Máfíò 26
26
Wa sɔ́ Jízɛ̀
(Máà 14:1-2; Ɖúù 22:1-2; Jɔ̃́ɔ́ 11:45-53)
1Ti ɓɛ́ Jízɛ̀ ɖǎ ma ɖɛ ɓě nìà kɛ cɛ̃ɛ hwɔɛɛ, ɔ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, 2“Wé sɔ̃́ dyi ziín, ɓě dyuòɛ̀ kà Zĩ̀ìn-Kɔ̃in-hwɔ̀ɔ̀ mu kpáùn wɛ̃. Ké wa mu mɔ̄ Nyɔǔn-dyùɛ̀ Dyú-gààɔ̀ nyɔǔn ɓě xwáɖáún zàìn, ɓɛ́ wa ké ḿ kɔ́ɖɔ́sì kɔ̃in kɔ̀ìn.”
3Púɛɛ, sáa-zà-nyɔ̀ kpa ɖɛ ɓěɔ̀ kè Júù-nyɔ̀ vɛ̀nɛ̀ ɓěɔ̀ poìn ma dyí ɖé Kádyáfà ɓɛ́ ɔ mɔ̀ ma sáa-zà-nyɔ̀ vɛ̀nɛ̀ɔ̀ kɛɛ gbǒɔ̀ dya. 4Ké wa poìn ma wuɖuí, ɓɛ́ wa ké Jízɛ̀ kpɔ̃ nyàà, ɓɛ́ wa ké ɔ ɖáɓá. 5Kɛɛ wa cɛ̃ɛ ma, ké wa ɖá, “Ɓěà ní nyuɛ hwɔɔ̀ pa-tìǐn, ɓɛ́ nyɔ ɓěɔ̀ ní kɔ̃̀ ɖà à gbo vɔ̃.”
Wa po Jízɛ̀ cáná dúún ɖé Bɛ́fènì-hwɔ̀ɖɔ̀ɔ̀ mú
(Máà 14:3-9; Jɔ̃́ɔ́ 12:1-8)
6Ɓó tia ɓaɖaa, Jízɛ̀ nì ma ɖé Sã́ɓò ɓɛ́ ɔ zà ma caà-wɛ̀ múɛɛ ɓíɖí-gbǒǔn ɖé Bɛ́fènì-hwɔ̀ɖɔ̀ɔ̀ mú. 7Ké màa ɖò dyi ma Jízɛ̀ gbo, ké ɔ dyà ma tɛ̀ɓɛ̀ɛ̌ ɓɛ́ wa nyùìn ma áɖàɓásà-sɔ̀ɔ̌ kɛ. Ké cáná nɔ̀mɔ̀ nyɔ́ún ɓɛ́ ɔ kpa wíɖí pàɖǎ kɛɛ dyí ma ɖé tɛ̀ɓɛ̀ɛ̌ɔ̀ mú. Ké màaɔ̀ púè ma cánáɔ̀ Jízɛ̀ dúún ɓó téɓèɖèɔ̀ gbɔ. 8Púɛɛ, ɔ ɖeín-nà-nyɔ̀ ɓěɔ̀ hwòɖǒ kpá ma ɖé ɖei mìɔ ti wa dyéɛ ma kɛ, ké wa cɛ̃ɛ ma, ké wa ɖá, “Ɖɛ́ kɔ̃̀ jè cáná nìà kɛ gbɔɔ̀à kà múɛ́? 9À ɓɛ́ìnɔ̌ má cánáɔ̀ wíɖí pàɖǎ pèɖèɛ̀n, ɓɛ́ à kéɔ́ wíɖíɔ̀ gǎ-dyé-nyɔ̀ ɓě nyí.”
10Kɛɛ Jízɛ̀ dyuò ɖɛ wa nì ma cɛ̃iń nyɛɛ dyí, ké ɔ diè ma wa dyi, ké ɔ ɖá, “Ɖɛ́ kɔ̃̀ jè ɓě nìà màa nìà kɛ fũ̀à-fṹá nyùɛ̌n nyɛ́? Ɔ ɖǎ ḿ ɖɛ zi dyíin nɔ̀mɔ̀ǔn wɛ̃ɛ dyí nyu. 11Sepóɛɖé gǎ-dyé-nyɔ̀ ɓěɔ̀ mu dà ɓě gbo nììn kánáá pū, kɛɛ ḿ se dà ɓě gbo nìɛ̌ mu kánáá pū. 12Ɖɛ ɔ nyuà kɛɛ mɔ̀, ɓɛ́ ɔ ké ní kpóɖó-dyùàɔ̀ ti dyéìn ɓóɛ dyóɖóún zà jè. 13Ḿ cɛ̃ ɓě jǎà gbo, ɓóɖó-kpàà dà séín ɓɛ́ wa mu bɔ̃̌ nɔ̀mɔ̀ dyíinɔ̀ jè zio mú pòìn nyɛɛ, ɖɛ ɓɛ́ màaɔ̀ ɖǎà nyuɛɛ, wa mu ɔ jè cɛ̃ìn ɖekè, ɓɛ́ màaɔ̀ jè ké nyɔǔn hwìɖǐi nì.”
Júdà mɔ́ ɓɛ́ ɔ ké Jízɛ̀ peɖe
(Máà 14:10-11; Ɖúù 22:3-6)
14Púɛɛ, Jízɛ̀ɛ̀ ɖeín-nà-nyɔ̀ ɓaɖa-bùè sè sɔ̃́ ɓěɔ̀ dyúáɖò kɔ̃̀ nyɛ́nɛ́ mɔ̀ Júdà Ɛ́sìkáɖìɔ̀ kɛɛ mu ma sáa-zà-nyɔ̀ kpa ɖɛ ɓěɔ̀ gbo, 15ké ɔ diè ma wa dyi, ké ɔ ɖá, “Ḿ dyi Jízɛ̀ ɓě xwáɖáún zàìn ní, ɖɛ́ ɓě mu ḿ nyíìn nyɛ́?” Ké wa gbɛ̌ìn ma séɓàɖà-pĩ̀à kpáɖá-nyɔ ɓaɖa-bùè dyí, ké wa nyíɛ ma ɔ. 16Sɔ̀ìn ɓó tia gboɛɛ, ɔ nì ma hwìè dyi mɔ́uń, ɓɛ́ ɔ ké ma Jízɛ̀ wa xwáɖáún zàìn.
Jízɛ̀ kè ɔ ɖeín-nà-nyɔ̀ ɓěɔ̀ ɖi Zĩ̀ìn-Kɔ̃in-hwɔ̀ɔ̀
(Máà 14:12-21; Ɖúù 22:7-13, 21-23; Jɔ̃́ɔ́ 13:21-30)
17Ɓó Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ wé kĩ́ín-kĩ́ínɔ̀ ɓaɖaa, ɖeín-nà-nyɔ̀ ɓěɔ̀ mu ma Jízɛ̀ gbo, ké wa diè ma ɔ dyi, ké wa ɖá, “Dɛ̌ m̀ mɔ́ ɓɛ́ à ké Zĩ̀ìn-Kɔ̃in-hwɔ̀ɔ̀ naɓaà ɓó m̀ bììɛ́?”
18Ké ɔ cɛ̃ɛ ma wa gbo, ké ɔ ɖá, “Ɓě mu ɖé gàa kɔ̃̀ nyɛ́nɛ́ jǔà ɓɛ́ ɔ nì ɖé hwɔɖɔɔ̀ múɛɛ gbo, ɓɛ́ ɓě kéɛ ɔ gbo cɛ̃, ɓɛ́ ɓě ké níiń, ‘Nyɔ-ɖɛ-tɛ̀mɛ̀ìn-nyɔ̀ɔ̀ ɖá ɔ tiɔ̀ ɖǎ nyini. Ɔ kè ɔ ɖeín-nà-nyɔ̀ ɓěɔ̀ mu Zĩ̀ìn-Kɔ̃in-hwɔ̀ɔ̀ ɖé m̀ ɓíɖí-taún pàìn.’ ”
19Ɔ jèɛɛ, ɖeín-nà-nyɔ̀ ɓěɔ̀ nyuɛ kà Jízɛ̀ nyuɛ ma kà wa gbo cɛ̃ɛ kɛ. Ké wa dyéìn ma hwɔɔ̀ ɖii-ɖɛ̀ɔ̀ ti.
