Wóɖómà 2

Gèɖèpɔ́ɔ̀ zaa-wɔ̃-po-poɔ̀

1Ɔ jèɛɛ, mɔ̀ mɔ̀ nyɔ kpɔ̃̀ìn kà nyɔ ɖò zaa kɛɛ, ḿ se ɖé kɔ̃̀ nyɔ m̀ jǔɛ. M̀ se kã̀fĩ́á ɖò ɓéɖé. Sepóɛɖé ɔ jǔ ké m̀ dyi nyɔ ɖò zaa kpɔ̃̀ìn ní, m̀ kpɔ̃̀ìn m̀ mìɔùn zaa, sepóɛɖé mɔ̀ mɔ̀ nyɔ mɔ̀à zaa-wɔ̃-po-nyɔ̀ɔ̀ kɛɛ, m̀ nì ɖɛ dyúáɖòɔ̀ nyuɛń ɖekè. 2À dyuòɛ̀ kà Gèɖèpɔ́ɔ̀ zaa-wɔ̃-po-po dyi nyɔ ɓě ɓɛ́ wa nyu ɖɛ nì kàà kɛɛ kɔ̃ jɛ́ɛ́ cáa. 3Ké mɔ̀ mɔ̀ nyɔ kpɔ̃̀ìn kà nyɔ ɓě nyu ɖɛ nì kà ɓěa kɛɛ zaa, ké mɔ̀ùn nìà ɖɛ dyúáɖòɔ̀ nyuɛń ɖekèɛɛ, m̀ poɛ̀n hwìɖǐi kà nì mu Gèɖèpɔ́ɔ̀ nììn zaa-wɔ̃-po-poɔ̀ dyúa gbǔùn wɛ̃ɛ̀? 4Ɔ kpeɖe zi dyíin nɔ̀mɔ̀ǔnɔ̀ kè ɔ kpeɖe-hwòɖǒ-kùìn-kùìnɔ̀ kè ɔ hwòɖǒ-ku-kuɔ̀, m̀ se wa ɖɛ ɖáà? M̀ seɛ dyí dyuò kà ɖɛ kɔ̃̀ jè Gèɖèpɔ́ɔ̀ kpeɖe nɔ̀mɔ̀ dyíin nyɛɛ, ɔ mɔ̀ ɓɛ́ ɔ ké m̀ nàmàǔn-kpèɖè dyi-táà-hwìèɔ̀ dyí kpaà? 5Kɛɛ m̀ po kɛ́ɛ́, ké nì hwòɖǒ-dyùàɔ̀ se mɔ́ ɓɛ́ ɔ ké gbo zĩàìn. Ɔ jèɛɛ, m̀ nìɛ̀ nyuɛń ɓɛ́ Gèɖèpɔ́ɔ̀ dyoɖo muà m̀ kɔ̃ dyiìn ɓó wé ɓɛ́ Gèɖèpɔ́ɔ̀ muà ɔ zaa-wɔ̃-po-po sɛ́ɖɛ́ìn dyíɔ̀ nyɔǔn dyí tɛ̀mɛ̀ìn ɖé dyoɖo múɛɛ ɓaɖaa ké dyí ɓúá. 6Kà nyɔ séín kũ̀à-sɔ̃̀ nyu nìɛ̀ kɛɛ, kǎà ɔ mu wa pɛ́ɛ̀ nyuùn. 7Nyɔ ɓě ɓɛ́ wa ku dúún, ɓɛ́ wa ké nɔ̀mɔ̀ dyíin nyu, sepóɛɖé wa mɔ́ ɖɛ dĩ́ín-dĩ̀ìn, ké wa mɔ́ ɓɛ́ Gèɖèpɔ́ɔ̀ ké wa ɓàìn, ké wa mɔ́ ɓɛ́ wa ké cĩ́ kánáá pūɛɛ, Gèɖèpɔ́ɔ̀ mu wa sè-ná-sèɛ̀ fɛ̀ɛ̀ nyíìn. 8Kɛɛ nyɔ ɓě ɓɛ́ wa dyàà mú-ge-ge, ké wa seà jǎàɔ̀ dyi kpɔ̃, ké wa kpaà hwìè se dyí sɛ́ɖɛ́ìn nyɛɛ, Gèɖèpɔ́ɔ̀ mu wa dyoɖoún kpáìn mìɔ. 9Nyɔǔn séín ɓɛ́ wa nyu ɖɛ gbà kɛɛ, wa mu gǎ dyéìn mìɔ, ké wa mu ti kàmàǔn-kàmàǔn dyéìn. Júù-nyɔ̀ ɓěɔ̀ muɛ dyéìn kĩ́ín, hwɛ̀ ɓɛ́ ɓóɖó-dù kà kò ɖò ɓěɛ̀ nyɔ ɓěɔ̀ kéɛ dyé. 10Kɛɛ nyɔǔn séín ɓɛ́ wa nyu nɔ̀mɔ̀ dyíin nyɛɛ, wa mu ɖɛ dĩ́ín-dĩ̀ìn kè Gèɖèpɔ́ɔ̀ ɓàìn-ɓàìn ɔ kè gìɖìǐ dyéìn. Júù-nyɔ̀ ɓěɔ̀ muɛ dyéìn kĩ́ín, hwɛ̀ ɓɛ́ ɓóɖó-dù kà kò ɖò ɓěɛ̀ nyɔ ɓěɔ̀ kéɛ dyé. 11Sepóɛɖé Gèɖèpɔ́ɔ̀ ní zi nyɔ ɖò gbo kpoɖo-kà.

