Wóɖómà 1
1
Pɔ́ɔ̀ zà Wóɖóùn-nyɔ̀ ɓěɔ̀ nyíɔún
1Céè-ɖɛ̀ nìà kɛ sɔ̀ mɔ̄ Pɔ́ɔ̀ gbo. Ḿ mɔ̀ Kɛ́ɖɛ́ì Jízɛ̀ɛ̀ gbo-nì-dyù. Gèɖèpɔ́ɔ̀ ɖá ma ḿ, ɓɛ́ ḿ ké àpɔ́sò jǔ. Ɔ po ma ḿ wáká ɓó bɔ̃̌ nɔ̀mɔ̀ dyíin ɓɛ́ ɔ sɔ̀ìn kà ɖé Gèɖèpɔ́ɔ̀ gboɛɛ cɛ̃ jè. 2Bɔ̃̌ nɔ̀mɔ̀ dyíin nìà kɛɛ, Gèɖèpɔ́ɔ̀ ɖǎ ma ɔ jè cɛ̃ kĩ́ín, ti ɓɛ́ ɔ nyuɛ ké ɔ kpáá-ɖɛ̀-cɛ̃-nyɔ̀ ɓěɔ̀ cɛ̃ɛ ma ɖéɛ ɔ céè-ɖɛ̀ hwɛ̀ǐn-hwɛ̀ǐn ɓěɔ̀ múɛ. 3Bɔ̃̌ nɔ̀mɔ̀ dyíinɔ̀ ɓá ɔ Dyú-gààɔ̀ jè dyí. Ɖé nyɔǔn-dyù nììn wáká kɔ̃ɛɛ, ɔ wóɖóìn ma ɖé Dèɓéɛ̀ xwéɖé-dùɔ̀ mú. 4Kɛɛ ɖé zùǔn-wàká mɔ̀à Zùù Hwɛ̀ǐn-hwɛ̀ǐnɔ̀ kɛɛ nììn wáká kɔ̃ɛɛ, ɖɛ kpa ɖɛ ɓɛ́ ɔ nyu ma kà ɖé ɔ gĩɔ-wóɖó-wóɖó múɛɛ, ɔ tɛ̀mɛ̀ìn nyɔǔn dyí kà ɔ mɔ̀ Gèɖèpɔ́ɔ̀ Dyú-gàà kɛ. Bɔ̃̌ nɔ̀mɔ̀ dyíinɔ̀ ɓá Jízɛ̀ Kɛ́ɖɛ́ì mɔ̀à à Wuɖuí-kɔ̃̀-nyɔ̀ɔ̀ kɛɛ jè dyí. 5Ké sɔ̀ìn ɖé ɔ múɛɛ, ḿ dyé ɖɛ nɔ̀mɔ̀ dyíin mɔ̀ àpɔ́sò-kũ̀àɔ̀ kɛ, ɓɛ́ ḿ kéɛ ɖéɛ ɔ nyɛ́nɛ́ mú nyùìn. Kũ̀àɔ̀ mɔ̀, ɓɛ́ ḿ kéɛ nyu ɓɛ́ nyɔ ɓě nìà ɓóɖó-dù séín ɓěɔ̀ kɔ̃ɛɛ ké Kɛ́ɖɛ́ì hwìɖǐǐ taɓa, ɓɛ́ wa ké ɔ wuɖu nyu. 6Nyɔ ɓě ɓɛ́ Gèɖèpɔ́ɔ̀ ɖǎà ɖá, ké Jízɛ̀ Kɛ́ɖɛ́ì kɔ̃̀à wa kɛɛ, ɓě mɔ̀ wa ɖò ɖekè.
7Ɓě mɔ̀ nyɔ séín ɓě nìà ɖé Wóɖóùn-hwɔ̀ɖɔ̀ɔ̀ mú, ɓɛ́ Gèɖèpɔ́ɔ̀ ɖɛ̀ɓɛ̀à ɓě mú, ké ɔ ɖǎà ɓě ɖá, ɓɛ́ ɓě kéà ɓě mìɔùn ɔ xwáɖáún zàìn nyɛɛ, ḿ zà ɓě séín nyíɔún. Gèɖèpɔ́ɔ̀ mɔ̀à à Ɓǎ kɛ kè Bounɓo Jízɛ̀ Kɛ́ɖɛ́ì mɛ po ɓě mana kɔ̃, ɓɛ́ wa ké ɓě gìɖìǐ nyí.