20Ti hwìo ɖǎ ma jǔɛɛ, Jízɛ̀ kè ɔ ɖeín-nà-nyɔ̀ ɓaɖa-bùè sè sɔ̃́ɔ̀ kò ma téɓèɖèɔ̀ gbɔi. 21Ti wa nì ma ɖɛ ɖiɛń nyɛɛ, Jízɛ̀ ɖá, “Ḿ cɛ̃ ɓě jǎà gbo, ɓě dyúáɖò mu ḿ xwáɖáún zàùn ɖé ní mú-nyɛ́-nyɔ̀ ɓěɔ̀ gbo.”
22Ké ɔ ɖeín-nà-nyɔ̀ ɓěɔ̀ hwòɖǒ kpá ma ɖé ɖei mìɔ, ké wa diè ma ɔ dyi ɖò-ɖò, ké wa ɖá, “Bounɓo, ɔ mɔ̀ mɔ̄ɔ̀?”
23Ké Jízɛ̀ zà ma ɖé wuɖu, ké ɔ ɖá, “Nyɔ ɓɛ́ ḿ kèɔ̀ kè nìà bɛɖɛɛ̀ ɖɛ-fùù dyúáɖò mú taɓauń wɛ̃ɛ mɔ̀ nyɔ mu ḿ xwáɖáún zàùn ɖé ní mú-nyɛ́-nyɔ̀ ɓěɔ̀ gbo. 24Mɔ̄ Nyɔǔn-dyùɛ̀ Dyú-gààɔ̀ mu muùn kà ɔ nyuà ɖé Gèɖèpɔ́ɔ̀-cèè-ɖɛ̀ɔ̀ mú céèɛ̀ kɛ. Kɛɛ gàa ɓɛ́ ɔ zàà mɔ̄ Nyɔǔn-dyùɛ̀ Dyú-gààɔ̀ xwáɖáún ɖé ní mú-nyɛ́-nyɔ̀ ɓěɔ̀ gboɛɛ, ééɓàa, gboò-wùɖù nì ɔ kɔ̃. Ɔ muɔ́ dyíin nɔ̀mɔ̀ùn ɓó gàa nìà kɛ bìì, ɓɛ́ ɔ ké seɔ́ má wóɖó.”
25Ké Júdà mɔ̀ nyɔ mu ma kà ɔ peɖeìn nyɛɛ diè ma ɔ dyi, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, ɔ mɔ̀ mɔ̄ɔ̀?”
Ké Jízɛ̀ cɛ̃ɛ ma ɔ gbo, ké ɔ ɖá, “Mɔ̀ mɔ̀ nyɔ cɛ̃ɛ.”
Gèɖèpɔ́ɔ̀-bɛ̀ɖɛ̀ɛ̀ɔ̀ ɖi-ɖi
(Máà 14:22-26; Ɖúù 22:14-20; 1 Kɔ̀ɖéíntĩ̀ɔ̀ 11:23-25)
26Ti ɓɛ́ wa nì ma ɖɛ ɖiɛń nyɛɛ, Jízɛ̀ zà bɛɖɛɛ̀ɔ̀ ɖò ɓó, ké ɔ po Gèɖèpɔ́ɔ̀ zùo, ké ɔ jaɖaìn kpói. Ké ɔ nyíɛ ɔ ɖeín-nà-nyɔ̀ ɓěɔ̀, ké ɔ ɖá, “Ɓě kpɔ̃ɔ dyi, ɓɛ́ ɓě kéɛ ɖi. Ɖɛ nìà kɛ mɔ̀ ní kpóɖó-dyùàɔ̀.”
27Ké ɔ ɖú kópòɔ̀ dyí, ké ɔ po Gèɖèpɔ́ɔ̀ zùo. Ké ɔ nyíɛ ma wa, ké ɔ ɖá, “Ɓě séín náa, 28sepóɛɖé ɖɛ nìà kɛ mɔ̀ ní nyɔmɔɔ ɓɛ́ ɔ wáɖáìn dyi ɓó Gèɖèpɔ́ɔ̀ nyɔ pàɖǎ nàmàǔn kɔ̃in zĩ̀ìn jè kɛ. Ní nyɔmɔɔ̀ nyuɛ ké dèè-wùɖùɔ̀ kpa ɖɛ. 29Ḿ cɛ̃ɛ ɓě gbo, ḿ se géɖéè-ɓòɔ̀ ní ɖò náa mu ɖe fɔɔ. Ḿ kéɛ dyɛ ná ɖe ní, nìí, ɔ mɔ̀ ti ɓɛ́ ḿ kè ɓě muà ɔ ɖieɔ̀ náùn ɖé ḿ Ɓǎà kã́á-ɓòɖòɔ̀ kɔ̃ɛ.”
30Sɔ̀ìn ɓóɛ gboɛɛ, wa ɓeɖe ma wɛ́ɖɛ́ ɖò. Hwɛ̀ ké wa sɔ̀ dyí, ké wa mu ma ɖé Ɔ́ɖè-tòɖòɔ̀ dya.
Jízɛ̀ cɛ̃ɛ kà Píɖɛ̀ mu ɔ jè mú doìn nyɛ
(Máà 14:27-31; Ɖúù 22:31-34; Jɔ̃́ɔ́ 13:36-38)
31Púɛɛ, Jízɛ̀ cɛ̃ɛ ma wa gbo, ké ɔ ɖá, “Máaǔn nìà kɛɛ, ɓě séín mu ḿ ɖei hwɛ̀ìn, sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, ‘Gèɖèpɔ́ɔ̀ mu ɓáɖáá-dyí-gmɔ̀-nyɔ̀ɔ̀ ɖáɓáùn, ké ɓáɖáá ɓěɔ̀ mu dyi gbɛ̀ìn.’ 32Kɛɛ ḿ ɖǎ gĩɔ wóɖóín, ní mu ɖé ɓě dyúa muùn ɖé Gáɖàɖíì-ɓòɖòɔ̀ kɔ̃.”
33Hwɛ̀ ké Píɖɛ̀ cɛ̃ɛ ma ɔ gbo, ké ɔ ɖá, “Kɛbì nyɔǔn séín mɛ hwɛ̀ m̀ ɖeiɛɛ, mɔ́ún seɛ náa nyuɛ́ mu fɔɔ.”
34Ké Jízɛ̀ cɛ̃ɛ ma ɔ gbo, ké ɔ ɖá, “Ḿ cɛ̃ m̀ jǎà gbo, máaǔn, hwɛ̀ ɓɛ́ sòò ké wuɖu poɛɛ, nì mu ní jè mú-doìn-kpà tã nyuùn.”
35Ké Píɖɛ̀ cɛ̃ɛ ma ɔ gbo, ké ɔ ɖá, “Ɔ mɔ̀ ɖɛ ní, ḿ kè mɔ̀ ɓɛ́ìn mɛ́ɛ pū, kɛɛ ḿ se nì jè mú doɛ̀n ɓɛ́ìn fɔɔ.” Ké ɖeín-nà-nyɔ̀ tɔ̀ɔ̀ séín ɓěɔ̀ cɛ̃ ma ɖɛ dyúáɖòɔ̀ ɖekè.
Jízɛ̀ ɓaà ɖé Gɛ̀sɛ́mɛ̀níì-pàɔ̀ mú
(Máà 14:32-42; Ɖúù 22:39-46)
36Sɔ̀ìn ɓóɛ gboɛɛ, Jízɛ̀ kè ɔ ɖeín-nà-nyɔ̀ ɓěɔ̀ mu ma ɖé pá ɖò ɓɛ́ wa ɖáìn Gɛ̀sɛ́mɛ̀níì kɛɛ mú, ké ɔ cɛ̃ɛ ma wa gbo, ké ɔ ɖá, “Ɓě kò dà dyi, ɓɛ́ ḿ ké ɖéa mu, ɓɛ́ ḿ ké ɓaà.” 37Ɔ kpa ma Píɖɛ̀ kè Zɛ́ɓìɖíìɛ̀ dyú-gàà sɔ̃́ ɓěɔ̀. Ké wìì ɖú ma ɔ nyu kpàǐ, ké fũ̀à-fṹá nyu ma ɔ mìɔ. 38Ké ɔ cɛ̃ɛ ma wa gbo, ké ɔ ɖá, “Wìì nyu ḿ mìɔ, ké hwɔ ḿ mɛ mɛ́á. Ɓě sè dà ɓó ḿ gbo, ɓɛ́ ɓě ké ɓɛ́ɖɛ́ kɔ̃ nì.”
