Máfíò 25

Nɔ́ɔ́ ɓá màa-dyù gmɔ̀ ɓaɖa-bùè ɓě jè dyíɛ

1“Ɓó tia ɓaɖaa, Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ mu nììn kà màa-dyù gmɔ̀ ɓaɖa-bùè ɓě jè nìà kɛ. Màa-dyù gmɔ̀ ɓěɔ̀ ɖú ma waà ɖáùnpò ɓě dyí, ké wa mu, ɓɛ́ wa ké ma nyɔ́nɔ́-dyi-kpɔ̃-nyɔ̀ɔ̀ hwìǐ kpɔ̃. 2Waà nyɔ-kpò hm̀m̌ mɔ̀ ma zuɖuu-nyɔ̀, ké nyɔ-kpò hm̀m̌ tɔ̀ɔ̀ fɔ̀nɔ̀ ma hwòɖǒ. 3Nyɔ zuɖu-zuɖu ɓěɔ̀ ɖú ma waà ɖáùnpò ɓěɔ̀ dyí, kɛɛ wa se ma cáná ɖò ɖáùnpò ɓěɔ̀ gbo ɓéɖéìn. 4Kɛɛ hwòɖǒ-fɔ̀nɔ̀-nyɔ̀ ɓěɔ̀ kpa ma waà ɖáùnpò ɓěɔ̀ kè cáná-tɛ̀ɓɛ̀ɛ̌ ɓě. 5Nyɔ́nɔ́-dyi-kpɔ̃-nyɔ̀ɔ̀ se ma dyiɛń fṹà. Ɔ jèɛɛ, màa-dyù gmɔ̀ ɓěɔ̀ ɖú ma dyí ɖeè kpàǐ, ké wa mɔ́ ma.

6“Ké ɓó máaún hwuɖu hwìɛ̀ǐn nyɛɛ, mú-páná-wùɖù ɖò dyi ma. Wuɖuɔ̀ mɔ̀, ‘Nyɔ́nɔ́-dyi-kpɔ̃-nyɔ̀ɔ̀ kɛà kɛ̀. Ɓě dyi ɔ hwìǐ kpɔ̃.’ 7Ké màa-dyù gmɔ̀ ɓaɖa-bùè ɓěɔ̀ wóɖó ma nyíɔún, ké wa ɖú ma waà ɖáùnpò ɓěɔ̀ ti dyéìn kpàǐ. 8Púɛɛ, zuɖuu-nyɔ̀ ɓěɔ̀ cɛ̃ɛ ma hwòɖǒ-fɔ̀nɔ̀-nyɔ̀ ɓěɔ̀ gbo, ké wa ɖá, ‘Ɓě nyí wɛ́ɛ ɓěɛ̀ cánáɔ̀ ɖò à, sepóɛɖé à ɖáùnpò ɓěɔ̀ nìǎ mɔ́uń we?’ 9Kɛɛ hwòɖǒ-fɔ̀nɔ̀-nyɔ̀ ɓěɔ̀ cɛ̃ɛ ma, ké wa ɖá, ‘Gbào, sepóɛɖé à se cáná pàɖǎ ɓéɖé ɓó à kè ɓě bìì. Ɓě mu ɖé ɖɛ-peɖe-nyɔ̀ ɓěɔ̀ gbo, ɓɛ́ ɓě ké ɓě nììn dɔ̃.’ 10Ké màa-dyù gmɔ̀ zuɖu-zuɖu ɓěɔ̀ mu ma, ɓɛ́ wa ké ma cáná dɔ̃. Ti wa mɛ̀ìn ma ɖéɛɛ, nyɔ́nɔ́-dyi-kpɔ̃-nyɔ̀ɔ̀ dyi ma, ké nyɔ ɓě ɖǎ ma kà ti dyéɛ kè nyɔ́nɔ́-dyi-kpɔ̃-nyɔ̀ɔ̀ mu ma ɖé hwɔɔ̀ kɔ̃. Ké wa kã ma gbǒɔ̀.