Gèɖèpɔ́ɔ̀ zùo-po-ɓàà-wùɖù
8Kĩ́ín nyɛɛ, ḿ po ní Gèɖèpɔ́ɔ̀ zùo ɓó ɓě séín jè, dyììn ɖé Jízɛ̀ Kɛ́ɖɛ́ì mú, sepóɛɖé wa nì ɓěɛ̀ hwìɖǐǐ-taɓa-taɓaɔ̀ jè ɓóɖóɛ̀ dà séín cɛ̃iń. 9Gèɖèpɔ́ɔ̀ ɓɛ́ ḿ ɓièà ɖé ní hwòɖǒ-dyùàɔ̀ mú, ɓó bɔ̃̌ nɔ̀mɔ̀ dyíin ɓá ɔ Dyú-gààɔ̀ dyíɛɛ cɛ̃ jèɛɛ mɔ̀ ní zàse. Ɔ dyuòɛ̀ kà ti séín ɓɛ́ ní ɓaà kɛɛ, ní cɛ̃ ɓě jè ɔ gbo teeɛ. 10Ḿ nì Gèɖèpɔ́ɔ̀ dyi dièɛ̌n, ɓɛ́ ɔ mɔ́ɔ́-ɖɛ̀ kéɛ nyu ɓɛ́ ɔ ké hwìè ɖò dyí kaà, ɓɛ́ ɔ ké ḿ ɖé ɓě gbo nyìnììn nɔ̀mɔ̀ dyíin. 11Sepóɛɖé ɓěɛ̀ dyé-tò nyu ḿ xwéé. Ké ḿ mɔ́ ɓɛ́ ḿ ké ɓě nyíí-ɖɛ̀ sɔ̀ìn ɖé Zùù Hwɛ̀ǐn-hwɛ̀ǐnɔ̀ gboɛɛ nyí, ɓɛ́ ɔ ké ɓě dyi kùìn. 12Ɔ xwíníín mɔ̀, ḿ mɔ́ ɓɛ́ ḿ ké ɖé ɓě hwìɛ̀ nì, ɓɛ́ ɓě nììn hwìɖǐǐ-taɓa-taɓa ké mɔ́ún kpéí po, ɓɛ́ ḿ níǐnɔ̀ ké ɓě mɔ̀ùn kpéí po ɖekè.
13Ɖíí ɓě, ḿ mɔ́ ɓɛ́ ɓě kéɛ dyuò kà ɓɛ́ ḿ poìn hwìɖǐi tee, ɓɛ́ ḿ ké ɖé ɓě gbo dyiɛ, kɛɛ ɖɛ ɖò ɓéɖé ɔ ké ḿ dyí kpɔ̃ wɛ̃́ɛ́ pū. Ḿ mɔ́ ɓɛ́ ḿ ké ma ɖé dyi, ɓɛ́ ní kũ̀àɔ̀ ké pɛ́ɛ̀-ɖɛ̀ ɖò ɖé ɓě hwìɛ̀ dyé kà ɔ nyuà ɖéɛ ɓóɖó-dù kà kò ɖò ɓěɛ̀ nyɔ tɔ̀ɔ̀ ɓěɔ̀ hwìɛ̀ dyéɛ kɛ. 14Ḿ ɓéɖé ɖɛ ɖò ɓɛ́ ḿ kéɛ nyɔǔn séín bìì nyu. Ɔ hwɔìn kà nyɔ ɓě cɛ̃́ ɖɛɛ kè nyɔ ɓě séè ɖɛ cɛ̃́ɛ ɔ kè hwòɖǒ-fɔ̀nɔ̀-nyɔ̀ ɓě kè nyɔ ɓě se hwòɖǒ fɔ̀nɔ̀ɛ. 15Ɔ jèɛɛ, ní hwòɖǒ mɔ́ɔ xwéé, ɓɛ́ ḿ ké ɓě mɔ̀ nyɔ ɓě nìà ɖé Wóɖóùn-hwɔ̀ɖɔ̀ɔ̀ múɛɛ bɔ̃̌ nɔ̀mɔ̀ dyíinɔ̀ gbo cɛ̃ ɖekè.
Bɔ̃̌ nɔ̀mɔ̀ dyíinɔ̀ ɓéɖé kpé
16Dɛ̃ se ḿ nyu ɓó bɔ̃̌ nɔ̀mɔ̀ dyíinɔ̀ cɛ̃ jè. Gèɖèpɔ́ɔ̀ kpéɔ̀ mɔ̀ nyɔ nyuɛ ké bɔ̃̌ nìà kɛ dyà pó-pó ɖé nyɔ séín ɓě ɓéɖé hwìɖǐǐ-taɓa-taɓa kɛɛ gbo. Pó-pó nìà kɛ mu Júù-nyɔ̀ ɓěɔ̀ gbo kĩ́ín, hwɛ̀ ké ɔ nyini ɓóɖó-dù kà kò ɖò ɓěɛ̀ nyɔ ɓěɔ̀ gbo ɖekè. 17Bɔ̃̌ nɔ̀mɔ̀ dyíinɔ̀ tɛ̀mɛ̀ìn à kà Gèɖèpɔ́ɔ̀ nyu nyɔǔn dyí sɛ́ɖɛ́ìn nyɛɛ dyí. Dyí-sɛ́ɖɛ́ìn-sɛ́ɖɛ́ìnɔ̀ dèìn hwìɖǐǐ-taɓa-taɓa gbo gbɔ, ké ɔ jɛ̀ɖɛ̀ìn hwìɖǐǐ-taɓa-taɓa dúí. Kà ɔ ɖǎà céè ɖé Gèɖèpɔ́ɔ̀-cèè-ɖɛ̀ɔ̀ múɛɛ, ɔ ɖá, “Nyɔ ɓě sɛ́ɖɛ́ìn dyíɛɛ mu cĩ́ìn dyììn ɖé hwìɖǐǐ-taɓa-taɓa mú.”
