Máfíò 27

Wa kpa Jízɛ̀ Páɖè dyúa

(Máà 15:1; Ɖúù 23:1-2; Jɔ̃́ɔ́ 18:28-32)

1Ti ɓɛ́ zɔ̃ ɖǎ ma zɔ̃ɛɛ, sáa-zà-nyɔ̀ kpa ɖɛ ɓěɔ̀ kè Júù-nyɔ̀ vɛ̀nɛ̀ ɓěɔ̀ poìn ma wuɖu dyí ɓá Jízɛ̀ jè dyí, ɓɛ́ wa ké ma ɔ ɖáɓá. 2Wa sã ma ɔ, ké wa kpa ma ɔ, ké wa zàìn ma ɔ Páɖè ɓɛ́ ɔ mɔ̀ ma Wóɖóùn-gɔ̀mànà kɛɛ xwáɖáún.

Júdàà mɛ́ jè

(Àpɔ́sò 1:18-19)

3Ti ɓɛ́ Júdà mɔ̀ nyɔ peɖe ma kà Jízɛ̀ kɛɛ dyé kà zaa ɖǎ ma Jízɛ̀ kpɔ̃ kɛɛ, ɔ kpá ma wìǐn, ké ɔ kpa ma séɓàɖà-pĩ̀à kpáɖá-nyɔ ɓaɖa-bùèɔ̀ ɖé sáa-zà-nyɔ̀ kpa ɖɛ ɓěɔ̀ kè Júù-nyɔ̀ vɛ̀nɛ̀ ɓěɔ̀ gbo ɖe. 4Ké ɔ ɖá, “Ḿ ɖǎ nàmàǔn nyu, sepóɛɖé ḿ peɖe gàa ɓɛ́ ɔ se ɖɛ gbà ɖò nyuɛ, ké wa muá ɔ ɖáɓáùn.”

Ké wa ɖá, “À se ɖé kɔ̃̀. Ɔ mɔ̀ nì kpé.”

5Púɛɛ, Júdà wáɖá ma wíɖíɔ̀ ɖé Gèɖèpɔ́ɔ̀ gbǒɔ̀ múin, ké ɔ sɔ̀ ma ɖé wa gbo dyí, ké ɔ mu, ké ɔ beè ma ɔ mìɔùn.

6Sɔ̀ìn ɓóɛ gboɛɛ, sáa-zà-nyɔ̀ kpa ɖɛ ɓěɔ̀ ɖú ma wíɖíɔ̀ dyí, ké wa ɖá, “Wíɖí nìà kɛ mɔ̀ nyɔmɔɔ-wìɖì. Ɔ se dyíin nɔ̀mɔ̀ ɓɛ́ à kéɛ wíɖí-dyi-dèìn-naínɔ̀ po.” 7Ké wa poìn ma hwìɖǐi, ké wa dɔ̃ ma wíɖíɔ̀ pá ɖò ɓɛ́ wa ɖáìn Mɛ-dyàà-mɛ-nyɔ̀ɔ̀ Pá kɛɛ mú, ɓɛ́ wa ké ɖé ɖéè ɓě dyóɖóún zàìn. 8Ɔ jèɛɛ, wa ɖáìn páɔ̀ Nyɔmɔɔ-pà ke ɓó zɛ̃̌ɛ̀.

9Púɛɛ, ɖɛ ɓɛ́ kpáá-ɖɛ̀-cɛ̃-nyɔ̀ Jɛ̀ɖèmádyà cɛ̃ zɔ̃̌ɔ̀ kɛɛ kpá ma jǎà. Ɖɛ ɔ cɛ̃ zɔ̃̌ɔ̀ kɛɛ kɛà kɛ̀. Ɔ ɖá, “Wa ɖú ma séɓàɖà-pĩ̀à kpáɖá-nyɔ ɓaɖa-bùèɔ̀ dyí. Ɔ mɔ̀ wíɖí jĩ̀ kà ɓɛ́ Éézùɖùɛ̀-nyɔ̀ ɓěɔ̀ wɔ̃́ ɓɛ́ wa ké ma pɛ́ɛ̀ ɓó ɔ jèɛ. 10Ké wa dɔ̃ wíɖíɔ̀ mɛ-dyàà-mɛ-nyɔ̀ɔ̀ páɔ̀ mú kà ɓɛ́ Bounɓoɔ̀ nyuɛ ma ḿ gbo cɛ̃ɛ kɛ.”

