Máà 10
10
Jízɛ̀ tɛ̀mɛ̀ìn nyɔǔn ɖɛ ɓá nyɔ́nɔ́ ɓɔ́ jè dyí
(Máfíò 19:1-12; Ɖúù 16:18)
1Sɔ̀ìn ɓóɛ gboɛɛ, Jízɛ̀ sɔ̀ ma Gáɖàɖíì-ɓòɖòɔ̀ kɔ̃, ké ɔ mu ma ɖé Júɖìà-ɓòɖòɔ̀ kɔ̃, ɖé Jɔ́nì-nìɔ̀ ɖeín. Ké nyɔ kúɖúú poìn ma ɓó ɔ gbo dyí ɖe, ké ɔ tɛ̀mɛ̀ìn ma wa ɖɛ ɖe kà ɔ ní ɓɔ́à nyuɛ kɛ.
2Ɓó tia ɓaɖaa, Fáɖòsíì-nyɔ̀ ɖíɛ́ ɓě dyi ma Jízɛ̀ gbo, ɓɛ́ wa ké ma ɔ mú dɔ̃̌. Ké wa diè ma ɔ dyi, ké wa ɖá, “Ɔ nɔ̀mɔ̀ dyíin ɓɛ́ gàa ɖò ké ɔ gmàà ɓɔ́ɔ̀?”
3Ké Jízɛ̀ jǔ ma wa gɔ̃̌, ké ɔ ɖá, “Ɖɛ́ Mózè cɛ̃ ma ɓě gbo, ɓɛ́ ɓě ké nyuɛ́?”
4Ké wa ɖá, “Mózè wɔ̃́ ɓɛ́ gàaɔ̀ ké buɛ̀-cèè-ɖɛ̀ céè, ɓɛ́ ɔ kéɛ ɔ gmààɔ̀ nyí, ɓɛ́ ɔ ké màaɔ̀ ɔ ɓíɖí ɖe tò.”
5Kɛɛ Jízɛ̀ cɛ̃ɛ ma wa gbo, ké ɔ ɖá, “Ɓěɛ̀ hwòɖǒ-dyùà kùmù jè, Mózè céèà gma nìà kɛ ɓó ɓě bììɛ̀. 6Ɖé ɖɛ dè gbɔɔ̀ múɛɛ, Gèɖèpɔ́ɔ̀-cèè-ɖɛ̀ɔ̀ ɖá, ‘Gèɖèpɔ́ɔ̀ mɛ ma gàa kè màa. 7Ɓó ɖɛa jèɛɛ, gàaɔ̀ mu ɔ ɖe kè ɔ ɓǎ dyi táàùn, ɓɛ́ ɔ kè ɔ gmààɔ̀ ké xwaún kpáìn, 8ɓɛ́ wa ké nyɔ dyúáɖò jǔ.’ Ɔ ɖǎ ná nìǐn, wa se nyɔ sɔ̃́ ɖe, kɛɛ wa mɔ̀ǎ nyɔ dyúáɖò. 9Ɔ jèɛɛ, ɖɛ Gèɖèpɔ́ɔ̀ ɖǎ xwaún poìn nyɛɛ, nyɔ ɖò ní nyuɛ, ké wa ní sɔìn mú.”
10Ti Jízɛ̀ kè ɔ ɖeín-nà-nyɔ̀ ɓěɔ̀ ɖǎ ma ɖé gbǒɔ̀ xwíníín muɛɛ, ɔ ɖeín-nà-nyɔ̀ ɓěɔ̀ diè ma ɔ dyi ɖe ɓó ɖɛa jè. 11Ké ɔ cɛ̃ɛ ma wa gbo, ké ɔ ɖá, “Nyɔ mɔ̀ nyɔ ɓɛ́ ɔ ɓɔ́ ɔ gmàà, ké ɔ kpɔ̃ màa kà kò ɖò dyiɛɛ, ɔ po gmaɖe. 12Ké màa ɖò dyi ɔ dyú-ɓǎ ɓɔ́, ké ɔ dyi gàa kà kò ɖò dyi kpɔ̃ ní, nìí, màaɔ̀ po gmaɖe.”