Nyɔǔn-dyùɛ̀ zaa-kpɔ̃-kpɔ̃
18Gèɖèpɔ́ɔ̀ tɛ̀mɛ̀ìn ɔ dyoɖoɔ̀ à dyí sɔ̀ìn ɖé dyɔún. Gèɖèpɔ́ɔ̀ dyoɖo nì nyɔ ɓě ɓɛ́ wa mɔ̀ ɔ ɖɛ-gbà-bũ̌-nyu-nyɔ̀ kɛ kè nyɔ séín ɓě ɓɛ́ wa mɔ̀ ɖɛ gbà kò-kò ɓě nyu-nyɔ̀ kɛɛ kɔ̃. Wa kpɔ̃ jǎàɔ̀ dyí ɖé waà ɖɛ-gbà-nyu-nyuɔ̀ mú. 19Sepóɛɖé ɖɛ nyɔ ɓɛ́ìn dyí dyuòɛ̀ ɓá Gèɖèpɔ́ɔ̀ dyíɛɛ, ɔ nì wáɖáá ɓó wa dyéɖé waí. Gèɖèpɔ́ɔ̀ mìɔùn ɖǎa wa dyí tɛ̀mɛ̀ìn. 20Sɔ̀ìn ɖé ɓóɖó-kpàà mɛ-mɛɔ̀ gboɛɛ, ɖɛ ɓě ɓɛ́ wa ɓá Gèɖèpɔ́ɔ̀ dyí, ké nyɔ seà dyéɛ ɓɛ́ìn nyɛɛ, wa mɔ̀ ɔ sè-ná-sèɛ̀ kpéɔ̀, ɔ kè kà ɓɛ́ ɔ mɔ̀à Gèɖèpɔ́ɔ̀ jɛ́ɛ́ cáa. Ɖɛ ɓě nìà kɛɛ, nyɔ ɓɛ́ìn dyéɛ wáɖáá dyììn ɖé ɖɛ ɓě ɓɛ́ ɔ ɖǎà nyuɛɛ mú. Ɔ jèɛɛ, wa se kã̀fĩ́á ɖò ɓéɖé. 21Wa dyuò ma Gèɖèpɔ́ɔ̀ dyí, kɛɛ wa se ma ɔ ɓàìn kà ɓɛ́ wa ɓéɖé ɓɛ́ wa ké ɔ ɓàìn nyuɛ, ké wa se ɔ zùo po. Kɛɛ wa ɖɛ-hwìɖǐi-poìn-poìn séín ɓěɔ̀ gbɔ-hwɛ̀-hwɛ̀ mɔ̀ ɖɛ fóɖóún, ké waà fɔ̀nɔ̀-hwòɖǒ ɓěɔ̀ kpè kɔ̃in. 22Wa ɖá wa fɔ̀nɔ̀ ma hwòɖǒ, kɛɛ wa zùɖùìn wa mìɔùn. 23Wa ɓéɖé ɓɛ́ wa kéɔ́ dĩ́ín-dĩ̀ìn Gèɖèpɔ́ɔ̀ seà mɛ́-mɛ́ kɔ̃̀ɛɛ ɓiè, kɛɛ wa ɖú ɓiè-ɖɛ̀ kà kò ɖò dyí. Wa ɓiè ma hwɔìn-ɖɛ̀ sɛ-sɛ. Hwɔìn-ɖɛ̀ ɓěɔ̀ kè nyɔǔn-dyù ɓɛ́ìn kà mɛ́ɛ kɛ kè naà ɓě kè nimii ɓě ɔ kè ɓíɖíi-dyi-nà-ɖɛ̀ ɓě hwɔìn ní.