Páɖè diè Jízɛ̀ dyi

(Máà 15:2-5; Ɖúù 23:3-5; Jɔ̃́ɔ́ 18:33-38)

11Ti Jízɛ̀ nyànà ma ɓó Páɖè mɔ̀à gɔ̌mànàɔ̀ kɛɛ dyúa dyiɛɛ, Páɖè diè ma ɔ dyi, ké ɔ ɖá, “Mɔ̀ mɔ̀à Júù-nyɔ̀ ɓěɔ̀ kã́áɔ̀ kɛɛ̀?”

Ké Jízɛ̀ cɛ̃ɛ ma ɔ gbo, ké ɔ ɖá, “Mɔ̀ mɔ̀ nyɔ cɛ̃ɛ.” 12Kɛɛ ti ɓɛ́ sáa-zà-nyɔ̀ kpa ɖɛ ɓěɔ̀ kè Júù-nyɔ̀ vɛ̀nɛ̀ ɓěɔ̀ cɛ̃ɛ kà ɓɛ́ Jízɛ̀ ɖǎ ɖɛ gbà nyu kɛɛ, Jízɛ̀ se ma ɖɛ ɖò cɛ̃.

13Hwɛ̀ ké Páɖè cɛ̃ɛ ma ɔ gbo, ké ɔ ɖá, “Ɖɛ jĩ̀ kà kɔ̃̀ nyu jè wa nìà m̀ kɔ̃ún cɛ̃iń nyɛɛ, mɔ̀ǔn wɔ̃́ waà?”

14Kɛɛ Jízɛ̀ se ma ɖé wuɖu zà fɔɔ. Ɖɛ nìà kɛ fɔ̀nɔ̀ìn ma Páɖè wɔ̃ mìɔ.

Wa ɖá Jízɛ̀ ɓéɖé ɓɛ́ ɔ ké mɛ́

(Máà 15:6-15; Ɖúù 23:13-25; Jɔ̃́ɔ́ 18:39–19:16)

15Zĩ̀ìn-Kɔ̃in-hwɔ̀ɔ̀ ti séín ní, gɔ̌mànàɔ̀ buɛ̀ ma kpɔɖɔ-ɖeín-nì-nyɔ̀ ɖò ɓɛ́ nyɔ kúɖúú ɓěɔ̀ mɔ́ ɓɛ́ ɔ ké ma buɛ̀ kɛɛ ní, sepóɛɖé ɔ mɔ̀ ma waà kpeɖe. 16Ɔ nì ná kɛɛ, gàa ɖò ɓɛ́ ɔ nì ma kpɔɖɔ ɖeín kɔ̃̀ nyɛ́nɛ́ mɔ̀ Bàwáɖáɓà#27:16 Báɓò ɖíɛ́ ɓě ɖá, “Jízɛ̀ Bàwáɖáɓà.” kɛɛ nì ma ɓó. Nyɔǔn séín dyuò ma ɔ jè. 17Ɔ jèɛɛ, ti nyɔ kúɖúú ɓěɔ̀ ɖǎ ma dyí poìn nyɛɛ, Páɖè diè ma wa dyi, ké ɔ ɖá, “Nyɛ́ ɓě mɔ́ ɓɛ́ ḿ ké ɓě bìì buɛ̀ kɛ́? Ɓě mɔ́ ɓɛ́ ḿ ké ɓě bìì Bàwáɖáɓà buɛ̀, mɔɔ ɓě mɔ́ ɓɛ́ ḿ ké Jízɛ̀ wa ɖáìn Kɛ́ɖɛ́ìɔ̀ kɛɛ buɛ̀ɛ̀?” 18Páɖè dyuòɛ̀ ma dyí jɛ́ɛ́ kà ɓɛ́ wa po ma Jízɛ̀ ɔ xwaún dyi, sepóɛɖé wa dyéìn ma ɔ hwɛ̀nɛ̌ jèɛ.

