Máɖékà 3
3
1Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ, ké ɔ ɖá, “Gmɔ̀ nɔ̄, ḿ ɖoɓo ní kíáɔ̀ dyúa, ɓɛ́ ɔ ké ní kpaa-hwìèɔ̀ zà. Ɔ ɖǎ ná nìǐn, nìí, mɔ̄ Bounɓo ɓɛ́ ɓě nìà dyi mɔ́uń wɛ̃ɛ mu ɖé ní gbǒɔ̀ mú dyiìn wàɖà. Kíá kɔ̃̀ dyé-tò nyuà ɓěɛɛ mu dyiìn, ɓɛ́ ɔ ké zio po ɓá ní dèè-wùɖùɔ̀ jè dyí.”
2Kɛɛ nyɛ́ mu dyi nyànàà ɓɛ́ìn ɓó wé kɔ̃̀ ɓaɖa Bounɓoɔ̀ muà dyiìn nyɛɛ kɛ́? Ti ɓɛ́ ɔ muà xwáɖáún wóɖóùn wɛ̃ɛ, nyɛ́ mu ɔ xwaún póùn wɛ̃́? Sepóɛɖé ɔ mu nììn kà nyɛ ɓɛ́ ɔ zà séɓàɖà zɛ̀nɛ̌ múɛɛ nìà kɛ ɔ kè kà ɖɔ-mú-hwɔ-sùǐ nìà kɛ. 3Ɔ mu dyiìn, ɓɛ́ ɔ ké Ɖíìváà-nyɔ̀ ɓěɔ̀ mú hwɔ kà nyɔ ɖèìn kà séɓàɖà kè góò ɓɛ́ wa dyià zɛ̀nɛ̌ǐn hwɛ̀ kɛ, nìí ɓɛ́ wa ké sáa-zàìn-ɖɛ̀ sɛ́ɖɛ́ìn dyí ɓěɔ̀ Bounɓoɔ̀ gbo dyà hwɛ̀. 4Ɔ ɖǎ ná nìǐn, nìí, sáa-zàìn-ɖɛ̀ ɓě ɓɛ́ Júɖà-nyɔ̀ ɓěɔ̀ kè Júɖà-nyɔ̀ tɔ̀ɔ̀ ɓě nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ mu dyàùn wɛ̃ɛ mu Bounɓoɔ̀ hwòɖǒ dyi dèìn kà ɔ nyuó zɔ̃̌ɔ̀ kà nìɛ̀ ɓó zɔ̃ ɓě ɖǎ dyi ziɛɛ múɛ.
5Ké Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ ɖe, ké ɔ ɖá, “Ní mu ɖé ɓě hwìɛ̀ dyiìn, ɓɛ́ ḿ ké ɓěɛ̀ zaa wɔ̃ po. Ní mu hwĩɔ̀ ɓěɔ̀ kè gmaɖe-po-nyɔ̀ ɓěɔ̀ kè seɛ̀-zàse-nyu-nyɔ̀ ɓěɔ̀ kè nyɔ ɓě ɓɛ́ wa nyu nyɔ tɔ̀ɔ̀ ɓě nyu wa bìì kũ̀à kɛɛ gbá-gbá mú ɓá wa pɛ́ɛ̀ jè dyíɛ kè nyɔ ɓě ɓɛ́ wa pĩ́à jɔ̌ɔ̀-nyɔ̀nɔ̀ ɓěɔ̀ kè xwíè-dyù ɓěɔ̀ dyiɛ ɔ kè nyɔ ɓě ɓɛ́ wa ní po ɖéè ɓěɔ̀ zɔ̃́ín wɔ̃ dyí-sɛ́ɖɛ́ìn-kà kɛɛ zɔ̃́ín dúún wáɖáùn wàɖà, sepóɛɖé wa se ḿ dyi fɛ̃̀ìn.”
