Máà 8
8
Jízɛ̀ nyí gàa táázĩ̀ìn hĩinyɛ ɖii-ɖɛ̀
(Máfíò 15:32-39)
1Wé ɖòɛ̀ ɓaɖaa, nyɔ kúɖúú poìn ma Jízɛ̀ ɖei dyí ɖe. Ké wa se ma ɖɛ ɖò ɓéɖé ɓɛ́ wa kéɛ ɖi. Ɔ jèɛɛ, Jízɛ̀ ɖá ma ɔ ɖeín-nà-nyɔ̀ ɓěɔ̀ ɓó ɔ gbo, ké ɔ cɛ̃ɛ wa gbo, ké ɔ ɖá, 2“Nyɔ ɓěɛ̀ jè nyùìn ḿ wìì, sepóɛɖé wa nyuá ḿ gbo wé tã, ké ɖii-ɖɛ̀ ɖò se nì ɓɛ́ wa kéɛ ɖi. 3Wa dyi mɔ́ún sè, ké ḿ dyi wa ɖe ɖoɓo ní, nìí, wa mu hwìèɔ̀ gba kṹún kpáìn, sepóɛɖé wa ɖíɛ́ ɓě sɔ̀ dà vɛ̃in.”
4Ké ɔ ɖeín-nà-nyɔ̀ ɓěɔ̀ diè ɔ dyi, ké wa ɖá, “Dɛ̌ à ɓɛ́ìn ɖii-ɖɛ̀ dyéɛ nɔ̄ gbǎùn-fúɖúá nìà kɛ kɔ̃, ɓɛ́ ɔ ké nyɔ ɓěɛ̀ mɔ́ xwíníín zà kɛ́?”
5Ké ɔ diè ma wa dyi, ké ɔ ɖá, “Bɛɖɛɛ̀-kpò jĩ̀ xwɛ̌ ɓě ɓéɖéɛ́?”
Ké wa ɖá, “À ɓéɖé bɛɖɛɛ̀-kpò mɛ̀nɛ̌ìn-sɔ̃́.”
6Ké Jízɛ̀ cɛ̃ɛ ma nyɔ ɓěɔ̀ gbo, ɓɛ́ wa ké ɓó ɓíɖíi dyi kò, ké ɔ ɖú ma bɛɖɛɛ̀-kpò mɛ̀nɛ̌ìn-sɔ̃́ɔ̀ dyí, ké ɔ po ma Gèɖèpɔ́ɔ̀ zùo. Ké ɔ jaɖaìn ma wa kpói, ké ɔ nyíɛ ɔ ɖeín-nà-nyɔ̀ ɓěɔ̀, ɓɛ́ wa mɔ̀ùn kéɛ nyɔ ɓěɔ̀ múin geìn. Ké wa geɛ̀n ma nyɔ kúɖúú ɓěɔ̀ múin. 7Ké wa ɓéɖé ma zimii-dyù gbɛ̀ǐ-gbɛ̀ǐ ɖekè. Ké Jízɛ̀ po Gèɖèpɔ́ɔ̀ zùo ɓó zimiiɔ̀ jè. Ké ɔ cɛ̃ɛ ɔ ɖeín-nà-nyɔ̀ ɓěɔ̀ gbo, ɓɛ́ wa kéɛ nyɔ ɓěɔ̀ múin geìn ɖekè. 8Ké nyɔ ɓěɔ̀ ɖi ma ɖɛ, ké wa ɖoɓo ma. Ké wa poìn ma bɛɖɛɛ̀ɔ̀ kè zimiiɔ̀ nyɔ sè dyiɛɛ dyí, ké ɔ nyu ma tìě-wè mɛ̀nɛ̌ìn-sɔ̃́. 9Nyɔ ɓě ɓɛ́ wa ɖiɛ ma kà kɛɛ ɓɛ́ìn ma nyɔ-kpò táázĩ̀ìn hĩinyɛ jǔɛ. 10Sɔ̀ìn ɓóɛ gboɛɛ, Jízɛ̀ ɖoɓo ma nyɔ ɓěɔ̀ wa ɓíɖí ɖe. Ké ɔ kè ɔ ɖeín-nà-nyɔ̀ ɓěɔ̀ dyá ma ɓáɖáà ɖò mú wàɖà, ké wa mu ma dɛ̀ wa ɖáìn Dàmànútà kɛ.