12Nyɔ séín ɓě ɓɛ́ wa se gmaɔ̀ ɓéɖé, ké wa nyu nàmàǔn wɛ̃ɛ, wa mu mú gbɔɔ̀ùn. Waà zaa se wɔ̃ kpáa mu kà gmaɔ̀ nyuà cɛ̃ɛ kɛ. Ké nyɔ séín ɓě ɓɛ́ wa ɓéɖé gmaɔ̀, ké wa nyu nàmàǔn wɛ̃ɛ, waà zaaɔ̀ mu wɔ̃ kpáùn kà gmaɔ̀ nyuà cɛ̃ɛ kɛ. 13Ɔ se ɖɛ ɓɛ́ nyɔ ɓě wɔ̃́à gmaɔ̀ kɛɛ ké dyí sɛ́ɖɛ́ìn ɓó Gèɖèpɔ́ɔ̀ gboɛ, kɛɛ ɔ mɔ̀ nyɔ ɓě mɔ̀ nyɔ nyu ɖɛ gmaɔ̀ cɛ̃ɛ, ɖéɛ̀ Gèɖèpɔ́ɔ̀ mu dyí-sɛ́ɖɛ́ìn-nyɔ̀ ɖáìn. 14Ti ɓóɖó-dù kà kò ɖò ɓěɛ̀ nyɔ ɓě ɓɛ́ wa seà gmaɔ̀ ɓéɖéɛɛ dyi ɖɛ ɓɛ́ gmaɔ̀ cɛ̃ɛ nyu, sepóɛɖé waà hwòɖǒ tóɛ náa dyi jè ní, nìí, wa se gmaɔ̀ dyí dyuò, kɛɛ wa tɛ̀mɛ̀ìn gmaɔ̀ wa mìɔùn dyí. 15Sepóɛɖé ɖɛ wa nyuà kɛɛ zàà mú kà ɖɛ gmaɔ̀ cɛ̃à kɛɛ, ɔ nì wa hwòɖǒɔ̀ bũ̌ɛ. Waà hwòɖǒ-xwíníín-hwòɖò-dyùàɔ̀ nyuɛ zàse ɖekè, ké wa mìɔùn nììn hwìɖǐi-poìn-ɖɛ̀ ɓěɔ̀ dyà mú-ge-ge. Ɖò zi wa gbo, ké ɖò se wa gbo zi, 16ɓó wé kɔ̃̀ ɓaɖa ɓɛ́ Gèɖèpɔ́ɔ̀ muà nyɔǔn-dyùɛ̀ vǐè-ɖɛ̀ ɓěɔ̀ wɔ̃ poùn ɖé Kɛ́ɖɛ́ì Jízɛ̀ múɛɛ ɓaɖa. Kǎà bɔ̃̌ nɔ̀mɔ̀ dyíin ɓɛ́ ḿ cɛ̃à kɛɛ ɖá.