39Ké ɔ mu ma ɖé dyúa ɖɛ wè, ké ɔ ɓùɖùìn ma ɔ dyúa-kpàɔ̀ kɔ̃, ké ɔ ɓaà ma, ké ɔ ɖá, “Ḿ Ɓǎ, gǎ-kòpò nìà kɛ mɛ sɔ̀ dà ḿ bũ̌, ɔ dyi ná nìɛ̀ ɓɛ́ìn ní. Kɛɛ wɛ̃́ɛ́ kɛɛ, m̀ mɛ nyu ɖɛ nì hwòɖǒɔ̀ mɔ́ kɛ. Mɔ̀ǔn ɖá ɓɛ́ m̀ ké ní hwòɖǒɛ̀-mɔ́ɔ́-ɖɛ̀ nyu.”
40Ké ɔ kɔ́ìn ma ɖé ɖeín-nà-nyɔ̀ tã ɓěɔ̀ gbo ɖe, ké ɔ dyɛ̀ìn ma wa nyíɔún dyi. Ké ɔ diè ma Píɖɛ̀ dyi, ké ɔ ɖá, “Ɖɛ́ kɔ̃̀ jè ɓě seà ḿ gbo nìɛ̀ ɓɛ́ìn ɓó áɓà dyúáɖò xwíníín, ɓɛ́ ɓě kéà ɓɛ́ɖɛ́ kɔ̃ nì kɛ́? 41Ɓě mɛ nì ɓɛ́ɖɛ́ kɔ̃, ɓɛ́ ɓě ké ɓaà, ɓɛ́ mú-dɔ̃̌-dɔ̃̌ ní kɔ̃̀ ɖà ɓě kɔ̃ dyi. Ɓěɛ̀ hwòɖǒ-dyùàɔ̀ nì kpéí, kɛɛ kpé hwɛ̀ ɓě mìɔùn dyí.”
42Ké Jízɛ̀ mu ma ɖe, ké ɔ ɓaà ma ɖe, ké ɔ ɖá, “Ḿ Ɓǎ, gǎ-kòpò nìà kɛ se dà ḿ gbo sɔ̀ɔ̀ ɓɛ́ìn, ké ḿ dyi ɓéɖé ɓɛ́ ḿ ké ɖɛ nìà ɔ múɛɛ ná wɛ̃́ɛ́ ní, nìí, nì mɔ́ɔ́-ɖɛ̀ mɛ nì.” 43Ké ɔ dyi ma ɖe, ké ɔ dyɛ̀ìn ma ɖeín-nà-nyɔ̀ ɓěɔ̀ nyíɔún dyi ɖe, sepóɛɖé waà dyéɖé-kpɔ̀ɔ̌ ɓěɔ̀ ku ma xwa mìɔ.
44Púɛɛ, Jízɛ̀ sɔ̀ ma ɓó wa gbo dyí ɖe, ké ɔ ɓaà ma ɖe, ké ɔ cɛ̃ ma ɖɛ dyúáɖòɔ̀ ɖe. 45Ké ɔ dyi ma ɔ ɖeín-nà-nyɔ̀ ɓěɔ̀ gbo ɖe, ké ɔ diè ma wa dyi, ké ɔ ɖá, “Ɓě pɛ̃́ dyi, ké ɓě nì mɔ́uń keè? Gmɔ̀ nɔ̄, tiɔ̀ ɖǎ nyini. Wa muá mɔ̄ Nyɔǔn-dyùɛ̀ Dyú-gààɔ̀ xwáɖáún zàùn ɖé nàmàǔn-nyɔ̀ ɓěɔ̀ gbo. 46Ɓě sɔ̀ dyí, ɓɛ́ ɓěà ké mu. Ɓě dyéɛ, nyɔ kéà ḿ xwáɖáún zàa ɖǎ nyini.”
Wa kpɔ̃ Jízɛ̀
(Máà 14:43-50; Ɖúù 22:47-53; Jɔ̃́ɔ́ 18:3-12)
47Ti ɓɛ́ Jízɛ̀ nì ma wùɖùɛ̌n keɛɛ, Júdà ɓɛ́ ɔ mɔ̀ ma kà ɖeín-nà-nyɔ̀ ɓaɖa-bùè sè sɔ̃́ ɓěɔ̀ ɖò kɛɛ dyi ma. Ɔ kè nyɔ kúɖúú ɓéɖé gàsíà kè kpó-kpó-ɓà-cù ɓě dyi ma. Nyɔ ɓěɔ̀ sɔ̀ìn ma ɖé sáa-zà-nyɔ̀ kpa ɖɛ ɓěɔ̀ kè Júù-nyɔ̀ vɛ̀nɛ̀ ɓěɔ̀ gbo. 48Nyɔ ɓɛ́ ɔ mu ma kà Jízɛ̀ xwáɖáún zàùn wɛ̃ɛ ɖǎ ma ɔ da-zà-ɖɛ̀ ɖò nyɔ kúɖúú ɓěɔ̀ nyí, ké ɔ ɖá, “Nyɔ kɔ̃̀ wɔ̃ ní muà nyáùn wɛ̃ɛ, ɔ mɔ̀ gàaɔ̀ mɔ̀. Ɓě kpɔ̃ ɔ.” 49Ké ɔ mu ma Jízɛ̀ gbo wàɖà, ké ɔ ɖá, “M̀ hwèɖěìn, nyɔ-ɖɛ-tɛ̀mɛ̀ìn-nyɔ̀.” Ké ɔ nyá ma ɔ wɔ̃.
50Hwɛ̀ ké Jízɛ̀ cɛ̃ɛ ma ɔ gbo, ké ɔ ɖá, “Ḿ ɓǎto, nyu ɖɛ kɔ̃̀ jè m̀ dyià kɛ.” Ké nyɔ ɓěɔ̀ mu ma Jízɛ̀ gbo, ké wa kpɔ̃ ma ɔ. 51Ké nyɔ ɓě nì ma kà ɓó Jízɛ̀ gboɛɛ ɖò zà ma ɔ gàsíàɔ̀ kpaɖaún, ké ɔ cɛ̃ ma sáa-zà-nyɔ̀ vɛ̀nɛ̀ɔ̀ gǐìɔ̀ ɖùǔ dú. 52Ké Jízɛ̀ cɛ̃ɛ ma ɔ gbo, ké ɔ ɖá, “Po nì gàsíàɔ̀ kpaɖaún ɖe, sepóɛɖé nyɔ séín ɓě vɔ̃̀ìn gàsíà kɛɛ mu gàsíà dyí mɛ́ìn. 53M̀ seɛ dyí dyuò kà ḿ ɓɛ́ìnɔ̌ má ḿ Ɓǎ ɖáa, ɓɛ́ ɔ kéɔ́ má ḿ gbo kpá kɛɛ̀? Ɔ muɔ́ má ɔ ínjà ɓěɔ̀ tòùn wàɖà, ké ínjà ɓě ɓɛ́ ɔ muɔ́ tòùn wɛ̃ɛ muɔ́ má ínjà kúɖúú ɓě jǔùn. 54Kɛɛ ḿ dyiɛ náa nyuín, xwɛ̌ ɖɛ Gèɖèpɔ́ɔ̀-cèè-ɖɛ̀ɔ̀ cɛ̃à kɛɛ muɔ́ jǎà kpáa nyuùn wɛ̃́?”
55Púɛɛ, Jízɛ̀ wùɖù ma nyɔ kúɖúú ɓěɔ̀ gbo, ké ɔ ɖá, “Ɓě dyà gàsíà kè kpó-kpó-ɓà-cù, ké ɓě dyi ḿ kpɔ̃ùn kà nyɔ dyià nyɔ-ɖɛ-gana-xwa-zàìn-nyɔ̀ ɖò kpɔ̃ùn wɛ̃ɛ̀? Ḿ kò ma ɖé Gèɖèpɔ́ɔ̀ gbǒɔ̀ múin wé séín ɓaɖa, ké ḿ nì ma ɓě ɖɛ tɛ̀mɛ̀ǐn, ké ɓě se ma ɖé ḿ kpɔ̃̀ìn. 56Kɛɛ ɖɛ séín ɓě nìà kɛ kpá, ɓɛ́ ɖɛ ɓě ɓɛ́ kpáá-ɖɛ̀-cɛ̃-nyɔ̀ ɓěɔ̀ céè ma kà ɖé Gèɖèpɔ́ɔ̀ céè-ɖɛ̀ɔ̀ múɛɛ ké jǎà kpá.” Ké ɔ ɖeín-nà-nyɔ̀ séín ɓěɔ̀ gbɛ̀ ma ɔ ɖei, ké wa gbǔ ma.