24Ɔ jèɛɛ, nàmàǔn-kpèɖè gbà ɓě kɔ̃̀ nyu-tò nyu ma kà wa hwòɖǒ-dyùà ɓěɔ̀ kɛɛ, Gèɖèpɔ́ɔ̀ zàìn ma wa xwáɖáún, ɓɛ́ ɔ kéɛ nyu ɓɛ́ wa mìɔùn nììn kpóɖó-dyùàɔ̀ ké dyíin nyìnììn. 25Gèɖèpɔ́ɔ̀ nyuɛ ma náa, sepóɛɖé wa táà ma Gèɖèpɔ́ɔ̀ jǎàɔ̀ dyi, ké wa ɖú ma se dyí. Ké wa ɓiè ma ɖɛ ɓě ɓɛ́ Gèɖèpɔ́ɔ̀ nyu ma kɛ, ké wa kpɔ̃ waà gma ɓěɔ̀ dyi. Kɛɛ wa seɛ ma náa nyɔ mɛ ma kà ɖɛ ɓěa kɛɛ bìì nyu, nyɔ mɔ̀ nyɔ muà ɓàìn-ɓàìn dyéìn ɓó sè-ná-sèɛ̀ tiín nyɛ. Kǎà ɔ mɛ nì.
26Sepóɛɖé ɓó ɖɛ wa mɔ́ ma kà kɛɛ jèɛɛ, Gèɖèpɔ́ɔ̀ zàìn ma wa dɛ̃-ɖɛ̀ ɓě ɓɛ́ wa mɔ́ ma kà xwééɛɛ xwáɖáún, ké waà màa ɓěɔ̀ zĩàìn ɖɛ nɔ̀mɔ̀ dyíin wa kéɔ́ waà kpóɖó-dyùà mú nyùìn nyɛɛ gbo, ké wa nyùɛ̀n ɖɛ nyìnììn dyíin mú. 27Ké kǎà gàa ɓěɔ̀ mɔ̀ùn nyuɛ ɖekè. Wa táà màa ɓěɔ̀ dyi-kpɔ̃-hwìè nɔ̀mɔ̀ dyíinɔ̀ dyi, ké waà mɔ́ìn-mɔ̀ìnɔ̀ kɔ̃̀ wa wuɖuí gàná cá. Gàa ɓěɔ̀ nyu wa mǔè-gàà ɓě dɛ̃-ɖɛ̀ ɓě bũ̌, ké wa dyé waà pɛ́ɛ̀-ɖɛ̀ ɓɛ́ wa kɔ̃̀ wa kéɔ́ dyéɛɛ ɓó waà ɖɛ gbà nyu jè, ɖé wa mìɔùn mú.
28Kà ɓɛ́ nyɔ ɓěɔ̀ se ma kà wɔ̃́ ɓɛ́ Gèɖèpɔ́ɔ̀ jè ké ma kà wa hwìɖǐi nìɛ jèɛɛ, Gèɖèpɔ́ɔ̀ zàìn ma wa waà hwìɖǐi-poìn-ɖɛ̀ se kɔ̃in nɔ̀mɔ̀ ɓěɔ̀ ɔ kè kpeɖe gbà ɓěɔ̀ xwáɖáún. 29Ɖɛ gbà kò-kò ɓě nyu-nyu bã ma wa mú mìɔ. Wa ɓéɖé ma sã̀-kpɛ̃́ín. Wa mɔ́ ɖɛ séín. Wa nyìnììn hwòɖǒ kɔ̃in. Wa ɓéɖé hwɛ̀nɛ̌ mìɔ. Wa ɖáɓá kú. Wa zà ɖɛín. Wa nyu gbá-gbá. Wa kpeɖe zi dyíin nyìnìɛ̌n mìɔ. Wa cɛ̃̀ wĩin dyi. 30Wa zeɖe nyɔǔn nyɛ́nɛ́. Wa nyɛ́ Gèɖèpɔ́ɔ̀ mú. Wa se nyɔǔn kpéín dyé. Wa ɓɔ́ɖɔ́ìn wa mìɔùn dyí. Wa ɓúá wĩín dyi. Wa mɔ̀ ɖɛ-gbà-nyu-hwìè dyi-mɔ́-nyɔ̀. Wa se waà nyɔ ɓě kpéín dyé. 31Wa se ɖɛ-múin-wɔ̃́-wɔ̃́ ɖò ɓéɖé. Wa mɔ̀ nyɔ ɓě se hwìɖǐǐ-taɓa-nyɔ̀ ɓěɛ. Wa se nyɔ ɖò mɔ̀ùn jè gbo kɔ̃̀. Wa ní dyé nyɔ ɖò wìǐn. 32Wa dyuòɛ̀ kà Gèɖèpɔ́ɔ̀ gmaɔ̀ ɖá nyɔ ɓě nyu ɖɛ ɓě nì kà kɛɛ kɔ̃̀ wa ké mɛ́ɛ. Wa se ɖɛ ɓěa nyu ɖòùn pū, kɛɛ wa hwòɖǒ dèìn nyɔ ɓě nyu wa kɛɛ múin.