Ɖɛ ɓá ɓàɖàìn-bùè tò jè dyíɛ
6Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ ɖe, ké ɔ ɖá, “Mɔ̄ mɔ̀ Bounɓoɔ̀. Mɔ́ún zĩàìn gbo. Ɔ jèɛɛ, ɓě mɔ̀à Jékɔ̀ɛ̀ xwíníín-dyù ɓěɛɛ séèà mú gbɔɔ̀ hwɔ keɛ̀. 7Ɓě kè ɓě ɓǎ nììn ɓǎ ɓěɔ̀ ɖǎ ní gma ɓěɔ̀ kɔ̃ín pòìn, ké ɓě ní kpɔ̃ wa dyi. Ɓě gmɔ̀ìn nɔ̄ ḿ gbo ɖe, nìí, ní mu ɓě mɔ̀ùn gbo gmɔ̀ìn ɖe. Kɛɛ ɓě cɛ̃ɛ, ké ɓě ɖá, ‘Xwɛ̌ à mɛ nyuà m̀ gbo gmɔ̀ìn ɖe kɛ́?’ 8Ɔ sɛ́ɖɛ́ìn dyí ɓɛ́ nyɔ ɖò ké Gèɖèpɔ́ɔ̀ bũ̌ dyíɖíe? Kɛɛ wɛ̃́ɛ́ kɛɛ, ɓě nì ḿ bũ̌ dyíɖíɛńo. Ké ɓě ɖá, ‘Xwɛ̌ à nyuà m̀ bũ̌ dyíɖíɛ kɛ́?’ Ɓě dyíɖí ḿ bũ̌ ɓá ɓěɛ̀ dyéé-ɖɛ̀ ɓěɔ̀ ɓàɖàìn-bùèɔ̀ kè nyíí-ɖɛ̀ ɓěɔ̀ jè dyí. 9Gboò-wùɖù nì ɓě kɔ̃, sepóɛɖé ɓě mɔ̀à ɓóɖó-dù gànáɔ̀ kɛɛ nì ḿ bũ̌ dyíɖíɛń. 10Ɓě dyà ɓěɛ̀ dyéé-ɖɛ̀ ɓěɔ̀ bùè-ɓàɖàìn nììn séín ɓěɔ̀ ɖé ní ɖɛ-mú-dyi-dèìn-gbòɔ̀ mú, nìí ɓɛ́ ɖii-ɖɛ̀ ké ɖé ní gbǒɔ̀ mú nì. Ké dyììn ɖéɛ múɛɛ, ɓě dɔ̃̌ ḿ mú, ɓɛ́ ɓě kéɛ dyé kà ní mu dyɔún gbǒ-wɔ̃̀ ɓěɔ̀ kaàùn, ɓɛ́ ḿ ké ɓě mana kɔ̃̀ ɓéɖéìn-naín ɓě se ɓéɖé ɓóɛ dyí vò jèɛɛ ɓě kɔ̃ púè kɛ. 11Ní mu ɓěɛ̀ ɓáá-ɖɛ̀ ɓěɔ̀ mú-gbɔɔ̀-ɖɛ̀ ɓěɔ̀ ɓɔ́í poùn, ɓɛ́ wa ní kɔ̃̀ ɖà ɓěɛ̀ ɓáá-ɖɛ̀ ɓěɔ̀ dyíin nyìnììn. Ké ɓěɛ̀ géɖéè-gbǎ ɓěɔ̀ mu tòɖòùn ti séín ɓó waà tòɖò-tìɔ̀ ɓaɖa. 12Ɔ ɖǎ ná nìǐn, ɓóɖó-dù tɔ̀ɔ̀ ɓěɔ̀ mu ɓěɛ̀ ɓóɖóɔ̀ ɓóɖó ɓɛ́ mana nì kɔ̃ɛɛ ɖáìn, sepóɛɖé ɔ mu ɓóɖó nɔ̀mɔ̀ kɔ̃ cĩ́ɛ kɛɛ jǔùn. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.”