Jízɛ̀ nì ɓó tɔ̀ɔ̀-ɓìɔ̀ ɓě dyúa
(Máà 14:53-65; Ɖúù 22:54-55, 63-71; Jɔ̃́ɔ́ 18:13-14, 19-24)
57Ké nyɔ ɓě ɓɛ́ wa kpɔ̃ ma kà Jízɛ̀ kɛɛ kpa ma ɔ ɖé Kádyáfà mɔ̀à sáa-zà-nyɔ̀ vɛ̀nɛ̀ɔ̀ kɛɛ ɓíɖí-taún. Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Júù-nyɔ̀ vɛ̀nɛ̀ ɓěɔ̀ poìn ma ɖé dyí. 58Ti ɓɛ́ wa nì ma kà Jízɛ̀ kpauń wɛ̃ɛ, Píɖɛ̀ sí ma wa kíɖíí, kɛɛ ɔ sè ma ɖe vɛ̃in. Ké wa nyini ma ɖé sáa-zà-nyɔ̀ vɛ̀nɛ̀ɔ̀ kɔ̃̀pã́ùnɔ̀ kɔ̃. Ké Píɖɛ̀ dyá ma ɖé, ké ɔ kè sójà ɓěɔ̀ kò ma ɓó dyi, ɓɛ́ ɔ ké ɖɛ mu ma kpáùn wɛ̃ɛ dyé. 59Ɓó tia ɓaɖaa, sáa-zà-nyɔ̀ kpa ɖɛ ɓěɔ̀ kè tɔ̀ɔ̀-ɓìɔ̀ séín ɓěɔ̀ nì ma nyɔ ɓě ɓɛ́ wa ké ma Jízɛ̀ se wĩin tɔ́mɔ́ìn nyɛɛ dyi mɔ́uń, ɓɛ́ ɔ kéɛ nyu ɓɛ́ wa ké ma ɔ ɖáɓá. 60Zàse pàɖǎ ɓě dyi ma, ké wa tɔ́mɔ́ìn ma Jízɛ̀ se wĩin dyɛo, kɛɛ wa se ma nyɔ ɓɛ́ ɔ kéɛ ma nyu ɓɛ́ wa ké ma ɔ ɖáɓáa ɖò dyé. Ɖé mánáín nyɛɛ, gàa sɔ̃́ dyi ma, 61ké wa ɖá, “Gàa nìà kɛ cɛ̃ɛ ma, ké ɔ ɖá ɔ ɓéɖé kpé ɓɛ́ ɔ ké Gèɖèpɔ́ɔ̀ gbǒɔ̀ wáɖá, ɓɛ́ ɔ kéɛ po ɖe ɓó wé tã xwíníín.”
62Ké sáa-zà-nyɔ̀ vɛ̀nɛ̀ɔ̀ nyànà ma dyi, ké ɔ diè ma Jízɛ̀ dyi, ké ɔ ɖá, “M̀ se ɖɛ ɖò ɓéɖé ɓɛ́ m̀ kéɛ cɛ̃ ɓá ɖɛ wa nìà m̀ kɔ̃ún cɛ̃iń nyɛɛ dyíì?” 63Kɛɛ Jízɛ̀ nì ma gìɖìǐ. Ké sáa-zà-nyɔ̀ vɛ̀nɛ̀ɔ̀ cɛ̃ɛ ma ɔ gbo, ké ɔ ɖá, “Ɖé nì-nì Gèɖèpɔ́ɔ̀ nyɛ́nɛ́ múɛɛ, ḿ cɛ̃ɛ m̀ gbo. M̀ dyi Kɛ́ɖɛ́ì mɔ̀à Gèɖèpɔ́ɔ̀ Dyú-gààɔ̀ kɛɛ jǔ ní, cɛ̃ɛ à gbo.”
64Ké Jízɛ̀ zà ma ɖé wuɖu, ké ɔ ɖá, “Mɔ̀ mɔ̀ nyɔ cɛ̃ɛ. Kɛɛ ḿ cɛ̃ɛ ɓě gbo, ɓě mu mɔ̄ Nyɔǔn-dyùɛ̀ Dyú-gààɔ̀ dyéìn ɖé dyúa. Ní mu kpé-ɓéɖé-Gèɖèpɔ́ɔ̀ ɖiaún dya dèɖěìn, ké ní mu ní-kpò nìà ɖé dyɔɔ̀ dyíɛɛ mú dyììn.”
65Ké sáa-zà-nyɔ̀ vɛ̀nɛ̀ɔ̀ fáìn ma ɔ mìɔùn ɖɔún dyi, ké ɔ ɖá, “Ɔ ɖǎ Gèɖèpɔ́ɔ̀ ɖɛ gbà kɔ̃ún cɛ̃. Ɖɛ́ kɔ̃̀ jè ɓěà kéà zàse ɖò dyi mɔ́ ɖeɛ́? Ɓě wɔ̃́ɔ kàǔn, ké ɔ cɛ̃ Gèɖèpɔ́ɔ̀ ɖɛ gbà kɔ̃ún. 66Ɖɛ́ ɓě poìn hwìɖǐiɛ́?”
Ké wa zà ma ɖé wuɖu, ké wa ɖá, “Zaaɔ̀ ɖǎ ɔ kpɔ̃. Ɔ ɓéɖé ɓɛ́ ɔ ké mɛ́.”
67Ké wa po ma ɔ tɔ̃ɔ dyúa, ké wa ɓaɖa ma ɔ. Ké wa ɖíɛ́ ɓě taɓa ma ɔ kpá, 68ké wa ɖá, “Mɔ̀ mɔ̀à Kɛ́ɖɛ́ìɔ̀ kɛɛ, nyɛ́ taɓaà m̀ kpá kɛ́? Ɖá ɔ nyɛ́nɛ́.”
Píɖɛ̀ doìn Jízɛ̀ jè mú
(Máà 14:66-72; Ɖúù 22:56-62; Jɔ̃́ɔ́ 18:15-18, 25-27)
69Ti ɓɛ́ Píɖɛ̀ kò ma ɖé kɔ̃̀pã́ùnɔ̀ kɔ̃ dyiɛɛ, gbo-nì-màà ɖò mu ma ɔ gbo, ké ɔ cɛ̃ɛ ma ɔ gbo, ké ɔ ɖá, “M̀ nì ma ɖé Jízɛ̀ sɔ̀ìn kà Gáɖàɖíì-ɓòɖòɔ̀ kɔ̃ɛɛ gbo ɖekè.”
70Kɛɛ Píɖɛ̀ doɛ̀n ma mú ɓó nyɔ séín dyúa, ké ɔ ɖá, “Ḿ se ɖɛ m̀ nìà cɛ̃iń nyɛɛ dyí dyuò.” 71Ké ɔ mu ma ɖé kɔ̃̀pã́ùnɔ̀ gmɔ-wɔ̃̀ɔ̀ gbo. Ké gbo-nì-màà ɖò dyé ma ɔ ɖe, ké ɔ cɛ̃ɛ ma nyɔ ɓě nì ma ɓóɛɛ gbo, ké ɔ ɖá, “Gàa nìà kɛ nì ma Jízɛ̀ sɔ̀ìn kà Názɛ̀ɖɛ̀-hwɔ̀ɖɔ̀ɔ̀ múɛɛ gbo.”
72Ké Píɖɛ̀ doɛ̀n ma mú ɖe, ké ɔ gboò ma, ké ɔ ɖá, “Ḿ se gàaɔ̀ dyí dyuò.”
73Ti ɓɛ́ ɔ ɖǎ ma hwèɖèìn kpã́ún wɛ̃ɛ, nyɔ ɓě nì ma ɓóɛɛ dyi ma Píɖɛ̀ gbo, ké wa cɛ̃ɛ ma ɔ gbo, ké wa ɖá, “M̀ mɔ̀ wa ɖò jǎà, sepóɛɖé kà m̀ nyuà wùɖùɛ̀ kɛɛ tɛ̀mɛ̀ìn à dyí.”
74Ké Píɖɛ̀ ɖú ma gboò kpàǐ, ké ɔ cɛ̃ɛ gana-kà, ké ɔ ɖá, “Ḿ se gàaɔ̀ dyí dyuò.”
Wàɖà cá kɛɛ, sòò ɖò zoɖo ma. 75Púɛɛ, ɖɛ Jízɛ̀ cɛ̃ ma kà Píɖɛ̀ gboɛɛ dyi ma ɔ hwìɖǐi. Ɔ mɔ̀, “Hwɛ̀ ɓɛ́ sòò ké wuɖu poɛɛ, nì mu ní jè mú-doìn-kpà tã nyuùn.” Ké Píɖɛ̀ sí ma píé, ké ɔ vĩ̌ ma hwòɖǒɛ̀-nɛɛ̀-kà.