Jízɛ̀ po dyú mɛ́nɛ́ɛ́ ɓě mana kɔ̃
(Máfíò 19:13-15; Ɖúù 18:15-17)
13Wé ɖòɛ̀ ɓaɖaa, nyɔ ɖíɛ́ ɓě dyà ma waà dyú ɓě Jízɛ̀ gbo, ɓɛ́ ɔ ké ma wa sɔ̃ dúún dè, kɛɛ ɔ ɖeín-nà-nyɔ̀ ɓěɔ̀ po ma nyɔ ɓěɔ̀ ɓɔ́í. 14Ti ɓɛ́ Jízɛ̀ dyéɛ ma kɛɛ, ɔ hwòɖǒ se ma dyi dè, ké ɔ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Ɓě táà dyú mɛ́nɛ́ɛ́ ɓěɔ̀ dyi. Wa mɛ dyi ḿ gbo. Ɓěǐn ɖá ɓɛ́ ɓě ké wa dyí ɓàɖàìn, sepóɛɖé wa mɔ̀ nyɔ mu Gèɖèpɔ́ɔ̀ kã́á-ɓòɖòɔ̀ kɔ̃̀ùn. 15Ḿ cɛ̃ ɓě jǎà gbo, nyɔ mɔ̀ nyɔ ɓɛ́ ɔ se wɔ̃́ ɓɛ́ Gèɖèpɔ́ɔ̀ ké ɔ wuɖuí kɔ̃̀ kà dyú-gbɔ́ɔ́ wɔ̃́à kɛɛ, nìí, ɔ se ɖé Gèɖèpɔ́ɔ̀ kã́á-ɓòɖòɔ̀ kɔ̃ muɛ́ mu fɔɔ.” 16Ké ɔ gbèɖèìn ma dyú mɛ́nɛ́ɛ́ ɓěɔ̀ hwòɖǒ, ké ɔ dè ma wa sɔ̃ dúún, ké ɔ po ma wa mana kɔ̃.
Gàa-dyù gmɔ̀ bã-bã ɖò jè
(Máfíò 19:16-30; Ɖúù 18:18-30)
17Ti Jízɛ̀ ɖǎ ma hwìè xwíníín kpáa, gàa-dyù gmɔ̀ ɖò dyà ma ɔ gbo peɖeɛ, ké ɔ taɓa kɔ́-dù hwuɖu ɓó ɔ dyúa. Ké ɔ diè ma ɔ dyi, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, mɔ̀ kɔ̃̀ kpeɖe nɔ̀mɔ̀à dyíin nyɛɛ, ɖɛ́ nɔ̀mɔ̀ dyíin ḿ mɛ nyu, ɓɛ́ ḿ ké sè-ná-sèɛ̀ fɛ̀ɛ̀ ɓéɖéɛ́?”
18Ké Jízɛ̀ jǔ ma ɔ gɔ̃̌, ké ɔ ɖá, “Ɖɛ́ kɔ̃̀ jè m̀ ɖáìn ḿ nyɔ kɔ̃̀ kpeɖe nɔ̀mɔ̀ dyíin nyɛɛ kɛ́? Nyɔ ɖòɛ̀ kpeɖe se dyíin nɔ̀mɔ̀, ɔ sèìn Gèɖèpɔ́ɔ̀ ɖòùn. 19M̀ dyuò gma ɓěɔ̀ dyí. Ɓě ɖò ní ɖá ɓɛ́ ɓě ké kú ɖáɓá. Ɓě ɖò ní ɖá ɓɛ́ ɓě ké gmaɖe po. Ɓě ɖò ní ɖá ɓɛ́ ɓě ké dyíɖí. Ɓě ɖò ní ɖá ɓɛ́ ɓě ké seɛ̀-zàse nyu. Ɓě ɖò ní ɖá ɓɛ́ ɓě ké ɖɛ ɖò dyí ɖú kpoɖo-kà. Dyé m̀ ɖe kè m̀ ɓǎ kpéín.”