Fáɖòsíì-nyɔ̀ ɓěɔ̀ mɔ́ ɖàɓàìn-ɖɛ̀ ɖò dyéɛ dyi
(Máfíò 16:1-4)
11Wé ɖòɛ̀ ɓaɖaa, Fáɖòsíì-nyɔ̀ ɓěɔ̀ ɖíɛ́ ɓě dyi ma Jízɛ̀ gbo, ké wa nì ma ɔ dyéɖéín dyi ɓúɖúɛń. Wa mɔ́ ɓɛ́ wa ké ma ɔ mú dɔ̃̌. Ɔ jèɛɛ, wa diè ma ɔ dyi, ɓɛ́ ɔ ké ma wa bìì ɖàɓàìn-ɖɛ̀ ɖò nyu sɔ̀ìn ɖé dyɔún. 12Ké ɔ nì ma dĩin, ké ɔ ɖá, “Ɖɛ́ kɔ̃̀ jè nyɔ ɓě nìà kàǔn wɛ̃ɛ mɔ́à ɖàɓàìn-ɖɛ̀ dyiɛ́? Ḿ cɛ̃ ɓě jǎà gbo, nyɔ ɓě nìà kàǔn wɛ̃ɛ se ɖàɓàìn-ɖɛ̀ ɖò dyéɛ ɓɛ́ìn.”
13Ké ɔ sɔ̀ ɓó Fáɖòsíì-nyɔ̀ ɓěɔ̀ gbo, ké ɔ dyá ɓáɖáàɔ̀ mú ɖe, ké ɔ mu ɖé dòùnɓìǎɔ̀ ɖeín.
Fáɖòsíì-nyɔ̀ ɓěɔ̀ kè Hɛ́wɔ̀ɖɔ̀ nììn bɛɖɛɛ̀-dyáìn-ɖɛ̀ɔ̀ jè
(Máfíò 16:5-12)
14Ɓó tia ɓaɖaa, ɔ sɔ̀ ma ɖeín-nà-nyɔ̀ ɓěɔ̀ hwìɖǐi, ké wa se ma ɖii-ɖɛ̀ ɖò kpa. Wa se ma ɖii-ɖɛ̀ ɖò ɖé ɓáɖáàɔ̀ mú ɓéɖé, ɔ sèìn bɛɖɛɛ̀-kpò dyúáɖò kpeé-kpeé. 15Ké Jízɛ̀ po ma wa náún, ké ɔ ɖá, “Ɓě mɛ ma mú ɓó Fáɖòsíì-nyɔ̀ ɓěɔ̀ kè Hɛ́wɔ̀ɖɔ̀ nììn bɛɖɛɛ̀-dyáìn-ɖɛ̀ɔ̀ jè.”
16Ké wa cɛ̃ìn cɛ̃̀ìn ma gbo, ké wa ɖá, “Ɔ mɔ̀ à se dyɛ̀ bɛɖɛɛ̀ dyà jèo.”
17Jízɛ̀ dyuò ɖɛ wa nì ma cɛ̃iń nyɛɛ dyí jèɛɛ, ɔ diè ma wa dyi, ké ɔ ɖá, “Ɖɛ́ kɔ̃̀ jè ɓě nìɛ̀ cɛ̃iń kà ɓɛ́ ɔ mɔ̀ ɓě se bɛɖɛɛ̀ ɓéɖé jèɛɛ kɛ́? Ɓě séèɛ̀ dyé, ké ɓě séèɛ̀ múin wɔ̃́ keè? Ɓě kàmà ɖɛ múin wɔ̃́uń we? 18-19Ɓě nì dyéɖé dú, ké ɓě ní dyé dyiì? Ɓě nì ɖùǔ dú, ké ɓě ní wɔ̃́ dyiì? Ti ɓɛ́ ḿ jaɖaìn ma kà bɛɖɛɛ̀-kpò hm̀m̌ɔ̀ dyi ɓó gàa táázĩ̀ìn hm̀m̌ɔ̀ jèɛɛ, ɖii-ɖɛ̀ sè ma dyiɛɛ tìě-wè jĩ̀ xwɛ̌ ɓě poìn ma dyíɛ́? Ɔ jè se ɓě hwìɖǐi nìì?”
Ké wa cɛ̃ɛ ma ɔ gbo, ké wa ɖá, “Ɔ mɔ̀ tìě-wè ɓaɖa-bùè sè sɔ̃́.”
20Ké Jízɛ̀ cɛ̃ɛ ɖe, ké ɔ ɖá, “Ti ɓɛ́ ḿ jaɖaìn ma kà bɛɖɛɛ̀-kpò mɛ̀nɛ̌ìn-sɔ̃́ɔ̀ kpói ɓó gàa táázĩ̀ìn hĩinyɛɔ̀ jèɛɛ, ɖii-ɖɛ̀ sè dyiɛɛ tìě-wè jĩ̀ xwɛ̌ ɓě poìn ma dyíɛ́?”
Ké wa cɛ̃ɛ ma ɔ gbo, ké wa ɖá, “Ɔ mɔ̀ ma tìě-wè mɛ̀nɛ̌ìn-sɔ̃́.”