Currently Selected:
Máfíò 26: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Máfíò 26
26
Wa sɔ́ Jízɛ̀
(Máà 14:1-2; Ɖúù 22:1-2; Jɔ̃́ɔ́ 11:45-53)
1Ti ɓɛ́ Jízɛ̀ ɖǎ ma ɖɛ ɓě nìà kɛ cɛ̃ɛ hwɔɛɛ, ɔ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, 2“Wé sɔ̃́ dyi ziín, ɓě dyuòɛ̀ kà Zĩ̀ìn-Kɔ̃in-hwɔ̀ɔ̀ mu kpáùn wɛ̃. Ké wa mu mɔ̄ Nyɔǔn-dyùɛ̀ Dyú-gààɔ̀ nyɔǔn ɓě xwáɖáún zàìn, ɓɛ́ wa ké ḿ kɔ́ɖɔ́sì kɔ̃in kɔ̀ìn.”
3Púɛɛ, sáa-zà-nyɔ̀ kpa ɖɛ ɓěɔ̀ kè Júù-nyɔ̀ vɛ̀nɛ̀ ɓěɔ̀ poìn ma dyí ɖé Kádyáfà ɓɛ́ ɔ mɔ̀ ma sáa-zà-nyɔ̀ vɛ̀nɛ̀ɔ̀ kɛɛ gbǒɔ̀ dya. 4Ké wa poìn ma wuɖuí, ɓɛ́ wa ké Jízɛ̀ kpɔ̃ nyàà, ɓɛ́ wa ké ɔ ɖáɓá. 5Kɛɛ wa cɛ̃ɛ ma, ké wa ɖá, “Ɓěà ní nyuɛ hwɔɔ̀ pa-tìǐn, ɓɛ́ nyɔ ɓěɔ̀ ní kɔ̃̀ ɖà à gbo vɔ̃.”
Wa po Jízɛ̀ cáná dúún ɖé Bɛ́fènì-hwɔ̀ɖɔ̀ɔ̀ mú
(Máà 14:3-9; Jɔ̃́ɔ́ 12:1-8)
6Ɓó tia ɓaɖaa, Jízɛ̀ nì ma ɖé Sã́ɓò ɓɛ́ ɔ zà ma caà-wɛ̀ múɛɛ ɓíɖí-gbǒǔn ɖé Bɛ́fènì-hwɔ̀ɖɔ̀ɔ̀ mú. 7Ké màa ɖò dyi ma Jízɛ̀ gbo, ké ɔ dyà ma tɛ̀ɓɛ̀ɛ̌ ɓɛ́ wa nyùìn ma áɖàɓásà-sɔ̀ɔ̌ kɛ. Ké cáná nɔ̀mɔ̀ nyɔ́ún ɓɛ́ ɔ kpa wíɖí pàɖǎ kɛɛ dyí ma ɖé tɛ̀ɓɛ̀ɛ̌ɔ̀ mú. Ké màaɔ̀ púè ma cánáɔ̀ Jízɛ̀ dúún ɓó téɓèɖèɔ̀ gbɔ. 8Púɛɛ, ɔ ɖeín-nà-nyɔ̀ ɓěɔ̀ hwòɖǒ kpá ma ɖé ɖei mìɔ ti wa dyéɛ ma kɛ, ké wa cɛ̃ɛ ma, ké wa ɖá, “Ɖɛ́ kɔ̃̀ jè cáná nìà kɛ gbɔɔ̀à kà múɛ́? 9À ɓɛ́ìnɔ̌ má cánáɔ̀ wíɖí pàɖǎ pèɖèɛ̀n, ɓɛ́ à kéɔ́ wíɖíɔ̀ gǎ-dyé-nyɔ̀ ɓě nyí.”
10Kɛɛ Jízɛ̀ dyuò ɖɛ wa nì ma cɛ̃iń nyɛɛ dyí, ké ɔ diè ma wa dyi, ké ɔ ɖá, “Ɖɛ́ kɔ̃̀ jè ɓě nìà màa nìà kɛ fũ̀à-fṹá nyùɛ̌n nyɛ́? Ɔ ɖǎ ḿ ɖɛ zi dyíin nɔ̀mɔ̀ǔn wɛ̃ɛ dyí nyu. 11Sepóɛɖé gǎ-dyé-nyɔ̀ ɓěɔ̀ mu dà ɓě gbo nììn kánáá pū, kɛɛ ḿ se dà ɓě gbo nìɛ̌ mu kánáá pū. 12Ɖɛ ɔ nyuà kɛɛ mɔ̀, ɓɛ́ ɔ ké ní kpóɖó-dyùàɔ̀ ti dyéìn ɓóɛ dyóɖóún zà jè. 13Ḿ cɛ̃ ɓě jǎà gbo, ɓóɖó-kpàà dà séín ɓɛ́ wa mu bɔ̃̌ nɔ̀mɔ̀ dyíinɔ̀ jè zio mú pòìn nyɛɛ, ɖɛ ɓɛ́ màaɔ̀ ɖǎà nyuɛɛ, wa mu ɔ jè cɛ̃ìn ɖekè, ɓɛ́ màaɔ̀ jè ké nyɔǔn hwìɖǐi nì.”
Júdà mɔ́ ɓɛ́ ɔ ké Jízɛ̀ peɖe
(Máà 14:10-11; Ɖúù 22:3-6)
14Púɛɛ, Jízɛ̀ɛ̀ ɖeín-nà-nyɔ̀ ɓaɖa-bùè sè sɔ̃́ ɓěɔ̀ dyúáɖò kɔ̃̀ nyɛ́nɛ́ mɔ̀ Júdà Ɛ́sìkáɖìɔ̀ kɛɛ mu ma sáa-zà-nyɔ̀ kpa ɖɛ ɓěɔ̀ gbo, 15ké ɔ diè ma wa dyi, ké ɔ ɖá, “Ḿ dyi Jízɛ̀ ɓě xwáɖáún zàìn ní, ɖɛ́ ɓě mu ḿ nyíìn nyɛ́?” Ké wa gbɛ̌ìn ma séɓàɖà-pĩ̀à kpáɖá-nyɔ ɓaɖa-bùè dyí, ké wa nyíɛ ma ɔ. 16Sɔ̀ìn ɓó tia gboɛɛ, ɔ nì ma hwìè dyi mɔ́uń, ɓɛ́ ɔ ké ma Jízɛ̀ wa xwáɖáún zàìn.
Jízɛ̀ kè ɔ ɖeín-nà-nyɔ̀ ɓěɔ̀ ɖi Zĩ̀ìn-Kɔ̃in-hwɔ̀ɔ̀
(Máà 14:12-21; Ɖúù 22:7-13, 21-23; Jɔ̃́ɔ́ 13:21-30)
17Ɓó Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ wé kĩ́ín-kĩ́ínɔ̀ ɓaɖaa, ɖeín-nà-nyɔ̀ ɓěɔ̀ mu ma Jízɛ̀ gbo, ké wa diè ma ɔ dyi, ké wa ɖá, “Dɛ̌ m̀ mɔ́ ɓɛ́ à ké Zĩ̀ìn-Kɔ̃in-hwɔ̀ɔ̀ naɓaà ɓó m̀ bììɛ́?”
18Ké ɔ cɛ̃ɛ ma wa gbo, ké ɔ ɖá, “Ɓě mu ɖé gàa kɔ̃̀ nyɛ́nɛ́ jǔà ɓɛ́ ɔ nì ɖé hwɔɖɔɔ̀ múɛɛ gbo, ɓɛ́ ɓě kéɛ ɔ gbo cɛ̃, ɓɛ́ ɓě ké níiń, ‘Nyɔ-ɖɛ-tɛ̀mɛ̀ìn-nyɔ̀ɔ̀ ɖá ɔ tiɔ̀ ɖǎ nyini. Ɔ kè ɔ ɖeín-nà-nyɔ̀ ɓěɔ̀ mu Zĩ̀ìn-Kɔ̃in-hwɔ̀ɔ̀ ɖé m̀ ɓíɖí-taún pàìn.’ ”
19Ɔ jèɛɛ, ɖeín-nà-nyɔ̀ ɓěɔ̀ nyuɛ kà Jízɛ̀ nyuɛ ma kà wa gbo cɛ̃ɛ kɛ. Ké wa dyéìn ma hwɔɔ̀ ɖii-ɖɛ̀ɔ̀ ti.