11“Púɛɛ, màa-dyù tɔ̀ɔ̀ ɓěɔ̀ mɔ̀ùn dyi ma, ké wa ɖá, ‘Ɓɔ̌ɔ̀, kaà gbǒɔ̀, ɓɛ́ à ké dyá.’ 12Kɛɛ ɔ cɛ̃ɛ ma wa gbo, ké ɔ ɖá, ‘Gbào, ḿ se ɓě dyí dyuò fɔɔ cá.’ ”

13Ɖé nɔ́ɔ̀ dúí-jaɖa-jaɖa múɛɛ, Jízɛ̀ ɖá, “Ɔ jèɛɛ, ɓě mɛ nì ɓɛ́ɖɛ́ kɔ̃, sepóɛɖé ɓě se tiɔ̀ dyí dyuò.

Nɔ́ɔ́ ɓá gbo-nì-nyɔ̀ tã ɓě jè dyíɛ

(Ɖúù 19:11-27)

14“Ɓó ɓóɖó-kpàà mánáín-hwɛ̀-tìǐn nyɛɛ, Gèɖèpɔ́ɔ̀ kã́á-ɓòɖòɔ̀ mu nììn kà gàa ɖò ɓɛ́ ɔ mɔ́ ɓɛ́ ɔ ké dà ɖò mu kɛɛ nìà kɛ. Ɔ ɖá ma ɔ gbo-nì-nyɔ̀ ɓěɔ̀, ké ɔ sè ɔ kɔ̃̀ɔ̀-ɖɛ̀ ɓěɔ̀ wa gbo. 15Jĩ̀ kà nyɔ ɖò mɔ̀ùn ɓɛ́ìn gbo gmɔ̀ɔ̀ kɛɛ, ɖéɛ̀ ɔ sè ɔ gbo. Ɔ nyí ɖò mɔ̀ùn dáɖà táázĩ̀ìn hm̀m̌, ké ɔ nyí ɖò mɔ̀ùn dáɖà táázĩ̀ìn sɔ̃́, ké ɔ nyí ɖò mɔ̀ùn dáɖà táázĩ̀ìn dyúáɖò. Ké ɔ kpá ma hwìè xwíníín. 16Gbo-nì-nyɔ̀ ɓɛ́ ɔ sè ma kà dáɖà táázĩ̀ìn hm̀m̌ gboɛɛ mu, ké ɔ zaìn ma ɔ wíɖíɔ̀ mú, ké ɔ dyé ma dáɖà táázĩ̀ìn hm̀m̌ ɖò ɖe. 17Kà dyúáɖòɔ̀ kǎà nyɔ ɓɛ́ ɔ sè ma kà dáɖà táázĩ̀ìn sɔ̃́ gboɛɛ mɔ̀ùn dyé ma dáɖà táázĩ̀ìn sɔ̃́ ɓó kɔ̃in ɖe. 18Kɛɛ nyɔ ɓɛ́ ɔ sè ma kà dáɖà táázĩ̀ìn dyúáɖò gboɛɛ mu, ké ɔ ɓúɖú ma ɓí, ké ɔ vǐè ma ɖé ɔ gbo-nì-ɓǎɔ̀ wíɖíɔ̀.

19“Ti ɓɛ́ ɔ ɖǎ ma hwèɖèìn nyɛɛ, waà gbo-nì-ɓǎɔ̀ dyi ma ɖe. Ti ɓɛ́ ɔ nyini ma kɛɛ, ɔ mɔ́ ɓɛ́ ɔ ké ma ɖɛ ɓě ɓɛ́ ɔ sè ma kà ɔ gbo-nì-nyɔ̀ ɓěɔ̀ gboɛɛ dyí gbɛ̌ìn. 20Ké nyɔ ɓɛ́ ɔ sè ma kà dáɖà táázĩ̀ìn hm̀m̌ gboɛɛ dyi ma, ké ɔ tò ma dáɖà táázĩ̀ìn hm̀m̌ɔ̀, ké ɔ dè ma ɓó dáɖà táázĩ̀ìn hm̀m̌ ɖò kɔ̃in ɖe, ké ɔ ɖá, ‘Ɓɔ̌ɔ̀, m̀ sè ma ḿ dáɖà táázĩ̀ìn hm̀m̌ gbo. Ḿ ɖǎ wíɖíɔ̀ mú zaìn, ké ḿ ɖǎ dáɖà táázĩ̀ìn hm̀m̌ ɓó kɔ̃in dyé ɖe. Gmɔ̀ nɔ̄, wa kɛà kɛ̀.’ 21Ké ɔ gbo-nì-ɓǎɔ̀ cɛ̃ɛ ma ɔ gbo, ké ɔ ɖá, ‘M̀ ɖǎ ɖɛ nɔ̀mɔ̀ dyíin nyu. M̀ mɔ̀ gbo-nì-nyɔ̀ nɔ̀mɔ̀ dyíin, ké m̀ mɔ̀ hwòɖǒ-kɔ̃-dè-nyɔ̀. M̀ mɔ̀ hwòɖǒ-kɔ̃-dè-nyɔ̀ ɖé ɖɛ tííwè nìà kɛ mú jèɛɛ, ní mu m̀ ɖɛ pàɖǎ gbo sèìn. Dyi, ɓɛ́ ḿ kè mɔ̀ ké múà nyu.’