21Ké ɔ diè ma wa dyi, ké ɔ ɖá, “Ɓě séèɛ̀ múin wɔ̃́ keè?”
Jízɛ̀ kánáìn dyéɖéín-dyi-kpè-gàà ɖò dyi ɖé Bɛ̀séɖà-hwɔ̀ɖɔ̀ɔ̀ mú
22Sɔ̀ìn ɓóɛ gboɛɛ, Jízɛ̀ kè ɔ ɖeín-nà-nyɔ̀ ɓěɔ̀ dyi ma ɖé Bɛ̀séɖà-hwɔ̀ɖɔ̀ɔ̀ mú, ké nyɔ ɖíɛ́ ɓě dyà ma dyéɖéín-dyi-kpè-nyɔ̀ ɖò Jízɛ̀ gbo. Ké wa ɓaà ma ɔ, ɓɛ́ ɔ ké ɔ sɔ̃ kɔ̃ pɛ̃́ìn. 23Ké ɔ kpɔ̃ gàa kpè dyéɖéín dyiɔ̀ sɔ̃in, ké ɔ zà ma ɔ ɓó hwɔɖɔɔ̀ mú. Ké Jízɛ̀ po ma ɔ tɔ̃ɔ dyéɖéín, ké ɔ pɛ̃́ìn ma ɔ sɔ̃ kɔ̃. Ti ɔ nyuɛ ma náa kɛɛ, ɔ diè ma gàaɔ̀ dyi, ké ɔ ɖá, “M̀ dyé ɖɛ ɖòò?”
24Ké gàaɔ̀ ɖú ma dyéɖé dyií, ké ɔ ɖá, “Ḿ dyé nyɔǔn ɓě, ké wa nì nàǔn, kɛɛ wa nì kà cu-gɔ̃̀ ɓě nìà kɛ.”
25Ké Jízɛ̀ jìɖǐ ma gàaɔ̀ sɔ̃ dyéɖéín ɖe. Ké gàaɔ̀ gmɔ̀ ma ɖé nya gãa. Ké ɔ dyéɖéɔ̀ cɛ̃̀ ma kɔ̃in, ké ɔ dyé ma ɖɛ séín wáɖáá. 26Ké Jízɛ̀ cɛ̃ɛ ma gàaɔ̀ gbo, ké ɔ ɖá, “Mɔ̀ǔn ɖá m̀ ké hwɔɖɔɔ̀ dyá dyɛ mɔ̀ùn.” Ké ɔ tò ma gàaɔ̀ ɔ ɓíɖí ɖe.
Píɖɛ̀ cɛ̃ɛ kà Jízɛ̀ mɔ̀ Kɛ́ɖɛ́ìɔ̀ kɛ
(Máfíò 16:13-20; Ɖúù 9:18-21)
27Ké Jízɛ̀ kè ɔ ɖeín-nà-nyɔ̀ ɓěɔ̀ mu ma ɖé hwɔɖɔ-kpàǎ ɓě nì ma ɖé Sɛ̀sɛ̀wíɖíà-Féɖópà Gbɛ̌ɛ̀ɔ̀ múɛɛ kɔ̃. Ɖé hwìèɔ̀ kɔ̃ɛɛ, ɔ diè ɔ ɖeín-nà-nyɔ̀ ɓěɔ̀ dyi, ké ɔ ɖá, “Nyɔǔn ɓě dyi ní jè cɛ̃ín, nìí, nyɛ́ wa ɖá ḿ jǔɛ́?”
28Ké wa cɛ̃ɛ ma ɔ gbo, ké wa ɖá, “Nyɔ ɖíɛ́ ɓě ɖá m̀ mɔ̀ Jɔ̃́ɔ́ nyɔ-níɔ-po-nyɔ̀ɔ̀. Ɖíɛ́ ɓě mɔ̀ùn ɖá m̀ mɔ̀ Ìɖáájɔ̀, ké ɖíɛ́ ɓě ɖá m̀ mɔ̀ kpáá-ɖɛ̀-cɛ̃-nyɔ̀ tɔ̀ɔ̀ ɓěɔ̀ ɖò.”
29Hwɛ̀ ké Jízɛ̀ diè ma wa mɔ̀ùn dyi, ké ɔ ɖá, “Nyɛ́ ɓě mɔ̀ùn ɖá ḿ jǔ kɛ́?”
Ké Píɖɛ̀ zà ma ɖé wuɖu, ké ɔ ɖá, “M̀ mɔ̀ Kɛ́ɖɛ́ìɔ̀.”
30Ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo kóɖó-kóɖó, ɓɛ́ wa ní kɔ̃̀ɔ̀ ɖà nyɔ ɖò gbo cɛ̃.