20Hwɛ̀ ké gàaɔ̀ cɛ̃ɛ ma Jízɛ̀ gbo, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, ḿ ɖúó gma séín ɓěɛ̀ dyi kpɔ̃uń dyí sɔ̀ìn ɖé ní dyú-gbɔ́ɔ́ ɓìɖìɛ.”
21Ké Jízɛ̀ gmɔ̀ ma gàa-dyù gmɔ̀ɔ̀ dya, ké ɔ ɖɛ̀ɓɛ̀ ma ɔ mú, ké ɔ cɛ̃ɛ ɔ gbo, ké ɔ ɖá, “M̀ ɓéɖé ɖɛ dyúáɖò m̀ kéɛ nyu ke. Mu, ɓɛ́ m̀ ké ɖɛ séín ɓě ɓɛ́ m̀ ɓéɖéɛɛ peɖe, ɓɛ́ m̀ ké wíɖíɔ̀ gǎ-dyé-nyɔ̀ ɓě nyí. Nìí, nì mu dyi-dè-ɖɛ̀ ɓéɖéìn ɖé dyɔún. Ké m̀ mɛ dyi, ɓɛ́ ḿ kè mɔ̀ ké mú naìn.” 22Ti Jízɛ̀ cɛ̃ɛ ma náa kɛɛ, gàaɔ̀ hwòɖǒ zi ma ɖé ɖei kpáuń mìɔ, ké ɔ mu ma ɔ ɖɛ, sepóɛɖé ɔ bã ma ní mìɔ.
23Ké Jízɛ̀ gmɔìn ma dyi, ké ɔ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Ɔ mu mú kàmàǔn ziìn ɓɛ́ bã-nyɔ̀ ɖò ké ɖé Gèɖèpɔ́ɔ̀ kã́á-ɓòɖòɔ̀ kɔ̃ mu.” 24Ké ɔ ɖeín-nà-nyɔ̀ ɓěɔ̀ giniìn ma dyi ɓó wuɖu ɔ cɛ̃à kɛɛ jè. Ɔ jèɛɛ, Jízɛ̀ cɛ̃ɛ ma wa gbo ɖe, ké ɔ ɖá, “Dyú ɓě, ɔ kàmà mú ɓɛ́ nyɔ ké ɖé Gèɖèpɔ́ɔ̀ kã́á-ɓòɖòɔ̀ kɔ̃ mu. 25Ɔ kàmà mú ɓɛ́ bã-nyɔ̀ ké ɖé Gèɖèpɔ́ɔ̀ kã́á-ɓòɖòɔ̀ kɔ̃ mu, ké ɔ zi ɓɛ́ sǒ-nì-gbu-kɔ̃ún ké taɓa-ɖɔ-ɓì mú cɛ̃̀ìn nyɛɛ dyí.”
26Ké ɔ ɖeín-nà-nyɔ̀ ɓěɔ̀ zi ma dyi giniɛ̌n mìɔ, ké wa cɛ̃ìn cɛ̃̀ìn ma gbo, ké wa ɖá, “Ɔ dyi ná nìǐn, nìí, nyɛ́ ɓɛ́ìn póɛ kɛ́?”
27Ké Jízɛ̀ gmɔ̀ ma wa dya, ké ɔ ɖá, “Nyɔǔn-dyù se ɖɛ nìà kɛ nyuɛ ɓɛ́ìn, kɛɛ Gèɖèpɔ́ɔ̀ ɓɛ́ìn ɖɛ séín nyuɛ.”
28Hwɛ̀ ké Píɖɛ̀ cɛ̃ɛ ma ɔ gbo, ké ɔ ɖá, “Gmɔ̀ nɔ̄, à mɔ̀ùn ɖǎ ɖɛ séín dyi táà, ké à ɖǎ m̀ kíɖíí sí.”