22“Ké nyɔ ɓɛ́ ɔ sè ma kà dáɖà táázĩ̀ìn sɔ̃́ gboɛɛ dyi ma, ké ɔ ɖá, ‘Ɓɔ̌ɔ̀, m̀ sè ma ḿ dáɖà táázĩ̀ìn sɔ̃́ gbo. Ḿ ɖǎ wíɖíɔ̀ mú zaìn, ké ḿ ɖǎ dáɖà táázĩ̀ìn sɔ̃́ ɓó kɔ̃in dyé ɖe. Gmɔ̀ nɔ̄, wa kɛà kɛ̀.’ 23Ké ɔ gbo-nì-ɓǎɔ̀ cɛ̃ɛ ma ɔ gbo, ké ɔ ɖá, ‘M̀ ɖǎ ɖɛ nɔ̀mɔ̀ dyíin nyu. M̀ mɔ̀ gbo-nì-nyɔ̀ nɔ̀mɔ̀ dyíin, ké m̀ mɔ̀ hwòɖǒ-kɔ̃-dè-nyɔ̀. M̀ mɔ̀ hwòɖǒ-kɔ̃-dè-nyɔ̀ ɖé ɖɛ tííwè nìà kɛ mú jèɛɛ, ní mu m̀ ɖɛ pàɖǎ gbo sèìn. Dyi, ɓɛ́ ḿ kè mɔ̀ ké múà nyu.’

24“Púɛɛ, nyɔ ɓɛ́ ɔ sè ma kà dáɖà táázĩ̀ìn dyúáɖò gboɛɛ dyi ma, ké ɔ ɖá, ‘Ɓɔ̌ɔ̀, ḿ dyuòɛ̀ kà m̀ mɔ̀ ɖɛín-kàmà-nyɔ̀ kɛ. Dɛ̀ m̀ se ɖɛ ɓáa, ɓóɛ̀ nì kpã́ ɖɛ. Ké dɛ̀ m̀ se ɖɛ mɛ́nɛ́ kɛɛ, ɖéɛ̀ nì poìn ɖɛ dyí. 25Ḿ fɛ̃̀ìn ma, ké ḿ mu, ké ḿ vǐè ma nì wíɖíɔ̀ ɖé ɓóɖóún. Gmɔ̀ nɔ̄, nì wíɖíɔ̀ kɛà kɛ̀.’