Currently Selected:
Wóɖómà 1: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Wóɖómà 1
1
Pɔ́ɔ̀ zà Wóɖóùn-nyɔ̀ ɓěɔ̀ nyíɔún
1Céè-ɖɛ̀ nìà kɛ sɔ̀ mɔ̄ Pɔ́ɔ̀ gbo. Ḿ mɔ̀ Kɛ́ɖɛ́ì Jízɛ̀ɛ̀ gbo-nì-dyù. Gèɖèpɔ́ɔ̀ ɖá ma ḿ, ɓɛ́ ḿ ké àpɔ́sò jǔ. Ɔ po ma ḿ wáká ɓó bɔ̃̌ nɔ̀mɔ̀ dyíin ɓɛ́ ɔ sɔ̀ìn kà ɖé Gèɖèpɔ́ɔ̀ gboɛɛ cɛ̃ jè. 2Bɔ̃̌ nɔ̀mɔ̀ dyíin nìà kɛɛ, Gèɖèpɔ́ɔ̀ ɖǎ ma ɔ jè cɛ̃ kĩ́ín, ti ɓɛ́ ɔ nyuɛ ké ɔ kpáá-ɖɛ̀-cɛ̃-nyɔ̀ ɓěɔ̀ cɛ̃ɛ ma ɖéɛ ɔ céè-ɖɛ̀ hwɛ̀ǐn-hwɛ̀ǐn ɓěɔ̀ múɛ. 3Bɔ̃̌ nɔ̀mɔ̀ dyíinɔ̀ ɓá ɔ Dyú-gààɔ̀ jè dyí. Ɖé nyɔǔn-dyù nììn wáká kɔ̃ɛɛ, ɔ wóɖóìn ma ɖé Dèɓéɛ̀ xwéɖé-dùɔ̀ mú. 4Kɛɛ ɖé zùǔn-wàká mɔ̀à Zùù Hwɛ̀ǐn-hwɛ̀ǐnɔ̀ kɛɛ nììn wáká kɔ̃ɛɛ, ɖɛ kpa ɖɛ ɓɛ́ ɔ nyu ma kà ɖé ɔ gĩɔ-wóɖó-wóɖó múɛɛ, ɔ tɛ̀mɛ̀ìn nyɔǔn dyí kà ɔ mɔ̀ Gèɖèpɔ́ɔ̀ Dyú-gàà kɛ. Bɔ̃̌ nɔ̀mɔ̀ dyíinɔ̀ ɓá Jízɛ̀ Kɛ́ɖɛ́ì mɔ̀à à Wuɖuí-kɔ̃̀-nyɔ̀ɔ̀ kɛɛ jè dyí. 5Ké sɔ̀ìn ɖé ɔ múɛɛ, ḿ dyé ɖɛ nɔ̀mɔ̀ dyíin mɔ̀ àpɔ́sò-kũ̀àɔ̀ kɛ, ɓɛ́ ḿ kéɛ ɖéɛ ɔ nyɛ́nɛ́ mú nyùìn. Kũ̀àɔ̀ mɔ̀, ɓɛ́ ḿ kéɛ nyu ɓɛ́ nyɔ ɓě nìà ɓóɖó-dù séín ɓěɔ̀ kɔ̃ɛɛ ké Kɛ́ɖɛ́ì hwìɖǐǐ taɓa, ɓɛ́ wa ké ɔ wuɖu nyu. 6Nyɔ ɓě ɓɛ́ Gèɖèpɔ́ɔ̀ ɖǎà ɖá, ké Jízɛ̀ Kɛ́ɖɛ́ì kɔ̃̀à wa kɛɛ, ɓě mɔ̀ wa ɖò ɖekè.
7Ɓě mɔ̀ nyɔ séín ɓě nìà ɖé Wóɖóùn-hwɔ̀ɖɔ̀ɔ̀ mú, ɓɛ́ Gèɖèpɔ́ɔ̀ ɖɛ̀ɓɛ̀à ɓě mú, ké ɔ ɖǎà ɓě ɖá, ɓɛ́ ɓě kéà ɓě mìɔùn ɔ xwáɖáún zàìn nyɛɛ, ḿ zà ɓě séín nyíɔún. Gèɖèpɔ́ɔ̀ mɔ̀à à Ɓǎ kɛ kè Bounɓo Jízɛ̀ Kɛ́ɖɛ́ì mɛ po ɓě mana kɔ̃, ɓɛ́ wa ké ɓě gìɖìǐ nyí.