20Ti hwìo ɖǎ ma jǔɛɛ, Jízɛ̀ kè ɔ ɖeín-nà-nyɔ̀ ɓaɖa-bùè sè sɔ̃́ɔ̀ kò ma téɓèɖèɔ̀ gbɔi. 21Ti wa nì ma ɖɛ ɖiɛń nyɛɛ, Jízɛ̀ ɖá, “Ḿ cɛ̃ ɓě jǎà gbo, ɓě dyúáɖò mu ḿ xwáɖáún zàùn ɖé ní mú-nyɛ́-nyɔ̀ ɓěɔ̀ gbo.”
22Ké ɔ ɖeín-nà-nyɔ̀ ɓěɔ̀ hwòɖǒ kpá ma ɖé ɖei mìɔ, ké wa diè ma ɔ dyi ɖò-ɖò, ké wa ɖá, “Bounɓo, ɔ mɔ̀ mɔ̄ɔ̀?”
23Ké Jízɛ̀ zà ma ɖé wuɖu, ké ɔ ɖá, “Nyɔ ɓɛ́ ḿ kèɔ̀ kè nìà bɛɖɛɛ̀ ɖɛ-fùù dyúáɖò mú taɓauń wɛ̃ɛ mɔ̀ nyɔ mu ḿ xwáɖáún zàùn ɖé ní mú-nyɛ́-nyɔ̀ ɓěɔ̀ gbo. 24Mɔ̄ Nyɔǔn-dyùɛ̀ Dyú-gààɔ̀ mu muùn kà ɔ nyuà ɖé Gèɖèpɔ́ɔ̀-cèè-ɖɛ̀ɔ̀ mú céèɛ̀ kɛ. Kɛɛ gàa ɓɛ́ ɔ zàà mɔ̄ Nyɔǔn-dyùɛ̀ Dyú-gààɔ̀ xwáɖáún ɖé ní mú-nyɛ́-nyɔ̀ ɓěɔ̀ gboɛɛ, ééɓàa, gboò-wùɖù nì ɔ kɔ̃. Ɔ muɔ́ dyíin nɔ̀mɔ̀ùn ɓó gàa nìà kɛ bìì, ɓɛ́ ɔ ké seɔ́ má wóɖó.”
25Ké Júdà mɔ̀ nyɔ mu ma kà ɔ peɖeìn nyɛɛ diè ma ɔ dyi, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, ɔ mɔ̀ mɔ̄ɔ̀?”
Ké Jízɛ̀ cɛ̃ɛ ma ɔ gbo, ké ɔ ɖá, “Mɔ̀ mɔ̀ nyɔ cɛ̃ɛ.”
Gèɖèpɔ́ɔ̀-bɛ̀ɖɛ̀ɛ̀ɔ̀ ɖi-ɖi
(Máà 14:22-26; Ɖúù 22:14-20; 1 Kɔ̀ɖéíntĩ̀ɔ̀ 11:23-25)
26Ti ɓɛ́ wa nì ma ɖɛ ɖiɛń nyɛɛ, Jízɛ̀ zà bɛɖɛɛ̀ɔ̀ ɖò ɓó, ké ɔ po Gèɖèpɔ́ɔ̀ zùo, ké ɔ jaɖaìn kpói. Ké ɔ nyíɛ ɔ ɖeín-nà-nyɔ̀ ɓěɔ̀, ké ɔ ɖá, “Ɓě kpɔ̃ɔ dyi, ɓɛ́ ɓě kéɛ ɖi. Ɖɛ nìà kɛ mɔ̀ ní kpóɖó-dyùàɔ̀.”
27Ké ɔ ɖú kópòɔ̀ dyí, ké ɔ po Gèɖèpɔ́ɔ̀ zùo. Ké ɔ nyíɛ ma wa, ké ɔ ɖá, “Ɓě séín náa, 28sepóɛɖé ɖɛ nìà kɛ mɔ̀ ní nyɔmɔɔ ɓɛ́ ɔ wáɖáìn dyi ɓó Gèɖèpɔ́ɔ̀ nyɔ pàɖǎ nàmàǔn kɔ̃in zĩ̀ìn jè kɛ. Ní nyɔmɔɔ̀ nyuɛ ké dèè-wùɖùɔ̀ kpa ɖɛ. 29Ḿ cɛ̃ɛ ɓě gbo, ḿ se géɖéè-ɓòɔ̀ ní ɖò náa mu ɖe fɔɔ. Ḿ kéɛ dyɛ ná ɖe ní, nìí, ɔ mɔ̀ ti ɓɛ́ ḿ kè ɓě muà ɔ ɖieɔ̀ náùn ɖé ḿ Ɓǎà kã́á-ɓòɖòɔ̀ kɔ̃ɛ.”
30Sɔ̀ìn ɓóɛ gboɛɛ, wa ɓeɖe ma wɛ́ɖɛ́ ɖò. Hwɛ̀ ké wa sɔ̀ dyí, ké wa mu ma ɖé Ɔ́ɖè-tòɖòɔ̀ dya.
Jízɛ̀ cɛ̃ɛ kà Píɖɛ̀ mu ɔ jè mú doìn nyɛ
(Máà 14:27-31; Ɖúù 22:31-34; Jɔ̃́ɔ́ 13:36-38)
31Púɛɛ, Jízɛ̀ cɛ̃ɛ ma wa gbo, ké ɔ ɖá, “Máaǔn nìà kɛɛ, ɓě séín mu ḿ ɖei hwɛ̀ìn, sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, ‘Gèɖèpɔ́ɔ̀ mu ɓáɖáá-dyí-gmɔ̀-nyɔ̀ɔ̀ ɖáɓáùn, ké ɓáɖáá ɓěɔ̀ mu dyi gbɛ̀ìn.’ 32Kɛɛ ḿ ɖǎ gĩɔ wóɖóín, ní mu ɖé ɓě dyúa muùn ɖé Gáɖàɖíì-ɓòɖòɔ̀ kɔ̃.”
33Hwɛ̀ ké Píɖɛ̀ cɛ̃ɛ ma ɔ gbo, ké ɔ ɖá, “Kɛbì nyɔǔn séín mɛ hwɛ̀ m̀ ɖeiɛɛ, mɔ́ún seɛ náa nyuɛ́ mu fɔɔ.”
34Ké Jízɛ̀ cɛ̃ɛ ma ɔ gbo, ké ɔ ɖá, “Ḿ cɛ̃ m̀ jǎà gbo, máaǔn, hwɛ̀ ɓɛ́ sòò ké wuɖu poɛɛ, nì mu ní jè mú-doìn-kpà tã nyuùn.”
35Ké Píɖɛ̀ cɛ̃ɛ ma ɔ gbo, ké ɔ ɖá, “Ɔ mɔ̀ ɖɛ ní, ḿ kè mɔ̀ ɓɛ́ìn mɛ́ɛ pū, kɛɛ ḿ se nì jè mú doɛ̀n ɓɛ́ìn fɔɔ.” Ké ɖeín-nà-nyɔ̀ tɔ̀ɔ̀ séín ɓěɔ̀ cɛ̃ ma ɖɛ dyúáɖòɔ̀ ɖekè.
Jízɛ̀ ɓaà ɖé Gɛ̀sɛ́mɛ̀níì-pàɔ̀ mú
(Máà 14:32-42; Ɖúù 22:39-46)
36Sɔ̀ìn ɓóɛ gboɛɛ, Jízɛ̀ kè ɔ ɖeín-nà-nyɔ̀ ɓěɔ̀ mu ma ɖé pá ɖò ɓɛ́ wa ɖáìn Gɛ̀sɛ́mɛ̀níì kɛɛ mú, ké ɔ cɛ̃ɛ ma wa gbo, ké ɔ ɖá, “Ɓě kò dà dyi, ɓɛ́ ḿ ké ɖéa mu, ɓɛ́ ḿ ké ɓaà.” 37Ɔ kpa ma Píɖɛ̀ kè Zɛ́ɓìɖíìɛ̀ dyú-gàà sɔ̃́ ɓěɔ̀. Ké wìì ɖú ma ɔ nyu kpàǐ, ké fũ̀à-fṹá nyu ma ɔ mìɔ. 38Ké ɔ cɛ̃ɛ ma wa gbo, ké ɔ ɖá, “Wìì nyu ḿ mìɔ, ké hwɔ ḿ mɛ mɛ́á. Ɓě sè dà ɓó ḿ gbo, ɓɛ́ ɓě ké ɓɛ́ɖɛ́ kɔ̃ nì.”