Júù-nyɔ̀ ɓěɔ̀ kè gmaɔ̀

17M̀ ɖáìn m̀ mìɔùn Júù-nyɔ̀. M̀ dè gmaɔ̀ hwòɖǒ kɔ̃, ké m̀ ɓɔ́ɖɔ́ìn Gèɖèpɔ́ɔ̀ jè dyí. 18M̀ dyuò ɔ mɔ́ɔ́-ɖɛ̀ dyí. M̀ ɓɛ́ìn ɖɛ nɔ̀mɔ̀ dyíin kè ɖɛ nyìnììn dyíin zaìn gboi dyí dyuòɛ̀, sepóɛɖé wa ɖǎa ma m̀ tɛ̀mɛ̀ìn sɔ̀ìn ɖé gmaɔ̀ mú. 19M̀ dèɛ̀ hwòɖǒ kɔ̃ kà m̀ mɔ̀ nyɔ ɓéɖé ɓɛ́ m̀ kéɔ́ dyéɖéín-dyi-kpè-nyɔ̀ ɓěɔ̀ hwìè da zàìn nyɛ. M̀ mɔ̀ ce ɓó nyɔ ɓě nìà tíe-kpòǔn wɛ̃ɛ gbo. 20M̀ mɔ̀ zuɖuu-nyɔ̀ ɓěɔ̀ dyí-sɛ́ɖɛ́ìn-nyɔ̀. M̀ mɔ̀ dyú mɛ́nɛ́ɛ́ ɓě ɖɛ-tɛ̀mɛ̀ìn-nyɔ̀, sepóɛɖé m̀ ɓéɖé jǎàɔ̀ kè fɔ̀nɔ̀-hwòɖǒɛ̀ jìì-kɔ̃-nɛ́ìn-ɖɛ̀ ɖé gmaɔ̀ mú. 21Kɛɛ mɔ̀ mɔ̀ nyɔ tɛ̀mɛ̀ìn kà nyɔ ɓě mɔ̀ùn ɖɛɛ, m̀ se m̀ mìɔùn ɖɛ tɛ̀mɛ̀ǐn muù? M̀ ɖá nyɔ ɖò ní dyíɖí, kɛɛ mɔ̀ùn nì dyíɖíɛńǹ? 22Mɔ̀ mɔ̀ nyɔ ɖá nyɔ ní poà gmaɖeɛɛ, mɔ̀ùn mɔ̀ gmaɖe-po-nyɔ̀ɔ̀? Kũùn-kpò nyàìn m̀ dyi, hwɛ̀ ké nì dyíɖíà kũùn-gbò ɓěɔ̀ mú kɛɛ̀? 23M̀ ɓɔ́ɖɔ́ìn gmaɔ̀ jè dyí, kɛɛ nì gmaɔ̀ wáɖá-wáɖáɔ̀ nyùìn Gèɖèpɔ́ɔ̀ dɛ̃. 24Sepóɛɖé kà ɔ nyu kà céèɛ̀ ɖé Gèɖèpɔ́ɔ̀-cèè-ɖɛ̀ɔ̀ mú. Ɔ ɖá, “Wa zàìn ní nyɛ́nɛ́ zùǔn ɖé ɓóɖó-dù kà kò ɖò ɓěɛ̀ nyɔ ɓěɔ̀ hwìɛ̀, ɓó ɓě jè.”

25M̀ dyi gmaɔ̀ dyi kpɔ̃ ní, nìí, nì sàà-mɛ́-mɛ́ɔ̀ nɔ̀mɔ̀ dyíin, kɛɛ ɔ jǔ ké m̀ dyi gmaɔ̀ wáɖáín, nìí, sàà m̀ mɛ́à kɛɛ nì pū kà nyɔ séèɔ̌ kà sàà mɛ́ keɛ. 26Kɛɛ ɔ jǔ ké gàa seà sàà mɛ́ɛ, ɔ dyi ɖɛ gmaɔ̀ cɛ̃à kɛɛ dyi kpɔ̃ ní, nìí, Gèɖèpɔ́ɔ̀ se ɔ jè dyi kpɔ̃ɔ́ mu kà ɔ kpɔ̃à sàà-mɛ́-nyɔ̀ ɓěɔ̀ jè dyiɛe? 27Nyɔ seà sàà mɛ́ jɛ́ɛ́ cáa, ɔ dyi gmaɔ̀ dyi kpɔ̃ ní, ɔ mu m̀ zaa dúún wáɖáùn, sepóɛɖé m̀ ɖǎ sàà mɛ́, ké m̀ ɓéɖé gma wa céè ma kà kɛ, kɛɛ m̀ wáɖáa ní. 28Nyɔ mɔ̀ Júù-nyɔ̀ ɓó ku kɔ̃in pūɛɛ, ɔ se Júù-nyɔ̀ cá. Ké sàà-mɛ́-mɛ́ jɛ́ɛ́ cáɔ̀, ɔ se nyɔ wa nyùìn kà ɖǎ-dyùɛ. 29Nyɔ mɔ̀à Júù-nyɔ̀ ɖé hwòɖǒ bũ̌ɛɛ, ɔ mɔ̀ Júù-nyɔ̀ jɛ́ɛ́ cá. Ɖàɓàìn-ɖɛ̀ jɛ́ɛ́ cá ɓɛ́ ɔ tɛ̀mɛ̀ìn nyɔǔn dyí kà m̀ mɔ̀ Gèɖèpɔ́ɔ̀-nyɔ̀ kɛɛ, ɔ nì ɖé nyɔ hwòɖǒ bũ̌. Ɖàɓàìn-ɖɛ̀ nìà kɛɛ, ɔ mɔ̀ ɖɛ ɓɛ́ Zùùɔ̀ nyuɛ. Ɔ se ɖɛ ɓɛ́ gmaɔ̀ cɛ̃à kɛ. Gàa nì kà kɛɛ, ɔ ní dyé ɔ ɓàìn-ɓàìnɔ̀ ɖé nyɔǔn-dyù xwaún, kɛɛ ɔ dyéɛ sɔ̀ìn ɖé Gèɖèpɔ́ɔ̀ gbo.

Currently Selected:

Wóɖómà 2: ƁB02

Highlight

Copy