Gèɖèpɔ́ɔ̀ zùo-po-ɓàà-wùɖù
8Kĩ́ín nyɛɛ, ḿ po ní Gèɖèpɔ́ɔ̀ zùo ɓó ɓě séín jè, dyììn ɖé Jízɛ̀ Kɛ́ɖɛ́ì mú, sepóɛɖé wa nì ɓěɛ̀ hwìɖǐǐ-taɓa-taɓaɔ̀ jè ɓóɖóɛ̀ dà séín cɛ̃iń. 9Gèɖèpɔ́ɔ̀ ɓɛ́ ḿ ɓièà ɖé ní hwòɖǒ-dyùàɔ̀ mú, ɓó bɔ̃̌ nɔ̀mɔ̀ dyíin ɓá ɔ Dyú-gààɔ̀ dyíɛɛ cɛ̃ jèɛɛ mɔ̀ ní zàse. Ɔ dyuòɛ̀ kà ti séín ɓɛ́ ní ɓaà kɛɛ, ní cɛ̃ ɓě jè ɔ gbo teeɛ. 10Ḿ nì Gèɖèpɔ́ɔ̀ dyi dièɛ̌n, ɓɛ́ ɔ mɔ́ɔ́-ɖɛ̀ kéɛ nyu ɓɛ́ ɔ ké hwìè ɖò dyí kaà, ɓɛ́ ɔ ké ḿ ɖé ɓě gbo nyìnììn nɔ̀mɔ̀ dyíin. 11Sepóɛɖé ɓěɛ̀ dyé-tò nyu ḿ xwéé. Ké ḿ mɔ́ ɓɛ́ ḿ ké ɓě nyíí-ɖɛ̀ sɔ̀ìn ɖé Zùù Hwɛ̀ǐn-hwɛ̀ǐnɔ̀ gboɛɛ nyí, ɓɛ́ ɔ ké ɓě dyi kùìn. 12Ɔ xwíníín mɔ̀, ḿ mɔ́ ɓɛ́ ḿ ké ɖé ɓě hwìɛ̀ nì, ɓɛ́ ɓě nììn hwìɖǐǐ-taɓa-taɓa ké mɔ́ún kpéí po, ɓɛ́ ḿ níǐnɔ̀ ké ɓě mɔ̀ùn kpéí po ɖekè.
13Ɖíí ɓě, ḿ mɔ́ ɓɛ́ ɓě kéɛ dyuò kà ɓɛ́ ḿ poìn hwìɖǐi tee, ɓɛ́ ḿ ké ɖé ɓě gbo dyiɛ, kɛɛ ɖɛ ɖò ɓéɖé ɔ ké ḿ dyí kpɔ̃ wɛ̃́ɛ́ pū. Ḿ mɔ́ ɓɛ́ ḿ ké ma ɖé dyi, ɓɛ́ ní kũ̀àɔ̀ ké pɛ́ɛ̀-ɖɛ̀ ɖò ɖé ɓě hwìɛ̀ dyé kà ɔ nyuà ɖéɛ ɓóɖó-dù kà kò ɖò ɓěɛ̀ nyɔ tɔ̀ɔ̀ ɓěɔ̀ hwìɛ̀ dyéɛ kɛ. 14Ḿ ɓéɖé ɖɛ ɖò ɓɛ́ ḿ kéɛ nyɔǔn séín bìì nyu. Ɔ hwɔìn kà nyɔ ɓě cɛ̃́ ɖɛɛ kè nyɔ ɓě séè ɖɛ cɛ̃́ɛ ɔ kè hwòɖǒ-fɔ̀nɔ̀-nyɔ̀ ɓě kè nyɔ ɓě se hwòɖǒ fɔ̀nɔ̀ɛ. 15Ɔ jèɛɛ, ní hwòɖǒ mɔ́ɔ xwéé, ɓɛ́ ḿ ké ɓě mɔ̀ nyɔ ɓě nìà ɖé Wóɖóùn-hwɔ̀ɖɔ̀ɔ̀ múɛɛ bɔ̃̌ nɔ̀mɔ̀ dyíinɔ̀ gbo cɛ̃ ɖekè.
Bɔ̃̌ nɔ̀mɔ̀ dyíinɔ̀ ɓéɖé kpé
16Dɛ̃ se ḿ nyu ɓó bɔ̃̌ nɔ̀mɔ̀ dyíinɔ̀ cɛ̃ jè. Gèɖèpɔ́ɔ̀ kpéɔ̀ mɔ̀ nyɔ nyuɛ ké bɔ̃̌ nìà kɛ dyà pó-pó ɖé nyɔ séín ɓě ɓéɖé hwìɖǐǐ-taɓa-taɓa kɛɛ gbo. Pó-pó nìà kɛ mu Júù-nyɔ̀ ɓěɔ̀ gbo kĩ́ín, hwɛ̀ ké ɔ nyini ɓóɖó-dù kà kò ɖò ɓěɛ̀ nyɔ ɓěɔ̀ gbo ɖekè. 17Bɔ̃̌ nɔ̀mɔ̀ dyíinɔ̀ tɛ̀mɛ̀ìn à kà Gèɖèpɔ́ɔ̀ nyu nyɔǔn dyí sɛ́ɖɛ́ìn nyɛɛ dyí. Dyí-sɛ́ɖɛ́ìn-sɛ́ɖɛ́ìnɔ̀ dèìn hwìɖǐǐ-taɓa-taɓa gbo gbɔ, ké ɔ jɛ̀ɖɛ̀ìn hwìɖǐǐ-taɓa-taɓa dúí. Kà ɔ ɖǎà céè ɖé Gèɖèpɔ́ɔ̀-cèè-ɖɛ̀ɔ̀ múɛɛ, ɔ ɖá, “Nyɔ ɓě sɛ́ɖɛ́ìn dyíɛɛ mu cĩ́ìn dyììn ɖé hwìɖǐǐ-taɓa-taɓa mú.”