29Ké Jízɛ̀ ɖá, “Ḿ cɛ̃ ɓě jǎà gbo, nyɔ ɖò dyi ɔ gbǒ ɓě mɔɔ ɔ ɖíí-gàà ɓě mɔɔ ɔ ɖíí-màà ɓě mɔɔ ɔ ɖe mɔɔ ɔ ɓǎ mɔɔ ɔ dyú ɓě mɔɔ ɔ pá ɓě dyi táà ɓó ní jè ɔ kè ɓó bɔ̃̌ nɔ̀mɔ̀ dyíinɔ̀ jè ní, 30nìí, ɔ mu ɖɛ ɓě nì ná kɛɛ dú hɔ̃dɛ̀ɖɛ̀ ɖò dyéìn ɖe nɔ̄ tiɛ̀ mú. Ɖɛ ɓěɔ̀ hwɔìn kà gbǒ kè ɖíí-gàà kè ɖíí-màà kè ɖe kè dyú ɔ kè pá ɓě. Ké nyɔǔn mu ɔ gǎ dyéìn, kɛɛ ɖé mánáín ní, ɔ mu sè-ná-sèɛ̀ fɛ̀ɛ̀ ɓéɖéìn. 31Nyɔ pàɖǎ nìà dyúa ɓó kàǔn wɛ̃ɛ mu ɖe ziìn ɖé ɓóɖó ɖìè nìà dyiɛń nyɛɛ kɔ̃, ké nyɔ pàɖǎ sèà ɖe ɓó kàǔn wɛ̃ɛ mu dyúa ziìn ɖé ɓóɖó ɖìè nìà dyiɛń nyɛɛ kɔ̃.”
Jízɛ̀ cɛ̃ɛ kpa tã nììn kà ɔ mu mɛ́ìn nyɛ
(Máfíò 20:17-19; Ɖúù 18:31-34)
32Wé ɖòɛ̀ ɓaɖaa, Jízɛ̀ kè nyɔ ɓě nì ma kà ɓó ɔ gboɛɛ nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú muɛń, ké Jízɛ̀ nì ma wa dyúa. Dĩin-dɔ̃ kpɔ̃ ma ɔ ɖeín-nà-nyɔ̀ ɓěɔ̀ kɔ̃, ké nyɔ tɔ̀ɔ̀ ɓě ɓɛ́ wa sí ma ɔ ɖeín nyɛɛ fɛ̃̀ìn ma. Ɔ kpa ma ɔ ɖeín-nà-nyɔ̀ ɓaɖa-bùè sè sɔ̃́ ɓěɔ̀ dà ɖò ɖe, ké ɔ nì ma ɖɛ mu ma ɔ gbo kpáùn wɛ̃ɛ wa gbo cɛ̃iń. 33Ɔ ɖá, “Ɓě gmɔ̀ nɔ̄, ɓěà nì ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú muɛń, ké wa mu mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ xwaún dyi poùn, ké wa mu ḿ zaa kpɔ̃̀ìn kà ɓɛ́ ḿ ɓéɖé ḿ ké mɛ́ɛ, ké wa mu ḿ ɓóɖó-dù kà kò ɖò ɓěɛ̀ nyɔ ɓěɔ̀ xwaún dyi poùn, 34ké wa mɔ̀ùn mu ḿ dyɔ́ ɓaɖaùn, ké wa mu ḿ tɔ̃ɔ dya poùn, ké wa mu ḿ gbàtò ɓàɖàìn, ké wa mu ḿ ɖáɓáùn. Kɛɛ wé tã dyi zi ní, nìí, ní mu gĩɔ wóɖóùn.”
Jĩ́ìn kè Jɔ̃́ɔ́ɛ̀ zɔ̀ɔ̀-ɖɛ̀
(Máfíò 20:20-28)
35Wé ɖòɛ̀ ɓaɖaa, Jĩ́ìn kè Jɔ̃́ɔ́ mɔ̀à Zɛ́ɓìɖíìɛ̀ dyú-gàà ɓěɔ̀ kɛɛ dyi ma Jízɛ̀ gbo, ké wa ɖá, “Nyɔ-ɖɛ-tɛ̀mɛ̀ìn-nyɔ̀, à mɔ́ ɖɛ à dyià m̀ gbo cɛ̃ìn nyɛɛ, ɓɛ́ m̀ kéɛ à bìì nyu.”