26“Kɛɛ ɔ gbo-nì-ɓǎɔ̀ cɛ̃ɛ ma ɔ gbo, ké ɔ ɖá, ‘M̀ mɔ̀ gbo-nì-nyɔ̀ nyìnììn kpeɖeín, ké m̀ fó ní. M̀ dyuòɛ̀ kà ḿ kpã́ ɖɛ dɛ̀ ɓɛ́ ḿ seɛ ɓá kɛ, ké ḿ poìn ɖɛ dyí dɛ̀ ɓɛ́ ḿ se ɖɛ mɛ́nɛ́ɛ. 27Kà ɔ nìà náa, nìí, m̀ ɓéɖé ɓɛ́ m̀ ké ma ní wíɖíɔ̀ ɖé wíɖí-dyi-dè-nyɔ̀ ɓěɔ̀ gbo kpa, ɓɛ́ wa kéɛ ma dyi dè. Nìí, dyi ḿ dyiɔ́ kà kɛɛ, ní muɔ́ má wíɖíɔ̀ dyéìn, ɓɛ́ ɖɛ ɖò kéɔ́ má ɔ kɔ̃in nì ɖe. 28Ɓě zà ɔ wíɖíɔ̀ xwa, ɓɛ́ ɓě kéɛ nyɔ ɓéɖéà dáɖà táázĩ̀ìn ɓaɖa-bùèɔ̀ kɛɛ nyí. 29Sepóɛɖé nyɔ ɓɛ́ ɔ ɓéɖé ɖò kɛɛ, ɔ mu ɖò dyéìn ɖe, ké ɔ mu pàɖǎ ɓéɖéìn, kɛɛ nyɔ ɓɛ́ ɔ se ɖò ɓéɖéɛɛ, ɔ nyɔ wè ɓɛ́ ɔ ɓéɖéà kɛɛ mu ɔ xwa sɔ̀ùn. 30Ɓě po gbo-nì-nyɔ̀ se ɖɛ ɖò mú nì nìà kɛ ɖé píé, dɛ̀ ɓɛ́ tíe-kpò nìà kɛ. Ɖéɛ̀ ɔ mu kpé poùn, ké ɔ mu nyɛ́nɛ́ tàùn.’

Zaa-wɔ̃-po-po hwɛ̀ìn-gbɔɔ̀

31“Ti ɓɛ́ mɔ̄ Nyɔǔn-dyùɛ̀ Dyú-gààɔ̀ kè ní ínjà séín ɓěɔ̀ mu dyiìn ɖé ní dĩ́ín-dĩ̀ìnɔ̀ múɛɛ, ní mu ní zèè dĩ́ín-dĩ̀ìnɔ̀ kɔ̃ dya dèɖěìn. 32Ké ɓóɖó-dù séín mu ḿ dyúa dyí poìn, ké ní mu wa mú geìn, ɓɛ́ wa ké nyɔ-dù sɔ̃́ jǔ kà nyúà-ɖɛ̀-dyí-gmɔ̀-nyɔ̀ zàà wiɖi ɓě ɓáɖáá ɓě hwìɛ̀ dyi kɛ. 33Ní mu ɓáɖáá ɓěɔ̀ ɖé ní ɖiaùn-sɔ̃̀ kɔ̃ zĩ̀ìn, ɓɛ́ wiɖi ɓěɔ̀ ké ɖé ní kunuà-sɔ̃̀ kɔ̃ zi. 34Nìí, mɔ̄ kã́áɔ̀ muɛ nyɔ ɓě nìà ɖé ní ɖiaún wɛ̃ɛ gbo cɛ̃ìn, ɓɛ́ ḿ ké níiń, ‘Ɓě dyi. Ḿ Ɓǎ ɖǎ ɓě mana kɔ̃ po. Ɓě dyi, ɓɛ́ ɓě ké kã́á-ɓòɖò ɓɛ́ ɔ ɖǎ ɓě bìì ti dyé sɔ̀ìn ɖé ɓóɖó-kpàà gbɔ-dè-tìǐn nyɛɛ dyí ɖú. 35Sepóɛɖé mɔ́ nyu ma ḿ, ké ɓě nyí ma ḿ ɖii-ɖɛ̀. Ní-ná-tò nyu ma ḿ, ké ɓě nyí ma ḿ ní. Ḿ mɔ̀ ma ɖéè, ké ɓě kpɔ̃ ma ní jè dyi. 36Ḿ fɔ̀nɔ̀ ma múin, ké ɓě po ma ḿ ɖɔún. Ḿ wɛ́ ma, ké ɓě gmɔ̀ ma ḿ gbo. Ḿ nì ma kpɔɖɔ ɖeín, ké ɓě té ma ḿ gboi.’