Nyɔǔn-dyùɛ̀ zaa-kpɔ̃-kpɔ̃
18Gèɖèpɔ́ɔ̀ tɛ̀mɛ̀ìn ɔ dyoɖoɔ̀ à dyí sɔ̀ìn ɖé dyɔún. Gèɖèpɔ́ɔ̀ dyoɖo nì nyɔ ɓě ɓɛ́ wa mɔ̀ ɔ ɖɛ-gbà-bũ̌-nyu-nyɔ̀ kɛ kè nyɔ séín ɓě ɓɛ́ wa mɔ̀ ɖɛ gbà kò-kò ɓě nyu-nyɔ̀ kɛɛ kɔ̃. Wa kpɔ̃ jǎàɔ̀ dyí ɖé waà ɖɛ-gbà-nyu-nyuɔ̀ mú. 19Sepóɛɖé ɖɛ nyɔ ɓɛ́ìn dyí dyuòɛ̀ ɓá Gèɖèpɔ́ɔ̀ dyíɛɛ, ɔ nì wáɖáá ɓó wa dyéɖé waí. Gèɖèpɔ́ɔ̀ mìɔùn ɖǎa wa dyí tɛ̀mɛ̀ìn. 20Sɔ̀ìn ɖé ɓóɖó-kpàà mɛ-mɛɔ̀ gboɛɛ, ɖɛ ɓě ɓɛ́ wa ɓá Gèɖèpɔ́ɔ̀ dyí, ké nyɔ seà dyéɛ ɓɛ́ìn nyɛɛ, wa mɔ̀ ɔ sè-ná-sèɛ̀ kpéɔ̀, ɔ kè kà ɓɛ́ ɔ mɔ̀à Gèɖèpɔ́ɔ̀ jɛ́ɛ́ cáa. Ɖɛ ɓě nìà kɛɛ, nyɔ ɓɛ́ìn dyéɛ wáɖáá dyììn ɖé ɖɛ ɓě ɓɛ́ ɔ ɖǎà nyuɛɛ mú. Ɔ jèɛɛ, wa se kã̀fĩ́á ɖò ɓéɖé. 21Wa dyuò ma Gèɖèpɔ́ɔ̀ dyí, kɛɛ wa se ma ɔ ɓàìn kà ɓɛ́ wa ɓéɖé ɓɛ́ wa ké ɔ ɓàìn nyuɛ, ké wa se ɔ zùo po. Kɛɛ wa ɖɛ-hwìɖǐi-poìn-poìn séín ɓěɔ̀ gbɔ-hwɛ̀-hwɛ̀ mɔ̀ ɖɛ fóɖóún, ké waà fɔ̀nɔ̀-hwòɖǒ ɓěɔ̀ kpè kɔ̃in. 22Wa ɖá wa fɔ̀nɔ̀ ma hwòɖǒ, kɛɛ wa zùɖùìn wa mìɔùn. 23Wa ɓéɖé ɓɛ́ wa kéɔ́ dĩ́ín-dĩ̀ìn Gèɖèpɔ́ɔ̀ seà mɛ́-mɛ́ kɔ̃̀ɛɛ ɓiè, kɛɛ wa ɖú ɓiè-ɖɛ̀ kà kò ɖò dyí. Wa ɓiè ma hwɔìn-ɖɛ̀ sɛ-sɛ. Hwɔìn-ɖɛ̀ ɓěɔ̀ kè nyɔǔn-dyù ɓɛ́ìn kà mɛ́ɛ kɛ kè naà ɓě kè nimii ɓě ɔ kè ɓíɖíi-dyi-nà-ɖɛ̀ ɓě hwɔìn ní.