Jízɛ̀ cɛ̃ɛ ɔ ɖeín-nà-nyɔ̀ ɓěɔ̀ gbo kà ɔ mu gǎ dyéìn ɓɛ́ ɔ ké mɛ́ kɛ
(Máfíò 16:21-28; Ɖúù 9:22-27)
31Sɔ̀ìn ɓóɛ gboɛɛ, Jízɛ̀ ɖúɛ ɔ ɖeín-nà-nyɔ̀ ɓěɔ̀ gbo cɛ̃ kpàǐ, ké ɔ ɖá, “Mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ, ḿ ɓéɖé ḿ ké gǎ pàɖǎ dyé. Júù-nyɔ̀ vɛ̀nɛ̀ ɓěɔ̀ kè sáa-zà-nyɔ̀ kpa ɖɛ ɓěɔ̀ ɔ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ mu ḿ ɓɔ́ùn, ké wa mu ḿ ɖáɓáùn. Kɛɛ wé tã ɖǎ ziín, ní mu gĩɔ wóɖóùn.” 32Ɔ cɛ̃ɛ ma wa gbo wáɖáá. Ké Píɖɛ̀ zà ma Jízɛ̀ ɓó ɖeín-nà-nyɔ̀ tɔ̀ɔ̀ ɓěɔ̀ hwìɛ̀, ké ɔ po ma ɔ ɓɔ́í. 33Ké Jízɛ̀ gmɔ̀ìn ma ɖé ɔ ɖeín-nà-nyɔ̀ ɓěɔ̀ gbo, ké ɔ wùɖù ma Píɖɛ̀ gbo, ké ɔ ɖá, “Sɔ̀ ḿ bũ̌, Sétɔ̃̀. Ɖɛ ɓě nì poìn kà hwìɖǐiɛɛ mɔ̀ nyɔǔn-dyùɛ̀ hwìɖǐi-poìn-ɖɛ̀. Wa se Gèɖèpɔ́ɔ̀ nììn hwìɖǐi-poìn-ɖɛ̀.”
34Hwɛ̀ ké Jízɛ̀ ɖá ma nyɔ kúɖúú ɓěɔ̀ kè ɔ ɖeín-nà-nyɔ̀ ɓěɔ̀ ɓó ɔ gbo, ké ɔ ɖá, “Nyɔ ɖò dyi mɔ́ ɓɛ́ ḿ kè ɔ ké mú naìn ní, nìí, ɔ mɛ táà ɔ hwòɖǒɛ̀-mɔ́ɔ́-ɖɛ̀ dyi, ké ɔ mɛ ɖú ɔ kɔ́ɖɔ́sìɔ̀ dyí, ɓɛ́ ɔ ké ḿ kíɖíí sí. 35Nyɔ mɔ̀ nyɔ ɓɛ́ ɔ kàmà ɔ fɛ̀ɛ̀ɔ̀ jè kɛɛ, ɔ fɛ̀ɛ̀ɔ̀ mu ɔ xwa sɔ̀ùn. Ké nyɔ mɔ̀ nyɔ ɓɛ́ ɔ fɛ̀ɛ̀ɔ̀ mu ɔ xwa sɔ̀ùn ɓó ní jè ɔ kè ɓó bɔ̃̌ nɔ̀mɔ̀ dyíinɔ̀ jèɛɛ, ɔ muɛ póìn. 36Nyɔ ɖò dyi ɖɛ séín nì ɓóɖó-kpà gànáà kɔ̃ɛɛ kɔ̃̀, ké ɔ fɛ̀ɛ̀ɔ̀ dyi ɔ xwa sɔ̀ ní, nìí, ɖɛ́ mɔ̀ kpáná ɖò ɔ muɛ kɔ̃ún dyéìn nyɛ́? 37Ɔ jǔ ké ɔ fɛ̀ɛ̀ jɛ́ɛ́ɔ̀ dyi ɔ xwa sɔ̀ ní, nìí, ɖɛ́ ɔ ɓɛ́ìn tòɛ̀ ɓɛ́ ɔ ké ɔ fɛ̀ɛ̀ jɛ́ɛ́ɔ̀ ɖe dyéɛ́? 38Ní jè kè ní wuɖuɔ̀ jè dyi nyɔ ɖò dɛ̃ nyuìn nɔ̄ ɓóɖó-kpà kɔ̃̀ kɔ̃ ɓɛ́ nyɔ ɓě táà Gèɖèpɔ́ɔ̀ dyi, ɓɛ́ wa dyià nàmàǔn nyuɛɛ ní, nìí, dɛ̃ mu mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ nyuùn ɓó nyɔɔ̀ mɔ̀ùn jè ɖekè, ti ɓɛ́ ḿ kè ínjà hwɛ̀ǐn-hwɛ̀ǐn ɓěɔ̀ muà dyiìn ɖé ḿ Ɓǎà dĩ́ín-dĩ̀ìnɔ̀ múɛ.”
