Wóɖómà 16
16
Nyɔ ɖò-ɖò ɓěɛ̀ nyíɔún-zà-zà
1Ḿ nì ɓě à ɖíí-màà mɔ̀ Fíɓì kɛɛ dyí tɛ̀mɛ̀ǐn. Ɔ mɔ̀ cɔ́cì nìà ɖé Sɛ̃̀kíɖíà-hwɔ̀ɖɔ̀ɔ̀ múɛɛ gbo-nì-màà ɖò. 2Ɓě kpɔ̃ ɔ jè dyi, ɓɛ́ ɓě kèɔ̀ kè ké gbo kpɔ̃ìn ɖé Bounɓoɔ̀ mú. Ɓě kpɔ̃ ɔ jè dyi kà Gèɖèpɔ́ɔ̀-nyɔ̀ ɓě ɓéɖé ɓɛ́ wa ké wa mǔè ɖò jè dyi kpɔ̃ɔ nyuɛ. Ɓě mɛ kpá ɔ gbo ɖé ɖɛ séín ɓě ɓɛ́ ɔ mu ɓě xwa mɔ́ùn wɛ̃ɛ mú, sepóɛɖé ɔ kpá ma ḿ kè nyɔ ɓáún-ɓáún ɓě gbo ɖekè.
3Ḿ zà Pìɖìsíɖà kè Àkúɖà mɔ̀à ḿ mǔè ɓě ɓɛ́ ḿ kè wa nyu ma kà kũ̀à ɖé Kɛ́ɖɛ́ì Jízɛ̀ múɛɛ nyíɔún. 4Wa zà ma wa fɛ̀ɛ̀ɔ̀ hwòɖǒ gbo ɓó ḿ jè. Ḿ po wa zùo. Ké ɔ se ḿ ɖòǔn, kɛɛ ɔ mɔ̀ ḿ kè ɓóɖó-dù kà kò ɖò ɓěɛ̀ nyɔ ɓěɔ̀ cɔ́cì-nyɔ̀ séín ɓěɔ̀ ɖekè. 5Ḿ zà cɔ́cì-nyɔ̀ séín ɓě ɓɛ́ wa poìn kà dyí tee ɖé wa ɓíɖí-gbǒǔn wɛ̃ɛ nyíɔún.
Ḿ zà ní ɖɛ̀ɓɛ̀-nyɔ̀ mɔ̀à Ìpànétà kɛɛ nyíɔún. Ɔ mɔ̀ nyɔ taɓa ma Kɛ́ɖɛ́ì hwìɖǐǐ kĩ́ín ɖé Ésìà-ɓòɖòɔ̀ kɔ̃ɛ. 6Ḿ zà Meɖé nyíɔún. Ɔ ɖǎ kũ̀à pàɖǎ nyu ɖé ɓě hwìɛ̀. 7Ḿ zà Àã̀dòɖònákà kè Júnìà nyíɔún. Wa mɔ̀ ḿ ɓíɖí-nyɔ̀ ɓě, ké wa mɔ̀ ma ḿ mǔè kpɔɖɔ-ɖeín-nì-nyɔ̀ ɓě. Wa mɔ̀ àpɔ́sò nɔ̀mɔ̀ dyíin, ké wa se dyí kĩà ɖé àpɔ́sò tɔ̀ɔ̀ ɓěɔ̀ hwìɛ̀. Wa mɔ̀ ma Kɛ́ɖɛ́ì ɖeín-sí-nyɔ̀ kĩ́ín, hwɛ̀ ké ḿ mɔ̀à Kɛ́ɖɛ́ì ɖeín-sí-nyɔ̀ kɛ̀.