37“Nìí, dyí-sɛ́ɖɛ́ìn-nyɔ̀ ɓěɔ̀ mu ḿ dyi dièìn, ɓɛ́ wa ké níiń, ‘Bounɓo, tiɔ̀ nyɛ́ à dyé ma m̀, ké mɔ́ nyu ma m̀, ké à nyí ma m̀ ɖii-ɖɛ̀ kɛ́? Ké tiɔ̀ nyɛ́ ní-ná-tò nyu ma m̀, ké à nyí ma m̀ níɛ́? 38Tiɔ̀ nyɛ́ à dyé ma m̀, ké m̀ mɔ̀ ma ɖéè, ké à kpɔ̃ ma nì jè dyi kɛ́? Ké tiɔ̀ nyɛ́ m̀ fɔ̀nɔ̀ ma múin, ké à po ma m̀ ɖɔún wɛ̃́? 39Tiɔ̀ nyɛ́ à dyé ma m̀ wɛ́ɛ, mɔɔ à dyé ma m̀ kpɔɖɔ ɖeín, ké à dyi ma m̀ gbo gmɔ̀ kɛ́?’ 40Nìí, mɔ̄ kã́áɔ̀ muɛ wa gbo cɛ̃ìn, ɓɛ́ ḿ ké níiń, ‘Ḿ cɛ̃ ɓě jǎà gbo, ɓě dyiɛ ma nyɔ se ɖɛ kpa ɓě nì ɖé ní nyɔ ɓěɔ̀ hwìɛ̀ kɛɛ ɖò bũ̌ nyu ní, nìí, ɓě nyuɛ ma ḿ bũ̌.’

41“Sɔ̀ìn ɓóɛ gbo ní, nìí, ní muɛ nyɔ ɓě nìà ɖé ní kunuà-sɔ̃̀ɔ̀ kɔ̃ɛɛ gbo cɛ̃ìn, ɓɛ́ ḿ ké níiń, ‘Ɓě sɔ̀ dà ḿ gbo. Gboò-wùɖù nì ɓě kɔ̃. Ɓě mu nyɛ-gbà-wɔ̃̀ se mɔ́-mɔ́ kɔ̃̀ ɓɛ́ wa ɖǎà ti dyéìn ɓó Nɔɔ́-nàmàǔn kè ɔ ínjà ɓěɔ̀ bììɛɛ mú. 42Mɔ́ nyu ma ḿ, kɛɛ ɓě se ma ḿ ɖii-ɖɛ̀ nyí. Ní-ná-tò nyu ma ḿ, kɛɛ ɓě se ma ḿ ní ɖò nyí. 43Ḿ mɔ̀ ma ɖéè, kɛɛ ɓě se ma ní jè dyi kpɔ̃. Ḿ fɔ̀nɔ̀ ma múin, kɛɛ ɓě se ma ḿ ɖɔún po. Ḿ wɛ́ ma, ké ḿ nì ma kpɔɖɔ ɖeín, kɛɛ ɓě se ma ḿ gbo gmɔ̀.’

44“Nìí, wa muɛ cɛ̃ìn, ɓɛ́ wa ké níiń, ‘Bounɓo, tiɔ̀ nyɛ́ à dyé ma m̀, ké mɔ́ nyu ma m̀, ké ní-ná-tò nyu ma m̀, ké m̀ mɔ̀ ma ɖéè, ké m̀ fɔ̀nɔ̀ ma múin, ké m̀ wɛ́ ma, ké m̀ nì ma kpɔɖɔ ɖeín, ké à se ma m̀ gbo kpáa ɓɛ́ìn nyɛ́?’ 45Nìí, ní muɛ wa gbo cɛ̃ìn, ɓɛ́ ḿ ké níiń, ‘Ḿ cɛ̃ ɓě jǎà gbo, ɓě dyi ma nɔ́ɔ̀, ké ɓě se ma nyɔ se ɖɛ kpa ɓě nìà kɛɛ ɖò gbo kpá ní, nìí, ɓě nɔ́ɔ̀, ké ɓě se ma ḿ gbo kpá.’ 46Nìí, nyɔ ɓě nìà kɛ mu muùn, ɓɛ́ wa ké wa gǎ dyéìn kánáá pū, kɛɛ dyí-sɛ́ɖɛ́ìn-nyɔ̀ ɓěɔ̀ mu muùn, ɓɛ́ wa ké sè-ná-sèɛ̀ fɛ̀ɛ̀ ɓéɖé.”

Currently Selected:

Máfíò 25: ƁB02

Highlight

Copy