Currently Selected:
Máà 8: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Máà 8
8
Jízɛ̀ nyí gàa táázĩ̀ìn hĩinyɛ ɖii-ɖɛ̀
(Máfíò 15:32-39)
1Wé ɖòɛ̀ ɓaɖaa, nyɔ kúɖúú poìn ma Jízɛ̀ ɖei dyí ɖe. Ké wa se ma ɖɛ ɖò ɓéɖé ɓɛ́ wa kéɛ ɖi. Ɔ jèɛɛ, Jízɛ̀ ɖá ma ɔ ɖeín-nà-nyɔ̀ ɓěɔ̀ ɓó ɔ gbo, ké ɔ cɛ̃ɛ wa gbo, ké ɔ ɖá, 2“Nyɔ ɓěɛ̀ jè nyùìn ḿ wìì, sepóɛɖé wa nyuá ḿ gbo wé tã, ké ɖii-ɖɛ̀ ɖò se nì ɓɛ́ wa kéɛ ɖi. 3Wa dyi mɔ́ún sè, ké ḿ dyi wa ɖe ɖoɓo ní, nìí, wa mu hwìèɔ̀ gba kṹún kpáìn, sepóɛɖé wa ɖíɛ́ ɓě sɔ̀ dà vɛ̃in.”
4Ké ɔ ɖeín-nà-nyɔ̀ ɓěɔ̀ diè ɔ dyi, ké wa ɖá, “Dɛ̌ à ɓɛ́ìn ɖii-ɖɛ̀ dyéɛ nɔ̄ gbǎùn-fúɖúá nìà kɛ kɔ̃, ɓɛ́ ɔ ké nyɔ ɓěɛ̀ mɔ́ xwíníín zà kɛ́?”
5Ké ɔ diè ma wa dyi, ké ɔ ɖá, “Bɛɖɛɛ̀-kpò jĩ̀ xwɛ̌ ɓě ɓéɖéɛ́?”
Ké wa ɖá, “À ɓéɖé bɛɖɛɛ̀-kpò mɛ̀nɛ̌ìn-sɔ̃́.”
6Ké Jízɛ̀ cɛ̃ɛ ma nyɔ ɓěɔ̀ gbo, ɓɛ́ wa ké ɓó ɓíɖíi dyi kò, ké ɔ ɖú ma bɛɖɛɛ̀-kpò mɛ̀nɛ̌ìn-sɔ̃́ɔ̀ dyí, ké ɔ po ma Gèɖèpɔ́ɔ̀ zùo. Ké ɔ jaɖaìn ma wa kpói, ké ɔ nyíɛ ɔ ɖeín-nà-nyɔ̀ ɓěɔ̀, ɓɛ́ wa mɔ̀ùn kéɛ nyɔ ɓěɔ̀ múin geìn. Ké wa geɛ̀n ma nyɔ kúɖúú ɓěɔ̀ múin. 7Ké wa ɓéɖé ma zimii-dyù gbɛ̀ǐ-gbɛ̀ǐ ɖekè. Ké Jízɛ̀ po Gèɖèpɔ́ɔ̀ zùo ɓó zimiiɔ̀ jè. Ké ɔ cɛ̃ɛ ɔ ɖeín-nà-nyɔ̀ ɓěɔ̀ gbo, ɓɛ́ wa kéɛ nyɔ ɓěɔ̀ múin geìn ɖekè. 8Ké nyɔ ɓěɔ̀ ɖi ma ɖɛ, ké wa ɖoɓo ma. Ké wa poìn ma bɛɖɛɛ̀ɔ̀ kè zimiiɔ̀ nyɔ sè dyiɛɛ dyí, ké ɔ nyu ma tìě-wè mɛ̀nɛ̌ìn-sɔ̃́. 9Nyɔ ɓě ɓɛ́ wa ɖiɛ ma kà kɛɛ ɓɛ́ìn ma nyɔ-kpò táázĩ̀ìn hĩinyɛ jǔɛ. 10Sɔ̀ìn ɓóɛ gboɛɛ, Jízɛ̀ ɖoɓo ma nyɔ ɓěɔ̀ wa ɓíɖí ɖe. Ké ɔ kè ɔ ɖeín-nà-nyɔ̀ ɓěɔ̀ dyá ma ɓáɖáà ɖò mú wàɖà, ké wa mu ma dɛ̀ wa ɖáìn Dàmànútà kɛ.