19Ti ɓɛ́ Páɖè kò ma ɖé zaa-cɛ̃̀ìn-naínɔ̀ dyiɛɛ, ɔ gmàà tò ma ɖé ɔ gbo wuɖu, ké ɔ ɖá, “Táà dyí-sɛ́ɖɛ́ìn-gàà nìà kɛ jè dyi, sepóɛɖé ɖɛ ḿ dya máaǔn ɓá gàa nìà kɛ jè dyíɛɛ nyùìn ḿ fã̀à mìɔ.”

20Ɔ nì ná kɛɛ, sáa-zà-nyɔ̀ kpa ɖɛ ɓěɔ̀ kè Júù-nyɔ̀ vɛ̀nɛ̀ ɓěɔ̀ po ma nyɔ kúɖúú ɓěɔ̀ pɛ́í, ɓɛ́ wa kéɛ ma Páɖè gbo cɛ̃, ɓɛ́ ɔ ké ma Bàwáɖáɓà buɛ̀, ɓɛ́ ɔ ké ma Jízɛ̀ ɖáɓá. 21Páɖè diè ma wa dyi, ké ɔ ɖá, “Nyɔ sɔ̃́ ɓě nìà kɛɛ, waà nyɛ́ ɓě mɔ́ ḿ ké ɓě bìì buɛ̀ kɛ́?”

Ké wa zà ma ɖé wuɖu, ké wa ɖá, “Ɔ mɔ̀ Bàwáɖáɓà.”

22Ké Páɖè diè ma wa dyi ɖe, ké ɔ ɖá, “Nìí, ɖɛ́ ḿ mɛ nyùìn Jízɛ̀ wa ɖáìn Kɛ́ɖɛ́ìɔ̀ kɛɛ múɛ́?”

Ké wa séín ɖá, “Kɔ̀ìn ɔ kɔ́ɖɔ́sì kɔ̃in.”

23Ké Páɖè diè ma wa dyi ɖe, ké ɔ ɖá, “Ɖɛ́ mɔ̀ ɖɛ gbà ɓɛ́ ɔ ɖǎ nyuɛ́?”

Kɛɛ wa páná ma mú, ké wa ɖá, “Kɔ̀ìn ɔ kɔ́ɖɔ́sì kɔ̃in.”

24Páɖè dyéɛ ma kà ɔ se ma ɖɛ ɖò nyuɛ ɓɛ́ìn nyɛ, ké ɔ nì ma kà wa nìǎ ma gɔ̌mànàɔ̀ gbo vɔ̃uń wɛ̃. Ɔ jèɛɛ, ɔ ɖú ma ní dyí, ké ɔ dèɖè ma xwai ɓó nyɔǔn séín dyúa, ké ɔ ɖá, “Ḿ se gàa nìà kɛ nyɔmɔɔ̀ kpa dyí ɖúɛ mu. Ɔ mɔ̀ ɓěɛ̀ kpé.”

25Ké nyɔ kúɖúú ɓěɔ̀ zà ma ɖé wuɖu, ké wa ɖá, “À kè à dyú ɓě mɛ ɖú ɔ nyɔmɔɔ̀ kpa dyí.”

26Ké Páɖè buɛ̀ ma wa bìì Bàwáɖáɓà. Ké ɔ nyuɛ ké ɔ sójà ɓěɔ̀ ɓàɖàìn ma Jízɛ̀ gbàtò, ké ɔ zàìn ma ɔ wa xwáɖáún, ɓɛ́ wa ké ma ɔ kɔ́ɖɔ́sìɔ̀ kɔ̃in kɔ̀ìn.

Sójà ɓěɔ̀ ɓaɖa Jízɛ̀ dyɔ́

(Máà 15:16-20; Jɔ̃́ɔ́ 19:2-3)