24Ɔ jèɛɛ, nàmàǔn-kpèɖè gbà ɓě kɔ̃̀ nyu-tò nyu ma kà wa hwòɖǒ-dyùà ɓěɔ̀ kɛɛ, Gèɖèpɔ́ɔ̀ zàìn ma wa xwáɖáún, ɓɛ́ ɔ kéɛ nyu ɓɛ́ wa mìɔùn nììn kpóɖó-dyùàɔ̀ ké dyíin nyìnììn. 25Gèɖèpɔ́ɔ̀ nyuɛ ma náa, sepóɛɖé wa táà ma Gèɖèpɔ́ɔ̀ jǎàɔ̀ dyi, ké wa ɖú ma se dyí. Ké wa ɓiè ma ɖɛ ɓě ɓɛ́ Gèɖèpɔ́ɔ̀ nyu ma kɛ, ké wa kpɔ̃ waà gma ɓěɔ̀ dyi. Kɛɛ wa seɛ ma náa nyɔ mɛ ma kà ɖɛ ɓěa kɛɛ bìì nyu, nyɔ mɔ̀ nyɔ muà ɓàìn-ɓàìn dyéìn ɓó sè-ná-sèɛ̀ tiín nyɛ. Kǎà ɔ mɛ nì.
26Sepóɛɖé ɓó ɖɛ wa mɔ́ ma kà kɛɛ jèɛɛ, Gèɖèpɔ́ɔ̀ zàìn ma wa dɛ̃-ɖɛ̀ ɓě ɓɛ́ wa mɔ́ ma kà xwééɛɛ xwáɖáún, ké waà màa ɓěɔ̀ zĩàìn ɖɛ nɔ̀mɔ̀ dyíin wa kéɔ́ waà kpóɖó-dyùà mú nyùìn nyɛɛ gbo, ké wa nyùɛ̀n ɖɛ nyìnììn dyíin mú. 27Ké kǎà gàa ɓěɔ̀ mɔ̀ùn nyuɛ ɖekè. Wa táà màa ɓěɔ̀ dyi-kpɔ̃-hwìè nɔ̀mɔ̀ dyíinɔ̀ dyi, ké waà mɔ́ìn-mɔ̀ìnɔ̀ kɔ̃̀ wa wuɖuí gàná cá. Gàa ɓěɔ̀ nyu wa mǔè-gàà ɓě dɛ̃-ɖɛ̀ ɓě bũ̌, ké wa dyé waà pɛ́ɛ̀-ɖɛ̀ ɓɛ́ wa kɔ̃̀ wa kéɔ́ dyéɛɛ ɓó waà ɖɛ gbà nyu jè, ɖé wa mìɔùn mú.
28Kà ɓɛ́ nyɔ ɓěɔ̀ se ma kà wɔ̃́ ɓɛ́ Gèɖèpɔ́ɔ̀ jè ké ma kà wa hwìɖǐi nìɛ jèɛɛ, Gèɖèpɔ́ɔ̀ zàìn ma wa waà hwìɖǐi-poìn-ɖɛ̀ se kɔ̃in nɔ̀mɔ̀ ɓěɔ̀ ɔ kè kpeɖe gbà ɓěɔ̀ xwáɖáún. 29Ɖɛ gbà kò-kò ɓě nyu-nyu bã ma wa mú mìɔ. Wa ɓéɖé ma sã̀-kpɛ̃́ín. Wa mɔ́ ɖɛ séín. Wa nyìnììn hwòɖǒ kɔ̃in. Wa ɓéɖé hwɛ̀nɛ̌ mìɔ. Wa ɖáɓá kú. Wa zà ɖɛín. Wa nyu gbá-gbá. Wa kpeɖe zi dyíin nyìnìɛ̌n mìɔ. Wa cɛ̃̀ wĩin dyi. 30Wa zeɖe nyɔǔn nyɛ́nɛ́. Wa nyɛ́ Gèɖèpɔ́ɔ̀ mú. Wa se nyɔǔn kpéín dyé. Wa ɓɔ́ɖɔ́ìn wa mìɔùn dyí. Wa ɓúá wĩín dyi. Wa mɔ̀ ɖɛ-gbà-nyu-hwìè dyi-mɔ́-nyɔ̀. Wa se waà nyɔ ɓě kpéín dyé. 31Wa se ɖɛ-múin-wɔ̃́-wɔ̃́ ɖò ɓéɖé. Wa mɔ̀ nyɔ ɓě se hwìɖǐǐ-taɓa-nyɔ̀ ɓěɛ. Wa se nyɔ ɖò mɔ̀ùn jè gbo kɔ̃̀. Wa ní dyé nyɔ ɖò wìǐn. 32Wa dyuòɛ̀ kà Gèɖèpɔ́ɔ̀ gmaɔ̀ ɖá nyɔ ɓě nyu ɖɛ ɓě nì kà kɛɛ kɔ̃̀ wa ké mɛ́ɛ. Wa se ɖɛ ɓěa nyu ɖòùn pū, kɛɛ wa hwòɖǒ dèìn nyɔ ɓě nyu wa kɛɛ múin.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.