Fáɖòsíì-nyɔ̀ ɓěɔ̀ mɔ́ ɖàɓàìn-ɖɛ̀ ɖò dyéɛ dyi
(Máfíò 16:1-4)
11Wé ɖòɛ̀ ɓaɖaa, Fáɖòsíì-nyɔ̀ ɓěɔ̀ ɖíɛ́ ɓě dyi ma Jízɛ̀ gbo, ké wa nì ma ɔ dyéɖéín dyi ɓúɖúɛń. Wa mɔ́ ɓɛ́ wa ké ma ɔ mú dɔ̃̌. Ɔ jèɛɛ, wa diè ma ɔ dyi, ɓɛ́ ɔ ké ma wa bìì ɖàɓàìn-ɖɛ̀ ɖò nyu sɔ̀ìn ɖé dyɔún. 12Ké ɔ nì ma dĩin, ké ɔ ɖá, “Ɖɛ́ kɔ̃̀ jè nyɔ ɓě nìà kàǔn wɛ̃ɛ mɔ́à ɖàɓàìn-ɖɛ̀ dyiɛ́? Ḿ cɛ̃ ɓě jǎà gbo, nyɔ ɓě nìà kàǔn wɛ̃ɛ se ɖàɓàìn-ɖɛ̀ ɖò dyéɛ ɓɛ́ìn.”
13Ké ɔ sɔ̀ ɓó Fáɖòsíì-nyɔ̀ ɓěɔ̀ gbo, ké ɔ dyá ɓáɖáàɔ̀ mú ɖe, ké ɔ mu ɖé dòùnɓìǎɔ̀ ɖeín.
Fáɖòsíì-nyɔ̀ ɓěɔ̀ kè Hɛ́wɔ̀ɖɔ̀ nììn bɛɖɛɛ̀-dyáìn-ɖɛ̀ɔ̀ jè
(Máfíò 16:5-12)
14Ɓó tia ɓaɖaa, ɔ sɔ̀ ma ɖeín-nà-nyɔ̀ ɓěɔ̀ hwìɖǐi, ké wa se ma ɖii-ɖɛ̀ ɖò kpa. Wa se ma ɖii-ɖɛ̀ ɖò ɖé ɓáɖáàɔ̀ mú ɓéɖé, ɔ sèìn bɛɖɛɛ̀-kpò dyúáɖò kpeé-kpeé. 15Ké Jízɛ̀ po ma wa náún, ké ɔ ɖá, “Ɓě mɛ ma mú ɓó Fáɖòsíì-nyɔ̀ ɓěɔ̀ kè Hɛ́wɔ̀ɖɔ̀ nììn bɛɖɛɛ̀-dyáìn-ɖɛ̀ɔ̀ jè.”
16Ké wa cɛ̃ìn cɛ̃̀ìn ma gbo, ké wa ɖá, “Ɔ mɔ̀ à se dyɛ̀ bɛɖɛɛ̀ dyà jèo.”
17Jízɛ̀ dyuò ɖɛ wa nì ma cɛ̃iń nyɛɛ dyí jèɛɛ, ɔ diè ma wa dyi, ké ɔ ɖá, “Ɖɛ́ kɔ̃̀ jè ɓě nìɛ̀ cɛ̃iń kà ɓɛ́ ɔ mɔ̀ ɓě se bɛɖɛɛ̀ ɓéɖé jèɛɛ kɛ́? Ɓě séèɛ̀ dyé, ké ɓě séèɛ̀ múin wɔ̃́ keè? Ɓě kàmà ɖɛ múin wɔ̃́uń we? 18-19Ɓě nì dyéɖé dú, ké ɓě ní dyé dyiì? Ɓě nì ɖùǔ dú, ké ɓě ní wɔ̃́ dyiì? Ti ɓɛ́ ḿ jaɖaìn ma kà bɛɖɛɛ̀-kpò hm̀m̌ɔ̀ dyi ɓó gàa táázĩ̀ìn hm̀m̌ɔ̀ jèɛɛ, ɖii-ɖɛ̀ sè ma dyiɛɛ tìě-wè jĩ̀ xwɛ̌ ɓě poìn ma dyíɛ́? Ɔ jè se ɓě hwìɖǐi nìì?”
Ké wa cɛ̃ɛ ma ɔ gbo, ké wa ɖá, “Ɔ mɔ̀ tìě-wè ɓaɖa-bùè sè sɔ̃́.”
20Ké Jízɛ̀ cɛ̃ɛ ɖe, ké ɔ ɖá, “Ti ɓɛ́ ḿ jaɖaìn ma kà bɛɖɛɛ̀-kpò mɛ̀nɛ̌ìn-sɔ̃́ɔ̀ kpói ɓó gàa táázĩ̀ìn hĩinyɛɔ̀ jèɛɛ, ɖii-ɖɛ̀ sè dyiɛɛ tìě-wè jĩ̀ xwɛ̌ ɓě poìn ma dyíɛ́?”
Ké wa cɛ̃ɛ ma ɔ gbo, ké wa ɖá, “Ɔ mɔ̀ ma tìě-wè mɛ̀nɛ̌ìn-sɔ̃́.”