27Ké Páɖèɛ̀ sójà ɓěɔ̀ kpa ma Jízɛ̀ ɖé gɔ̌mànà-gbòɔ̀ mú, ké sójà kúɖúú ɓěɔ̀ poìn ma ɔ ɖei dyí. 28Ké wa zà ma ɔ ɖɔún, ké wa po ma ɔ ɖɔ zĩ-zã ɖò mú. 29Ké wa fíá ma wí-gbɛ̌ɛ̀ ɖò, ké wa dèɛ̀n ma ɔ dú. Ké wa po gɛ̃̀ǐn-pìǒ ɖò ɔ ɖiaùn-xwàɔ̀ mú. Ké wa taɓa ma kɔ́-dù hwuɖu ɓó ɔ dyúa. Ké wa ɓaɖa ma ɔ dyɔ́, ké wa ɖá, “Júù-nyɔ̀ ɓěɔ̀ kã́á, m̀ mɛ kɔ̃̀ à wuɖuí kánáá pū.” 30Ké wa po ma ɔ tɔ̃ɔ dya, ké wa ɖú ma gɛ̃̀ǐn-pìǒɔ̀ dyí, ké wa nàmàìn ma ɔ dú. 31Ti ɓɛ́ wa ɖǎ ma ɔ dyɔ́ ɓaɖaa hwɔɛɛ, wa zà ma ɔ ɖɔ zĩ-zãɔ̀ mú, ké wa po ma ɔ mìɔùn nììn ɖɔɔ̀ ɔ mú ɖe. Ké wa kpa ma ɔ, ɓɛ́ wa ké ma ɔ kɔ́ɖɔ́sìɔ̀ kɔ̃in kɔ̀ìn.

Wa kɔ̀ìn Jízɛ̀ kɔ́ɖɔ́sìɔ̀ kɔ̃in

(Máà 15:21-32; Ɖúù 23:26-43; Jɔ̃́ɔ́ 19:17-27)

32Ti ɓɛ́ wa nì ma muɛń nyɛɛ, wa dyɛ̀ìn ma gàa ɖò ɓɛ́ ɔ sɔ̀ìn ma ɖé Sàwíɖíìn-hwɔ̀ɖɔ̀ɔ̀ mú, kɔ̃̀ nyɛ́nɛ́ mɔ̀ ma Sã́ɓò kɛ. Ké wa kpɔ̃ ma gàaɔ̀, ɓɛ́ ɔ ké ma Jízɛ̀ɛ̀ kɔ́ɖɔ́sìɔ̀ ɓéɖé. 33Ké wa nyini ma pá ɖò ɓɛ́ wa ɖáìn Gɔ̀gɔ́tà kɛɛ mú. Gɔ̀gɔ́tà-nyɛ̀nɛ̀ɔ̀ xwíníín mɔ̀ nyɔǔn-dù-kpà. 34Wa nyí ma Jízɛ̀ wã́ìn caìn fɔ́-ɖáɓá-kũ̀ùn ɖò, kɛɛ ti ɓɛ́ ɔ dɔ̃̌ɔ ma wɔ̃ kɛɛ, ɔ seɛ ma ná.

35Ti ɓɛ́ wa ɖǎ ma ɔ kɔ́ɖɔ́sìɔ̀ kɔ̃in kɔ̀ìn nyɛɛ, wa nyu ma gbo-ɖàɓàìn-ɖɛ̀, ɓɛ́ wa ké ma ɔ ɖɔɔ̀ wa mìɔùn múin geìn. 36Ɔ ɖǎ ma ná nìɛɛ, wa kò ma dyi, ké wa gmɔ̀ ma ɔ dya. 37Ké wa po ma céè-ɖɛ̀ ɖò ɓá ɖɛ kɔ̃̀ jè wa kpɔ̃ ma kà ɔ kɛɛ jè dyíɛɛ ɓó kɔ́ɖɔ́sìɔ̀ dyéɖéín, ɓó ɔ kɔ̃in. Céè-ɖɛ̀ɔ̀ wuɖu ɖá, “Nyɔ nìà kɛ mɔ̀ Jízɛ̀ mɔ̀à Júù-nyɔ̀ ɓěɔ̀ kã́á kɛ.” 38Púɛɛ, wa kɔ̀ìn ma dyíɖíí-nyɔ̀ sɔ̃́ kɔ́ɖɔ́sì ɓě kɔ̃in ɖekè. Ɖò nì ma Jízɛ̀ ɖiaún, ké ɖò nì ma ɔ kunuaún.