36Ké Jízɛ̀ diè ma wa dyi, ké ɔ ɖá, “Ɖɛ́ ɓě mɔ́ ɓɛ́ ḿ ké ɓě bìì nyuɛ́?”
37Ké wa cɛ̃ɛ ma ɔ gbo, ké wa ɖá, “Nyuɛ ɓɛ́ à ɖò ké ɖé m̀ ɖiaún dya dèɖě, ɓɛ́ ɖò ké ɖé m̀ kunuaún dya dèɖě ɖé nì dĩ́ín-dĩ̀ìnɔ̀ mú.”
38Kɛɛ Jízɛ̀ cɛ̃ɛ ma wa gbo, ké ɔ ɖá, “Ɖɛ ɓě nìà zɔ̀ǔn wɛ̃ɛ, ɓě seɛ dyí dyuò. Ɓě ɓɛ́ìn gǎ-kòpò ɓɛ́ ní muà mú náìn nyɛɛ mú náìne? Ɓě ɓɛ́ìn níɔ ɓɛ́ ní muà kpáùn wɛ̃ɛ ná níɔ kpáae?”
39Ké wa ɖá, “À ɓɛ́ìn nyuɛ.”
Ké Jízɛ̀ cɛ̃ɛ ma wa gbo, ké ɔ ɖá, “Ɓě mu ní gǎ-kòpòɔ̀ mú náìn jǎà, ké níɔ ɓɛ́ ní muà kpáùn wɛ̃ɛ, ɓě mu ná ɖò kpáùn. 40Kɛɛ ḿ se kpé ɓéɖé ɓɛ́ ḿ ké nyɔ ké ḿ ɖiaún dyi kòɛ kè nyɔ ké ḿ kunuaún dyi kòɛɛ gã. Nyɔ ɓě ɓɛ́ wa mu pá ɓě nìà kɛ kɔ̃̀ùn wɛ̃ɛ mɔ̀ nyɔ ɓě kɔ̃̀ bìì Gèɖèpɔ́ɔ̀ ɖǎ wa ti dyéìn nyɛ.”
41Ti ɓɛ́ ɖeín-nà-nyɔ̀ ɓaɖa-bùè tɔ̀ɔ̀ ɓěɔ̀ wɔ̃́ ma ɖɛ nìà kɛɛ, wa kpáìn ma Jĩ́ìn kè Jɔ̃́ɔ́ dyoɖoún. 42Ké Jízɛ̀ ɖá ma wa séín, ké ɔ cɛ̃ɛ ma wa gbo, ké ɔ ɖá, “Ɓě dyuò kà ɓóɖó-dù kà kò ɖò ɓěɛ̀ kã́á ɓěɔ̀ kɔ̃̀ wa wuɖuí ɖé ɖɛ séín mú, ké waà gɔ̌mànà-nyɔ̀ ɓěɔ̀ kpɔ̃ wa kànàǎ-kà kɛ. 43Ɔ se ɓéɖé ɓɛ́ ɔ ké ná nì ɖé ɓě hwìɛ̀. Kɛɛ ɔ jǔ ké ɓě ɖò dyi nyɔ vɛ̀nɛ̀ jǔɛ mɔ́ ní, ɔ mɛ mɔ̀ ɓěɛ̀ gbo-nì-nyɔ̀. 44Ɓě ɖò dyi mɔ́ ɓɛ́ ɔ ké nyɔ vɛ̀nɛ̀ jǔ ɖé ɓě séín hwìɛ̀ ní, nìí, ɔ mɛ mɔ̀ nyɔǔn séín gǐì. 45Sepóɛɖé mɔ̄ Nyɔǔn-dyùɛ̀ Dyú-gààɔ̀ se dyi, ɓɛ́ nyɔ ɓě ké ḿ bìì kũ̀à nyu, kɛɛ ḿ dyi, ɓɛ́ ḿ ké wa bìì kũ̀à nyu, ɓɛ́ ḿ ké ní fɛ̀ɛ̀ɔ̀ tò, ɓɛ́ ɔ ké nyɔ pàɖǎ mú-gbǎàìn-ɖɛ̀ jǔ.”