21Ké ɔ diè ma wa dyi, ké ɔ ɖá, “Ɓě séèɛ̀ múin wɔ̃́ keè?”
Jízɛ̀ kánáìn dyéɖéín-dyi-kpè-gàà ɖò dyi ɖé Bɛ̀séɖà-hwɔ̀ɖɔ̀ɔ̀ mú
22Sɔ̀ìn ɓóɛ gboɛɛ, Jízɛ̀ kè ɔ ɖeín-nà-nyɔ̀ ɓěɔ̀ dyi ma ɖé Bɛ̀séɖà-hwɔ̀ɖɔ̀ɔ̀ mú, ké nyɔ ɖíɛ́ ɓě dyà ma dyéɖéín-dyi-kpè-nyɔ̀ ɖò Jízɛ̀ gbo. Ké wa ɓaà ma ɔ, ɓɛ́ ɔ ké ɔ sɔ̃ kɔ̃ pɛ̃́ìn. 23Ké ɔ kpɔ̃ gàa kpè dyéɖéín dyiɔ̀ sɔ̃in, ké ɔ zà ma ɔ ɓó hwɔɖɔɔ̀ mú. Ké Jízɛ̀ po ma ɔ tɔ̃ɔ dyéɖéín, ké ɔ pɛ̃́ìn ma ɔ sɔ̃ kɔ̃. Ti ɔ nyuɛ ma náa kɛɛ, ɔ diè ma gàaɔ̀ dyi, ké ɔ ɖá, “M̀ dyé ɖɛ ɖòò?”
24Ké gàaɔ̀ ɖú ma dyéɖé dyií, ké ɔ ɖá, “Ḿ dyé nyɔǔn ɓě, ké wa nì nàǔn, kɛɛ wa nì kà cu-gɔ̃̀ ɓě nìà kɛ.”
25Ké Jízɛ̀ jìɖǐ ma gàaɔ̀ sɔ̃ dyéɖéín ɖe. Ké gàaɔ̀ gmɔ̀ ma ɖé nya gãa. Ké ɔ dyéɖéɔ̀ cɛ̃̀ ma kɔ̃in, ké ɔ dyé ma ɖɛ séín wáɖáá. 26Ké Jízɛ̀ cɛ̃ɛ ma gàaɔ̀ gbo, ké ɔ ɖá, “Mɔ̀ǔn ɖá m̀ ké hwɔɖɔɔ̀ dyá dyɛ mɔ̀ùn.” Ké ɔ tò ma gàaɔ̀ ɔ ɓíɖí ɖe.
Píɖɛ̀ cɛ̃ɛ kà Jízɛ̀ mɔ̀ Kɛ́ɖɛ́ìɔ̀ kɛ
(Máfíò 16:13-20; Ɖúù 9:18-21)
27Ké Jízɛ̀ kè ɔ ɖeín-nà-nyɔ̀ ɓěɔ̀ mu ma ɖé hwɔɖɔ-kpàǎ ɓě nì ma ɖé Sɛ̀sɛ̀wíɖíà-Féɖópà Gbɛ̌ɛ̀ɔ̀ múɛɛ kɔ̃. Ɖé hwìèɔ̀ kɔ̃ɛɛ, ɔ diè ɔ ɖeín-nà-nyɔ̀ ɓěɔ̀ dyi, ké ɔ ɖá, “Nyɔǔn ɓě dyi ní jè cɛ̃ín, nìí, nyɛ́ wa ɖá ḿ jǔɛ́?”
28Ké wa cɛ̃ɛ ma ɔ gbo, ké wa ɖá, “Nyɔ ɖíɛ́ ɓě ɖá m̀ mɔ̀ Jɔ̃́ɔ́ nyɔ-níɔ-po-nyɔ̀ɔ̀. Ɖíɛ́ ɓě mɔ̀ùn ɖá m̀ mɔ̀ Ìɖáájɔ̀, ké ɖíɛ́ ɓě ɖá m̀ mɔ̀ kpáá-ɖɛ̀-cɛ̃-nyɔ̀ tɔ̀ɔ̀ ɓěɔ̀ ɖò.”
29Hwɛ̀ ké Jízɛ̀ diè ma wa mɔ̀ùn dyi, ké ɔ ɖá, “Nyɛ́ ɓě mɔ̀ùn ɖá ḿ jǔ kɛ́?”
Ké Píɖɛ̀ zà ma ɖé wuɖu, ké ɔ ɖá, “M̀ mɔ̀ Kɛ́ɖɛ́ìɔ̀.”
30Ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo kóɖó-kóɖó, ɓɛ́ wa ní kɔ̃̀ɔ̀ ɖà nyɔ ɖò gbo cɛ̃.