39Ké nyɔ ɓě ɓɛ́ wa nì ma ziɛń nyɛɛ po ma ɔ wuɖu dyíin, ké wa ɓàɖàìn ma ɔ dúi, 40ké wa ɖá, “Mɔ̀ mɔ̀ nyɔ ké ma kà Gèɖèpɔ́ɔ̀ gbǒɔ̀ wáɖá, ɓɛ́ m̀ kéà po ɖe ɓó wé tã múɛɛ, póàǐn m̀ mìɔùn. Ɔ jǔ ké m̀ dyi Gèɖèpɔ́ɔ̀ Dyú-gààɔ̀ jǔ ní, sɔ̀ kɔ́ɖɔ́sìɔ̀ kɔ̃.”

41Kà dyúáɖòɔ̀ kǎà sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ ɔ kè Júù-nyɔ̀ vɛ̀nɛ̀ ɓěɔ̀ ɓaɖa ma ɔ dyɔ́, ké wa ɖá, 42“Ɔ póìn nyɔ kà kò ɖò ɓě, kɛɛ ɔ se ɔ mìɔùn póɛ̀n ɓɛ́ìn. Ɔ mɔ̀ Éézùɖùɛ̀-nyɔ̀ ɓěɔ̀ kã́áɔ̀. Ɔ mɛ sɔ̀ kɔ́ɖɔ́sìɔ̀ kɔ̃ ɓó kàǔn, nìí, à mu ɔ hwìɖǐǐ taɓaùn. 43Ɔ dè Gèɖèpɔ́ɔ̀ hwòɖǒ kɔ̃, ké ɔ ɖá ɔ mɔ̀ Gèɖèpɔ́ɔ̀ Dyú-gààɔ̀. Ɓěà mɛ dyéɛ kɛbì Gèɖèpɔ́ɔ̀ mu ɔ póìn ɓó kàǔn ní.”

44Ké dyíɖíí-nyɔ̀ ɓě ɓɛ́ wa kɔ̀ìn ma kà ɔ kè wa kɔ́ɖɔ́sì ɓěɔ̀ kɔ̃in nyɛɛ po ma ɔ wuɖu dyíin ɖekè.

Jízɛ̀ɛ̀ mɛ́ jè

(Máà 15:33-41; Ɖúù 23:44-49; Jɔ̃́ɔ́ 19:28-30)

45Ti ɓɛ́ dyóɖóɔ̀ ɖǎ ma dú-hwìɛ̀ kò kɛɛ, tíe kpɔ̃ ma ɓóɖó-kpàà dà séín tee, ké ɔ dyɛ̀ìn ma zii-dyòɖò-gbo-dyòɖòàǔn. 46Ti ɔ ɖǎ ma zii-dyòɖò-gbo-dyòɖòàǔn jǔɛɛ, Jízɛ̀ páná ma mú zoo, ké ɔ ɖá, “Íɖà, íɖà, ɖámà sàbáɖènì.” Ɔ xwíníín mɔ̀, “Ní Gèɖèpɔ́ɔ̀, ní Gèɖèpɔ́ɔ̀, ɖɛ́ kɔ̃̀ jè m̀ hwɛ̀à ḿ gboɛ́?”

47Ti nyɔ ɓě nyànà ma ɓó dyiɛɛ wɔ̃́ɔ ma kɛɛ, wa ɖíɛ́ ɓě ɖá, “Gàa nìà kɛ nì Ìɖáájɔ̀ ɖáuń.” 48Ké nyɔ dyúáɖò kpa ma peɖeɛ wàɖà, ké ɔ ɖú ma ɖɛ fɔ̀ì-fɔ̀ì ɖò dyí, ké ɔ dyíìn ma náá-ɖɛ̀ nya-nya ɖò ɖɛ fɔ̀ì-fɔ̀ìɔ̀ mú. Ké ɔ poɛ ma gɛ̃̀ǐn-pìǒ ɖò mánáín, ké ɔ tòɛ̀ ma Jízɛ̀ dyí, ɓɛ́ ɔ kéɛ ma mú nyɔ́.

49Kɛɛ nyɔ tɔ̀ɔ̀ ɓěɔ̀ ɖá, “Ɓěà fòìn, ɓɛ́ ɓěà kéɛ dyé, kɛbì Ìɖáájɔ̀ mu dyiìn, ɓɛ́ ɔ ké ɔ póìn ní.” 50Ké Jízɛ̀ páná ma mú zoo ɖe. Púɛɛ, ɔ zà ma hwòɖǒ dya.