39Ké ɔ mu ma ɖé dyúa ɖɛ wè, ké ɔ ɓùɖùìn ma ɔ dyúa-kpàɔ̀ kɔ̃, ké ɔ ɓaà ma, ké ɔ ɖá, “Ḿ Ɓǎ, gǎ-kòpò nìà kɛ mɛ sɔ̀ dà ḿ bũ̌, ɔ dyi ná nìɛ̀ ɓɛ́ìn ní. Kɛɛ wɛ̃́ɛ́ kɛɛ, m̀ mɛ nyu ɖɛ nì hwòɖǒɔ̀ mɔ́ kɛ. Mɔ̀ǔn ɖá ɓɛ́ m̀ ké ní hwòɖǒɛ̀-mɔ́ɔ́-ɖɛ̀ nyu.”
40Ké ɔ kɔ́ìn ma ɖé ɖeín-nà-nyɔ̀ tã ɓěɔ̀ gbo ɖe, ké ɔ dyɛ̀ìn ma wa nyíɔún dyi. Ké ɔ diè ma Píɖɛ̀ dyi, ké ɔ ɖá, “Ɖɛ́ kɔ̃̀ jè ɓě seà ḿ gbo nìɛ̀ ɓɛ́ìn ɓó áɓà dyúáɖò xwíníín, ɓɛ́ ɓě kéà ɓɛ́ɖɛ́ kɔ̃ nì kɛ́? 41Ɓě mɛ nì ɓɛ́ɖɛ́ kɔ̃, ɓɛ́ ɓě ké ɓaà, ɓɛ́ mú-dɔ̃̌-dɔ̃̌ ní kɔ̃̀ ɖà ɓě kɔ̃ dyi. Ɓěɛ̀ hwòɖǒ-dyùàɔ̀ nì kpéí, kɛɛ kpé hwɛ̀ ɓě mìɔùn dyí.”
42Ké Jízɛ̀ mu ma ɖe, ké ɔ ɓaà ma ɖe, ké ɔ ɖá, “Ḿ Ɓǎ, gǎ-kòpò nìà kɛ se dà ḿ gbo sɔ̀ɔ̀ ɓɛ́ìn, ké ḿ dyi ɓéɖé ɓɛ́ ḿ ké ɖɛ nìà ɔ múɛɛ ná wɛ̃́ɛ́ ní, nìí, nì mɔ́ɔ́-ɖɛ̀ mɛ nì.” 43Ké ɔ dyi ma ɖe, ké ɔ dyɛ̀ìn ma ɖeín-nà-nyɔ̀ ɓěɔ̀ nyíɔún dyi ɖe, sepóɛɖé waà dyéɖé-kpɔ̀ɔ̌ ɓěɔ̀ ku ma xwa mìɔ.
44Púɛɛ, Jízɛ̀ sɔ̀ ma ɓó wa gbo dyí ɖe, ké ɔ ɓaà ma ɖe, ké ɔ cɛ̃ ma ɖɛ dyúáɖòɔ̀ ɖe. 45Ké ɔ dyi ma ɔ ɖeín-nà-nyɔ̀ ɓěɔ̀ gbo ɖe, ké ɔ diè ma wa dyi, ké ɔ ɖá, “Ɓě pɛ̃́ dyi, ké ɓě nì mɔ́uń keè? Gmɔ̀ nɔ̄, tiɔ̀ ɖǎ nyini. Wa muá mɔ̄ Nyɔǔn-dyùɛ̀ Dyú-gààɔ̀ xwáɖáún zàùn ɖé nàmàǔn-nyɔ̀ ɓěɔ̀ gbo. 46Ɓě sɔ̀ dyí, ɓɛ́ ɓěà ké mu. Ɓě dyéɛ, nyɔ kéà ḿ xwáɖáún zàa ɖǎ nyini.”
Wa kpɔ̃ Jízɛ̀
(Máà 14:43-50; Ɖúù 22:47-53; Jɔ̃́ɔ́ 18:3-12)
47Ti ɓɛ́ Jízɛ̀ nì ma wùɖùɛ̌n keɛɛ, Júdà ɓɛ́ ɔ mɔ̀ ma kà ɖeín-nà-nyɔ̀ ɓaɖa-bùè sè sɔ̃́ ɓěɔ̀ ɖò kɛɛ dyi ma. Ɔ kè nyɔ kúɖúú ɓéɖé gàsíà kè kpó-kpó-ɓà-cù ɓě dyi ma. Nyɔ ɓěɔ̀ sɔ̀ìn ma ɖé sáa-zà-nyɔ̀ kpa ɖɛ ɓěɔ̀ kè Júù-nyɔ̀ vɛ̀nɛ̀ ɓěɔ̀ gbo. 48Nyɔ ɓɛ́ ɔ mu ma kà Jízɛ̀ xwáɖáún zàùn wɛ̃ɛ ɖǎ ma ɔ da-zà-ɖɛ̀ ɖò nyɔ kúɖúú ɓěɔ̀ nyí, ké ɔ ɖá, “Nyɔ kɔ̃̀ wɔ̃ ní muà nyáùn wɛ̃ɛ, ɔ mɔ̀ gàaɔ̀ mɔ̀. Ɓě kpɔ̃ ɔ.” 49Ké ɔ mu ma Jízɛ̀ gbo wàɖà, ké ɔ ɖá, “M̀ hwèɖěìn, nyɔ-ɖɛ-tɛ̀mɛ̀ìn-nyɔ̀.” Ké ɔ nyá ma ɔ wɔ̃.
50Hwɛ̀ ké Jízɛ̀ cɛ̃ɛ ma ɔ gbo, ké ɔ ɖá, “Ḿ ɓǎto, nyu ɖɛ kɔ̃̀ jè m̀ dyià kɛ.” Ké nyɔ ɓěɔ̀ mu ma Jízɛ̀ gbo, ké wa kpɔ̃ ma ɔ. 51Ké nyɔ ɓě nì ma kà ɓó Jízɛ̀ gboɛɛ ɖò zà ma ɔ gàsíàɔ̀ kpaɖaún, ké ɔ cɛ̃ ma sáa-zà-nyɔ̀ vɛ̀nɛ̀ɔ̀ gǐìɔ̀ ɖùǔ dú. 52Ké Jízɛ̀ cɛ̃ɛ ma ɔ gbo, ké ɔ ɖá, “Po nì gàsíàɔ̀ kpaɖaún ɖe, sepóɛɖé nyɔ séín ɓě vɔ̃̀ìn gàsíà kɛɛ mu gàsíà dyí mɛ́ìn. 53M̀ seɛ dyí dyuò kà ḿ ɓɛ́ìnɔ̌ má ḿ Ɓǎ ɖáa, ɓɛ́ ɔ kéɔ́ má ḿ gbo kpá kɛɛ̀? Ɔ muɔ́ má ɔ ínjà ɓěɔ̀ tòùn wàɖà, ké ínjà ɓě ɓɛ́ ɔ muɔ́ tòùn wɛ̃ɛ muɔ́ má ínjà kúɖúú ɓě jǔùn. 54Kɛɛ ḿ dyiɛ náa nyuín, xwɛ̌ ɖɛ Gèɖèpɔ́ɔ̀-cèè-ɖɛ̀ɔ̀ cɛ̃à kɛɛ muɔ́ jǎà kpáa nyuùn wɛ̃́?”
55Púɛɛ, Jízɛ̀ wùɖù ma nyɔ kúɖúú ɓěɔ̀ gbo, ké ɔ ɖá, “Ɓě dyà gàsíà kè kpó-kpó-ɓà-cù, ké ɓě dyi ḿ kpɔ̃ùn kà nyɔ dyià nyɔ-ɖɛ-gana-xwa-zàìn-nyɔ̀ ɖò kpɔ̃ùn wɛ̃ɛ̀? Ḿ kò ma ɖé Gèɖèpɔ́ɔ̀ gbǒɔ̀ múin wé séín ɓaɖa, ké ḿ nì ma ɓě ɖɛ tɛ̀mɛ̀ǐn, ké ɓě se ma ɖé ḿ kpɔ̃̀ìn. 56Kɛɛ ɖɛ séín ɓě nìà kɛ kpá, ɓɛ́ ɖɛ ɓě ɓɛ́ kpáá-ɖɛ̀-cɛ̃-nyɔ̀ ɓěɔ̀ céè ma kà ɖé Gèɖèpɔ́ɔ̀ céè-ɖɛ̀ɔ̀ múɛɛ ké jǎà kpá.” Ké ɔ ɖeín-nà-nyɔ̀ séín ɓěɔ̀ gbɛ̀ ma ɔ ɖei, ké wa gbǔ ma.