Jízɛ̀ kánáìn Bátòméà ɓɛ́ ɔ kpè ma dyéɖéín dyiɛɛ dyi
(Máfíò 20:29-34; Ɖúù 18:35-43)
46Sɔ̀ìn ɓóɛ gboɛɛ, Jízɛ̀ kè ɔ ɖeín-nà-nyɔ̀ ɓěɔ̀ nyini ma ɖé Jɛ́ɖèkóò-hwɔ̀ɖɔ̀ɔ̀ mú. Ti ɓɛ́ wa nìǎ ma ziɛń nyɛɛ, nyɔ kúɖúú ɓě sí ma wa kíɖíí. Gàa ɖò mɔ̀ Bátòméà ɓɛ́ ɔ mɔ̀ ma dyéɖéín-dyi-kpè-nyɔ̀ kɛɛ kò ma ɓó hwìèɔ̀ gbìǐ dyi. Ɔ mɔ̀ ma Tòméàà dyú-gàà. 47Ti ɓɛ́ ɔ wɔ̃́ɔ ma kà ɓɛ́ ɔ mɔ̀ Jízɛ̀ sɔ̀ìn Názɛ̀ɖɛ̀-hwɔ̀ɖɔ̀ɔ̀ múɛɛ, ɔ ɖú ma mú páná kpàǐ, ké ɔ ɖá, “Jízɛ̀, mɔ̀ mɔ̀à Dèɓéɛ̀ Dyú-gààɔ̀ kɛɛ, dyé ḿ wìǐn.”
48Ké nyɔ pàɖǎ po ma ɔ ɓɔ́í. Wa cɛ̃ɛ ma ɔ gbo, ɓɛ́ ɔ ké gìɖìǐ nì. Kɛɛ dyɛ̌ɛ̀ ɔ pánáá ma mú ɖe mìɔ, ké ɔ ɖá, “Dèɓéɛ̀ Dyú-gàà, dyé ḿ wìǐn.”
49Ké Jízɛ̀ nyànà ma dyi, ké ɔ ɖá, “Ɓě ɖá ɔ.”
Ké wa ɖá gàa kpè dyéɖéín dyiɔ̀, ké wa cɛ̃ɛ ma ɔ gbo, ké wa ɖá, “Ku hwòɖǒ, ɓɛ́ m̀ ké dyí sɔ̀. Jízɛ̀ nì m̀ ɖáuń.”
50Ké gàaɔ̀ po ma ɔ kɔ̃in-gba-ɖɔ̀ɔ̀ xwáɖáún, ké ɔ wã ma ɓíɖíi, ké ɔ dyi ma Jízɛ̀ gbo.
51Ké Jízɛ̀ diè ma ɔ dyi, ké ɔ ɖá, “Ɖɛ́ nì mɔ́ ɓɛ́ ḿ ké m̀ bìì nyuɛ́?”
Ké gàa kpè dyéɖéín dyiɔ̀ ɖá, “Ɓɔ̌ɔ̀, nyuɛ ɓɛ́ ḿ ké dyi dyé.”
52Ké Jízɛ̀ cɛ̃ɛ ma ɔ gbo, ké ɔ ɖá, “Mu m̀ ɖɛ. Nì hwìɖǐǐ-taɓa-taɓaɔ̀ ɖǎ m̀ dyi kánáìn.” Wàɖà kɛɛ, ɔ dyé ma dyi, ké ɔ sí ma Jízɛ̀ kíɖíí ɖé hwìèɔ̀ kɔ̃.
Currently Selected:
Máà 10: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