8Ḿ zà Àã̀pìɖìétìà mɔ̀à ní ɖɛ̀ɓɛ̀-nyɔ̀ ɖé Bounɓoɔ̀ múɛɛ nyíɔún. 9Ḿ zà Àbánà nyíɔún. À kèɔ̀ kè nyu ma kũ̀à ɖé Kɛ́ɖɛ́ì mú. Ḿ zà ní ɖɛ̀ɓɛ̀-nyɔ̀ mɔ̀à Séɖékà kɛɛ nyíɔún. 10Ḿ zà Àpɛ́ɖì nyíɔún. Ɔ ɖǎa nyɔǔn dyí tɛ̀mɛ̀ìn kà ɔ mɔ̀ Kɛ́ɖɛ́ì ɖeín-sí-nyɔ̀ cáa. Ḿ zà Àwèɖèsɔ́ɖɔ́ɓìà ɓíɖí-gbǒ-xwíníín-nyɔ̀ ɓěɔ̀ nyíɔún. 11Ḿ zà Hìwóɖódìà mɔ̀à ḿ ɓíɖí-nyɔ̀ kɛɛ nyíɔún. Ḿ zà Nàsísà ɓíɖí-gbǒ-xwíníín-nyɔ̀ ɓěɔ̀ nyɔ ɓě nìà ɖé Bounɓoɔ̀ múɛɛ nyíɔún.
12Ḿ zà nyɔ ɓě ɓɛ́ wa nyuà Bounɓoɔ̀ bìì kũ̀à kɛɛ nyíɔún. Wa mɔ̀ Tàɖàfínà kè Tàɖàfósà. Ḿ zà ní ɖɛ̀ɓɛ̀-nyɔ̀ Pɔ́sì nyíɔún. Ɔ ɖǎ Bounɓoɔ̀ bìì kũ̀à nyu mìɔ. 13Ḿ zà Wuɖufɔ́ nyíɔún. Bounɓoɔ̀ hwòɖǒ dèìn ɔ múin. Ḿ zà ḿ ɖe mɔ̀à ɔ ɖeɛɛ nyíɔún. 14Ḿ zà Àsĩ́kìɖìtà kè Fíɖígɔ̃̀ kè Hɔ̀míì kè Pátòɖòbà kè Hɔ́mà ɔ kè à ɖíí cɔ́cì-nyɔ̀ ɓě nìà ɖé wa gboɛɛ nyíɔún. 15Ḿ zà Fìɖóɖógà kè Judyá kè Níwìɖìà kè ɔ ɖíí-mààɔ̀ kè Òɖípà ɔ kè Gèɖèpɔ́ɔ̀-nyɔ̀ séín ɓě nìà ɖé wa gboɛɛ nyíɔún.
16Ɓě zaìn zàìn nyíɔún ɖé wɔ̃-nyá-nyá mú ɓó dyí-sɛ́ɖɛ́ìn-kà. Kɛ́ɖɛ́ìɛ̀ cɔ́cì-nyɔ̀ ɓě nì dà séín nyɛɛ zà ɓě nyíɔún.
Nyɔ-náún-po-wùɖù hwɛ̀ìn-gbɔ
17Ḿ ɖíí ɓě, ḿ ɓaà ɓě ní, ɓě mɛ dè nyɔ ɓě ɓɛ́ wa dyàà mú-ge-ge kè ɖɛ kàmàǔn-kàmàǔn wɛ̃ɛ dyéɖé gbo, sepóɛɖé ɖɛ ɓě nìà kɛ se ɖɛ ɓě ɖǎ ma cɛ̃́ɛ mú nì. Ɓě mɛ peɖe nyɔ nì kà ɓěa dyi, 18sepóɛɖé nyɔ nì kà ɓěa se à Bounɓo mɔ̀à Kɛ́ɖɛ́ì kɛɛ bìì kũ̀à nyuɛń nì. Kɛɛ waà mɔ́ɔ́-ɖɛ̀ ɓěɔ̀ kɔ̃̀ wa wuɖuí. Wa cá nyɔ ɓě ɓɛ́ wa se zùɖùɛ̌n kàmàa ɖé wuɖu ɓɛ̀ɖɛ̀ɛ̀-ɓɛ̀ɖɛ̀ɛ̀ ɔ kè nyɔ-dya-dè-wùɖù múɛ. 19Nyɔ séín ɖǎ ɓěɛ̀ wuɖu-nyu-nyuɔ̀ jè wɔ̃́. Ɖɛ nìà kɛ nyuɛ ké ḿ kpá ɓě bìì múàǔn mìɔ. Kɛɛ ḿ mɔ́ ɓɛ́ ɓě ké hwòɖǒ fɔ̀nɔ̀ ɓó ɖɛ mɔ̀ ɖɛ nɔ̀mɔ̀ dyíin nyɛɛ jè. Ḿ mɔ́ ɓɛ́ ɓě ké se kɛɛ ɖò ɓéɖé ɓá ɖɛ gbà nyu jè dyí. 20Ké Gèɖèpɔ́ɔ̀ mɔ̀ nyɔ tòà gìɖìǐɛɛ mu Sétɔ̃̀ ɓě ɓo xwíɖíi dyi wàìn ɓó kàǔn. À Bounɓo Jízɛ̀ɛ̀ manaɔ̀ mɛ nì ɓě kɔ̃.