51Wàɖà cá kɛɛ, faà-ɖɔ̀ ɓɛ́ ɔ ɓá ma ɖé Gèɖèpɔ́ɔ̀ gbǒɔ̀ mú dyiíɛɛ fá ma sɔ̀ìn ɖé dyií, ké ɔ sí ɓíɖíi. Ké ɓóɖó-kpàà túò ma dyi, ké sɔ́ɔ́-kpò ɓě fá ma mú. 52Ké xwɛ́-gmàà ɓě kaà ma wɔ̃, ké Gèɖèpɔ́ɔ̀-nyɔ̀ pàɖǎ ɓě ɓɛ́ wa ɖǎ ma mɛ́ kɛɛ wóɖó ma gĩɔ. 53Wa sɔ̀ ma waà gmàà ɓěɔ̀ mú, ké ti ɓɛ́ Jízɛ̀ ɖǎ ma gĩɔ wóɖó kɛɛ, wa mu ma ɖé Jùɖúsɛ̀ɖɛ̀ìn-hwɔ̀ɖɔ̀ mɔ̀à hwɔɖɔ hwɛ̀ǐn-hwɛ̀ǐnɔ̀ kɛɛ mú, ké nyɔ pàɖǎ dyé ma ɖé wa.

54Ti ɓɛ́ gàa ɓɛ́ ɔ kɔ̃̀ sójà hɔ̃dɛ̀ɖɛ̀ ɖò wuɖuíɛ kè ɔ sójà ɓě ɓɛ́ wa nì ma Jízɛ̀ dyí gmɔ̀ǔn wɛ̃ɛ dyé ma ɓóɖó-kpàà dyi túòɛ̀, ɔ kè ɖɛ tɔ̀ɔ̀ ɓě ɖǎ ma kà kpá kɛɛ, díɖí zi ma wa taɓauń mìɔ, ké wa ɖá, “Gàa nìà kɛ mɔ̀ Gèɖèpɔ́ɔ̀ Dyú-gààɔ̀ jǎà.”

55Màa pàɖǎ nì ma ɓó. Wa nyànà ma ɖéé ɖé nya dyi, ké wa nì ma ɖé gmɔ̀ǔn. Wa mɔ̀ nyɔ ɓě ɓɛ́ wa kè Jízɛ̀ ɖǎ ma mú naìn sɔ̀ìn ɖé Gáɖàɖíì-ɓòɖòɔ̀ kɔ̃, ké wa kpá ma ɔ gbo kɛ. 56Meɖé ɓɛ́ ɔ sɔ̀ ma ɖé Máɖèɖà-hwɔ̀ɖɔ̀ɔ̀ múɛ kè Meɖé ɓɛ́ ɔ mɔ̀ ma Jĩ́ìn kè Jòsé ɖe kɛ ɔ kè Meɖé ɓɛ́ ɔ mɔ̀ ma Zɛ́ɓìɖíìɛ̀ gmàà kɛɛ nì ma màa ɓěɔ̀ hwìɛ̀.

Wa zà Jízɛ̀ dyóɖóún

(Máà 15:42-47; Ɖúù 23:50-56; Jɔ̃́ɔ́ 19:38-42)

57-58Ti hwìo ɖǎ ma jǔɛɛ, bã-gàà ɖò ɓɛ́ ɔ sɔ̀ ma ɖé Áɖémàtíà-hwɔ̀ɖɔ̀ɔ̀ múɛɛ mu ma ɖé Páɖè gbo, ké ɔ zɔ̀ ma Jízɛ̀ɛ̀ xwɛ́ɔ̀. Gàaɔ̀ nyɛ́nɛ́ mɔ̀ ma Jòsé. Ɔ mɔ̀ ma Jízɛ̀ɛ̀ ɖeín-nà-nyɔ̀ ɓěɔ̀ ɖò ɖekè. Ké Páɖè cɛ̃ɛ ma, ɓɛ́ wa ké ma ɔ Jízɛ̀ɛ̀ xwɛ́ɔ̀ nyí. 59Jòsé ɖú ma xwɛ́ɔ̀ dyí, ké ɔ bĩìn ma ɔ ɖénì-ɖɔ̀ ɖìè ɖò dyi. 60Ké ɔ pɛ̃́ìn ma Jízɛ̀ɛ̀ xwɛ́ɔ̀ ɖé ɔ mìɔùn nììn ɓí ɓɛ́ ɔ ɖǎ ma ɓúɖú ɖé sɔ́ɔ́ ɖò dyéɖéín ɖie kɛɛ múin. Ké ɔ kiɖiò ma sɔ́ɔ́-kpò vɛ̀nɛ̀ ɖò, ké ɔ ɓáìn ma ɓíɔ̀ wĩín. Ké ɔ mu ma ɔ ɖɛ. 61Ɓó tia ɓaɖaa, Meɖé ɓɛ́ ɔ sɔ̀à ɖé Máɖèɖà-hwɔ̀ɖɔ̀ɔ̀ múɛ kè Meɖé ɖò ɖe xwɛ̃́ìn ma ɓó xwɛ́-gmààɔ̀ bũ̌in.