Jízɛ̀ cɛ̃ɛ ɔ ɖeín-nà-nyɔ̀ ɓěɔ̀ gbo kà ɔ mu gǎ dyéìn ɓɛ́ ɔ ké mɛ́ kɛ
(Máfíò 16:21-28; Ɖúù 9:22-27)
31Sɔ̀ìn ɓóɛ gboɛɛ, Jízɛ̀ ɖúɛ ɔ ɖeín-nà-nyɔ̀ ɓěɔ̀ gbo cɛ̃ kpàǐ, ké ɔ ɖá, “Mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ, ḿ ɓéɖé ḿ ké gǎ pàɖǎ dyé. Júù-nyɔ̀ vɛ̀nɛ̀ ɓěɔ̀ kè sáa-zà-nyɔ̀ kpa ɖɛ ɓěɔ̀ ɔ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ mu ḿ ɓɔ́ùn, ké wa mu ḿ ɖáɓáùn. Kɛɛ wé tã ɖǎ ziín, ní mu gĩɔ wóɖóùn.” 32Ɔ cɛ̃ɛ ma wa gbo wáɖáá. Ké Píɖɛ̀ zà ma Jízɛ̀ ɓó ɖeín-nà-nyɔ̀ tɔ̀ɔ̀ ɓěɔ̀ hwìɛ̀, ké ɔ po ma ɔ ɓɔ́í. 33Ké Jízɛ̀ gmɔ̀ìn ma ɖé ɔ ɖeín-nà-nyɔ̀ ɓěɔ̀ gbo, ké ɔ wùɖù ma Píɖɛ̀ gbo, ké ɔ ɖá, “Sɔ̀ ḿ bũ̌, Sétɔ̃̀. Ɖɛ ɓě nì poìn kà hwìɖǐiɛɛ mɔ̀ nyɔǔn-dyùɛ̀ hwìɖǐi-poìn-ɖɛ̀. Wa se Gèɖèpɔ́ɔ̀ nììn hwìɖǐi-poìn-ɖɛ̀.”
34Hwɛ̀ ké Jízɛ̀ ɖá ma nyɔ kúɖúú ɓěɔ̀ kè ɔ ɖeín-nà-nyɔ̀ ɓěɔ̀ ɓó ɔ gbo, ké ɔ ɖá, “Nyɔ ɖò dyi mɔ́ ɓɛ́ ḿ kè ɔ ké mú naìn ní, nìí, ɔ mɛ táà ɔ hwòɖǒɛ̀-mɔ́ɔ́-ɖɛ̀ dyi, ké ɔ mɛ ɖú ɔ kɔ́ɖɔ́sìɔ̀ dyí, ɓɛ́ ɔ ké ḿ kíɖíí sí. 35Nyɔ mɔ̀ nyɔ ɓɛ́ ɔ kàmà ɔ fɛ̀ɛ̀ɔ̀ jè kɛɛ, ɔ fɛ̀ɛ̀ɔ̀ mu ɔ xwa sɔ̀ùn. Ké nyɔ mɔ̀ nyɔ ɓɛ́ ɔ fɛ̀ɛ̀ɔ̀ mu ɔ xwa sɔ̀ùn ɓó ní jè ɔ kè ɓó bɔ̃̌ nɔ̀mɔ̀ dyíinɔ̀ jèɛɛ, ɔ muɛ póìn. 36Nyɔ ɖò dyi ɖɛ séín nì ɓóɖó-kpà gànáà kɔ̃ɛɛ kɔ̃̀, ké ɔ fɛ̀ɛ̀ɔ̀ dyi ɔ xwa sɔ̀ ní, nìí, ɖɛ́ mɔ̀ kpáná ɖò ɔ muɛ kɔ̃ún dyéìn nyɛ́? 37Ɔ jǔ ké ɔ fɛ̀ɛ̀ jɛ́ɛ́ɔ̀ dyi ɔ xwa sɔ̀ ní, nìí, ɖɛ́ ɔ ɓɛ́ìn tòɛ̀ ɓɛ́ ɔ ké ɔ fɛ̀ɛ̀ jɛ́ɛ́ɔ̀ ɖe dyéɛ́? 38Ní jè kè ní wuɖuɔ̀ jè dyi nyɔ ɖò dɛ̃ nyuìn nɔ̄ ɓóɖó-kpà kɔ̃̀ kɔ̃ ɓɛ́ nyɔ ɓě táà Gèɖèpɔ́ɔ̀ dyi, ɓɛ́ wa dyià nàmàǔn nyuɛɛ ní, nìí, dɛ̃ mu mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ nyuùn ɓó nyɔɔ̀ mɔ̀ùn jè ɖekè, ti ɓɛ́ ḿ kè ínjà hwɛ̀ǐn-hwɛ̀ǐn ɓěɔ̀ muà dyiìn ɖé ḿ Ɓǎà dĩ́ín-dĩ̀ìnɔ̀ múɛ.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.