21Tímétè ɓɛ́ ḿ kèɔ̀ kè mɔ̀à kũ̀à-nyu-nyɔ̀ɛɛ zà ɓě nyíɔún. Ɖúsìà kè Jésììn ɔ kè Sɔ̀sípétà ɓɛ́ wa mɔ̀ ḿ ɓíɖí-nyɔ̀ ɓěɛɛ zà ɓě nyíɔún ɖekè.
22Tɔ̀tíà nìà céè-ɖɛ̀ nìà kɛ céèɛ̌n ɓó ḿ bììɛɛ zà ɓě nyíɔún ɖé Bounɓoɔ̀ mú.
23Gédyà mɔ̀ nyɔ kpɔ̃à ḿ kè cɔ́cì-nyɔ̀ séín ɓěɔ̀ jè dyiɛɛ zà ɓě nyíɔún. Ìwáɖásɔ̀ mɔ̀ nyɔ mɔ̀à hwɔɖɔɔ̀ wíɖí-dyi-dè-nyɔ̀ kè à ɖíí-gàà Kɔ́tɔ̀ zà ɓě nyíɔún. [ 24À Bounɓo Jízɛ̀ Kɛ́ɖɛ́ì mana mɛ nì ɓě séín kɔ̃. Kǎà ɔ mɛ nì.]
Ɓaà-wùɖù kè Gèɖèpɔ́ɔ̀ ɓàìn-wùɖù hwɛ̀ìn-gbɔ
25Gèɖèpɔ́ɔ̀ mɛ ɓéɖé ɓàìn-ɓàìn. Ɔ mɔ̀ nyɔ ɓéɖé kpé ɓɛ́ ɔ ké ɓě dyi kùìn dyììn ɖé bɔ̃̌ nɔ̀mɔ̀ dyíin ɓɛ́ ḿ cɛ̃à kɛ ɔ kè Jízɛ̀ Kɛ́ɖɛ́ì jè zio-po-poɔ̀ mú. Nyɔ se ma ɖɛa kɛ dyí dyuò kĩ́ín, sepóɛɖé Gèɖèpɔ́ɔ̀ vǐèɛ̀ ma ɓó ti tɔ̀mɔ̀ǔn-tɔ̀mɔ̀ǔn xwíníín, kɛɛ ɔ ɖǎa à dyí tɛ̀mɛ̀ìn. 26Ɔ ɖǎ píé wóɖó kàǔn. Kpáá-ɖɛ̀-cɛ̃-nyɔ̀ ɓěɔ̀ céè-ɖɛ̀ ɓěɔ̀ ɖǎa nyu ké ɓóɖó-dù séínɛ̀ nyɔ ɓěɔ̀ ɖǎa dyí dyuò. Sè-ná-sèɛ̀ Gèɖèpɔ́ɔ̀ ɖá wa mɛ nyuɛ ma náa, ɓɛ́ nyɔ séín ké Kɛ́ɖɛ́ì hwìɖǐǐ taɓa, ɓɛ́ wa ké ɔ wuɖu nyu.
27Gèɖèpɔ́ɔ̀ mɔ̀ nyɔ ɖòùn fɔ̀nɔ̀à hwòɖǒɛɛ, ɔ mɛ ɓéɖé ɓàìn-ɓàìn ɓó sè-ná-sèɛ̀ tiín, dyììn ɖé Jízɛ̀ Kɛ́ɖɛ́ì mú. Kǎà ɔ mɛ nì.
Currently Selected:
Wóɖómà 16: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