Wa gmɔ̀ xwɛ́-gmààɔ̀ dyí

62Wéɔ̀ nyɔ kɔ ma ɓó dyí, ɓɛ́ ɔ mɔ̀ Gèɖèpɔ́ɔ̀ fɔ̀-wèɔ̀ kɛɛ ɓaɖaa, sáa-zà-nyɔ̀ kpa ɖɛ ɓěɔ̀ kè Fáɖòsíì-nyɔ̀ ɓěɔ̀ mu ma ɖé Páɖè gbo, 63ké wa ɖá, “Ɓɔ̌ɔ̀, ɖɛ nyɔ-cá-nyɔ̀ nìà kɛ cɛ̃ ma ti ɓɛ́ ɔ séè ma mɛ́ keɛɛ ɖǎ à hwìɖǐi dyi. Ɖɛ ɔ cɛ̃ ma kɛɛ kɛà kɛ̀. Ɔ ɖá, ‘Wé tã ɖǎ zi ní, nìí, ní mu gĩɔ wóɖóùn.’ 64Ɔ jèɛɛ, cɛ̃ɛ ɓɛ́ wa ké xwɛ́-gmààɔ̀ dyí gmɔ̀ nɔ̀mɔ̀ dyíin, ɓɛ́ ɔ ké wéɔ̀ tã nììnɔ̀ kɔ̃ nyini hwɛ̀. M̀ mɛ nyuɛ náa, ɓɛ́ ɔ ɖeín-nà-nyɔ̀ ɓěɔ̀ ní kɔ̃̀ ɖà ɖé mu, ɓɛ́ wa ní kɔ̃̀ ɖà ɔ xwɛ́ɔ̀ dyí ɖú, ɓɛ́ wa ní kɔ̃̀ɔ̀ ɖà kpa. Wa dyiɛ náa nyu ní, wa muɛ nyɔǔn ɓě gbo cɛ̃ìn, ɓɛ́ wa ké níiń, ‘Ɔ ɖǎ gĩɔ wóɖó.’ Ké se hwɛ̀ìn-gbɔ nìà kɛ mu dyí ɓúáùn mìɔ ɓɛ́ ɔ ké ɔ kĩ́ín-kĩ́ínɔ̀ dyí zi.”

65Ké Páɖè cɛ̃ɛ ma wa gbo, ké ɔ ɖá, “Ɓě mɛ kpa sójà ɓě, ɓɛ́ wa ké xwɛ́-gmààɔ̀ dyí gmɔ̀. Ɓě mɛ mu, ɓɛ́ ɓě ké xwɛ́-gmààɔ̀ dyí gmɔ̀ nɔ̀mɔ̀ dyíin.”

66Ké wa mu ma, ké wa po ma sɔ̃-bɛ̃̀ ɓó sɔ́ɔ́-kpò ɓɛ́ wa kã̀ìn ma kà xwɛ́-gmààɔ̀ kɛɛ kɔ̃, ɓɛ́ nyɔ ɖò ní kɔ̃̀ɔ̀ ɖà kaà. Ké wa sè ma ɖé sójà ɓě, ɓɛ́ wa ké ma xwɛ́-gmààɔ̀ dyí gmɔ̀.

Currently Selected:

Máfíò 27: ƁB02

Highlight

Copy