Jízɛ̀ nì ɓó tɔ̀ɔ̀-ɓìɔ̀ ɓě dyúa
(Máà 14:53-65; Ɖúù 22:54-55, 63-71; Jɔ̃́ɔ́ 18:13-14, 19-24)
57Ké nyɔ ɓě ɓɛ́ wa kpɔ̃ ma kà Jízɛ̀ kɛɛ kpa ma ɔ ɖé Kádyáfà mɔ̀à sáa-zà-nyɔ̀ vɛ̀nɛ̀ɔ̀ kɛɛ ɓíɖí-taún. Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ kè Júù-nyɔ̀ vɛ̀nɛ̀ ɓěɔ̀ poìn ma ɖé dyí. 58Ti ɓɛ́ wa nì ma kà Jízɛ̀ kpauń wɛ̃ɛ, Píɖɛ̀ sí ma wa kíɖíí, kɛɛ ɔ sè ma ɖe vɛ̃in. Ké wa nyini ma ɖé sáa-zà-nyɔ̀ vɛ̀nɛ̀ɔ̀ kɔ̃̀pã́ùnɔ̀ kɔ̃. Ké Píɖɛ̀ dyá ma ɖé, ké ɔ kè sójà ɓěɔ̀ kò ma ɓó dyi, ɓɛ́ ɔ ké ɖɛ mu ma kpáùn wɛ̃ɛ dyé. 59Ɓó tia ɓaɖaa, sáa-zà-nyɔ̀ kpa ɖɛ ɓěɔ̀ kè tɔ̀ɔ̀-ɓìɔ̀ séín ɓěɔ̀ nì ma nyɔ ɓě ɓɛ́ wa ké ma Jízɛ̀ se wĩin tɔ́mɔ́ìn nyɛɛ dyi mɔ́uń, ɓɛ́ ɔ kéɛ nyu ɓɛ́ wa ké ma ɔ ɖáɓá. 60Zàse pàɖǎ ɓě dyi ma, ké wa tɔ́mɔ́ìn ma Jízɛ̀ se wĩin dyɛo, kɛɛ wa se ma nyɔ ɓɛ́ ɔ kéɛ ma nyu ɓɛ́ wa ké ma ɔ ɖáɓáa ɖò dyé. Ɖé mánáín nyɛɛ, gàa sɔ̃́ dyi ma, 61ké wa ɖá, “Gàa nìà kɛ cɛ̃ɛ ma, ké ɔ ɖá ɔ ɓéɖé kpé ɓɛ́ ɔ ké Gèɖèpɔ́ɔ̀ gbǒɔ̀ wáɖá, ɓɛ́ ɔ kéɛ po ɖe ɓó wé tã xwíníín.”
62Ké sáa-zà-nyɔ̀ vɛ̀nɛ̀ɔ̀ nyànà ma dyi, ké ɔ diè ma Jízɛ̀ dyi, ké ɔ ɖá, “M̀ se ɖɛ ɖò ɓéɖé ɓɛ́ m̀ kéɛ cɛ̃ ɓá ɖɛ wa nìà m̀ kɔ̃ún cɛ̃iń nyɛɛ dyíì?” 63Kɛɛ Jízɛ̀ nì ma gìɖìǐ. Ké sáa-zà-nyɔ̀ vɛ̀nɛ̀ɔ̀ cɛ̃ɛ ma ɔ gbo, ké ɔ ɖá, “Ɖé nì-nì Gèɖèpɔ́ɔ̀ nyɛ́nɛ́ múɛɛ, ḿ cɛ̃ɛ m̀ gbo. M̀ dyi Kɛ́ɖɛ́ì mɔ̀à Gèɖèpɔ́ɔ̀ Dyú-gààɔ̀ kɛɛ jǔ ní, cɛ̃ɛ à gbo.”
64Ké Jízɛ̀ zà ma ɖé wuɖu, ké ɔ ɖá, “Mɔ̀ mɔ̀ nyɔ cɛ̃ɛ. Kɛɛ ḿ cɛ̃ɛ ɓě gbo, ɓě mu mɔ̄ Nyɔǔn-dyùɛ̀ Dyú-gààɔ̀ dyéìn ɖé dyúa. Ní mu kpé-ɓéɖé-Gèɖèpɔ́ɔ̀ ɖiaún dya dèɖěìn, ké ní mu ní-kpò nìà ɖé dyɔɔ̀ dyíɛɛ mú dyììn.”
65Ké sáa-zà-nyɔ̀ vɛ̀nɛ̀ɔ̀ fáìn ma ɔ mìɔùn ɖɔún dyi, ké ɔ ɖá, “Ɔ ɖǎ Gèɖèpɔ́ɔ̀ ɖɛ gbà kɔ̃ún cɛ̃. Ɖɛ́ kɔ̃̀ jè ɓěà kéà zàse ɖò dyi mɔ́ ɖeɛ́? Ɓě wɔ̃́ɔ kàǔn, ké ɔ cɛ̃ Gèɖèpɔ́ɔ̀ ɖɛ gbà kɔ̃ún. 66Ɖɛ́ ɓě poìn hwìɖǐiɛ́?”
Ké wa zà ma ɖé wuɖu, ké wa ɖá, “Zaaɔ̀ ɖǎ ɔ kpɔ̃. Ɔ ɓéɖé ɓɛ́ ɔ ké mɛ́.”
67Ké wa po ma ɔ tɔ̃ɔ dyúa, ké wa ɓaɖa ma ɔ. Ké wa ɖíɛ́ ɓě taɓa ma ɔ kpá, 68ké wa ɖá, “Mɔ̀ mɔ̀à Kɛ́ɖɛ́ìɔ̀ kɛɛ, nyɛ́ taɓaà m̀ kpá kɛ́? Ɖá ɔ nyɛ́nɛ́.”
Píɖɛ̀ doìn Jízɛ̀ jè mú
(Máà 14:66-72; Ɖúù 22:56-62; Jɔ̃́ɔ́ 18:15-18, 25-27)
69Ti ɓɛ́ Píɖɛ̀ kò ma ɖé kɔ̃̀pã́ùnɔ̀ kɔ̃ dyiɛɛ, gbo-nì-màà ɖò mu ma ɔ gbo, ké ɔ cɛ̃ɛ ma ɔ gbo, ké ɔ ɖá, “M̀ nì ma ɖé Jízɛ̀ sɔ̀ìn kà Gáɖàɖíì-ɓòɖòɔ̀ kɔ̃ɛɛ gbo ɖekè.”
70Kɛɛ Píɖɛ̀ doɛ̀n ma mú ɓó nyɔ séín dyúa, ké ɔ ɖá, “Ḿ se ɖɛ m̀ nìà cɛ̃iń nyɛɛ dyí dyuò.” 71Ké ɔ mu ma ɖé kɔ̃̀pã́ùnɔ̀ gmɔ-wɔ̃̀ɔ̀ gbo. Ké gbo-nì-màà ɖò dyé ma ɔ ɖe, ké ɔ cɛ̃ɛ ma nyɔ ɓě nì ma ɓóɛɛ gbo, ké ɔ ɖá, “Gàa nìà kɛ nì ma Jízɛ̀ sɔ̀ìn kà Názɛ̀ɖɛ̀-hwɔ̀ɖɔ̀ɔ̀ múɛɛ gbo.”
72Ké Píɖɛ̀ doɛ̀n ma mú ɖe, ké ɔ gboò ma, ké ɔ ɖá, “Ḿ se gàaɔ̀ dyí dyuò.”
73Ti ɓɛ́ ɔ ɖǎ ma hwèɖèìn kpã́ún wɛ̃ɛ, nyɔ ɓě nì ma ɓóɛɛ dyi ma Píɖɛ̀ gbo, ké wa cɛ̃ɛ ma ɔ gbo, ké wa ɖá, “M̀ mɔ̀ wa ɖò jǎà, sepóɛɖé kà m̀ nyuà wùɖùɛ̀ kɛɛ tɛ̀mɛ̀ìn à dyí.”
74Ké Píɖɛ̀ ɖú ma gboò kpàǐ, ké ɔ cɛ̃ɛ gana-kà, ké ɔ ɖá, “Ḿ se gàaɔ̀ dyí dyuò.”
Wàɖà cá kɛɛ, sòò ɖò zoɖo ma. 75Púɛɛ, ɖɛ Jízɛ̀ cɛ̃ ma kà Píɖɛ̀ gboɛɛ dyi ma ɔ hwìɖǐi. Ɔ mɔ̀, “Hwɛ̀ ɓɛ́ sòò ké wuɖu poɛɛ, nì mu ní jè mú-doìn-kpà tã nyuùn.” Ké Píɖɛ̀ sí ma píé, ké ɔ vĩ̌ ma hwòɖǒɛ̀-nɛɛ̀-kà.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.