɖɛ mɔ̀ ɖɛ ɓěa xwíníín nyɛɛ dyuòò?”
Ké ḿ ɖá, “Ǹdyeo, ɓɔ̌ɔ̀.”
6Ké ínjàɔ̀ ɖá, “Ɖɛ ɓɛ́ Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ Zɛ̀wáɖáɓèɓò gboɛɛ kɛà kɛ̀. Ɔ ɖá, ‘Ɔ se ɖé kpé mú, mɔɔ ɖé gana mú, kɛɛ ɔ mɔ̀ dyììn ɖé ní Zùùɔ̀ mú. 7Toɖo vɛ̀nɛ̀ nìà kɛ mu bɔɔ-kpà mú zɛ̃̀ìn ɓó mɔ̀ Zɛ̀wáɖáɓèɓò dyúa, ké nì mu ní gbǒɔ̀ sɔ́ɔ́-kpò hwɛ̀ìn-gbɔɔ̀ dèìn. Ɔ ɖǎ ná nìǐn, nìí, nyɔ ɓěɔ̀ mu múà-kùɖǔ-kuɖu nyuɛń nììn, ɓɛ́ wa ké níiń, “Gèɖèpɔ́ɔ̀ jĩ́á-jè, Gèɖèpɔ́ɔ̀ jĩ́á-jè.” ’ ”
8Sɔ̀ìn ɓóɛ gboɛɛ, Bounɓoɔ̀ wùɖù ma ḿ gbo, ké ɔ ɖá, 9“Zɛ̀wáɖáɓèɓòɛ̀ sɔ̃ɔ̀ mɔ̀ nyɔ dè ma ní gbǒɛ̀ hìɖì-kpàɔ̀, ké ɔ kɔ̃̀ sɔ̃ muɛ dyí hwɔùn. Ɔ ɖǎ ná nìǐn, nìí, ní nyɔ ɓěɔ̀ muɛ dyuòùn kà mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ ɖoɓo m̀ ɖé wa gboɛ. 10Nyɔ ɖíɛ́ ɓě hwòɖǒ kpá ma ɖé ɖei ti ɓɛ́ kũ̀àɔ̀ kpã ma kɛ, kɛɛ wa mu múàǔn kpáùn ti ɓɛ́ wa mu sɔ́ɔ́-kpò hwɛ̀ìn-gbɔɔ̀ Zɛ̀wáɖáɓèɓò xwa dyéìn nyɛ.
“Ɖáùnpò mɛ̀nɛ̌ìn-sɔ̃́ ɓěɔ̀ mɔ̀ mɔ̄ Bounɓoɔ̀ dyéɖé ɓě ɓɛ́ ḿ dyéìn ɓóɖó-kpàà dà séín dyiɛ.”
11Hwɛ̀ ké ḿ diè ínjàɔ̀ dyi ɖe, ké ḿ ɖá, “Ɖɛ́ mɔ̀ ɔ́ɖè-cù sɔ̃́ ɓě kɔ̃̀ ɖò nìà ɖáùnpò-kɔ̃-dè-ɖɛ̀ɔ̀ ɖiaún, ɓɛ́ ɖò dyià ɖéɛ kunuaún nìɛɛ xwíníín nyɛ́?” 12Ké ḿ diè ɔ dyi ɖe, ké ḿ ɖá, “Ɖɛ́ mɔ̀ ɖɔ́ sɔ̃́ ɓě nìà ɔ́ɖè-cù ɓěɔ̀ dya kɛɛ xwíníín nyɛ́? Dyéɛ, wa nì ɓó ɖɛ hwɔìn pío-ɓì mɔ̀ góò saá-saá kɔ̃̀ mú ɓɛ́ ɖáùnpò ɓěɔ̀ cáná síìn kà kɛɛ wáún.”
13Ké ɔ cɛ̃ɛ ḿ gbo, ké ɔ ɖá, “M̀ se ɖɛ mɔ̀ ɖɛ ɓěa xwíníín nyɛɛ dyuòò?”
Ké ḿ ɖá, “Ǹdyeo, ɓɔ̌ɔ̀.”
14Hwɛ̀ ké ɔ ɖá, “Wa mɔ̀ nyɔ sɔ̃́ ɓě ɓɛ́ Bounɓoɔ̀ ɖǎ gã, ké ɔ ɖǎ wa cáná dúún po, ɓɛ́ wa ké Ɖɛɓíɔ́ mɔ̀ nyɔ kɔ̃̀à ɓóɖó-kpà gànáà wuɖuíɛɛ kũ̀à nyuɛ.”
Currently Selected:
Zɛ́kɔ̀wáɖádyà 4: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