Gèɖèpɔ́ɔ̀ ɖáìn wa nyɛ́nɛ́ín kà ɔ mu wa wìǐn dyéìn nyɛ
13Bounɓoɔ̀ cɛ̃ɛ ɖe, ké ɔ ɖá, “Ɖɛ ɓě ɓɛ́ ɓě cɛ̃ ḿ kɔ̃ún wɛ̃ɛ mɔ̀ ɖɛ nyìnììn kɔ̃in. Kɛɛ ɓě ɖá, ‘Xwɛ̌ à nyuà m̀ ɖɛ gbà kɔ̃ún cɛ̃ɛ kɛ́?’ 14Ɓě cɛ̃ɛ, ké ɓě ɖá, ‘Gèɖèpɔ́ɔ̀ ɓiè-ɓièɔ̀ mɔ̀ ɖɛ fóɖóún. Ɖɛ́ mɔ̀ kpáná ɖò à dyé ɖé ɔ gma ɓěɔ̀ dyi-kpɔ̃-kpɔ̃ mú, ɓɛ́ à kéà wìì-ɓò kò ɓó Bounɓo mɔ̀ nyɔ nìà ɖɛ séín kɔ̃in nyɛɛ dyúa kánáá pū kɛ́? 15Dyéɛ, nyɔ ɓě ɓɛ́ wa ɓúáìn wa mìɔùn dyíɛɛ, mana nì wa kɔ̃ kánáá pū. Hwòɖǒ-kɔ̃in-nyìnììn-nyɔ̀ ɓěɔ̀ nyuu-ɖɛ̀ ɓě wóɖó mú kánáá pū, ké ɓó kɔ̃in ɖeɛɛ, wa taɓa Gèɖèpɔ́ɔ̀ tĩ́ɔ ɖé waà ɖɛ-gbà-nyu-nyuɔ̀ mú, ké Gèɖèpɔ́ɔ̀ ní nyu wa ɖɛ ɖò bũ̌.’ ”
16Ɓó tia ɓaɖaa, nyɔ ɓě ɓɛ́ wa dyé Bounɓoɔ̀ kpéín nyɛɛ deìn dèìn dɔ́ɔ́ gbo, ké Bounɓoɔ̀ wɔ̃́ ma waà wuɖuɔ̀. Ké wa céè ma ɖɛ ɓě ɓá nyɔ ɓě ɓɛ́ wa fɛ̃̀ìn kà Bounɓoɔ̀ dyi, ɓɛ́ wa dyià ɔ kpéín dyéɛɛ jè dyíɛɛ ɖé céè-ɖɛ̀-kpò ɖò mú, ɓó Bounɓoɔ̀ dyéɖé waí, ɓɛ́ ɔ ké nyɔ-ɖɛ-hwìɖǐi-dyàìn-ɖɛ̀ jǔ. 17Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ ɓá wa jè dyí, ké ɔ ɖá, “Wa mu ní nyɔ ɓě jǔùn. Ɓó wé kɔ̃̀ ɓaɖa ní muà nyɔ séín zaa wɔ̃ poùn wɛ̃ɛ, wa mu ḿ mìɔùn nììn nyɔ kpa ɖɛ jɛ́ɛ́ ɓě jǔùn. Ké ní mu wa wìì kɔ̃ ɓéɖéìn kà ɓǎ ɓéɖéìn kà ɔ dyú-gàà ɓɛ́ ɔ nyu ɔ gbo-nì-kũ̀à kɛɛ wìì kɔ̃ɛ. 18Ɔ ɖǎ ná nìǐn, nìí, nyɔ séín muá dyí-sɛ́ɖɛ́ìn-nyɔ̀ ɓěɔ̀ kè hwòɖǒ-kɔ̃in-nyìnììn-nyɔ̀ ɓěɔ̀ zaìn gboi dyuòùn. Wa muá nyɔ ɓě ɓɛ́ wa ɓiè Gèɖèpɔ́ɔ̀ kɛ kè nyɔ ɓě se Gèɖèpɔ́ɔ̀ ɓièɛɛ zaìn gboi dyuòùn.”
Currently Selected:
Máɖékà 3: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
